ទីក្រុងបាងកកៈ ធនាគារលំនៅឋានរបស់រដ្ឋាភិបាលថៃ (GHB) បានឲ្យដឹងថា តម្លៃអចលនទ្រព្យក្នុងខេត្ត Samut Prakarn ដែលជាខេត្តនៅជាប់ទីក្រុងបាងកក ជាពិសេសតម្លៃលំនៅឋានក្នុងគម្រោងនៅតាមបណ្តោយផ្លូវរថភ្លើង MRT Green Line បានធ្លាក់ចុះច្រើនរហូតដល់ទៅ ៣៦ ភាគរយក្នុងត្រីមាសទី ២ ឆ្នាំនេះធៀបនឹងរយៈពេលដូចគ្នាឆ្នាំមុន។
លោក Wichai Wiratkapan នាយករងនៃមជ្ឈមណ្ឌលទិន្នន័យអចលនវត្ថុនៃធនាគារ GHB បាននិយាយថា៖ «ម្ចាស់គម្រោងអចលនទ្រព្យបានកាត់បន្ថយតម្លៃដើម្បីបង្កើនការលក់ក្នុងក្តីសង្ឃឹមថាពួកគេអាចបានទទួលសន្ទនីយភាពឡើងវិញដោយសារតែការធ្លាក់ចុះផ្នែកសេដ្ឋកិច្ចដែលបណ្តាលមកពីវិបត្តិកូវីដ ១៩»។
លោកប្រាប់ថា៖ «ខុនដូក្នុងតំបន់ Samut Prakarn កំពុងលក់ក្នុងអត្រាតម្លៃ ៣៦ ភាគរយថោកជាងតម្លៃកាលពីឆ្នាំមុន ខណៈដែលនិវេសនដ្ឋានក្នុងទីក្រុងលក់ក្នុងអត្រាប្រហែល ៣២ ភាគរយទាបជាងដើម្បីទាក់ទាញអតិថិជន។
លោកព្រមានថា៖ «តម្រូវការធ្លាក់ចុះ និងការសាងសង់ផ្ទះថ្មីៗកើនឡើងកំពុងបណ្តាលឲ្យមានសង្គ្រាមតម្លៃកាន់តែខ្លាំងហើយអាចប៉ះពាល់យ៉ាងខ្លាំងដល់ទីផ្សារអចលនទ្រព្យលក់បន្តក្នុងឆមាសទី ២ នៃឆ្នាំនេះ។ បើនិន្នាការនេះនៅតែបន្ត ស្ថាប័នហិរញ្ញវត្ថុនឹងរងគ្រោះពីការធ្លាក់ចុះការលក់អចលនទ្រព្យ និងអាចបន្ថយកម្ចីដែលផ្តល់ដល់អ្នកទិញផ្ទះទៀតផង»។
ធនាគារ GHB បានរាយការណ៍ថា តារាងតម្លៃផ្ទះក្នុងទីក្រុងបាងកក និងតំបន់ជុំវិញទីក្រុងនេះគឺ ១២៨,៣ ពិន្ទុ ក្នុងត្រីមាសទី ២ ដោយកើនឡើង ១,៩ ភាគរយក្នុងរយៈពេលដូចគ្នា ប៉ុន្តែធ្លាក់ចុះ ០,១ ភាគរយធៀបនឹងត្រីមាសមុន។
លោក Wichai បានបន្ថែមថា៖ «ទោះបីគម្រោងជាច្រើនតាមផ្លូវ MRT Green Line កំពុងធ្លាក់ចុះ ប៉ុន្តែតម្លៃគម្រោងតាមបណ្តោយផ្លូវរថភ្លើង Yellow Line ដែលកំពុងសាងសង់ពេលនេះទំនងហក់ឡើងជា ការឆ្លើយតបទៅនឹងកំណើនប្រជាជន»៕ ANN/RR