The Phnom Penh Post Search

Search form

Logo of Phnom Penh Post newspaper Phnom Penh Post - ទីផ្សារ​ខុនដូ​ ងាក​មក​កាន់​ប្រជាជន​មាន​ជីវភាព​មធ្យម

ទីផ្សារ​ខុនដូ​ ងាក​មក​កាន់​ប្រជាជន​មាន​ជីវភាព​មធ្យម

Content image - Phnom Penh Post
ទិដ្ឋភាព​ខុនដូ​មួយ​ចំនួន​ក្នុង​រាជធានី​ភ្នំពេញ​។ ហេង ជីវ័ន

ទីផ្សារ​ខុនដូ​ ងាក​មក​កាន់​ប្រជាជន​មាន​ជីវភាព​មធ្យម

ខុនដូ​ប្រណីត និង​មាន​តម្លៃ​ខ្ពស់​ទំនង​ជា​ចាប់ផ្តើម​ឆ្អែត​ជា​បណ្តើរៗ​ហើយ​នៅក្នុង​ទីផ្សារ ខណៈ​ក្រុមហ៊ុន​មួយ​ចំនួន​បាន​ចាប់ផ្តើម​សម្លឹង​ចាប់​យក​ទីផ្សារ​ថ្មី ដោយ​ផ្តោត​លើ​ខុនដូ​មាន​តម្លៃ​មធ្យម​។

នាយិកា​ប្រចាំ​ប្រទេស​នៃ​ក្រុមហ៊ុន CBRE Cambodia អ្នកស្រី អាន សុធីតា បាន​លើក​ឡើង​កាលពី​ពេល​ថ្មីៗ​នេះ​ថា​នៅ​ឆ្នាំ​នេះ​មាន​គម្រោង​ខុនដូ​ចំនួន​ ៣ ស្មើ​នឹង​ផ្ទះ​ជាង​ ២០០០ ​យូនីត​បាន​ប្រកាស​លក់​គម្រោង​របស់​ពួកគេ​ដោយ​ផ្តោត​ទៅ​លើ​ប្រជាជន​មាន​ជីវភាព​មធ្យម​ដែល​ជា​ក្រុម​ប្រជាជន​មាន​ចំនួន​ច្រើន និង​អាច​មាន​លទ្ធភាព​ទិញ​ខុនដូ​ទាំងនោះ​បាន​។ អ្នកស្រី​បន្ត​ថា​ខុនដូ​ដែល​ប្រកាស​លក់ និង​សាងសង់​នៅ​ដើម​ឆ្នាំ​នេះ​មាន​ដូចជា​គម្រោង Arakawa និង Urban Village ជាដើម​។

អ្នកនាង​បន្ត​ថា​៖ «​ខ្ញុំ​គិត​ថា​ទីផ្សារ​ខុនដូ​ដែល​ផ្តោត​លើ​ប្រជាជន​មាន​ជីវភាព​មធ្យម​ពួកគេ​អាច​ទទួល​បាន​ជោគជ័យ ដោយសារ​ប្រជាជន​ក្នុង​ស្រុក​អាច​មាន​លទ្ធភាព​ទិញ​បាន​ហើយ​និន្នាការ​ប្រជាជន​ក្នុង​ស្រុក​ទិញ​ខុនដូ​ក៏​កើនឡើង​ផងដែរ​»​។

ខុនដូ​តម្លៃ​មធ្យម​សំដៅ​ដល់​ខុនដូ​ដែល​សាងសង់​លក់​ក្នុង​តម្លៃ​ចន្លោះ​ពី​ ៣០០០០ ​ទៅ​ ៥០០០០ ​ដុល្លារ​ក្នុង​ ១ ​យូនីត​។

លោក ទុយ ប៊ុន ភាគហ៊ុនិក​ទទួល​បន្ទុក​ផ្នែក​បច្ចេកទេស​នៃ​ក្រុមហ៊ុន​លំនៅឋាន L កម្ពុជា​ភ្នំពេញ​ដែល​បាន​សាងសង់​ខុនដូ​ចំនួន​ ៥ ​គម្រោង​មាន​តម្លៃ​ចន្លោះ​ពី​ ២៩០០០ ​ទៅ​ដល់​ ៥០០០០ ​ដុល្លារ​ក្នុង​ ១ ​យូនីត​បាន​និយាយ​ថា ប្រជាជន​ក្នុង​ស្រុក​កាន់តែ​ច្រើន​បាន​ចាប់ផ្តើម​ចាប់​អារម្មណ៍​ទិញ​ខុនដូ​នៅក្នុង​រយៈពេល​ប៉ុន្មាន​ឆ្នាំ​ថ្មីៗ​នេះ ប៉ុន្តែ​នៅ​ឆ្នាំ​នេះ​មាន​ប្រជាជន​ចិន​កាន់តែ​ច្រើន​បាន​ទិញ​ខុនដូ​របស់​លោក​ដោយ​ពួកគេ​ម៉ៅ​យក​ ១០០ ​យូនីត ឬ​ច្រើន​ជាង​នេះ​សម្រាប់​លក់​បន្ត​។

