ភ្នំពេញៈ ការសម្រេចបិទអាជីវកម្មល្បែងអនឡាញកាលពីចុងឆ្នាំ ២០១៩ ព្រមជាមួយការរីករាលដាលនៃជំងឺកូវីដ ១៩ បានធ្វើឲ្យទីផ្សារអចលនទ្រព្យក្នុងខេត្តព្រះសីហនុចាប់ពីដើមឆ្នាំ ២០២០ រហូតមកទល់ពេលនេះមិនមានសញ្ញាវិជ្ជមានទេ ប៉ុន្តែវាអាចនឹងមានភាពល្អប្រសើរឡើងវិញ បន្ទាប់ពីជំងឺកូវីដ១៩ បញ្ចប់ទៅ។ នេះបើតាមក្រុមអ្នកជំនាញក្នុងវិស័យអចលនទ្រព្យនៅកម្ពុជា។
ការទទួលបានភ្ញៀវទេសចរ និងវិនិយោគិនជនជាតិចិនក្នុងចំនួនដ៏ច្រើនក្នុងខេត្តព្រះសីហនុបានធ្វើឲ្យតម្លៃ និងសកម្មភាពទិញ លក់ ជួលអចលនទ្រព្យនៅទីនោះហក់ឡើងយ៉ាងលឿនរហូតមិនអាចព្យាករបាននាអំឡុងឆ្នាំ ២០១៨-២០១៩ មុនពេលដែលវាត្រូវធ្លាក់ចុះវិញ បន្ទាប់ពីរដ្ឋាភិបាលសម្រេចបិទអាជីវកម្មល្បែងអនឡាញកាលពីថ្ងៃទី ៣១ ខែ ធ្នូ ឆ្នាំ ២០១៩ ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានប្រាប់ភ្នំពេញប៉ុស្តិ៍កាលពីម្សិលម្សិលថា ការធ្លាក់ចុះសកម្មភាពរបស់វិនិយោគិនចិន និងជំងឺកូវីដ១៩ បានធ្វើឲ្យអចលនទ្រព្យក្នុងខេត្តព្រះសីហនុ មិនមានទីផ្សាររស់រវើកដូចមុនឡើយ ខណៈតម្លៃក៏បានធ្លាក់ចុះច្រើនដែរ បើធៀបនឹងរយៈពេលដូចគ្នាកាលពីឆ្នាំ ២០១៩។ លោកបន្តថា ជារួមទីផ្សារអចលនទ្រព្យក្នុងខេត្តព្រះសីហនុធ្លាក់ចុះចាប់តាំងពីពេលរដ្ឋាភិបាលប្រកាសបិទល្បែងអនឡាញកាលពីចុងឆ្នាំ ២០១៩។
លោកថ្លែងថា៖ «តម្លៃធ្លាក់ចុះនៅពេលនេះអាចនិយាយថា កំពុងខិតកាន់តែកៀកទៅនឹងតម្លៃសេដ្ឋកិច្ចពិតប្រាកដ ដោយមិនមែនជាតម្លៃពពុះសាប៊ូទៅតាមការចង់បានរបស់អ្នកទិញ និងលក់ដូចពេលមុនទៀតទេ»។
បើតាមលោក សុខនីម នៅអំឡុងពេលអចលនទ្រព្យនៅទីនោះកំពុងមានសម្ទុះខ្លាំង តំបន់ខ្លះតម្លៃអចលនទ្រព្យបានកើនលើសពីតម្លៃទីផ្សារជាក់ស្តែងដល់ ១៥០ ភាគរយក៏មាន។
លោកបន្ថែមថា ជាមួយនឹងសកម្មភាពកែលម្អហេដ្ឋារចនាសម្ព័ន្ធនៅក្នុងខេត្តនាពេលនេះ លោករំពឹងថាតម្លៃអចលនទ្រព្យនៅខេត្តព្រះសីហនុនឹងកើនឡើងវិញនៅពេលជំងឺកូវីដ ១៩ បញ្ចប់ទៅវិញ ដោយតម្លៃពេលនោះក៏មិនមែនជាតម្លៃបែបពពុះសាប៊ូទៀតទេ។
