ភ្នំពេញៈ ការធ្លាក់ចុះដ៏គំហុកចំនួនភ្ញៀវបរទេសដែលមកធ្វើការ និងវិនិយោគនៅកម្ពុជាដោយសារការព្រួយបារម្ភពីការឆ្លងរាលដាលជំងឺកូវីដ ១៩ បានធ្វើឱ្យតម្លៃជួលអាផាតមិនក្នុងរាជធានីភ្នំពេញនៅដំណាច់ឆ្នាំ ២០២០ ធ្លាក់ចុះប្រមាណជិត ២០ ភាគរយ បើធៀបទៅឆ្នាំ ២០១៩។ នេះបើតាមការស្រាវជ្រាវរបស់ក្រុមហ៊ុនអចលនទ្រព្យ CBRE Cambodia។
ការសិក្សារបស់ CBRE រកឃើញថា គិតត្រឹមដំណាច់ឆ្នាំ ២០២០ អាផាតមិនក្នុងរាជធានីភ្នំពេញ កម្រិត A មានតម្លៃជួលជាមធ្យមពី ៩០០ ទៅ ១ ៥០០ ដុល្លារក្នុង ១ ខែសម្រាប់ប្រភេទស្ទូឌីយោ និង ១ បន្ទប់គេង និងប្រភេទ ២ បន្ទប់គេងមានតម្លៃចន្លោះពី ១ ៨០០ ទៅ ២ ៣០០ ដុល្លារដែលតម្លៃនេះបានធ្លាក់ចុះ ១៨,៧៤ ភាគរយធៀបនឹងចុងឆ្នាំ ២០១៩។
ចំណែកអាផាតមិនកម្រិត B មានតម្លៃជួលចន្លោះពី ៥០០ ទៅ ១ ០០០ ដុល្លារក្នុង ១ ខែសម្រាប់ប្រភេទស្ទូឌីយោ និង ១ បន្ទប់គេង និងប្រភេទ ២ បន្ទប់គេងមានតម្លៃចន្លោះពី ១ ២០០ ទៅ ១ ៦០០ ដុល្លារធ្លាក់ចុះ ១៨,២១ ភាគរយ។
យោងតាមការសិក្សាខាងលើគិតមកដល់ពេលនេះនៅក្នុងរាជធានីភ្នំពេញមានអាផាតមិនជួលសរុប ២ ៩៥១ យូនីត។
កញ្ញា គឹម គិនកេសា អ្នកគ្រប់គ្រងជាន់ខ្ពស់ក្រុមហ៊ុន CBRE Cambodia បានប្រាប់ភ្នំពេញប៉ុស្តិ៍កាលពីថ្ងៃទី ១១ ខែកុម្ភៈថា តម្លៃជួលអាផាតមិនក្នុងរាជធានីភ្នំពេញបានធ្លាក់ចុះជាបន្តបន្ទាប់តាំងពីចុងត្រីមាសទី១ ឆ្នាំ ២០២០ មក ព្រោះភាគច្រើនភ្ញៀវបរទេសដែលធ្វើដំណើរទៅលេងប្រទេសរបស់ខ្លួន គឺមិនបានត្រឡប់មកកម្ពុជាវិញទេរហូតមកដល់ពេលនេះ ដោយសារតែវិធានការបិទប្រទេសដើម្បីទប់ស្កាត់ការឆ្លងរាលដាលជំងឺកូវីដ ១៩។ កញ្ញាបានបន្តថា ភាពទំនេរនៃទីតាំងបានធ្វើឱ្យតម្លៃធ្លាក់ជាបន្តបន្ទាប់ ហើយវាក៏អាចនឹងបន្តអូសបន្លាយក្នុងឆ្នាំ ២០២១ នេះផងដែរ។
កញ្ញា គិនកេសា អះអាងថា៖ «តាមការស្រាវជ្រាវតម្លៃជួលអាផាតមិនក្នុងឆ្នាំនេះអាចនឹងបន្តធ្លាក់ចុះបន្ថែមទៀត ព្រោះចំនួនជនបរទេសមកកម្ពុជានឹងមិនទាន់មានចំនួនច្រើនដូចដើមទេ ហើយការប្រកួតប្រជែងតម្លៃជួល ក៏ដូចជាការដាក់ចូលក្នុងទីផ្សាររបស់អាផាតមិន និងខុនដូក៏នឹងមានចំនួនច្រើនដែរក្នុងឆ្នាំ ២០២១ នេះ»។ កញ្ញាបន្ថែមថា៖ «គ្រាន់តែអត្រានៃការធ្លាក់ចុះតម្លៃជួលនឹងមិនច្រើនដូចក្នុងឆ្នាំ ២០២០ ទៀតទេ ព្រោះតម្លៃពេលនេះគឺទាបណាស់ទៅហើយ»។
