រដ្ឋាភិបាលទីក្រុងយ៉ាំងហ្គោននៅក្នុងឆ្នាំនេះនឹងសាងសង់គម្រោងថ្មីមួយចំនួនដែលរួមមានការសាងសង់ទីប្រជុំជន ២ កន្លែង និងតំបន់សេដ្ឋកិច្ចពិសេស (SEZ) មួយនៅក្នុងទីក្រុងយ៉ាំងហ្គោន។
ប្រធានក្រុមរដ្ឋមន្ត្រី លោក U PhyoMin Thein បាននិយាយក្នុងកិច្ចប្រជុំស្តីពីហេដ្ឋារចនាសម្ព័ន្ធប្រទេសមីយ៉ាន់ម៉ាកាលពីពេលថ្មីៗនេះថា សម្រាប់ឆ្នាំ ២០១៨ នេះរួមមានគម្រោងសាងសង់ទីប្រជុំជនថ្មីចំនួន ២ គឺ Kyee Myin Daing និង Dala ព្រមទាំងតំបន់សេដ្ឋកិច្ចពិសេស ១ កន្លែងដែលស្ថិតនៅជិត Dala នាប៉ែកខាងលិចនៃទន្លេយ៉ាំងហ្គោនផងដែរ។
លោកបានលើកឡើងថា៖ «គម្រោងថ្មីៗទាំងនេះនឹងត្រូវសាងសង់ឡើងជាប្រភេទ Smart Cities ដោយប្រើបច្ចេកវិទ្យាទំនើបៗព្រមទាំងគម្រោងសាងសង់តំបន់សេដ្ឋកិច្ចពិសេសមួយនៅ Dalaដែលមានឈ្មោះថា Yangon SEZ។
គម្រោងទាំងនេះគឺជាផ្នែកមួយនៃគម្រោងអភិវឌ្ឍន៍ថ្មីៗដែលបានដាក់ស្នើក្នុងប្លង់មេរបស់ទីក្រុងយ៉ាំងហ្គោន ហើយត្រូវបានលើកយកមកបង្ហាញដោយលោក Daw Khaing Moe Nyunt ដែលជានាយករងនៃគណៈកម្មការអភិវឌ្ឍន៍ទីក្រុងយ៉ាំងហ្គោន (YCDC)។
បើតាម YCDC មានគម្រោងសរុបចំនួន ៤១ ដែលមានតម្លៃ ២,២ ពាន់លានដុល្លារអាមេរិកត្រូវបានគេដាក់ជាគម្រោងអាទិភាព។ គម្រោងទាំងនេះក៏មានទីក្រុងថ្មីឈ្មោះ Kyee Myin Daing នៅប៉ែកខាងលិចនៃទន្លេយ៉ាំងហ្គោនផងដែរ។
លោក U Ye Lin សមាជិកគណៈកម្មការប្រតិបត្តិរបស់សមាគមសហគ្រិនសំណង់មីយ៉ាន់ម៉ាបាននិយាយថា៖ «វានឹងក្លាយជារឿងល្អមួយក្នុងការអភិវឌ្ឍប៉ែកខាងលិចនៃទន្លេយ៉ាំងហ្គោន ព្រោះទីក្រុងយ៉ាំងហ្គោននាពេលនេះនៅមានទំហំតូចនៅឡើយ។ ទីក្រុងនេះត្រូវការពង្រីកបន្ថែមទៀត បើមិនដូច្នេះទេបញ្ហាកកស្ទះចរាចរណ៍នឹងកាន់តែធ្ងន់ធ្ងរជាក់ជាមិនខាន»។
លោកបានបន្ថែមថា យើងនៅតែត្រូវការ ការវិនិយោគដោយផ្ទាល់ពីបរទេស។ យើងនឹងមិនអាចសម្រេចបានសមិទ្ធផលច្រើនដោយពឹងផ្អែកតែទៅលើចំនួនវិនិយោគក្នុងស្រុក និងរបស់រដ្ឋនោះទេ»។
បើតាមលោក U Phyo Min Thein ព័ត៌មានលម្អិតអំពីការវិនិយោគសម្រាប់ការអភិវឌ្ឍទីក្រុងយ៉ាំងហ្គោននឹងត្រូវផ្សព្វផ្សាយនៅខែឧសភាខាងមុខ។
ការអភិវឌ្ឍមជ្ឈមណ្ឌលតូចៗការអភិវឌ្ឍ «មជ្ឈមណ្ឌលតូច» ឬទីក្រុងធំៗនៅផ្នែកខាងក្រៅនៃតំបន់ Central Business District (CBD) របស់ទីក្រុងយ៉ាំងហ្គោន ក៏ត្រូវបានគេដាក់ចូលក្នុងបញ្ជីអាទិភាពផងដែរ។ ក្រុងតូចៗទាំង ៤ ដែលត្រូវបានគេចាត់ទុកជាមជ្ឈមណ្ឌលតូចៗរួមមាន Thilawa, Yankin, Dagon Myothit និង Dagon Seikkan។
ទីក្រុងតូចៗទាំងនោះនឹងត្រូវអភិវឌ្ឍដោយមានយុទ្ធសាស្ត្រច្បាស់លាស់ដោយ Thilawa នឹងត្រូវធ្វើលើផ្ទៃដីទំហំ ៤០៤៦៨៥ ម៉ែត្រការ៉េជាកន្លែងសម្រាប់ស្រាវជ្រាវ និងជាកន្លែងបង្កើតកម្មវិធី IT ចំណែក Yankin នឹងត្រូវបានបង្កើតជាកន្លែងទេសចរណ៍ និងពាណិជ្ជកម្ម។ Dagon Myothit នឹងមានសណ្ឋាគារ កន្លែងសម្រាកលម្ហែ និងកន្លែងលេងកីឡា ខណៈ Dagon Seikkan ត្រូវបានគេរំពឹងថានឹងប្រើប្រាស់ជាកំពង់ផែ។
ស្របគ្នានេះដែរ Mindama ក៏នឹងត្រូវអភិវឌ្ឍឲ្យក្លាយជា CBD ទី ២ របស់មីយ៉ាន់ម៉ានៅលើផ្ទៃដីទំហំជាង ៨០០០០ ម៉ែត្រការ៉េ ដើម្បីធ្វើជាមជ្ឈមណ្ឌលធនាគារ និងជំនួញពាណិជ្ជកម្ម។ CBD ថ្មីនេះនឹងមានខ្សែរថភ្លើងឆ្លងកាត់ផងដែរ ហើយទីនោះនឹងមានផ្លូវរថភ្លើងចំនួន ៧ ខ្សែទៀតត្រូវបានសាងសង់៕