The Phnom Penh Post Search

Search form

ទី​ផ្សារ​ខុនដូ​នៅ​​ក្រុង ប៉ាតាយ៉ា កំពុង​ស្ទុះ​ងើប​ឡើង​វិញ

Content image - Phnom Penh Post
អគារ​ខុនដូរ​មើល​ពី​ចម្ងាយ​នៅ​ទីក្រុង​ប៉ាតាយ៉ា ដែលជាទីក្រុងទេសចរណ៍​តំបន់​ឆ្នេរ​របស់​ប្រទេស​ថៃ​​។ រូបថត AFP

ទី​ផ្សារ​ខុនដូ​នៅ​​ក្រុង ប៉ាតាយ៉ា កំពុង​ស្ទុះ​ងើប​ឡើង​វិញ

ក្រុង​ប៉ាតាយ៉ាៈ កម្រិត​នៃ​ការ​អភិវឌ្ឍ​​ខុនដូ​នៅ ប៉ាតាយ៉ា ដែល​ជា​ទីក្រុង​ទេស​ចរណ៍​របស់​ប្រទេស ថៃ មាន​ភាព​យឺត​យ៉ាវ​ខ្លាំង​ក្នុង​រយៈ​ពេល ៣ ឆ្នាំ​​ចុង​ក្រោយ​​នេះ​ ខណៈ​​​ក្រុម​ហ៊ុន​​អភិវឌ្ឍន៍​​​រង់​ចាំ​ឲ្យ​ការ​ផ្គត់​ផ្គង់​ខុនដូ​​ដែល​ត្រូវ​បាន​​​សាង​សង់​រួ​ច​​ ក្នុង​អំ​ឡុង​​ពេល​​រីក​ចម្រើន​​ខ្លាំង​ត្រូវ​បាន​លក់​ចេញ​​ឲ្យ​អស់​សិន។ នេះ​បើ​យោង​តាម​កាសែត​បាង​កក​ប៉ុស្តិ៍។

កាសែត​បាង​កក​ប៉ុស្តិ៍​បាន​រាយ​ការណ៍​កាល​ពីថ្ងៃ​អង្គារ​ថា សញ្ញា​នៃ​ការ​​ថម​ថយ​ទីផ្សារ​​បាន​មើល​ឃើញ​​ច្បាស់​ក្នុង​ឆ្នាំ ២០១៦ នៅ​ពេល​​ក្រុម​ហ៊ុន​អភិវឌ្ឍ​ន៍​បាន​​ចាប់​ផ្តើម​ផ្អាក​​​គម្រោង​​ថ្មី​ៗ​​របស់​ខ្លួន​។ ​មាន​តែ​ខុនដូ ២ ១០០ យូនីត ​ប៉ុណ្ណោះ​​​​​ត្រូវ​បាន​ចាប់​ផ្តើម​សាង​សង់​នៅ​​ឆ្នាំ​នោះ​។​

ចំនួន​សរុប​បាន​កើន​ឡើង​ដល់ ២ ៧៤៣ ក្នុង​ឆ្នាំ ២០១៧ ខណៈ​​គេ​ឃើញ​​មាន​យូនីត​ខ្លះ​​​លក់​មិន​ដាច់​​ក្នុង​ទីផ្សារ​ ប៉ុន្តែ​តួ​លេខ​​នៅ​តែ​​​ទាប​ខ្លាំង​ជាង​​នៅ​ចន្លោះ​​ឆ្នាំ ២០១១ ដល់ ២០១៥ ជា​ពេល​ដែល​មាន​ការ​ផ្គត់​​ផ្គង់​ខុនដូ​ច្រើន​ជាង ១០ ០០០ យូនីត​ក្នុង ១ ឆ្នាំ​។

សកម្ម​ភាព​នេះ​បាន​កើន​ឡើង​​នា​ឆ្នាំ​នេះ​​ ដោយ​ខុន​ដូរ​ចំនួន ៣ ៦៣៨ យូនីត ​​បាន​ចាប់​ផ្តើម​ដំណើរ​ការ​​ក្នុង​រយៈ​ពេល​តែ​ ៨ ​ខែ​​ដំបូង​​ក្នុង​ឆ្នាំ​នេះ​ប៉ុណ្ណោះ។ ​នេះ​ឆ្លុះ​បញ្ចាំង​ឲ្យ​ឃើញ​ពី​ការ​វិល​ត្រឡប់​មក​វិញ​នៃ​ទំនុក​ចិត្ត​របស់​​ក្រុម​ហ៊ុន​​​អភិវឌ្ឍន៍​ ​បើ​ទោះ​បី​ជា​តម្រូវ​ការ​​​នៅ​កំពុង​ត្រូវ​បាន​ពិនិត្យ​មើល​យ៉ាង​យក​ចិត្ត​ទុក​ដាក់​ក៏​ដោយ។

