ក្រុងបាងកកៈ ក្រុមអ្នកវិភាគផ្នែកអចលនទ្រព្យបានឲ្យដឹងថា តម្លៃដីនៅទីក្រុងបាងកកនៅឆ្នាំនេះត្រូវបានរំពឹងថានឹងនៅថេរ ឬធ្លាក់ចុះជាលើកដំបូងក្នុងរយៈពេលជាង ១ ទសវត្សរ៍ដែលមួយផ្នែកធំដោយសារការថមថយកំណើនសេដ្ឋកិច្ច និងពន្ធលើដីធ្លី និងអគារដែលគ្រោងចូលជាធរមាននៅដើមឆ្នាំក្រោយ។ នេះបើយោងតាមកាសែតបាងកកប៉ុស្តិ៍ ។
អ្នកស្រី Aliwassa Path-nadabutr នាយកគ្រប់គ្រងក្រុមហ៊ុនពិគ្រោះយោបល់ផ្នែកអចលនទ្រព្យ CBRE Thailand បានប្រាប់កាសែតបាងកកប៉ុស្តិ៍កាលពីថ្ងៃអង្គារថា មានការកើនឡើងចំនួនម្ចាស់ដីដែលមានស្តុកដីធំៗដាក់លក់។
អ្នកស្រីថ្លែងថា៖ «ម្ចាស់ដីមួយចំនួនដែលមិនធ្លាប់គិតថានឹងដាក់លក់ដីរបស់ខ្លួនអាចទទួលរងផលប៉ះពាល់ដោយសារការថមថយកំណើនសេដ្ឋកិច្ចនាពេលបច្ចុប្បន្ន។ ពួកគេកំពុងដាក់លក់ដីក្នុងលក្ខណៈមួយដែលមានការចរចាតម្លៃខ្លាំងជាងមុន ឬតម្លៃបត់បែនខ្លាំងជាងមុន»។
លោក Peerapong Jaroonek ប្រធានប្រតិបត្តិក្រុមហ៊ុនអភិវឌ្ឍន៍ Origin Property Plc ដែលចុះបញ្ជីក្នុងផ្សារហ៊ុនថៃបានថ្លែងថា ម្ចាស់ដីមួយចំនួនបានងាកមករកក្រុមហ៊ុនរបស់លោក ដើម្បីចាប់ផ្តើមការចរចាទិញលក់ដីឡើងវិញ។
លោកថ្លែងថា៖ «ដូច្នេះដីជាច្រើនកន្លែងត្រូវបានដាក់លក់មកឲ្យយើង។ ដីមួយកន្លែងនៅលើផ្លូវ Surawongse ដែលធ្លាប់មានតម្លៃ ៧ សែនបាតក្នុង ១ វ៉ាការ៉េ (៤ ម៉ែត្រការ៉េ) តែឥឡូវដាក់លក់ក្នុងតម្លៃ ៥ សែនបាត»។
អ្នកស្រី Aliwassa បានថ្លែងថា ម្ចាស់ដីមួយចំនួនបានផ្តល់ជម្រើសជួលដីជំនួសវិញដើម្បីកាត់បន្ថយការចំណាយថ្មីដែលកើតចេញពីពន្ធដែលនឹងចូលជាធរមាននៅពេលខាងមុខ។
យោងតាមច្បាប់ស្តីពីពន្ធដីធ្លី និងអគារ អត្រាពន្ធសម្រាប់ដីទំនេរ និងមានចាប់ពី ០,៣ ទៅ ០,៧ ភាគរយដោយមានការកើនឡើង ០,៣ ភាគរយក្នុងរយៈពេល ៣ ឆ្នាំម្តង ។ សម្រាប់ដីទំនេរទំហំ ១ រ៉ៃ (១ ៦០០ ម៉ែត្រការ៉េ) នៅតាមផ្លូវ Phloenchit អត្រាពន្ធនឹងមានចំនួន ២ លានបាតក្នុង ១ ឆ្នាំ។
ដោយសារមានដីជាច្រើនដាក់លក់ក្នុងតម្លៃចរចាកាន់តែខ្លាំងតម្លៃដីក្នុងទីក្រុងបាងកកនៅឆ្នាំនេះនឹងធ្លាក់ចុះពី ៥ ទៅ ១០ ភាគរយធៀបនឹងឆ្នាំមុន ឬនឹងមានតម្លៃថេរ ជាលើកដំបូងគិតចាប់ពីឆ្នាំ ២០០៩ មក បន្ទាប់ពីមានវិបត្តិ Hamburger។ នេះបើយោងតាមអ្នកស្រី Aliwassa។
យោងតាមក្រុមហ៊ុន CBRE កំណើនតម្លៃដីជាមធ្យមនៅទូទាំងប្រទេសមានប្រហែល ២ ទៅ ៣ ភាគរយក្នុង ១ ឆ្នាំ និងពី ៥ ទៅ ៦ ភាគរយសម្រាប់ទីក្រុងបាងកក។ តម្លៃដីនៅក្នុងទីក្រុងបាងកកបានកើនឡើងជាង ១០ ភាគរយនៅក្នុង ១ ឆ្នាំក្នុងអំឡុងពេល ៧ ឆ្នាំចុងក្រោយមកនេះ។
យោងតាមកាសែតបាងកកប៉ុស្តិ៍ តម្លៃថ្មីសម្រាប់វាយតម្លៃដីចូលជាធរមានសម្រាប់រយៈពេល ៤ ឆ្នាំដោយចាប់ផ្តើមពីថ្ងៃទី ១ ខែមករា ឆ្នាំ ២០២០។
តម្លៃថ្មីសម្រាប់ការវាយតម្លៃដីនេះមានកំណើនជាមធ្យម ២,៤៥ ភាគរយក្នុងទីក្រុងបាងកក និង ៨,៣៤ ភាគរយនៅទូទាំងប្រទេសធៀបនឹងតម្លៃបច្ចុប្បន្នសម្រាប់ការវាយតម្លៃដី។ នេះបើយោងតាមនាយកដ្ឋានរតនាគារ៕ KC