ក្រុងប៉េកាំងៈ របាយការណ៍ឧស្សាហកម្មរបស់ប្រទេសចិនបានបង្ហាញថា ការលក់ដីនៅក្នុងទីក្រុងសំខាន់របស់ប្រទេសចិនបានធ្លាក់ចុះច្រើនកាលពីខែកុម្ភៈកន្លងមក។
ទំហំប្រតិបត្តិការក្នុងទីក្រុងចំនួន ៤០ ដែលបានត្រួតពិនិត្យដោយវិទ្យាស្ថានស្រាវជ្រាវ និងអភិវឌ្ឍន៍ E-house China R&D Institute កាលពីខែកុម្ភៈ បានបង្ហាញពីការធ្លាក់ចុះបើធៀបនឹងរយៈពេលដូចគ្នាកាលពីឆ្នាំមុន ខណៈតម្លៃដីបានកើនឡើងដោយសារតែការស្ទុះងើបឡើងវិញនៃតម្លៃទីផ្សារដីធ្លីនៅក្នុងទីក្រុងធំលំដាប់ទី ១។ នេះបើតាមរបាយការណ៍ស្រាវជ្រាវខាងលើ។
របាយការណ៍បានឲ្យដឹងទៀតថា អត្រាតម្លៃដីធ្លីដែលវាស់វែងក្នុងចំណោមក្រុមហ៊ុនអភិវឌ្ឍន៍អចលនទ្រព្យដែលដេញថ្លៃខ្ពស់ជាងគេបំផុតនៅតែស្ថិតក្នុងកម្រិតទាបរួមជាមួយនឹងលទ្ធភាពដែលអាចនឹងមានការធ្លាក់ចុះបន្ថែមទៀត។
របាយការណ៍បន្តថា តម្លៃទីផ្សារអចលនទ្រព្យក្នុងទីក្រុងធំលំដាប់លេខ ២ បានធ្លាក់ចុះខ្លាំងទាំងផ្នែកប្រតិបត្តិការ និងបរិមាណ ចំណែកនៅក្នុងទីក្រុងលំដាប់ទី ៣ ក៏មាននិន្នាការធ្លាក់ចុះជាបណ្ដើរៗដែរ។
លោក Wang Yichen អ្នកស្រាវជ្រាវនៅវិទ្យាស្ថាន E-house China R&D Institute ដែលមានមូលដ្ឋាននៅទីក្រុងសៀងហៃបានឲ្យដឹងថា បន្ទាប់ពីការធ្លាក់ចុះតម្លៃ និងសកម្មភាពដីធ្លីនៅពេលនេះគឺគេចាំបាច់ត្រូវតែទាមទារឲ្យរដ្ឋមានគោលនយោបាយក្នុងស្រុកបន្ថែមទៀតដើម្បីគាំពារដល់វិស័យមួយនេះ។
លោក Wang បានឲ្យដឹងថា តាមការពិចារណារបស់លោកអំពីអត្រាតម្លៃដីធ្លីទាបនៅពេលបច្ចុប្បន្ន គឺទីផ្សារនេះមិនទំនងជានឹងកើនឡើងវិញក្នុងរយៈពេលខ្លីទេ ខណៈដែលការធ្លាក់ចុះបន្ថែមទៀតនៃតម្លៃដីធ្លីក៏នឹងត្រូវបានកម្រិតផងដែរ៕ People''s Daily/LA