.jpg)
ទិដ្ឋភាពដ៏ស្រស់ត្រកាលនៃតំបន់ឆ្នេរក្នុងក្រុងព្រះសីហនុ។ រូបថត ភ្នំពេញប៉ុស្តិ៍
ខេត្តព្រះសីហនុៈ ក្រុងព្រះសីហនុដែលជាតំបន់ឆ្នេរទេសចរណ៍ដ៏ល្បីល្បាញរបស់កម្ពុជាកំពុងក្លាយជាឋានសួគ៌របស់វិនិយោគិន និងជនជាតិចិន។
ការចូលយ៉ាងច្រើននៃអ្នកវិនិយោគចិនបានធ្វើឲ្យតម្លៃអចលនទ្រព្យក្នុងតំបន់ទេសចរណ៍មួយនេះបន្តហក់ឡើងឥតឈប់ឈរ ពិសេសតម្លៃដីតំបន់ខ្លះបានកើនឡើងដល់ទ្វេដង។ អាជីវកម្មរបស់ចិននៅខេត្តព្រះសីហនុមានចាប់តាំងពីអាជីវកម្មតូចតាចរហូតដល់ការវិនិយោគលើសណ្ឋាគារ និងកាស៊ីណូ។
ក្រុមហ៊ុនអចលនទ្រព្យ Amatak Property Service ដែលមានមូលដ្ឋានទៅទីក្រុងភ្នំពេញ និងកំពុងមានសកម្មភាពខ្លាំងគួរសមក្នុងខេត្តព្រះសីហនុទាក់ទងនឹងអចលនទ្រព្យបានកត់សម្គាល់ពីការកើនឡើងតម្លៃដីនៅក្នុងខេត្តព្រះសីហនុ នារយៈពេលចុងក្រោយនេះដែលកន្លែងខ្លះតម្លៃបានហក់ឡើងរហូតដល់ ១០០ ភាគរយ។
អ្នកស្រី តាំង ហួរ អគ្គនាយិកាក្រុមហ៊ុន Amatak Property Service បានប្រាប់ភ្នំពេញ ប៉ុស្តិ៍ថា ការវិវឌ្ឍដ៏ឆាប់រហ័សនៃវិស័យសំណង់ និងអចលនទ្រព្យ បានធ្វើឲ្យតម្លៃដីនៅខេត្តព្រះសីហនុ ពិសេសក្នុងក្រុង និងតំបន់ជាប់មាត់សមុទ្រកើនឡើងយ៉ាងលឿន ដោយកន្លែងខ្លះមានតម្លៃរហូតដល់ជាង ៣៥០០ ដុល្លារក្នុង ១ ម៉ែត្រការ៉េ។
អ្នកស្រីបន្តថា៖ «បច្ចុប្បន្នតម្លៃដីនៅតំបន់ខ្លះក្នុងក្រុងព្រះសីហនុបានឡើងស្ទើរតែស្មើនឹងតម្លៃដីនៅសង្កាត់បឹងកេងកងនៃរាជធានីភ្នំពេញទៅហើយ។ កន្លែងខ្លះកាលពីអំឡុងខែសីហាឆ្នាំ ២០១៧ លក់ក្នុងតម្លៃ ១ ៥០០ ដុល្លារក្នុង ១ ម៉ែត្រការ៉េពេលនេះបានឡើងដល់ជាង ៣ ០០០ ដុល្លារ»។
អ្នកស្រីបន្តថាតំបន់ដែលទាក់ទាញជាងគេគឺនៅក្បែរជើងភ្នំបែរមុខទៅមាត់សមុទ្រ។ អ្នកស្រីបន្តថា៖ «ដីហុងស៊ុយសម្រាប់ជនជាតិចិននៅខេត្តព្រះសីហនុកន្លែងខ្លះអាចលោតលើសពី ៤ ៥០០ ដុល្លារក្នុង ១ ម៉ែត្រការ៉េក៏មានដែរ»។