លោក អ៊ឹម សេងហួ ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចាំខេត្តព្រះសីហនុបានប្រាប់ថា ការបិទសកម្មភាពល្បែងអនឡាញនៅកម្ពុជាបានធ្វើឲ្យការទិញ លក់ ជាពិសេសទីផ្សារជួលអចលនទ្រព្យធ្លាក់ចុះយ៉ាងច្រើនក្នុងខេត្តព្រះសីហនុ។ បច្ចុប្បន្នដីក្នុងទីតាំងល្អបំផុតដែលមានតម្លៃក្នុងរង្វង់ ៥ ០០០ ដុល្លារក្នុង ១ ម៉ែត្រការ៉េ កាលពីអំឡុងឆ្នាំ ២០១៩ បានធ្លាក់មកនៅក្នុងរង្វង់ជាង ៣ ៥០០ ដុល្លារប៉ុណ្ណោះ។ លោកអះអាងថា៖ «ការធ្លាក់តម្លៃដីនាពេលនេះក៏មាន ១ ផ្នែកដែលបណ្តាលពីជំងឺកូវីដ១៩ ផងដែរ»។
ជាមួយនឹងក្តីសុទិដ្ឋិនិយមដែលអាជ្ញាធរកំពុងរៀបចំអភិវឌ្ឍហេដ្ឋារចនាសម្ព័ន្ធនៅទីនោះលោក សេងហួ បានបញ្ជាក់ថា៖ «បន្ទាប់ពីកូវីដ១៩ បញ្ចប់ទៅខ្ញុំរំពឹងថា ស្ថានភាពទីផ្សារអចលនទ្រព្យនឹងមានភាពល្អឡើងវិញ តែការកើនឡើងនេះនឹងមានលក្ខណៈសន្សឹមៗដោយមិនគំហុកដូចមុនទេ»។
តម្លៃអចលនទ្រព្យនៅពេលនេះ បើធៀបនឹងរយៈពេលដូចគ្នាកាលពីឆ្នាំមុន បានធ្លាក់ចុះចន្លោះពី ២០-៣០ ភាគរយ ខណៈតម្លៃជួលធ្លាក់លើសពី ៥០ ភាគរយ។ នេះបើតាមលោក សេងហួ។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានប្រាប់ភ្នំពេញ-ប៉ុស្តិ៍ថា ការរីករាលដាលជំងឺសកលកូវីដ១៩ បានធ្វើឲ្យសកម្មភាពសេដ្ឋកិច្ច និងទីផ្សារអចលនទ្រព្យគ្រប់ទីកន្លែងលើពិភពលោកត្រូវធ្លាក់ចុះមួយកម្រិត ដោយមិនមែនមានតែក្នុងខេត្តព្រះសីហនុទេ។ ទោះយ៉ាងណាអ្វីៗនឹងមានភាពល្អប្រសើរឡើងវិញនៅពេលដែលជំងឺនេះត្រូវថយឥទ្ធិពល ឬត្រូវលុបបំបាត់ចោលទាំងស្រុង។
លោកបន្តថា ជាមួយគ្នានេះលោកក៏មានសុទិដ្ឋិនិយមថា គ្រប់វិស័យទាំងអស់ក្នុងខេត្តព្រះសីហនុនឹងមានសម្ទុះឡើងវិញយ៉ាងឆាប់រហ័ស ខណៈបច្ចុប្បន្នអាជ្ញាធរកំពុងខិតខំយ៉ាងសកម្មក្នុងការកសាង និងជួសជុលប្រព័ន្ធហេដ្ឋារចនាសម្ព័ន្ធដ៏ច្រើន។
លោកថ្លែងថា៖ «ការកសាងហេដ្ឋារចនាសម្ព័ន្ធដ៏ច្រើននៅពេលនេះនឹងជំរុញឲ្យកំណើនសេដ្ឋកិច្ចក្នុងខេត្តមានសម្ទុះខ្លាំងខ្ពស់នៅពេលខាងមុខ ហើយនៅពេលនោះទីផ្សារអចលនទ្រព្យក៏នឹងមានភាពល្អប្រសើរដែរ»។
បើតាមលោក ភារម្យ គិតរហូតមកដល់ពេលនេះការសាងសង់ផ្លូវថ្នល់ ទឹកស្អាត និងប្រព័ន្ធលូបង្ហូរទឹកក្នុងក្រុងព្រះសីហនុសម្រេចបានប្រមាណ ៧០ ភាគរយហើយ ដោយអាចនឹងត្រូវរួចរាល់ទាំងស្រុងនៅក្នុងត្រីមាសទី ១ ឆ្នាំ ២០២១ ខាងមុខ៕