.jpg)
ការជួលនៅទីក្រុងបាងកកត្រូវរំពឹងថា នឹងធ្លាក់ចុះ ២,៩ ភាគរយនៅឆ្នាំនេះ ខណៈដែលនៅទីក្រុងឈៀងម៉ៃ ចក្ខុវិស័យគឺធ្លាក់ចុះ ២,១ ភាគរយនៅឆ្នាំនេះ និងធ្លាក់ចុះខ្លាំង ១១,៩ ភាគរយនៅឆ្នាំក្រោយ។ AFP
ទីក្រុងបាងកកៈ ចក្ខុវិស័យនៃទីផ្សារអចលនទ្រព្យក្នុងប្រទេសថៃនាឆ្នាំនេះនឹងស្ថិតក្នុងភាពស្រពេចស្រពិល ប៉ុន្តែសញ្ញាការស្ទុះងើបឡើងវិញអាចកើតឡើងត្រឹមឆ្នាំ ២០២២។ នេះបើយោងតាមក្រុមហ៊ុនបច្ចេកវិទ្យា Juwai IQI។
លោក Georg Chmiel ប្រធានប្រតិបត្តិ Juwai IQI បានឲ្យដឹងថា ក្រុមហ៊ុនខ្លួនបានតាមដានការវិវឌ្ឍនៃការរំពឹងទុកសម្រាប់តម្លៃ ការជួល និងនិន្នាការសកម្មភាពទីផ្សារ ដែលពឹងផ្អែកលើការស្ទង់មតិនៅក្នុងចំណោមទីភ្នាក់ងារអចលនទ្រព្យថៃចំនួន ១៩៦ នាក់នៅចន្លោះពីថ្ងៃទី ១២ ខែកុម្ភៈ ដល់ថ្ងៃទី ២ ខែមីនា។
ត្រឹមចុងឆ្នាំ ២០២០ តម្លៃត្រូវបានរំពឹងថា នឹងធ្លាក់ចុះ ២,៤ ភាគរយមុនពេលធ្លាក់ចុះ ៥,៦ ភាគរយត្រឹមចុងឆ្នាំ ២០២១។
ទីក្រុង Chiang Mai នឹងមើលឃើញការកើនឡើងខ្ពស់បំផុត ១២,៨ ភាគរយនៅឆ្នាំក្រោយ បន្ទាប់ពីការប្រឈមនឹងការធ្លាក់ចុះ ២,៨ ភាគរយនៅឆ្នាំនេះ។ ទីក្រុងបាងកកទំនងជានឹងប្រឈមការផ្លាស់ប្តូរធំជាងគេ ខណៈតម្លៃត្រូវបានរំពឹងថានឹងធ្លាក់ចុះ ៤,៩ ភាគរយត្រឹមចុងឆ្នាំនេះ និងកើនឡើង ៧,៣ ភាគរយត្រឹមចុងឆ្នាំ ២០២១។
ទីផ្សារតែមួយគត់ជាមួយនឹងចក្ខុវិស័យវិជ្ជមានទាំងនៅក្នុងឆ្នាំ ២០២០ និងឆ្នាំ ២០២១ គឺខេត្តភូកេតដោយការរំពឹងទុកកំណើនចំនួន ១,៧ ភាគរយនៅឆ្នាំនេះ និង ៥,៥ ភាគរយនៅឆ្នាំក្រោយ។
ការព្យាករសម្រាប់ការជួលជាទូទៅគឺអវិជ្ជមានដោយការធ្លាក់ចុះចំនួន ២,៦ ភាគរយត្រឹមចុងឆ្នាំ ២០២០។
ការជួលនៅទីក្រុងបាងកកត្រូវរំពឹងថា នឹងធ្លាក់ចុះ ២,៩ ភាគរយនៅឆ្នាំនេះ ខណៈដែលនៅទីក្រុងឈៀងម៉ៃ ចក្ខុវិស័យគឺធ្លាក់ចុះ ២,១ ភាគរយនៅឆ្នាំនេះ និងធ្លាក់ចុះខ្លាំង ១១,៩ ភាគរយនៅឆ្នាំក្រោយ។
ការស្ទង់មតិបានបង្ហាញ ការលក់លំនៅឋានថ្មីៗនៅទូទាំងប្រទេសដែលអ្នកទិញបរទេសមានចំនួន ៣១ ភាគរយនៃការប្រតិបត្តិការដែលជាចំណែកឈានមុខគេនៅក្នុងទីផ្សារ។
អ្នកទិញក្នុងស្រុកលើកដំបូងស្មើនឹង ២៦ ភាគរយនៃទីផ្សារលំនៅឋានថ្មីតាមពីក្រោយដោយក្រុមវិនិយោគិនក្នុងស្រុកថ្មីមានចំនួន ២៤ ភាគរយ និងអ្នកទិញក្នុងស្រុកថ្មីមានចំនួន ១៩ ភាគរយ។
នៅទូទាំងប្រទេស ៣៥ ភាគរយនៃទីភ្នាក់ងារបានរាយការណ៍ថា អ្នកទិញជនបរទេសនឹងទិញបន្ថែមទៀតនៅឆ្នាំខាងមុខនេះធៀបនឹងឆ្នាំ ២០១៩។
ទីភ្នាក់ងារអចលនទ្រព្យប្រហែល ៣១ ភាគរយបានរំពឹងថា ក្រុមវិនិយោគិនក្នុងស្រុកនឹងបង្កើនចំនួនប្រតិបត្តិការដែលពួកគេធ្វើនៅឆ្នាំខាងមុខនេះ ខណៈដែល ២៩ ភាគរយរំពឹងថា អ្នកទិញនៅក្នុងស្រុកលើកដំបូង និងអ្នកទិញ ក្នុងស្រុកថ្មីនឹងកាន់តែសកម្មនៅក្នុងឆ្នាំខាងមុខនេះ៕ B.Post/LA
