The Phnom Penh Post Search

Search form

តម្លៃ​អចលន​ទ្រព្យ​នៅ​ក្រុង​សៀមរាប កើន​ឡើង​តិចតួច​​​

Content image - Phnom Penh Post
ផែន​ទី​បង្ហាញ​ទីតាំង​តម្លៃ​ដីក្នុង​ក្រុង​សៀមរាប តាម​ប្លុក​របស់​​ក្រុមហ៊ុន​អចលន​ទ្រព្យ ឃី រៀលអេស្ទេត។ រូបថត សហ​ការី

តម្លៃ​អចលន​ទ្រព្យ​នៅ​ក្រុង​សៀមរាប កើន​ឡើង​តិចតួច​​​

សៀមរាប៖ ស្រប​ពេល​ដែល​តម្លៃ​ដី​នៅ​តាម​ខេត្ត​ជាប់​សមុទ្រ និង​រាជធានី​ភ្នំពេញ បាន​បង្ហាញ​ពី​កំណើន​កាល​ពី​ឆ្នាំ​ ២០១៨ តម្លៃ​អចលន​ទ្រព្យ​នៅ​ខេត្ត​ទេសចរណ៍​វប្បធម៌​ដ៏​ល្បីល្បាញ​របស់​កម្ពុជា​ មិន​មាន​ការ​ប្រែប្រួល​ច្រើន​​នោះ​ទេ​ក្នុង​អំឡុង​ពេល​នេះ។ នេះ​បើ​តាម​របាយការណ៍​ស្រាវជ្រាវ​របស់​ក្រុមហ៊ុន​អចលន​ទ្រព្យ ឃី រៀលអេស្ទេត។

របាយការណ៍​ស្រាវជ្រាវ​តម្លៃ​ដី​ធ្លី​ប្រចាំ​​​ឆមាស​ទី​ ២ ​របស់​ក្រុមហ៊ុន ឃី រៀល​អេស្ទេត ដែល​ភ្នំពេញ​ប៉ុស្តិ៍​ ទទួល​បាន​​កាល​ពី​ថ្ងៃ​ម្សិលមិញបង្ហាញ​ថា តម្លៃ​ដី​នៅ​ក្នុង​ក្រុង​សៀមរាប មាន​តម្លៃ​ចាប់​ពី ១០០ ​ដុល្លារ​ទៅ​ដល់ ៥ ៥០០​ ក្នុង ១ ​​ម៉ែត្រ​ការ៉េ។

លោក សន សៀប នាយក​ក្រុមហ៊ុន​អចលន​ទ្រព្យ ឃី រៀល​អេស្ទេត បាន​និយាយ​ថា ​តម្លៃ​អចលន​ទ្រព្យ​ក្នុង​ក្រុង​សៀមរាប​ កាល​ពី​ឆ្នាំ​មុន​មិន​បាន​កើន​ច្រើន​​ទេ ព្រោះ​ខេត្ត​សៀមរាប​ជា​កន្លែង​ ដែល​មាន​ការ​អភិវឌ្ឍ ​និង​ដី​មាន​តម្លៃ​​កើន​​​ខ្ពស់​ជា​យូរ​មក​ហើយ​​។

លោក​បន្ត​ថា ជា​រួម​សម្រាប់​ឆ្នាំ ​២០១៨ ​តម្លៃ​អចលន​ទ្រព្យ​ក្នុង​ក្រុង​សៀមរាប​កើន​ឡើង​ចន្លោះ​ពី​ ៥ ​ទៅ​ ១០ ​ភាគរយតែ​ប៉ុណ្ណោះ​ខុស​ពី​ខេត្ត​ព្រះ​សីហនុ ដែល​ដី​​បាន​កើន​ឡើង​យ៉ាង​ខ្ពស់ ដោយ​សារ​​ទី​នោះ​​ជា​តំបន់​អភិវឌ្ឍន៍​ថ្មី និង​មាន​ភ្ញៀវ​ជន​ជាតិ​ចិន​ជា​ច្រើន​ទៅ​សម្រាក​កម្សាន្ត​។​

