ក្រុងប៉េកាំងៈ ទីផ្សារអចលនទ្រព្យរបស់ប្រទេស ចិន នឹងមានស្ថិរភាពនៅឆ្នាំនេះ ខណៈដែលអាជ្ញាធរថ្នាក់កណ្ដាលសង្កត់ធ្ងន់បន្ថែមទៀតក្នុងការបង្កើតយន្តការរយៈពេលវែងសម្រាប់ការអភិវឌ្ឍប្រកបដោយភាពល្អប្រសើររបស់វិស័យនេះ។
កិច្ចប្រជុំរបស់ការិយាល័យនយោបាយនៃគណៈកម្មាធិការកណ្ដាលបក្សកុម្មុយនីស្ដចិន (CPC) ដែលបានធ្វើឡើងកាលពីខែមេសា បានបញ្ជាក់ជាថ្មីថា លំនៅឋាន គឺសម្រាប់រស់នៅ មិនមែនសម្រាប់កេងចំណេញថ្លៃទេ និងបានបញ្ជាក់ពីការបង្កើតយន្តការរយៈពេលវែងហៅថា «ទីក្រុងមួយ គោលនយោបាយមួយ»។
លោក Shaun Brodie នាយកជាន់ខ្ពស់ និងជាប្រធានផ្នែកស្រាវជ្រាវអ្នកកាន់កាប់លំនៅឋានប្រចាំក្រុមហ៊ុន Cushman and Wakefield ក្នុងប្រទេស ចិន បានថ្លែងថា៖ «នេះបានបង្ហាញថា តម្លៃដីប្រកបដោយស្ថិរភាព តម្លៃលំនៅឋានប្រកបដោយស្ថិរភាព និងការរំពឹងទុកពីតម្លៃប្រកបដោយស្ថិរភាព គួរតែទប់ស្កាត់ទីផ្សារអចលនទ្រព្យមិនឲ្យឡើង និងធ្លាក់ចុះថ្លៃខ្លាំង ហើយនេះនឹងជាទិសដៅបទប្បញ្ញត្តិដ៏សំខាន់សម្រាប់ពេលអនាគត»។
ដោយសារការខិតខំប្រឹងប្រែងជាប្រចាំដោយអាជ្ញាធរថ្នាក់កណ្ដាល និងរដ្ឋាភិបាលមូលដ្ឋាន ទីផ្សារលំនៅឋានរបស់ប្រទេស ចិន បានធ្វើឲ្យមានស្ថិរភាពទាក់ទងនឹងចំនួនលក់ និងតម្លៃលក់ក្នុងអំឡុងត្រីមាសទី១ ឆ្នាំនេះ។ នេះបើយោងតាមការស្រាវជ្រាវដោយក្រសួងអភិវឌ្ឍន៍លំនៅឋាន និងទីក្រុងជនបទ (MHURD) និងមជ្ឈមណ្ឌលស្រាវជ្រាវការអភិវឌ្ឍរបស់ក្រុមប្រឹក្សារដ្ឋ (DRC)។
ទិន្នន័យបានពីការិយាល័យជាតិស្ថិតិ (NBS) ចិនបានបង្ហាញថា ទំហំផ្ទៃក្រឡាដុលសរុបដែលត្រូវបានទិញលក់ចាប់ពីខែមករាដល់ខែមីនា បានធ្លាក់ចុះ ០,៩ ភាគរយ ធៀបនឹងរយៈពេលដូចគ្នាកាលពីឆ្នាំមុន មកនៅត្រឹម ២៩៨ លានម៉ែត្រការ៉េ ខណៈដែលតម្លៃប្រតិបត្តិការទិញលក់បានកើនឡើង ៥,៦ ភាគរយធៀបនឹងរយៈពេលដូចគ្នាកាលពីឆ្នាំមុន ដល់ ២,៧ ពាន់ពាន់លានយន់ (៣៩៩ ពាន់លានដុល្លារ)។
លោក Yao Yao ប្រធានផ្នែកស្រាវជ្រាវប្រចាំក្រុមហ៊ុនពិគ្រោះយោបល់ផ្នែកអចលនទ្រព្យ JLL China បានថ្លែងថា៖ «ស្របជាមួយនឹងការផ្លាស់ប្តូរសេដ្ឋកិច្ចរបស់យើងពីកំណើនរហ័សទៅជាកំណើនវៃឆ្លាត វិស័យលំនៅឋានកំពុងអភិវឌ្ឍក្នុងទិសដៅដែលមានស្ថិរភាពដូចគ្នាផងដែរ»។
យោងតាមទិន្នន័យរបស់ក្រុមហ៊ុន JLL ដែលតាមដានវិស័យអចលនទ្រព្យទូទាំងប្រទេស ចិន ទំហំជួញដូរលំនៅឋានបានធ្លាក់ចុះ ២៩,២ ភាគរយ នៅត្រីមាសទី១ ឆ្នាំនេះធៀបនឹងត្រីមាសទី៤ ឆ្នាំ ២០១៨ ក្នុងទីក្រុងដែលចាប់អារម្មណ៍ចំនួន ២០ និងបានធ្លាក់ចុះ ៨,៧ ភាគរយបើធៀបនឹងរយៈពេលដូចគ្នាកាលពីឆ្នាំមុន។
លោក Yao បានបន្ថែមថា ទោះបីជាមានកំណើនបន្តិចបន្តួចក្នុងទីក្រុងថ្នាក់ទី៣ ក៏ដោយ ក៏តម្លៃលំនៅឋាននៅទីក្រុងលំដាប់ថ្នាក់ទី១ និងទី២ បានរក្សាស្ថិរភាពក្នុងអំឡុងខែមករា ដល់ខែមីនានេះ។
