The Phnom Penh Post Search

Search form




Logo of Phnom Penh Post newspaper Phnom Penh Post - ទីផ្សារ​ដីឡូត៍​ចាប់ផ្តើម​លេចឡើង​បណ្តើរៗ​​ នៅ​ខេត្ត​មណ្ឌលគិរី




ទីផ្សារ​ដីឡូត៍​ចាប់ផ្តើម​លេចឡើង​បណ្តើរៗ​​ នៅ​ខេត្ត​មណ្ឌលគិរី

Content image - Phnom Penh Post
ទីតាំង​គម្រោង​ពុះ​ដីឡូត៍​ ១ ​កន្លែង ស្ថិតក្នុង​ក្រុង​សែនមនោរម្យ ខេត្តមណ្ឌលគិរី​។ រូបថត សហការី

ទីផ្សារ​ដីឡូត៍​ចាប់ផ្តើម​លេចឡើង​បណ្តើរៗ​​ នៅ​ខេត្ត​មណ្ឌលគិរី

មណ្ឌលគិរីៈ បន្ទាប់ពី​រាជធានី​ភ្នំពេញ និង​ខេត្ត​ក្រុង​មួយចំនួន បច្ចុប្បន្ន​ទីផ្សារ​ដីឡូត៍​បាន​ចាប់ផ្តើម​លេច​ឡើង​ជា​បន្តបន្ទាប់​នៅក្នុង​ក្រុង​សែនមនោរម្យ ខេត្តមណ្ឌលគិរី​នៃ​ភូមិភាគ​ឦសាន​ដែល​រដ្ឋាភិបាល​ចាត់ទុកថា នឹង​ក្លាយ​ទៅជា​ប៉ូល​សេដ្ឋកិច្ច​ថ្មី​មួយទៀត​។ នេះ​បើតាម​អ្នកជំនាញ​ក្នុង​វិស័យ​អចលនទ្រព្យ​កម្ពុជា​។

មណ្ឌលគិរី គឺជា​ខេត្ត​មួយ​ស្ថិត​នៅ​ភាគ​ឦសាន​ដែល​ត្រូវ​រដ្ឋាភិបាល​កម្ពុជា​កំណត់ថា​នឹង​ប្រែក្លាយ​ឱ្យ​ទៅ​ប៉ូល​សេដ្ឋកិច្ច​ ១ នៅក្នុង​ចំណោម​ប៉ូល​សេដ្ឋកិច្ច​ទាំង​ ៤ របស់​កម្ពុជា​រួមមាន រាជធានី​ភ្នំពេញ ខេត្ត​សៀមរាប និង​ខេត្ត​ព្រះសីហនុ​។

លោក ស៊ា ឆៃលីន អគ្គនាយក​ក្រុមហ៊ុន​អចលនទ្រព្យ ស៊ីអិល រៀលធី ដែលមាន​គម្រោង​ដីឡូត៍​លក់​ជាច្រើន​កន្លែង​នៅ​ខេត្តមណ្ឌលគិរី​បាន​ប្រាប់​ភ្នំពេញ​ប៉ុស្តិ៍​កាលពី​ថ្ងៃទី​ ៣ ខែកុម្ភៈ ថា​ចាប់​តាំង​ការផ្ទុះ​ឡើង​នៃ​ជំងឺ​កូវីដ​១៩ សកម្មភាព​ពុះ​ដីឡូត៍​លក់​ក្នុង​ក្រុង​សែនមនោរម្យ ខេត្តមណ្ឌលគិរី​បាន​លេច​ឡើងជា​បន្តបន្ទាប់​។