លោក​ថ្លែង​ថា៖​ «​​ស្ថាន​ភាព​អចលន​ទ្រព្យ​នៅ​ក្រុង​សៀមរាប និង​រាជ​ធានី​ភ្នំពេញ​គឺ​​ប្រហាក់​ប្រហែល​គ្នា ដោយ​សារ​កន្លែង​ទាំង​ ២ ​នេះ​មាន​ការ​អភិវឌ្ឍ​​​ស្ទើរ​រួច​ហើយ​»។

លោក​ពន្យល់​ថា ​ការ​សុំ​ច្បាប់​សាងសង់​សំណង់​អគារ​​ខ្ពស់​ៗ​ក៏​មិន​មាន​ភាព​ងាយ​ស្រួល​នោះ​ទេ ព្រោះ​ជា​តំបន់​​ត្រូវ​អភិរក្ស​។

លោក ច្រឹក សុខនីម ប្រធាន​សមាគម​អ្នក​វាយ​តម្លៃ និង​ភ្នាក់​ងារ​អចលន​វត្ថុ​កម្ពុជា បាន​ឲ្យ​ដឹង​ថា វិស័យ​​អចលន​ទ្រព្យ​ក្នុង​ក្រុង​សៀមរាប​នៅ​តែ​រក្សា​បាន​​​ភាព​ល្អ​ប្រសើរ​ ដោយ​កាល​ពី​ឆ្នាំ​ ២០១៨ តម្លៃ​អចលន​ទ្រព្យ​បាន​កើន​ឡើង​ក្នុង​រង្វង់​ ១៣ ​ភាគ​រយ​ បើ​ធៀប​នឹង​រយៈ​ពេល​ដូច​គ្នា​​ឆ្នាំ​ ២០១៧។

លោក​បញ្ជាក់​ថា៖​​ «​ការ​កើន​ឡើង​ក្នុង​​កម្រិត​នេះ​អាច​និយាយ​ថា​ល្អ ព្រោះ​វា​កើន​ឡើង​សម​ស្រប​ជា​មួយ​នឹង​ការ​រីក​ចម្រើន​ក្នុង​តំបន់ និង​កំណើន​សេដ្ឋកិច្ច​របស់​ប្រទេស​ កម្ពុជា​»។

លោក​បាន​​​បន្ត​ថា​ បច្ចុប្បន្ន​​នៅ​ក្នុង​ក្រុង​សៀមរាប​មាន​គម្រោង​សាងសង់​សណ្ឋាគារ​ផ្ទះ​សំណាក់ ផ្សារ​ទំនើប និង​មជ្ឈមណ្ឌល​ពាណិជ្ជកម្ម​ ​កើត​ឡើង​ជា​បន្ត​បន្ទាប់​។​

របាយការណ៍​របស់​​សហគ្រាស​អង្គរ ដែល​ចេញ​ផ្សាយ​កាល​ពី​ថ្ងៃ​អង្គារ បាន​ឲ្យ​ដឹង​ថា ក្នុង​ឆ្នាំ​២០១៨ តំបន់​​ឧទ្យាន​អង្គរ​ បាន​ស្វាគមន៍​​ភ្ញៀវ​ទេសចរ​ចំនួន​​ ២,៥៩ ​​លាន​នាក់​កើន​ឡើង​ ៥,៤៥​ ភាគរយ​បើ​ធៀប​នឹង​ឆ្នាំ​ ២០១៨ ដោយ​​​រក​ប្រាក់​ចំណូល​បាន​ជាង ១១៦,៦៤ ​​​លាន​ដុល្លារ កើន ៨ ​ភាគរយ​៕ LA

អត្ថបទគួរចាប់អារម្មណ៍