ភ្នំពេញៈ រាជធានីភ្នំពេញបានទទួលនូវគម្រោងវិនិយោគចំនួន ៥៨៣ ស្មើនឹងទុនវិនិយោគសរុបជិត ១,៤ ពាន់លានដុល្លារ ក្នុងរយៈពេល ៥ ខែដើមឆ្នាំ ២០២០ នេះ បើទោះបីជាការរីករាលដាលនៃជំងឺកូវីដ ១៩ បង្កផលប៉ះពាល់ខ្លះក៏ដោយ។ នេះបើតាមប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ។
ថ្លែងនៅក្នុងសន្និសីទសារព័ត៌មានស្តីពី «វឌ្ឍនភាព និងទិសដៅការងារបន្ដរបស់រដ្ឋបាលរាជធានីភ្នំពេញ» កាលពីថ្ងៃអង្គារលោក សារិន វណ្ណា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញបានប្រាប់ឲ្យដឹងថា ចំនួនគម្រោងសាងសង់ដែលភ្នំពេញទទួលបាននៅក្នុងរយៈពេល ៥ ខែដំបូងនេះមានតម្លៃសរុប ១,៣៧ ពាន់លានដុល្លារ លើគម្រោងសរុប ៥៨៣ ដែលស្មើនឹងផ្ទៃក្រឡាសំណង់សរុប ២,៨៨ លានម៉ែត្រក្រឡា។
លោកបានប្រាប់ទៀតថា ទោះយ៉ាងណាជំងឺកូវីដ ១៩ ក៏បានធ្វើឲ្យប៉ះពាល់ដល់វិនិយោគិនបរទេសដែលកំពុងបណ្តាក់ទុនលើវិស័យសំណង់នៅកម្ពុជាដែរ។ លោកបានថ្លែងថា៖ «ការវិនិយោគវិស័យសំណង់របស់យើងនៅក្នុងអំឡុងពេលនេះ គឺជាប់ទាក់ទងទៅនឹងជនបរទេសច្រើន ដូច្នេះការពាក់ព័ន្ធនេះក៏កំពុងធ្វើឲ្យវិស័យសំណង់របស់យើងជួបឧបសគ្គខ្លះៗដែរ»។
លោក ជីវ ស៊ីវផេង ប្រធានគ្រប់គ្រងទូទៅនៃសមាគមអ្នកសាងសង់កម្ពុជាបានប្រាប់ភ្នំពេញប៉ុស្តិ៍ ថាបើទោះបីជាជំងឺកូវីដ ១៩ បានធ្វើឲ្យគម្រោងសាងសង់មួយចំនួននៅក្នុងរាជធានីភ្នំពេញបន្ថយសកម្មភាពសាងសង់ ប៉ុន្តែនៅតាមការដ្ឋានសាងសង់គម្រោងធំៗ គឺសុទ្ធតែកំពុងដំណើរការសាងសង់ទៅមុខជាធម្មតា។ លោកបន្ថែមថា ការទទួលបានគម្រោងវិនិយោគសំណង់ថ្មីៗគឺបញ្ជាក់ពីទំនុកចិត្ត និងភាពរឹងមាំរបស់វិនិយោគិនចំពោះស្ថានភាពសេដ្ឋកិច្ច និងនយោបាយរបស់ប្រទេសកម្ពុជា។
លោកនិយាយថា៖ «កំណើនសេដ្ឋកិច្ចនឹងនៅតែបន្តជួយលើកកម្ពស់វិស័យសំណង់នៅកម្ពុជា។ សំណង់ធំ និងខ្ពស់ៗនឹងបន្តកើនឡើងកាន់តែច្រើនក្នុងរាជធានីភ្នំពេញ»។
លោក ស៊ីវផេង បានប្រាប់ថា តាមលោកដឹងចំនួនគម្រោង វិនិយោគដែលបានដាក់ពាក្យសុំច្បាប់សាងសង់ និងទទួលបានការអនុម័តពីអាជ្ញាធរក្នុងរយៈពេល ៥ ខែឆ្នាំ ២០២០ នេះមិនបានធ្លាក់ចុះទេធៀបនឹងរយៈពេលដូចគ្នាកាលពីឆ្នាំមុន។
អគ្គនាយកក្រុមហ៊ុនអចលនទ្រព្យ KW សែនសុខ លោក សំ សុខនឿន បាននិយាយថា វិស័យសំណង់ក្នុងរាជធានីភ្នំពេញនៅពេលនេះមិនមានភាពរស់រវើកដូចកាលពីឆ្នាំមុនទេ តែវាមាននឹងមានសម្ទុះខ្លាំងនៅពេលដែលពិភពលោកអាចបញ្ឈប់ការឆ្លងនៃជំងឺកូវីដ ១៩ បាន។
លោកបន្តថា ជាមួយនឹងគោលនយោបាយបើកចំហរបស់រដ្ឋាភិបាល លោករំពឹងថានឹងមានវិនិយោគិនបរទេសជាច្រើននាក់បន្ថែមទៀតចូលមកបណ្តាក់ទុននៅកម្ពុជាបន្ទាប់ពីកូវីដ ១៩ ត្រូវបានបញ្ចប់។
លោកថ្លែងថា៖ «តម្លៃ និងគម្រោងដែលអនុម័តក្នុងរាជធានីភ្នំពេញមានច្រើន តែការសាងសង់អាចនឹងមានសម្ទុះខ្លាំងនៅចុងឆ្នាំនេះ»។
បើតាមលោកប្រធានមន្ទីររៀបចំដែនដី នៅភ្នំពេញបច្ចុប្បន្នមានអគារខ្ពស់ៗចាប់ពី ៥ ជាន់ឡើងទៅចំនួន ១ ២៩២ អគារ និងសំណង់លក្ខណៈបុរីមានចំនួន ២៤៤៕LA