.jpg)
រដ្ឋបាលទីក្រុងប៊ែរឡាំង កាលពីថ្ងៃអង្គារបានដើរឆ្ពោះទៅរកការចាត់វិធានការបង្កកការជួលអចលនទ្រព្យ ដើម្បីផ្អាកការដំឡើងថ្លៃផ្ទះ។ AFP
ក្រុងប៊ែរឡាំងៈ រដ្ឋបាលទីក្រុងប៊ែរឡាំងរបស់ប្រទេស អាល្លឺម៉ង់ កាលពីថ្ងៃអង្គារបានដើរឆ្ពោះទៅរកការចាត់វិធានការបង្កកការជួលអចលនទ្រព្យនៅទីក្រុងប៊ែរឡាំងរយៈពេល ៥ ឆ្នាំ គិតចាប់ពី ឆ្នាំ ២០២០ ក្នុងគោលបំណងចុងក្រោយដើម្បីផ្អាកការដំឡើងថ្លៃផ្ទះ។
ធ្លាប់ត្រូវបានគេហៅថាជាទីក្រុង «ក្រីក្រ តែសិចស៊ី» ទីក្រុងប៊ែរឡាំងបានមើលឃើញតម្លៃផ្ទះកើនឡើងទ្វេដងក្នុងរយៈពេល ១ ទសវត្សរ៍ចុងក្រោយនេះ ខណៈនិយោជិតដែលត្រូវបានទាក់ទាញដោយទីផ្សារការងារខ្លាំងធ្វើចំណាកស្រុកទៅកាន់ទីក្រុងនេះ។
ការដំឡើងថ្លៃជួលយ៉ាងខ្លាំងនេះបានបណ្តាលឲ្យប្រជាជនមួយចំនួនពិចារណាពីការស្វែងរកដំណោះស្រាយជ្រុលនិយមនានា រួមទាំងការជំរុញឲ្យមានការរឹបអូសស្តុកផ្ទះពីម្ចាស់ផ្ទះដែលមានអំណាចផងដែរ។
ដោយត្រូវបានប្រកាសអាសន្នដោយនិន្នាការនេះ រដ្ឋាភិបាលក្រុងបែរឡាំងកាលពីថ្ងៃអង្គារបានឯកភាពលើខ្លឹមសារនានានៃសេចក្តីព្រាងច្បាប់មួយ ដែលនឹងរួមបញ្ចូលទាំងការបង្កកបណ្តោះអាសន្នលើការជួលរយៈពេល ៥ ឆ្នាំ គិតចាប់ពីឆ្នាំ ២០២០ ដោយច្បាប់នេះបច្ចុប្បន្នត្រូវបានព្រាងឡើង។
នាយកដ្ឋានអភិវឌ្ឍន៍ទីក្រុង និងផ្ទះសំបែងរបស់ទីក្រុងប៊ែរឡាំងបានឲ្យដឹងថា ការដាក់កម្រិតនេះមានន័យថាជា «ការការពារប្រឆាំងនឹងការដំឡើងថ្លៃជួលសម្រាប់អាផាតមិនចំនួន ១,៥ លានយូនីត»។
ស្ថិតក្រោមផែនការនេះ ម្ចាស់ផ្ទះដែលស្វែងរកការដំឡើងថ្លៃជួលដោយសារតែការងារកែលម្អផ្ទះ ក៏នឹងត្រូវទទួលបានការអនុម័តផ្លូវការសម្រាប់ការដំឡើងថ្លៃជួលណាមួយដែលមានចំនួនលើស ០,៥៦ ដុល្លារ ក្នុង ១ ម៉ែត្រការ៉េផងដែរ។
ចំណាត់ការនេះកំពុងត្រូវបានឃ្លាំមើលយ៉ាងយកចិត្តទុកដាក់នៅទូទាំងប្រទេស អាល្លឺម៉ង់៕ AFP/KC