លោក​បាន​អះអាង​ថា៖ «​ការសាងសង់​ខុនដូ​ដោយ​ផ្តោត​តម្លៃ​ចន្លោះ​ពី​ ៩០០ ​ទៅ​ ១២០០ ​ដុល្លារ​ក្នុង​ ១ ​ម៉ែត្រការ៉េ​ជា​គោលដៅ​ត្រឹមត្រូវ ហើយ​ខ្ញុំ​ក៏​មិន​បារម្ភ​ពី​ខុនដូ​របស់​ខ្ញុំ​លក់​មិន​ចេញ​នោះ​ទេ​»​។ លោក​បាន​បន្ត​ថា៖ «​ហេតុផល​ដែល​យើង​សាងសង់​ខុនដូ​តម្លៃ​មធ្យម ដោយសារ​ប្រជាជន​មាន​ជីវភាព​មធ្យម​មាន​ចំនួន​ច្រើន និង​ទីតាំង​គម្រោង​របស់​យើង​មិន​សមស្រប​សម្រាប់​ខុនដូ​មាន​តម្លៃ​ថ្លៃ​ផង​ដែរ​»​។

ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា​លោក គីម ហ៊ាង បាន​ថ្លែង​ថា​លោក​គិត​ថា​ការ​សាងសង់​ខុនដូ​តម្លៃ​មធ្យម​នឹង​ទទួល​បាន​ជោគជ័យ ពិសេស​តំបន់​ស្ថិត​ក្នុង​ខណ្ឌ​ចំការមន និង​ខណ្ឌ​ដូនពេញ​ទីតាំង​ដែល​សំណង់​នានា​បាន​ដុះដាល និង​ស្ទើរ​រក​ដី​សាងសង់​មិន​បាន​រួច​ទៅ​ហើយ​។

លោក​បាន​បន្ត​ថា​ បើ​សាងសង់​ខុនដូ​នៅ​តំបន់​នេះ​កម្ពស់​ ១៥ ​ទៅ​ ២៥ ​ជាន់ ហើយ​លក់​ក្នុង​តម្លៃ​ចន្លោះ​ពី​ ៨០០ ​ទៅ​ ១២០០ ​ដុល្លារ​ក្នុង​ ១ ​ម៉ែត្រការ៉េ​នឹង​ទទួល​បាន​ជោគជ័យ ព្រោះ​ប្រជាជន​ក្នុង​ស្រុក​ទោះបី​ជា​ចង់​ទិញ​ផ្ទះ​ក្នុង​តម្លៃ​ចន្លោះ​ពី ៤០០០០ ​ទៅ​ ៦០០០០ ​ដុល្លារ​ក៏​ទិញ​បាន​ផ្ទះ​នៅ​ជាន់​ទី​ ២ ​ទៅ​ទី​ ៤ ​ដែរ ហើយ​វា​ជា​ផ្ទះ​ចាស់​ដែល​មិន​មាន​ហេដ្ឋារចនាសម្ព័ន្ធ​សមស្រប​ទៀត​ផង​។

លោក​បន្ត​ថា​៖ «​បើ​សិន​ជា​មាន​អ្នក​វិនិយោគ​សាងសង់​ខុនដូ​ក្នុង​តម្លៃ​ខាង​លើ​នេះ​ខ្ញុំ​ជឿ​ថា​នឹង​មាន​ការគាំទ្រ​ពី​ប្រជាជន​ក្នុង​ស្រុក​ព្រោះ​ខុនដូ​មិន​ដូច​ផ្ទះល្វែង​ចាស់ៗ​ទេ ដោយសារ​ខុនដូ​មាន​ជណ្តើរយន្ត​មាន​សេវាកម្ម​សន្តិសុខ និង​សេវាកម្ម​បម្រើការ​រស់នៅ​ប្រសើរ​ជាង​ផ្ទះល្វែង​»​។

លោក ណារិទ្ធ ហៅ​ ធូ ប្រជាពលរដ្ឋ​រស់នៅ​រាជធានី​ភ្នំពេញ​ដែល​បាន​ទិញ​ខុនដូ តម្លៃ​មធ្យម​មួយ​កន្លែង​នៅ​តំបន់​បឹងត្របែក​បាន​លើក​ឡើង​ថា​ការពិត​លោក​មាន​ផ្ទះ​ផ្ទាល់​ខ្លួន​រួច​ហើយ តែ​លោក​បាន​ទិញ​ខុនដូ​ ១ ​ទៀត​ដោយសារ​ចង់​ផ្លាស់ប្តូរ​បរិយាកាស​ក្នុង​ការ​រស់នៅ និង​ទុក​សម្រាប់​កូនៗ​របស់​លោក​នាពេល​អនាគត​។

លោក​បាន​បន្ត​ថា​ លោក​គិត​ថា​ការ​រស់នៅ​ខុនដូ​នឹង​មាន​ភាព​ខុសគ្នា​ពី​ផ្ទះល្វែង​ជាប់​ដី ដោយសារ​ខុនដូ​មាន​កម្ពស់​ខ្ពស់ និង​មាន​សេវាកម្ម​ដែល​ធ្វើឲ្យ​ការ​ស្នាក់នៅ​របស់​យើង​មាន​ភាពកក់ក្តៅ និង​ផាសុកភាព​។

លោក ណារិទ្ធ បាន​មាន​ប្រសាសន៍​ថា៖ «​ខ្ញុំ​គិត​ថា​ប្រជាជន​ខ្មែរ​នឹង​ជ្រើសរើស​ការ​រស់នៅ​តាម​ខុនដូ​កាន់តែ​ច្រើន​នាពេល​អនាគត ព្រោះ​បច្ចុប្បន្ន​មិត្តភក្តិ​ខ្ញុំ​មួយ​ចំនួន​ក៏​បាន​ទិញ​ខុនដូ​សម្រាប់​រស់នៅ​ដែរ ដោយសារ​វា​ជា Lifestyle ថ្មី​»៕

អត្ថបទគួរចាប់អារម្មណ៍