.jpg)
ការដ្ឋានសំណង់ខុនដូបានលេចឡើងជាបន្តបន្ទាប់ក្នុងរាជធានីភ្នំពេញ។ ហុង មិនា
ភ្នំពេញៈ ការធ្លាក់ចុះនៃចំនួនជនបរទេសដែលមកស្នាក់នៅ និងធ្វើដំណើរមកកម្ពុជា ដោយសារក្តីបារម្ភពីជំងឺកូវីដ ១៩ បានធ្វើឲ្យតម្លៃលក់ និងជួលខុនដូ នៅក្នុងរាជធានីភ្នំពេញនាត្រីមាសទី ២ ឆ្នាំ ២០២០ បន្តធ្លាក់ចុះបន្ថែមទៀតធៀបនឹងត្រីមាសទី ១។ នេះបើយោងតាមរបាយការណ៍របស់ក្រុមហ៊ុនអចលនទ្រព្យ CBRE Cambodia។
របាយការណ៍ស្រាវជ្រាវរបស់ក្រុមហ៊ុន CBRE Cambodia ដែលភ្នំពេញប៉ុស្តិ៍ទើបទទួលបានកាលពីថ្ងៃពុធបង្ហាញថា ការរីករាលដាលនៃជំងឺកូវីដ១៩ បានធ្វើឲ្យតម្លៃខុនដូក្នុងត្រីមាសទី ២ ឆ្នាំ ២០២០ ធ្លាក់ចុះជាបន្តបន្ទាប់ក្នុងនោះខុនដូប្រណីតមានតម្លៃជាមធ្យម ៣ ០៤១ ដុល្លារ ក្នុង ១ ម៉ែត្រការ៉េធ្លាក់ ៣,៩៨ ភាគរយ ធៀបនឹងត្រីមាសទី ១ ឆ្នាំ ២០២០ ខុនដូប្រភេទមធ្យមមានតម្លៃ ២ ៤៤១ ដុល្លារ ធ្លាក់ ៤,៦១ ភាគរយ និងប្រភេទតម្លៃសមរម្យមានតម្លៃជាមធ្យម ១ ៥៣៩ ដុល្លារ ធ្លាក់ចុះ ០,៦៥ ភាគរយ។ ចំណែកតម្លៃជួលនៅក្នុងត្រីមាសទី ២ គឺ ១៣,១៨ ដុល្លារ ក្នុង ១ ម៉ែត្រការ៉េ សម្រាប់រយៈពេល ១ ខែ ចំពោះខុនដូប្រណីតដោយធ្លាក់ចុះ ៧,២៥ ភាគរយ ធៀបនឹងត្រីមាសទី ១ និងខុនដូប្រភេទមធ្យមមានតម្លៃ ១១,១២ ដុល្លារ ធ្លាក់ ៥,៧១ ភាគរយ។
កាលពីត្រីមាសទី ១ ខុនដូប្រណីតមានតម្លៃជាមធ្យមក្នុងរង្វង់ ៣ ១៦៧ ដុល្លារ ក្នុង ១ ម៉ែត្រការ៉េធ្លាក់ចុះ ០,៥៣ ភាគរយធៀប នឹងត្រីមាសទី ៤ ឆ្នាំ ២០១៩ ខុនដូប្រភេទមធ្យមមានតម្លៃ ២ ៥៥៩ ដុល្លារ ធ្លាក់ចុះ ១,៣៩ ភាគរយ និងប្រភេទតម្លៃសមរម្យមានតម្លៃ ១ ៥៤៩ ដុល្លារកើន ០,៣២ ភាគរយ។ សម្រាប់ទីផ្សារជួលខុនដូប្រណីតមានតម្លៃមធ្យម ១៤,២១ ដុល្លារ ក្នុង ១ ម៉ែត្រការ៉េ ធ្លាក់ចុះ ០,៤ ភាគរយ និងខុនដូប្រភេទមធ្យមមានតម្លៃមធ្យម ១១,៧៩ ដុល្លារ ធ្លាក់ចុះ ០,៦ ភាគរយ។
យោងតាមរបាយការណ៍ខាងលើនៅក្នុងត្រីមាសទី ២ ឆ្នាំ ២០២០ នេះមិនមានគម្រោងអភិវឌ្ឍន៍ខុនដូណាបញ្ចប់ការសាងសង់ទេ ប៉ុន្តែមានខុនដូថ្មីៗចំនួន ៣ ដែលស្មើនឹងបន្ទប់ស្នាក់នៅសរុប ២ ២៥២ យូនីត បានប្រកាសបើកលក់ជាផ្លូវការ។
