.jpg)
បុគ្គលិកក្រុមហ៊ុនអចលនទ្រព្យកំពុងបង្ហាញគំរូផ្ទះជូនអតិថិជន។ រូបថត ANN
ក្រុងប៉េកាំងៈ ទិន្នន័យផ្លូវការបានបង្ហាញក្នុងខែនេះថា តម្លៃផ្ទះក្នុងទីក្រុងសំខាន់ៗចំនួន ៧០ របស់ប្រទេស ចិន ជាទូទៅមានស្ថិរភាពដោយមានការកើនឡើងបន្តិចបន្តួចនៅក្នុងទីក្រុងធំៗកាលពីខែកក្កដា។
ការិយាល័យជាតិស្ថិតិ (NB-S) របស់ប្រទេស ចិន បានឲ្យដឹងក្នុងសេចក្ដីប្រកាសព័ត៌មានមួយដែលត្រូវបានចេញផ្សាយតាមអនឡាញថា តម្លៃលំនៅឋានថ្មីនៅក្នុងទីក្រុងថ្នាក់ទី ១ ចំនួន ៤ ទីក្រុង គឺទីក្រុងប៉េកាំង ស៊ាងហៃ ហ្សិនចិន និងក្វាងចូវ បានកើនឡើង ០,៣ ភាគរយ នៅខែកក្កដាធៀបនឹងខែមិថុនាជាពេលដែលមានកំណើន ០,២ ភាគរយ។
បើគិតពីមូលដ្ឋានប្រចាំខែតម្លៃផ្ទះថ្មីក្នុងទីក្រុងថ្នាក់ទី ២ ចំនួន ៣១ ទីក្រុង និងទីក្រុងថ្នាក់ទី ៣ ចំនួន ៣៥ ទីក្រុងបានកើនឡើង ០,៧ ភាគរយធៀបនឹងខែមិថុនា។
តម្លៃផ្ទះលក់បន្តនៅក្នុងទីក្រុងថ្នាក់ទី ១ បានកើនឡើង ០,៣ ភាគរយកាលពីខែកក្កដាធៀបនឹងខែមិថុនា ខណៈដែលតម្លៃលំនៅឋាននៅក្នុងទីក្រុងថ្នាក់ទី ២ បានរាយការណ៍ពីកំណើន ០,៤ ភាគរយដែលកើនឡើង ០,១ ពិន្ទុភាគរយធៀបនឹងខែមិថុនា។
តម្លៃផ្ទះលក់បន្តនៅក្នុងទីក្រុងថ្នាក់ទី ៣ បានកើនឡើង ០,៧ ភាគរយនៅខែកក្កដាដែលជាល្បឿនកំណើនដូចគ្នាធៀបនឹងខែមិថុនា។
លោក Liu Jianwei អ្នកស្ថិតិជាន់ខ្ពស់ប្រចាំការិយាល័យ NBS បានឲ្យដឹងថា រដ្ឋាភិបាលមូលដ្ឋានមានបំណងធ្វើឲ្យមានស្ថិរភាពតម្លៃដីតម្លៃផ្ទះ និងការរំពឹងទុកនានា និងបានអនុវត្តបន្ថែមទៀតនូវយន្តការរយៈពេលវែងសម្រាប់បទប្បញ្ញត្តិអចលនទ្រព្យក្នុងខែកក្កដា។
បើគិតពីមូលដ្ឋានប្រចាំឆ្នាំទាំងតម្លៃផ្ទះថ្មី និងតម្លៃផ្ទះលក់បន្តដែលបានចុះបញ្ជីកើនឡើងនៅក្នុងទីក្រុងភាគច្រើនរបស់ប្រទេស ចិន ប៉ុន្តែកើនក្នុងល្បឿនដដែល ឬថមថយសម្ទុះដោយទីក្រុងថ្នាក់ទី ៣ បានរាយការណ៍ពីកំណើនខ្លាំងជាងទីក្រុងធំៗដូចជាទីក្រុងប៉េកាំង និងទីក្រុងស៊ាងហៃ។
តម្លៃផ្ទះថ្មីក្នុងទីក្រុងថ្នាក់ទី ១ បានកើនឡើង ៤,៣ ភាគរយកាលពីខែកក្កដា ខណៈពេលដែលតម្លៃផ្ទះនៅក្នុងទីក្រុងថ្នាក់ទី ២ បានកើនឡើង ១០,៧ ភាគរយ និងតម្លៃផ្ទះនៅក្នុងទីក្រុងថ្នាក់ទី ៣ បានកើនឡើង ១០,២ ភាគរយ។
លោក Zhang Dawei ប្រធានអ្នកវិភាគនៅក្រុមហ៊ុន Centaline Property បានឲ្យដឹងថា តម្លៃផ្ទះថ្មីភាគច្រើនទទួលរងឥទ្ធិពលពីបទប្បញ្ញត្តិអចលនទ្រព្យ ជាពិសេសគោលនយោបាយកំណត់តម្លៃដែលអាចត្រូវបានពង្រឹងក្នុងទីក្រុងជាច្រើនជាទីដែលតម្លៃផ្ទះបានកត់ត្រាកំណើនកាន់តែរហ័ស។
ប្រទេស ចិន បានប្ដេជ្ញាថានឹងប្រកាន់ខ្ជាប់ទៅនឹងគោលការណ៍ថា «លំនៅឋានសម្រាប់រស់នៅ មិនមែនសម្រាប់ការកេងចំណេញតម្លៃ» និងអនុវត្តយន្តការរយៈពេលវែង ដើម្បីរក្សាការអភិវឌ្ឍដោយត្រឹមត្រូវរបស់ទីផ្សារអចលនទ្រព្យ៕ People''s Daily/LA