របាយការណ៍ស្រាវជ្រាវរបស់ក្រុមហ៊ុនអចលនទ្រព្យ ឃី រៀលអ៊ីស្ទេត ដែលភ្នំពេញ ប៉ុស្តិ៍ ទទួលបានកាលពីថ្ងៃម្សិលមិញបង្ហាញថា បច្ចុប្បន្នដីនៅកណ្តាលក្រុងក្នុងសង្កាត់លេខ ១ តាមផ្លូវតូចមានតម្លៃចាប់ពី ៥០-២០០ ដុល្លារក្នុង ១ ម៉ែត្រការ៉េ និងផ្លូវធំមានតម្លៃពី ២០០-៨០០ ដុល្លារ ចំណែកក្នុងសង្កាត់លេខ ២ ដីផ្លូវតូចមានតម្លៃពី ៦០០-១ ០០០ ដុល្លារ និងផ្លូវធំមានតម្លៃចាប់ពី ២ ០០០-៣ ០០០ ដុល្លារ។ សង្កាត់លេខ ៣ ដីនៅផ្លូវតូចមានតម្លៃពី ៤០០-៨០០ ដុល្លារ និងផ្លូវធំ តម្លៃពី ៨០០-១ ៥០០ ដុល្លារ ខណៈនៅក្នុងសង្កាត់លេខ ៤ តាមផ្លូវតូចដីមានតម្លៃពី ២០០-៧០០ ដុល្លារ និងផ្លូវធំមានតម្លៃ ១៥០០-៣០០០ ដុល្លារ។
លោក សន សៀប នាយកក្រុមហ៊ុន ឃី រៀលអ៊ីស្ទេត បាននិយាយថាការមកដល់យ៉ាងច្រើនរបស់វិនិយោគិនបរទេស ពិសេសចិន ហុងកុង ម៉ាកាវ និងសិង្ហបុរី បានធ្វើឲ្យតម្រូវការដីសាងសង់សំណង់ធំៗកើតឡើងជាលំដាប់។ សំណង់ទាំងនោះរួមមាន សណ្ឋាគារកាស៊ីណូ ខុនដូ អាផាតមិន និងអគារការិយាល័យ ជាដើម។
លោកអះអាងថា៖ «ខ្ញុំគិតថា តម្លៃដីក្នុងក្រុងព្រះសីហនុនឹងបន្តកើនឡើងទៀត ដោយសារកត្តាភូមិសាស្ត្រ និងនយោបាយមានស្ថិរភាពល្អ»។
លោក យន្ត មីន អភិបាលខេត្តព្រះសីហនុ ប្រាប់ថាគិតពីដើមឆ្នាំ ២០១៨ រហូតមកដល់ពេលនេះមានសំណង់ធំៗជាង ២០ បានលេចឡើងក្នុងខេត្តព្រះសីហនុដែលសំណង់ទាំងនោះភាគច្រើនជាការវិនិយោគរបស់អ្នកវិនិយោគមកពីប្រទេសចិន។
លោកថ្លែងថា៖ «វិស័យសំណង់ និងអចលនទ្រព្យនៅក្នុងខេត្តព្រះសីហនុនឹងមានដំណើរវិវឌ្ឍន៍ទៅមុខល្អជាបន្តទៀតដោយសារមានកត្តារួមផ្សំមួយចំនួនដូចជា ស្ថិរភាពនយោបាយ ច្បាប់វិនិយោគ និងសក្តានុពលរបស់ភូមិសាស្ត្រ»។
លោក យន្ត មីន បានចាត់ទុកភាពយឺតយ៉ាវនៃការអភិវឌ្ឍហេដ្ឋារចនាសម្ព័ន្ធក្នុងខេត្តព្រះសីហនុមួយចំនួន ដោយសារតែការវិនិយោគលឿនពេកពីសំណាក់ឯកជន។ លោកថ្លែងថា៖ «ដោយសារការវិនិយោគរបស់វិស័យឯកជននៅខេត្តព្រះសីហនុបោះជំហានទៅមុខយ៉ាងលឿននោះបានធ្វើឲ្យការវិនិយោគសាធារណរបស់រដ្ឋស្ទើរតែរត់មិនចង់ទាន់ទេនាពេលនេះ»។
ក្នុងរយៈពេល ៧ ខែកន្លងមក ខេត្តព្រះសីហនុទទួលបានភ្ញៀវទេសចរជាង ១ លាននាក់ដោយភាគច្រើនជាភ្ញៀវទេសចរជនជាតិចិន។ នេះបើតាមការប្រាប់ឲ្យដឹងពីលោកអភិបាលខេត្តព្រះសីហនុ។ បច្ចុប្បន្នខេត្តព្រះសីហនុមានប្រជាជនរស់នៅប្រមាណ ២២ ម៉ឺននាក់ និងមានភ្ញៀវស្នាក់នៅប្រហែលជាង ៣ ម៉ឺននាក់៕LA
