ក្រុងឡុងដ៍ៈ តម្លៃជាមធ្យមនៅទីផ្សារលំនៅឋាននៅតំបន់សំខាន់ៗក្នុងទីក្រុងឡុងដ៍ ចក្រភពអង់គ្លេសបានរក្សាភាពរឹងមាំជាលើកដំបូងនៅត្រីមាសទី២ ឆ្នាំ ២០១៩ គិតចាប់ពីត្រីមាសទី៣ ឆ្នាំ ២០១៥ មក។ នេះបើយោងតាមក្រុមហ៊ុនផ្តល់សេវាអចលនទ្រព្យ Savills Thailand។
ក្រុមហ៊ុន Savills Thailand បានឲ្យដឹងថា ខណៈដែលតម្លៃបានបន្តបង្ហាញការធ្លាក់ចុះធៀបអត្រាប្រចាំឆ្នាំ ការធ្លាក់ចុះជាមធ្យមមានត្រឹមតែ ១,៨ ភាគរយប៉ុណ្ណោះ ពោលគឺតិចជាងពាក់កណ្ដាលនៃកម្រិតធ្លាក់ចុះដែលបានមើលឃើញនៅពេលនេះកាលពីឆ្នាំមុន។
កំណើនតម្លៃប្រចាំត្រីមាស ១,២ ភាគរយ ក្នុងទីផ្សារក្នុងស្រុកសម្រាប់តំបន់សំខាន់ៗនៅទីក្រុងឡុងដ៍ភាគនិរតី ដែលរាប់ចាប់ពីទីក្រុង Fulham រហូតដល់ទីក្រុង Wimbledon មានន័យថា ផ្នែកនៃទីផ្សារនេះដែលមិនដូចជាទីផ្សារនៅតំបន់ផ្សេងទៀត កំពុងបង្ហាញកំណើនតម្លៃប្រចាំឆ្នាំតិចតួច។
អ្នកស្រី Prapaporn Boonkajornkul ប្រធានផ្នែកលក់លំនៅឋានអន្តរជាតិប្រចាំក្រុមហ៊ុន Savills ថ្លែងថា៖ «នេះឆ្លុះបញ្ចាំងដ៏សំខាន់នូវកង្វះស្ដុកនៅផ្នែកនេះនៃទីក្រុងឡុងដ៍»។ អ្នកស្រីបន្តថា៖ «ភ្នាក់ងារលក់ប្រចាំទីក្រុងឡុងដ៍ភាគនិរតីរបស់ក្រុមហ៊ុន Savills មួយចំនួនប្រាប់ពួកយើងថា កង្វះស្ដុកនៅពេលនេះ គឺជាឧបសគ្គដ៏ធំនៅផ្នែកទីផ្សាររបស់ពួកគេ ដែលបានបណ្ដាលឲ្យមានការរំពឹងទុកកាន់តែតិចរវាងអ្នកទិញ និងអ្នកលក់។
អ្នកស្រីបន្តថា៖ «នៅក្នុងទីផ្សារនៃតំបន់សំខាន់របស់ទីក្រុងឡុងដ៍ យើងបានមើលឃើញការកើតមានឡើងវិញនូវការដេញថ្លៃដ៏គួរឲ្យភ្ញាក់ផ្អើល។ លទ្ធផលនេះដោយសារកម្រិតស្ដុកទាប និងការប្ដេជ្ញាចិត្តរបស់អ្នកទិញក្នុងការទទួលបានអចលនទ្រព្យល្អបំផុតនៅក្នុងទីផ្សារងាយប្រែប្រួលមួយ»។
ក្នុងទីផ្សារក្នុងតំបន់ល្បីៗតម្លៃខ្ពស់របស់ទីក្រុងឡុងដ៍ភាគកណ្ដាល តម្លៃបានធ្លាក់ចុះ ០,៩ ភាគរយ បន្ថែមទៀតនៅត្រីមាសទី២ ដែលបណ្ដាលឲ្យតម្លៃធៀបនឹងរយៈពេលដូចគ្នាកាលពីឆ្នាំមុនធ្លាក់ចុះ ៣,៦ ភាគរយ ស្រដៀងគ្នានឹងអត្រាដែលបានមើលឃើញចាប់តាំងពីចុងឆ្នាំ ២០១៧។
នេះមានន័យថា ការធ្លាក់ចុះតម្លៃនៅទូទាំងតំបន់សំខាន់ៗរបស់ទីក្រុងឡុងដ៍ភាគកណ្ដាលដែលនៅពេលនេះជារួមមានប្រហែល ២០ ភាគរយ ទាបជាងការធ្លាក់ចុះខ្លាំងបំផុតដែលកើតមានកាលពីឆ្នាំ ២០១៤។
អ្នកស្រី Prapaporn បានថ្លែងបន្ថែមថា៖ «ជាធម្មតា នោះគឺជាសូចនាករដែលបង្ហាញថា ទីផ្សារជិតដល់ការកំណត់តម្លៃឡើងវិញពេញលេញហើយ»។
អ្នកស្រីបន្តថា៖ «ទោះជាមានការដើរតួនាទីពីរូបិយប័ណ្ណក៏ដោយ (ការប្រែប្រួលរូបិយប័ណ្ណរវាងប្រាក់ផោន និងដុល្លារអាមេរិក) ក៏តំបន់សំខាន់ៗរបស់ទីក្រុងឡុងដ៍ភាគកណ្ដាល នៅតែជាតំបន់ដែលមានតម្លៃងាយប្រែប្រួលខ្លាំង ក្នុងគ្រាមានភាពមិនច្បាស់លាស់ផ្នែកនយោបាយជាបន្ត។
អ្នកស្រីបញ្ជាក់ថា៖ «តាមពិតនៅក្នុងការស្ទង់មតិមួយដែលបានធ្វើឡើងកាលពីពាក់កណ្ដាលខែមិថុនា ៩០ ភាគរយ នៃទីភ្នាក់ងាររបស់ក្រុមហ៊ុន Savills នៅទីក្រុងឡុងដ៍ភាគកណ្ដាល បានដាក់ភាពមិនច្បាស់លាស់នៃ Brexit ថាជាបញ្ហាប្រឈមធំជាងគេតែមួយគត់នៅក្នុងទីផ្សារនេះ»៕ LA