.jpg)
ដី លក់មួយកន្លែងស្ថិតក្នុងខណ្ឌពោធិ៍សែនជ័យកាលពីពេលថ្មីៗនេះ។ រូបថត ហ៊ឹន ពិសី ហុង មិនា
ភ្នំពេញៈ តម្លៃដីក្នុងរាជធានីភ្នំពេញបានកើនឡើងតិចតួចប៉ុណ្ណោះ កាលពីត្រីមាសទី ២ ឆ្នាំ ២០២០ ដែលនេះជាកំណើនដ៏ទាបបំផុតក្នុងរយៈពេល ១ ទសវត្សរ៍ចុងក្រោយ ខណៈការរីករាលដាលនៃជំងឺកូវីដ ១៩ គឺជាហេតុផលសំខាន់តែមួយគត់ដែលធ្វើឲ្យប៉ះពាល់ដល់ស្ថានភាពទិញ-លក់។ នេះបើតាមការស្រាវជ្រាវរបស់ក្រុមហ៊ុនអចលនទ្រព្យ CBRE Cambodia។
ការស្រាវជ្រាវរបស់ក្រុមហ៊ុន CBRE Cambodia កាលពីពេលថ្មីៗនេះឲ្យដឹងថា តម្លៃដីនៅតាមបណ្តាខណ្ឌនៅភ្នំពេញនាដំណាច់ត្រីមាសទី ២ ឆ្នាំ ២០២០ នេះបានស្ថិតនៅទ្រឹងសម្រាប់តំបន់នៅកណ្តាលក្រុង និងមានការប្រែប្រួលតិចតួចសម្រាប់តំបន់ជាយក្រុង បើធៀបទៅនឹងដើមឆ្នាំ ២០២០។
របាយការណ៍បានបង្ហាញថា កាលពីចុងត្រីមាសទី ២ ឆ្នាំ ២០២០ ដីនៅក្នុងខណ្ឌសំខាន់ៗនៅកណ្តាលក្រុងភ្នំពេញរួមមានខណ្ឌដូនពេញ ចំការមន និងខណ្ឌបឹងកេងកង មានតម្លៃជាមធ្យម ៥ ៥០០ ដុល្លារក្នុង ១ ម៉ែត្រការ៉េ ចំណែកដីក្នុងខណ្ឌ ៧ មករា មានតម្លៃ ៥ ០០០ ដុល្លារ។ តម្លៃទាំងអស់នេះគឺរក្សានៅដដែលបើធៀបទៅនឹងដើមឆ្នាំ ២០២០។ ខណៈដីនៅខណ្ឌទួលគោក និងសែនសុខបានកើនឡើងប្រមាណ ២ ភាគរយដោយមានតម្លៃជាមធ្យមរៀងគ្នា ៣ ៥៥០ ដុល្លារ និង ១ ៤២៥ ដុល្លារ កើនពី ៣ ៥០០ ដុល្លារ និង ១ ៤០០ ដុល្លារ។
ចំណែកដីក្នុងខណ្ឌមួយចំនួនទៀតដូចជា ខណ្ឌឫស្សីកែវ រក្សាតម្លៃដដែល ១ ២៥០ ដុល្លារ និងខណ្ឌជ្រោយចង្វារតម្លៃ ១ ១៥០ ដុល្លារ។ ដោយឡែកខណ្ឌផ្សេងៗទៀតដូចជា ខណ្ឌដង្កោ មានជ័យ ច្បារអំពៅ ពោធិ៍សែនជ័យ ព្រែកព្នៅ និងខណ្ឌកំបូលមានតម្លៃជាមធ្យមចន្លោះពី ១៥០ ដុល្លារ ទៅដល់ ៥០០ ដុល្លារ ក្នុង ១ ម៉ែត្រការ៉េ។
អ្នកស្រី អាន សុធីតា នាយិកាគ្រប់គ្រងក្រុមហ៊ុន CBRE Cambodia បានប្រាប់ភ្នំពេញប៉ុស្តិ៍កាលពីថ្ងៃពុធថា ទីផ្សារដីធ្លីនៅកម្ពុជា ពិសេសក្នុងក្រុងភ្នំពេញដែលជាកន្លែងទទួលបានការបណ្តាក់ទុនយ៉ាងច្រើនពីសំណាក់វិនិយោគិនបរទេសនោះកំពុងទទួលរងផលប៉ះពាល់យ៉ាងខ្លាំងពីឥទ្ធិពលនៃការរាតត្បាតជំងឺផ្តាសាយសកល។