កញ្ញាលើកឡើងទៀតថា ការបន្ទាបតម្លៃជួលរបស់សណ្ឋាគារក៏អាចជាដៃគូប្រកួតប្រជែងថ្មីមួយទៀតសម្រាប់ទីផ្សារអាផាតមិនផងដែរ។
ក្នុងឆ្នាំ ២០២១ នេះមានគម្រោងអាផាតមិនចំនួន ២ គ្រោងបើកដំណើរការដោយមានបន្ទប់ស្នាក់នៅសរុប ៣៨៨ យូនីត។ នេះបើតាមកញ្ញា គិនកេសា។
លោក សំ សុខនឿន ប្រធានសមាគមអចលនទ្រព្យសកលលើកឡើងថា ទីផ្សារអាផាតមិននៅកម្ពុជាពឹងផ្អែកស្ទើរទាំងស្រុងលើអតិថិជនជាជនបរទេស ហេតុនេះការផ្ទុះឡើងនៃជំងឺផ្តាសាយសកលកូវីដ-១៩ ដែលជំរុញឱ្យគ្រប់ប្រទេសលើពិភពលោករឹតបន្តឹងលើការធ្វើដំណើរឆ្លងព្រំដែននោះ វាធ្វើឱ្យទីផ្សារនេះធ្លាក់ចុះយ៉ាងច្រើនចាប់តាំងពីដើមឆ្នាំ ២០២០ រហូតមកដល់ពេលនេះ។
លោកបន្តថា ការធ្លាក់ចុះនេះគឺទាំងអត្រាស្នាក់នៅ និងតម្លៃជួលដែលកន្លែងខ្លះតម្លៃបានធ្លាក់លើសពី ២០ ភាគរយ បើធៀបទៅនឹងដើមឆ្នាំ ២០២០។
លោកថ្លែងថា៖ «តម្លៃ និងអត្រាប្រើប្រាស់អាផាតមិននៅកម្ពុជាបានធ្លាក់ចុះចាប់តាំងពីអំឡុងខែកុម្ភៈឆ្នាំមុនមកម្ល៉េះ ព្រោះអតិថិជនជាជនបរទេសបានត្រឡប់ទៅប្រទេសគេវិញយ៉ាងច្រើន ហើយចំនួនជនបរទេសដែលចូលមកកម្ពុជានៅក្នុងអំឡុងពេលនេះក៏ស្ទើរតែមិនមានសោះតែម្តង»។
លោកបន្ថែមថា បច្ចុប្បន្នទីផ្សារនេះកំពុងពឹងផ្អែកទាំងស្រុងទៅលើស្ថានភាពជំងឺកូវីដ ១៩ បើជំងឺនេះអាចគ្រប់គ្រងបានដោយជោគជ័យ ហើយការធ្វើដំណើរមានភាពល្អប្រសើរដូចមុនឆ្នាំ ២០២០ នោះសម្ទុះនៃអត្រាចូលស្នាក់នៅ និងតម្លៃនឹងកើនឡើងទៅតាមនោះដែរ។ លោកបានអះអាងថា៖ «ក្នុងឆ្នាំ ២០២១ នេះខ្ញុំមិនទាន់រំពឹងថា ទីផ្សារនេះនឹងល្អដូចមុនពេលមានវិបត្តិទេ ដោយវាត្រូវការពេលទៅមុខបន្ថែមទៀតដើម្បីទាក់ទាញឱ្យភ្ញៀវបរទេសធ្វើដំណើរមកកម្ពុជាកាន់តែច្រើន»។
បើយោងតាមរដ្ឋមន្ត្រីក្រសួងទេសចរណ៍ លោក ថោង ខុន ដោយសារវិបត្តិជំងឺកូវីដ ១៩ បានធ្វើឱ្យចំនួនភ្ញៀវទេសចរបរទេសដែលធ្វើដំណើរមកកម្ពុជាក្នុងឆ្នាំ ២០២០ មានចំនួនត្រឹមតែ ១,៣១ លាននាក់ ធ្លាក់ចុះប្រមាណ ៨០ ភាគរយបើធៀបទៅនឹងឆ្នាំ ២០១៩៕ LA