គម្រោងទាំងនោះរួមមាន LEEDON Heights ស្ថិតក្នុងខណ្ឌសែនសុខ គម្រោង LE Conde BKK1 ក្នុងខណ្ឌបឹងកេងកង និងគម្រោង Grand Condo 7 នៅក្នុងខណ្ឌជ្រោយចង្វារ។
កញ្ញា គឹម គិនកេសា អ្នកគ្រប់គ្រងជាន់ខ្ពស់ផ្នែកស្រាវជ្រាវ និងប្រឹក្សាយោបល់ក្រុមហ៊ុន CBRE Cambodia បានប្រាប់ភ្នំពេញប៉ុស្តិ៍កាលពីថ្ងៃពុធថា ស្ថានភាពទីផ្សារខុនដូនៅរាជធានីភ្នំពេញចាប់ពីដើមឆ្នាំ ២០២០ មកមិនសូវមានភាពល្អប្រសើរទេ ព្រោះការផ្ទុះឡើងនៃជំងឺកូវីដ ១៩ បានធ្វើឲ្យចំនួនភ្ញៀវបរទេសដែលស្នាក់នៅ និងធ្វើដំណើរមកកម្សាន្តនៅកម្ពុជាធ្លាក់ចុះយ៉ាងច្រើន។
កញ្ញាបន្តថា ខុនដូ គឺជាទីផ្សារពេញនិយមខ្លាំងសម្រាប់ជនបរទេស ហេតុនេះនៅពេលជនបរទេសចាកចេញច្រើន ផលប៉ះពាល់ដល់ទីផ្សារនេះប្រាកដជាកើតមាន ដោយចៀសមិនផុត។
កញ្ញា គិនកេសា បានថ្លែងថា៖ «កូវីដ១៩ បានធ្វើឲ្យចំនួនភ្ញៀវបរទេសដែលស្នាក់នៅ និងធ្វើដំណើរមកកម្សាន្តនៅកម្ពុជាធ្លាក់ចុះយ៉ាងច្រើនជាហេតុធ្វើឲ្យបន្ទប់ខុនដូ នៅសល់ក៏កើនច្រើនដែរ»។
ខណៈស្ថានភាពនៃជំងឺកូវីដ ១៩ នៅបន្តការគំរាមកំហែងជាសកលនោះកញ្ញា គិនកេសា បាននិយាយថា បើតាមស្ថានភាពនៃការបន្តឆ្លងរបស់ជំងឺកូវីដ១៩ វិស័យខុនដូនៅកម្ពុជានឹងនៅតែបន្តទទួលរងផលអវិជ្ជមានជាបន្តទៀតក្នុងត្រីមាសទី ៣ ឆ្នាំនេះ។
កញ្ញាអះអាងថា៖ «ខ្ញុំគិតថា តម្លៃលក់ និងជួលខុនដូនៅភ្នំពេញនឹងបន្តធ្លាក់ចុះទៀតក្នុងត្រីមាសទី ៣ នេះ ព្រោះចំនួនជនបរទេសដែលធ្វើដំណើរមកកម្ពុជានៅមិនទាន់មានចំនួនច្រើនដូចមុនពេលការផ្ទុះឡើងនៃជំងឺកូវីដ ១៩ នោះទេ»។
គិតមកដល់ពេលនេះក្នុងក្រុងភ្នំពេញមានគម្រោងខុនដូចំនួន ៧២ ស្មើនឹងបន្ទប់ស្នាក់នៅសរុប ២០ ៨៥០ យូនីត ដែលបានបញ្ចប់ការសាងសង់ និងបើកដំណើរការ។ នេះបើតាមកញ្ញា គិនកេសា។
របាយការណ៍របស់ក្រសួងរៀបចំដែនដីបានឲ្យដឹងថា ទុនវិនិយោគវិស័យសំណង់នៅកម្ពុជាក្នុងឆមាសទី ១ ឆ្នាំ ២០២០ នេះមានតម្លៃជាង ៣,៨៤ ពាន់លានដុល្លារ កើនឡើង ១៣,២៦ ភាគរយ ធៀបនឹងឆមាសទី ១ ឆ្នាំ ២០១៩៕