លោក Yang Yuechen នាយក និងជាប្រធានផ្នែកស្រាវជ្រាវប្រចាំក្រុមហ៊ុន Knight Frank ជាដែលក្រុមហ៊ុនពិគ្រោះយោបល់ផ្នែកអចលនទ្រព្យមួយផ្សេងទៀតបានថ្លែងថា៖ «ការស្រាវជ្រាវបានបង្ហាញថា ទីផ្សារលំនៅឋានរបស់ប្រទេស ចិន កំពុងធ្វើឲ្យមានស្ថិរភាពស្ថិតក្រោមវិធានការជាច្រើន ហើយតម្រូវការទិញលំនៅឋានរបស់ប្រជាជនកំពុងងាកទៅរកភាពសមហេតុផល»។
ប៉ុន្តែការអង្កេតរបស់ក្រសួងអភិវឌ្ឍន៍លំនៅឋាន និងទីក្រុងជនបទចិន បានប្រកាសអាសន្នដោយសារកំណើនលក់ដី និងអចលនទ្រព្យក្នុងទីក្រុងសំខាន់ៗមួយចំនួននៅត្រីមាសទី១។
យោងតាមលោក Brodie មកពីក្រុមហ៊ុន Cushman and Wakefield ទីផ្សារសាងសង់លំនៅឋាន និងទីផ្សារដីសម្រាប់សាងសង់លំនៅឋានក្នុងទីក្រុងសំខាន់ៗមួយចំនួន បានស្ទុះងើបឡើងវិញ។ ទាំងតម្លៃប្រតិបត្តិការទិញលក់អចលនទ្រព្យលំនៅឋាន និងតម្លៃផ្ទៃដីសម្រាប់សាងសង់លំនៅឋានបានកើនឡើងក្នុងកម្រិតមធ្យម។ លើសពីនេះ ចំនួនដីឡូត៍ថ្លៃៗដែលបានលក់ចេញបានកើនឡើងយ៉ាងខ្លាំង។
លោក Brodie បានថ្លែងថា៖ «មូលហេតុដ៏សំខាន់ គឺទីផ្សារដីបានងាកចេញបន្តិចពីតម្លៃជាមធ្យមជាប្រវត្តិសាស្ដ្ររបស់ខ្លួន ក្នុងរយៈពេល ២-៣ ឆ្នាំចុងក្រោយនេះ ហើយអនុបាតតម្លៃធៀបនឹងប្រតិបត្តិការខ្ពស់របស់ដី បានបណ្ដាលឲ្យក្រុមហ៊ុនសាងសង់មានចំណាប់អារម្មណ៍យ៉ាងខ្លាំង»។
ទោះជាយ៉ាងណា កំណើនបែបនោះ គឺកំណើនតិចបំផុត និងជាសន្សឹមៗ។
លោក Hui Jianqiang ប្រធានផ្នែកស្រាវជ្រាវប្រចាំក្រុមហ៊ុន Beijing Zhongfang-yanxie Technology Service Ltd បានថ្លែងថា៖ «កំណើនប្រតិបត្តិការទិញលក់ និងតម្លៃលំនៅឋានក្នុងទីក្រុងលំដាប់ទី១ និងទី២ សំខាន់ៗមួយចំនួនត្រូវបានគាំទ្រដោយតម្រូវការប្រកបដោយស្ថិរភាព ហើយតម្រូវការនោះនឹងជំរុញទីផ្សារលំនៅឋានរបស់ប្រទេសនេះឲ្យរីកចម្រើន និងអភិវឌ្ឍន៍»។
ក្រុមអ្នកជំនាញក្នុងឧស្សាហកម្មនេះបានយល់ស្របថា តាមរយៈការអនុវត្តដោយតឹងរ៉ឹងតាមគោលការណ៍ណែនាំរបស់អាជ្ញាធរថ្នាក់កណ្ដាល «ទីក្រុងមួយ គោលនយោបាយមួយ» ស្របជាមួយនឹងលក្ខខណ្ឌផ្ទាល់ខ្លួនរដ្ឋាភិបាលថ្នាក់មូលដ្ឋាន រដ្ឋាភិបាលទាំងនេះកំពុងឃ្លាំមើលយ៉ាងដិតដល់លើទីផ្សារដី និងទីផ្សារលំនៅឋាន ហើយត្រូវត្រៀមខ្លួនជាមុនក្នុងការដាក់ចេញនូវបទប្បញ្ញត្តិថ្មីៗ និងការគ្រប់គ្រង ប្រសិនបើទីផ្សារនេះបង្ហាញសញ្ញារីកចម្រើនខ្លាំងហួសហេតុ។
គោលនយោបាយទាំងនេះ ទំនងជានឹងបន្តកំណត់ទិសដៅលើទីក្រុងនីមួយៗ ដែលទទួលបានការរីកចម្រើនខ្លាំងហួសហេតុមួយចំនួន ដើម្បីរក្សាកំណើនតម្លៃទីផ្សារឲ្យមានស្ថិរភាព។ គោលនយោបាយទូទាំងប្រទេសមិនទំនងជានឹងត្រូវដាក់ចេញនោះទេ ដោយសារតែទីផ្សាររួមនៅពេលបច្ចុប្បន្ន មានស្ថិរភាពដោយមិនឃើញមានកំណើន ឬការធ្លាក់ចុះតម្លៃច្បាស់លាស់នោះទេ៕ Poeple''s Dialy''s/LA