កូវីដ ១៩ បានធ្វើឲ្យការធ្វើដំណើររបស់អ្នកវិនិយោគធំៗពីបរទេសមកកម្ពុជាត្រូវផ្អាកជាបណ្តោះអាសន្ន ហេតុនេះសកម្មភាពទិញ លក់ដី ក៏ត្រូវជាប់គាំងតាមនោះដែរ។ អ្នកស្រីបន្តថា មិនត្រឹមតែទីផ្សារទិញ-លក់ដីធ្លីទេដែលជាប់គាំង សូម្បីតែសកម្មភាពនៃដំណើរការគម្រោងមួយចំនួនក៏ត្រូវពន្យារពេលផងដែរនាពេលនេះ។
អ្នកស្រីថ្លែងថា៖ «នេះជាស្ថានភាពដែលតម្លៃដីធ្លីក្នុងរាជធានីភ្នំពេញមានកំណើនតិចតួចបំផុតក្នុងរយៈពេល ១០ ឆ្នាំចុងក្រោយនេះ»។
អ្នកស្រីបន្តថា កត្តាដែលធ្វើឲ្យតម្លៃដីតាមខណ្ឌនៅជាយក្រុងកើនឡើងខុសពីតំបន់កណ្តាលក្រុង ដោយសារតែមានការអភិវឌ្ឍហេដ្ឋារចនាសម្ព័ន្ធថ្មីៗជាច្រើននៅទីនោះ ហើយទីនោះក៏កំពុងតែទាក់ទាញអ្នកអភិវឌ្ឍន៍ឲ្យទៅវិនិយោគនៅទីនោះផងដែរ។
អ្នកស្រីបានអះអាងថា៖ «ការអភិវឌ្ឍហេដ្ឋារចនាសម្ព័ន្ធជាច្រើនកំពុងធ្វើឲ្យដីកសិកម្មនៅជាយក្រុងក្លាយបន្តិចម្តងៗទៅជាតំបន់លំនៅឋាន តំបន់ឧស្សាហកម្ម មជ្ឈមណ្ឌលពាណិជ្ជកម្ម និងរោងចក្រ សហគ្រាសជាដើម»។
លោក ឌឹត ចណ្ណា នាយកប្រតិបត្តិក្រុមហ៊ុនអចលនទ្រព្យ ឡាក់គី រៀលធី បានឲ្យដឹងថា ចាប់ពីដើមឆ្នាំ ២០២០ រហូតមកដល់ពេលនេះតម្លៃដីក្នុងក្រុងភ្នំពេញមិនមានអ្វីប្រែប្រួលគួរឲ្យកត់សម្គាល់ទេ ដោយកន្លែងខ្លះនៅទ្រឹង និងកន្លែងខ្លះបានកើនឡើងតិចតួច។
លោកបន្តថា មានកត្តាធំៗចំនួន ៣ ដែលមានឥទ្ធិពលចំពោះទីផ្សារនេះរួមមាន ការធ្លាក់ចុះនៃចំនួនវិនិយោគិនជនជាតិចិននៅកម្ពុជា ការផ្ទុះឡើងនៃជំងឺកូវីដ ១៩ និងការជាប់គាំងនៃកំណើនសេដ្ឋកិច្ចពិភពលោក។
លោកថ្លែងថា៖ «តម្លៃដីក្នុងភ្នំពេញមិនកើនឡើងច្រើនទេក្នុងឆមាសទី ១ ឆ្នាំនេះបើធៀបនឹងចុងឆ្នាំមុន ប៉ុន្តែវានឹងមានកំណើនឡើងវិញខ្លះក្នុងឆមាសទី ២ នេះ ព្រោះសកម្មភាពទិញលក់បានចាប់ផ្តើមមានវិញខ្លះៗហើយ»។
តាមលោក ចណ្ណា តម្លៃដីនៅភ្នំពេញដែលកំពុងកើនពេលនេះ គឺស្ថិតនៅភាគខាងត្បូង ឬតំបន់ព្រលានយន្តហោះអន្តរជាតិភ្នំពេញថ្មី៕ LA