​អតិថិ​ជន​​ជា​​ជន​ជាតិ​ចិន​​​បាន​ងើប​ឡើង​ក្លាយ​ជា​ទីផ្សារ​បរទេស​ថ្មី​ដ៏​មាន​សក្តា​នុពល​ខ្ពស់​​មួយ​នៅ​ទីក្រុង ប៉ាតាយ៉ា ដោយ​​ជួយ​ប៉ះ​ប៉ូវ​ការ​ធ្លាក់​ចុះ​​ខ្លាំង​​អតិថិ​ជន​​រុស្ស៊ី​​ក្នុង​រយៈ​កាល​ប៉ុន្មាន​ឆ្នាំ​​ថ្មី​ៗនេះ។

កាសែត​បាង​កក​ប៉ុស្តិ៍​បាន​ឲ្យ​ដឹង​ទៀត​ថាតំបន់ ចម​ថៀន (Jomtien) មាន​បណ្តុំ​​អគារ​​ខុនដូ​ច្រើន​ជាង​គេ​​​​ក្នុង​ទីក្រុង​​ប៉ាតាយ៉ា​ ​រួម​ទាំង​គម្រោង​​អភិវឌ្ឍ​ន៍ធំ​ៗ​​ មួយ​​ចំនួន​​​ដែល​មាន​​ជាង ១ ០០០ យូនីត​​ក្នុង ១អគារ​​។

​​​ក្រុម​ហ៊ុន​​អភិវឌ្ឍន៍​ចូល​ចិត្ត​អភិវឌ្ឍ​នៅ​តំបន់​ចម​ថៀន ​ដោយ​សារ​តំបន់​នេះ​មាន​ដី​ទំនេរ​​ច្រើន​​​ដែល​មាន​តម្លៃ​ទាប​ជាង​​​កន្លែង​ផ្សេង​​​​ក្នុង​ទី​ក្រុង​​​រមណីយ​ដ្ឋាន​នេះ​ ​ដែល​មាន​សក្តា​នុ​ពល​​សម្រាប់​គម្រោង​​​តម្លៃ​ទាប​លើ​ទំហំ​កាន់​តែ​ធំ​។

​ទោះ​បី​ជា​​​អត្រា​កាន់​កាប់​ខុន​ដូ​ជា​មធ្យម​​ក្នុង​ទី​ផ្សារ​ខុន​ដូ​ប៉ាតាយ៉ា​​ មាន ៨១ ភាគរយ ​ហើយ​ការ​លក់​មាន​ភាព​ប្រសើរ​ឡើង​​​ថ្មី​ៗ​នេះ​ក៏​ដោយ​ ក៏​​យ៉ាង​ហោច​ណាស់​នៅ​មាន​​ខុនដូ​ដែល​មិន​ទាន់​លក់​ចំនួន ១៤ ០០០ យូនីត​។

អ្នក​សង្កេត​ទី​ផ្សារ​មួយ​ចំនួន​ជឿ​ថា​ ​តួ​លេខ​ពិត​ប្រាកដ​គឺ​ខ្ពស់​ជាង​នេះ​ ​ខណៈ​​អតិថិ​ជន​​មួយ​ចំនួន​បាន​បោះ​បង់​យូនីត​​ដែល​បាន​កក់​រួច​ហើយ​ ​ហើយ​​អ្នក​ខ្លះ​កំពុង​ចរចា​ជា​មួយ​ក្រុម​ហ៊ុន​អភិវឌ្ឍន៍​​​ដើម្បី​លក់​ចេញ​ ឬ​ប្រគល់​ទៅ​ឲ្យ​​ក្រុមហ៊ុន​វិញ​។ ​យូនីត​​ ជា​ច្រើន​ទាំង​អស់​នេះ​គឺ​ជា​ការ​ទិញ​ដើម្បី​ទុក​លក់​យក​ចំណេញ​វិញ​​ក្នុង​អំឡុង​​ពេល​រីក​ច្រើន​ខ្លាំង​។ ​នៅ​ពេល​ទីផ្សារ​ចាប់​ផ្តើម​ធ្លាក់​ចុះ​​ ​អ្នក​ទិញ​ជា​ច្រើន​​ចាប់​ផ្តើម​​​​ស្វែង​រក​វិធី​ជៀស​វាង​ការ​​ខាត​បង់​។