លោក​បន្តថា មាន​កត្តា​ជាច្រើន​ដែលនាំឱ្យ​វិស័យ​អចលនទ្រព្យ ក៏ដូចជា ទីផ្សារ​ដីឡូត៍​ក្នុង​ខេត្ត​មណ្ឌលគិរី​មាន​ទីផ្សារ​ល្អ ដែល​រួមមាន​គោលនយោបាយ​របស់​រដ្ឋាភិបាល​ដែល​នឹង​ប្រែក្លាយ​ភូមិភាគ​ឦសាន​ទៅជា​ប៉ូល​សេដ្ឋកិច្ច​ ១ ក្នុងចំណោម ៤ នៅ​កម្ពុជា ការយកចិត្ត​ទុកដាក់​របស់​អាជ្ញាធរ​មូលដ្ឋាន​ទាក់ទង​នឹង​ការកំណត់ និង​បែងចែក​ចំណាត់ថ្នាក់​ដី ភាពល្អប្រសើរ​នៃ​បរិស្ថាន​ធម្មជាតិ កំណើន​ប្រជាជន​ចូលទៅ​រស់នៅ និង​ប្រកប​អាជីវកម្ម និង​គម្រោង​វិនិយោគ​ក្នុង​វិស័យ​ទេសចរណ៍​ជាច្រើន​ទៀត​។

លោក​ថ្លែងថា​៖ «​ចំណុច​ទាំងនេះ​កំពុង​ធ្វើឱ្យ​ទីផ្សារ​អចលនទ្រព្យ ក៏ដូចជា គម្រោង​ពុះ​ដីឡូត៍​ក្នុង​ខេត្ត​មណ្ឌលគិរី​ទទួលបាន​នូវ​ការចាប់​អារម្មណ៍​កាន់តែច្រើន​»​។

លោក​ប្រាប់ទៀត​ថា ជាមួយនឹង​សម្ទុះ​នៃ​ការអភិវឌ្ឍ​ពេលនេះ​លោក​គិត​ថា សកម្មភាព​ពុះ​ដីឡូត៍​នឹងមាន​កាន់តែច្រើន​នៅក្នុង​ខេត្តមណ្ឌលគិរី ហើយ​តម្លៃ​ក៏​នឹង​កើនឡើង​តាម​នោះដែរ​។

បើ​យោងតាម​លោក ឆៃលីន បច្ចុប្បន្ន​ដី​នៅ​តំបន់​ល្អ​បំផុត​ក្នុង​ក្រុង​សែនមនោរម្យ​មាន​តម្លៃ​ប្រមាណ ១ ៥០០ ​ដុល្លារ​ក្នុង​ ១ ​ម៉ែត្រការ៉េ និង​ដី​តំបន់​ជាយក្រុង​អាចមាន​តម្លៃ​ក្រោម ១០០ ​ដុល្លារ​។

អគ្គនាយក​ក្រុមហ៊ុន​អចលនទ្រព្យ KFA លោក នួន រិទ្ធី ដែលមាន​ដីឡូត៍​ពុះ​លក់​នៅ​ខេត្តមណ្ឌលគិរី​ដែរនោះ​បាន​និយាយថា ស្ថានភាព​ទីតាំង​ភូមិសាស្ត្រ​ដែលមាន​ធម្មជាតិ​ស្រស់បំព្រង និង​ផែនការអភិវឌ្ឍន៍​របស់​រដ្ឋាភិបាល​បានធ្វើឱ្យ​គម្រោង​អភិវឌ្ឍន៍​ជាច្រើន​ងាក​ទៅ​ទីនោះ​។ លោក​បន្តថា បច្ចុប្បន្ន​ទីផ្សារ​ដីឡូត៍​នៅ​ខេត្តមណ្ឌលគិរី​កំពុង​មាន​តម្រូវការ​កើនឡើង​ជា​បន្តបន្ទាប់​។

លោក​មានប្រសាសន៍​ថា​៖ «​តម្រូវការ​ដីឡូត៍​នៅពេលនេះ​មាន​ច្រើន គ្រាន់តែ​ថា​យើង​ពិបាក​រក​ដី​ធំៗ​យក​មក​ពុះ​លក់ ព្រោះ​ស្ថានភាព​នៅ​ទីនោះ​មាន​ភ្នំ និង​ខ្ពង់រាប​ច្រើន​ធ្វើឱ្យ​ពិបាក​ពុះ​លក់​ជា​ឡូត៍​តូចៗ​»​។

