ភ្នំពេញៈ ការរីករាលដាលជំងឺកូវីដ ១៩ កំពុងធ្វើឲ្យតម្រូវការទីតាំងជួលលក់ទំនិញ (Retail) នៅតាមផ្សារទំនើប ឬអគារធំៗចាប់ផ្តើមបង្ហាញការធ្លាក់ចុះជាបន្តបន្ទាប់ ខណៈដែលតម្លៃមិនទាន់មានការប្រែប្រួលអ្វីគួរឲ្យកត់សម្គាល់ទេ។ នេះបើយោងតាមអ្នកជំនាញក្នុងវិស័យអចលនទ្រព្យ។
កំណើនសេដ្ឋកិច្ចក្នុងរង្វង់ជាមធ្យម ៧ ភាគរយ ក្នុងរយៈពេល ២ ទសវត្សរ៍ចុងក្រោយបានធ្វើឲ្យប្រទេសកម្ពុជាមានការផ្លាស់ប្តូរយ៉ាងឆាប់រហ័ស តាមរយៈការលេចឡើងជាបន្តបន្ទាប់នូវមជ្ឈមណ្ឌលពាណិជ្ជកម្មធំៗជាច្រើន ពិសេសក្នុងរាជធានីភ្នំពេញ។
របាយការណ៍ស្រាវជ្រាវពីក្រុមហ៊ុនអចលនទ្រព្យ CBRE Cambodia ដែលចេញផ្សាយកាលពីពេលថ្មីៗនេះបង្ហាញថា គិតត្រឹមចុងត្រីមាសទី ១ ឆ្នាំ ២០២០ ក្នុងរាជធានីភ្នំពេញមានផ្សារទំនើបចំនួន ២៣ លើផ្ទៃអគារសរុបប្រហែល ៣៨ ម៉ឺនម៉ែត្រការ៉េ ហើយត្រូវរំពឹងថានឹងកើនដល់ជិត ៥០ ម៉ឺនម៉ែត្រការ៉េនៅចុងឆ្នាំនេះ។
លោក សំ សុខនឿន អគ្គនាយកក្រុមហ៊ុនអចលនទ្រព្យ KW សែនសុខ និងជាប្រធានក្រុមហ៊ុន Sam SN Realty បានប្រាប់ភ្នំពេញប៉ុស្តិ៍កាលពីថ្ងៃពុធថា តម្រូវការជួលទីតាំងលក់ទំនិញនៅពេលនេះមិនមានសញ្ញាវិជ្ជមានទេ ព្រោះចំនួនអ្នកដើរទិញទំនិញនៅតាមកន្លែងលក់ទំនិញបានធ្លាក់ចុះយ៉ាងច្រើន។ ការបាត់បង់អតិថិជនបានធ្វើឲ្យអ្នកជួល ឬអ្នកមានបំណងជួលទីតាំងមួយចំនួនសម្រេចពន្យារពេលដោយរង់ចាំមើលពីស្ថានភាពនៃការវិវឌ្ឍរបស់កូវីដ១៩ បញ្ចប់សិន។
លោកថ្លែងថា៖ «តម្រូវការជួលរបស់ Retail បានធ្លាក់ចុះជាបន្តបន្ទាប់ចាប់តាំងពីជំងឺកូវីដ១៩ រីករាលដាល ប៉ុន្តែយ៉ាងណាក៏តម្លៃនៅពេលនេះមិនទាន់ធ្លាក់ចុះគួរឲ្យកត់សម្គាល់ទេ»។
ទោះយ៉ាងណាលោកប្រាប់ថា តាមលោកដឹងពេលនេះមាន Retail មួយចំនួនកំពុងរៀបចំយុទ្ធសាស្ត្រទីផ្សារតាមរយៈការបញ្ចុះតម្លៃ និងការផ្តល់នូវលក្ខខណ្ឌពិសេសមួយចំនួនដែរ។
បើតាមលោក សុខនឿន ទីផ្សារនេះនឹងធ្លាក់ចុះខ្លាំង ប្រសិនបើស្ថានភាពនៃជំងឺកូវីដបន្តអូសបន្លាយរយៈពេលលើសពី ៣ ខែទៅមុខ។ លោកអះអាងថា៖ «ឥឡូវនេះផលប៉ះពាល់គឺមិនទាន់ខ្លាំងប៉ុន្មានទេ តែបើ ៣ ខែខាងមុខស្ថានភាពកូវីដនៅដដែល ខ្ញុំគិតថាតម្លៃជួលនឹងធ្លាក់ចុះចន្លោះពី ២០-៣០ ភាគរយ»។
ការសិក្សាររបស់ CBRE Cambodia បានរកឃើញថា ក្នុងត្រីមាសទី ១ ឆ្នាំ ២០២០ កន្លែងជួលលក់ទំនិញប្រភេទ Prime Shopping Mall មានតម្លៃជួលជាមធ្យម ៣២,២៥ ដុល្លារក្នុង ១ ម៉ែត្រការ៉េសម្រាប់រយៈពេល ១ ខែប្រភេទ Prime Retail Podium តម្លៃ ២៦,៦៩ ដុល្លារប្រភេទ Prime High Street មានតម្លៃ ២៦,៥០ ដុល្លារ និងប្រភេទ Community Mall មានតម្លៃ ២០,៩៣ ដុល្លារ។
អ្នកស្រី អាន សុធីតា នាយិកាគ្រប់គ្រងក្រុមហ៊ុន CBRE Cambodia បានប្រាប់ថា បើនិយាយពីវិស័យអចលនទ្រព្យ គឺ Retail មានផលប៉ះពាល់ច្រើនជាងគេពីវិបត្តិជំងឺកូវីដ១៩ ព្រោះតែក្តីបារម្ភរបស់ប្រជាជនព្រមជាមួយការដាក់ចេញនូវវិធានមួយចំនួនរបស់រដ្ឋាភិបាលក្នុងការកាត់បន្ថយការជួបជុំ។
អ្នកស្រីបន្តថា ទោះយ៉ាងណាអ្វីៗហាក់មានភាពប្រសើរឡើងវិញបន្តិចហើយនាពេលនេះ បើធៀបនឹងចុងត្រីមាសទី ១។ អ្នកស្រីបន្តថា៖ «ដោយសារមានផលប៉ះពាល់ខ្លះ ហេតុនេះខ្ញុំគិតថា គេត្រូវការពេលយ៉ាងតិចពី ៦ ខែទៅ ១ ឆ្នាំទៀតទើបទីផ្សារ Retail នេះមានភាពល្អឡើងវិញ»។
យោងតាមរបាយការណ៍ CBRE Cambodia អត្រាប្រើប្រាស់របស់ Retail ក្នុងរាជធានីភ្នំពេញ គិតត្រឹមត្រីមាសទី ១ ឆ្នាំ ២០២០ គឺមាន ៨៩,៩ ភាគរយ ធ្លាក់ចុះ ០,៥ ភាគរយ បើធៀបនឹងត្រីមាសទី ៤ ឆ្នាំ ២០១៩។ ចំណែកឯតម្លៃជួលបានធ្លាក់ចុះនៅក្នុងរង្វង់ ១០ ភាគរយ៕ LA