តំបន់​ឆ្នេរ​ចម​ថៀន មាន​​អត្រា​​កាន់​កាប់​​ខ្ពស់​បំផុត​ក្នុង​តំបន់​ ហើយ​ក៏​មាន​​យូនីត​​​ដែល​មិន​ទាន់​លក់​​ច្រើន​បំផុត​​ផង​​ដែរ​ ដោយ​សារ​​ចំនួន​ខុនដូ​ច្រើន​ពេក​​ក្នុង​រយៈ​កាល​មួយ​ទសវត្សរ៍​ចុង​ក្រោយ​​នេះ ​បើ​ទោះ​បី​ជា​តម្លៃ​​មាន​ភាព​ទាក់​ទាញ​ក៏​ដោយ​។

គម្រោង​​ខុន​ដូ​​ស្ថិត​នៅ​មាត់​​ឆ្នេរ​សមុទ្រ​មាន​តម្លៃ​លក់​ខ្ពស់​ជាង​គម្រោង​​ដែល​​​មិន​នៅ​​​​មាត់​ឆ្នេរ​ ដោយ​សារ​​​តម្លៃ​ដី​ខ្ពស់​ខ្លាំង​។ ​ការ​អភិវឌ្ឍ​តំបន់​មុខ​ឆ្នេរ​​ភាគ​ច្រើន​បំផុត​​ជា​គម្រោង​ទំនើប ​​និង​​តម្លៃ​ថ្លៃ​​ដែល​លក់​​ក្នុង​តម្លៃ​ជាង​ ១២០ ០០០ បាត​ (ប្រហែល ៣ ៦៥៦ ដុល្លារ) ក្នុង​១​ម៉ែត្រ​ការ៉េ​។ ​គម្រោង​ខ្លះ​មាន​តម្លៃ​រហូត​ដល់​​ ១៥០ ០០០ ​បាត​ក្នុង​១​​ម៉ែត្រ​ការ៉េ​ឬ​ថ្លៃ​ជាង​នេះ​ ជា​ពិសេស​នៅ​​តំបន់​ឆ្នេរ​​វង្ស​អាម៉ាត (Wong Amat) ជា​ទី​ដែល​ខ្វះខាត​ទីតាំង​​ដី​ល្អ។

តម្លៃ​លក់​ខុន​ដូ​មធ្យម​​នៅ​​តំបន់ឆ្នេរ​វង្ស​អាម៉ាតមាន​​ប្រមាណ​ ៩០ ០០០​ បាត (ប្រហែល ២ ៧៤១ ​ដុល្លារ) ​ក្នុង​១​ម៉ែត្រ​​ការ៉េ​។ តម្លៃ​មធ្យម​នៅ​តំបន់​ឆ្នេរ​ចម​ថៀន​​​មាន​ ៦៦ ៦៥០​ បាត​​ក្នុង​១​ម៉ែត្រ​ការ៉េ​ ដែល​ជា​តម្លៃ​ទាប​បំផុត​​នៅ​​ទី​ផ្សារ​ប៉ាតាយ៉ា​ ​ខណៈ​យូនីត​មួយ​ចំនួន​ក្នុង​តំបន់​នេះ​​​អាច​មាន​​តម្លៃ​តិច​ជាង ​១ លាន​បាត​​(ប្រហែល ៣ ម៉ឺន​ដុល្លារ) ក្នុង​១​យូនីត​។

ក្រុមហ៊ុន​អភិវឌ្ឍ​ន៍​​ភាគ​ច្រើន​ កំពុង​ព្យាយាម​ទាក់​ទាញ​អតិថិ​ជន​​ក្នុង​អំឡុង​ធ្លាក់​ចុះ​នៃ​ទី​ផ្សារ​នេះ ​ដោយ​រក្សា​តម្លៃ​លក់​ថេរ​មិន​ឡើង​ថ្លៃ​ ឬ​​ដំ​ឡើង​​គ្រាន់​តែ​សម្រាប់​ការ​ចំណេញ​បន្តិច​​បន្តួច​​។ ​ហេតុ​ដូច្នេះ​តម្លៃ​លក់​​មធ្យម​​នៅ​ប៉ា​តា​យ៉ា​​នា​ឆ្នាំ​នេះ​​ នឹង​មាន​​ការ​ផ្លាស់​ប្តូរ​តិច​តួច​ធៀប​នឹង​​ឆ្នាំ​ ២០១៧​ ​បើ​ទោះ​បី​ជា​គម្រោង​ជា​ច្រើន​​ឥឡូវ​នេះ​ត្រូវ​បាន​បញ្ចប់​ ​ពី​ព្រោះ​​ទីផ្សារ​នៅ​មិន​ទាន់​​ត្រឡប់​មក​រក​ភាព​ដើម​​វិញ​នៅ​ឡើយ​ក៏ដោយ​៕ PS

អត្ថបទគួរចាប់អារម្មណ៍