សរុបពេលការផ្គត់ផ្គង់កើនឡើងបានធ្វើឲ្យតម្លៃខុនដូប្រណីត ដែលបានលក់ចេញបានធ្លាក់ចុះ ១ ភាគរយ នៅក្នុងឆមាសទី ១ ឆ្នាំ ២០១៧ នេះ ធៀបនឹងដំណាច់ឆ្នាំមុន។
យោងតាមការសិក្សារបស់ក្រុមហ៊ុន CBRE Cambodia ដែលបានបញ្ចប់កាលពីពេលថ្មីៗនេះ បានរកឃើញថា តម្លៃនៃការលក់ខុនដូប្រណីត បានធ្លាក់ចុះ ១ ភាគរយ គិតត្រឹមឆមាសទី ១ ឆ្នាំនេះ ធៀបនឹងដំណាច់ឆ្នាំមុន ប៉ុន្តែ និន្នាការអ្នកទិញ ខុនដូមានការប្រែប្រួល ដោយអ្នកទិញខុនដូភាគច្រើនផ្តោតលើខុនដូដែលបានបញ្ចប់ការសាងសង់ ជាជាងទិញគម្រោងកំពុងសាងសង់។ លើសពីនេះអ្នកទិញខុនដូ គឺទិញសម្រាប់រស់នៅជាជាងសម្រាប់វិនិយោគបន្ត ហើយប្រជាជនខ្មែរទិញខុនដូបានកើនចន្លោះពី ៥ទៅ១០ភាគរយ។
ការសិក្សាដដែលបានរកឃើញ ផងដែរថា តម្លៃខុនដូប្រភេទ High-end មានតម្លៃមធ្យម ៣ ១០៨ ដុល្លារ ខុនដូប្រភេទ Mid-end មានតម្លៃ ២ ៦៥៩ ដុល្លារ និងខុនដូប្រភេទ Affordable មានតម្លៃជាមធ្យម ១ ៤៩៨ ដុល្លារក្នុងមួយម៉ែត្រការ៉េ។
ការសិក្សាក៏បានរកឃើញផងដែរថា ខុនដូចំនួន ១ ៩១១ យូនីត បានដាក់ចូលទីផ្សារនៅក្នុងឆមាសទី ១ ឆ្នាំនេះ និងរំពឹងកើនឡើងដល់ ១១,៣០០ យូនីត នៅដំណាច់ឆ្នាំនេះ សម្រាប់ខុនដូសរុបដែលបានផ្គត់ផ្គង់តាំងពីមុនដល់ពេលបច្ចុប្បន្ននេះ។
អ្នកនាង អាន សុធីតា នាយិកាក្រុមហ៊ុន CBRE Cambodia បានថ្លែងថា ស្ថានភាពទីផ្សារខុនដូមិនមានអ្វីគួរឲ្យបារម្ភនោះទេ បើទោះបីជាតម្លៃជួល និងតម្លៃលក់ចេញបានធ្លាក់ចុះក៏ដោយ។
យោងតាមការសិក្សារបស់ក្រុមហ៊ុន ប៊ុណ្ណា រៀលធីគ្រុប ដែលទើបបញ្ចប់កាលពីពេលថ្មីៗនេះដែរក៏បានរកឃើញថា ចំនួនខុនដូបានកើនពី ១២១ គម្រោងដល់ ១២៥ គម្រោង និងចំនួនផ្ទះសរុបបានកើនពី ៤៣,៦០៤ យូនីត ដល់ចំនួន ៤៧,៧០៤ យូនីត នៅក្នុងឆមាសទី ១ ឆ្នាំនេះ ធៀបរយៈពេលដូចគ្នាកាលពីឆ្នាំមុន។
លោកឧកញ៉ា សៀ រិទ្ធី អគ្គនាយកក្រុមហ៊ុន World Bridge Group ដែលបានវិនិយោគខុនដូ The Bridge, The Peak តម្លៃជិត ១ ០០០ លានដុល្លារ បានថ្លែងថា ទីផ្សារខុនដូមិនមានអ្វីគួរឲ្យបារម្ភនោះទេ ហើយគម្រោងដែលលោកវិនិយោគ «បើមិនជោគជ័យលោកមិនធ្វើទេ» ព្រោះគម្រោងរបស់លោកមិនមែនលក់បន្ទប់គេងទេ មិនមែនលក់គ្រែដេកទេ តែជា «ការលក់ Life Style»។
លោក បន្តថា ៖ «យើងនឹងផ្តល់សេវាកម្មចម្រុះ ដើម្បីផ្តល់ឲ្យអ្នករស់នៅមានភាពងាយស្រួលដែលពួកគេអាចទទួលបានសេវាលម្ហែរ ការថែទាំសុខភាព មានផ្សារទំនើប មានការិយាល័យមេធាវី និងមានសេវាកម្មចាំបាច់មួយចំនួនទៀត សម្រាប់ធ្វើជាមូលដ្ឋាននៃតម្រូវការប្រចាំថ្ងៃរបស់អ្នករស់នៅ»។
លោកបន្តថា៖ «បើសាងសង់ខុនដូលក់ ហើយលក់តែគ្រែដេក ខ្ញុំមិនលើកទឹកចិត្តឲ្យធ្វើទេ ព្រោះនិន្នាការជាអន្តរជាតិ គឺគេផ្តោតការវិនិយោគលើគម្រោងដែលមានភាពចម្រុះ»។
នាយកផ្នែកទីផ្សារនៃគម្រោង Olympia CITY លោក ស៊ុន ហួត បានថ្លែងស្រដៀងគ្នាថា ស្ថានភាពនៃការលក់ខុនដូឆ្នាំនេះមិនមានភាពប្រែប្រួលខុសពីឆ្នាំមុននោះទេ ប៉ុន្តែក្នុងស្ថានភាពបែបនេះការលក់ខុនដូក្នុងគម្រោងនេះមិនបានបញ្ចុះតម្លៃនោះទេ។ ខុនដូ ក្នុងគម្រោង Olympia City មានតម្លៃចន្លោះពី ២ ៣០០ ទៅ ២ ៦០០ ដុល្លារក្នុងមួយម៉ែត្រការ៉េ។
លោកបន្តថា ៖ «ក្នុងចំណោមអ្នកទិញខុនដូក្នុងគម្រោងនេះមានប្រជាជនខ្មែរប្រមាណ៧០ភាគរយ ដែលអ្នកខ្លះទិញសម្រាប់ស្នាក់នៅ និងខ្លះទៀតទិញសម្រាប់ជួល»៕