លោក​បន្ថែមទៀត​ថា តាមរយៈ​គម្រោង​អភិវឌ្ឍន៍​ហេដ្ឋារចនាសម្ព័ន្ធ​ជា​បន្តបន្ទាប់​វិស័យ​អចលនទ្រព្យ​ក្នុង​ខេត្តមណ្ឌលគិរី​នឹង​មាន​ការរីកចម្រើន​ខ្លាំង​នៅពេល​ខាងមុខ​ឆាប់ៗ​នេះ​។

លោក​លើកឡើង​ទៀតថា​៖ «​នៅពេលនេះ​គេ​ឃើញ​មាន​គម្រោង​អភិវឌ្ឍន៍​ជា​បន្តបន្ទាប់​នាំគ្នា​ឆ្ពោះទៅ​ទីនោះ​ដែលមាន​ដូចជា សណ្ឋាគារ ភោជនីយដ្ឋាន បឹងហ្គាឡូ កន្លែង​លម្ហែ និង​លំនៅឋាន​ជាដើម​»​។

អ្នកនាំពាក្យ​រដ្ឋបាលខេត្ត​មណ្ឌលគិរី​លោក នាង វណ្ណៈ បាន​និយាយថា ផែនការអភិវឌ្ឍន៍​តំបន់​ភូមិភាគ​ឦសាន គម្រោង​ព្រលានយន្តហោះ​នៅ​ស្រុក​អូររាំង​ (​ខេត្តមណ្ឌលគិរី​) ​បាន​ធ្វើឱ្យ​ខេត្តមណ្ឌលគិរី​ផ្លាស់ប្តូរ​មុខមាត់​លើ​គ្រប់​វិស័យ​។ លោក​ប្រាប់ទៀតថា សម្រាប់​វិស័យ​អចលនទ្រព្យ​ក៏​ចាប់ផ្តើម​មាន​ទីផ្សារ​ល្អ​ដែរ ពិសេស​ក្នុង​ក្រុង​សែនមនោរម្យ​។

លោក​ថ្លែងថា​៖ «​ចលនា​នៃ​ការពុះ​ដីឡូត៍​ចាប់ផ្តើម​មាន​ជា​បណ្តើរៗ​ហើយ​ក្នុង​ក្រុង​សែនមនោរម្យ ហើយ​តម្លៃ​នៅ​កណ្តាល​ក្រុង​ក៏កើនឡើង​ដែរ ពិសេស​កន្លែង​មាន​ហេដ្ឋារចនាសម្ព័ន្ធ​ល្អប្រសើរ​»​។ លោក​បន្ថែមថា​៖ «​កំណើន​ចំនួន​គម្រោង​អភិវឌ្ឍន៍ និង​ផែនការ​សាងសង់​ព្រលានយន្តហោះ​នឹង​ធ្វើឱ្យ​ទីផ្សារ​ដីឡូត៍ រីកចម្រើន​កាន់តែ​ខ្លាំង​ក្នុង​ខេត្តមណ្ឌលគិរី​»​។

ទីស្តីការគណៈរដ្ឋមន្ត្រី​កាលពី​ថ្ងៃ ៣១ ខែធ្នូ ឆ្នាំ​ ២០២០ បានចេញ​លិខិត​មួយ​ដែល​សម្រេច​ជាគោលការណ៍​ជ្រើសរើស​ក្រុមហ៊ុន Powerchina International Group ជា​ដៃគូ​ឯកជន​ក្នុង​ការសិក្សា និង​អភិវឌ្ឍ​សំណើ​គម្រោង​សង់​អាកាសយានដ្ឋាន​ថ្មី​ខ្នាត​តំបន់​នៅ​មណ្ឌលគិរី​៕LA

វីដេអូ៖

អត្ថបទគួរចាប់អារម្មណ៍