.jpg)
ទិដ្ឋភាពនៅការដ្ឋានសាងសង់មួយក្នុងទីក្រុងបាងកក។ រូបថត AFP
ក្រុងបាងកកៈ មន្ដ្រីជាន់ខ្ពស់បានឲ្យដឹងដោយលើកឡើងពីស្ថានភាពហិរញ្ញវត្ថុដ៏រឹងមាំរបស់ក្រុមហ៊ុនអភិវឌ្ឍន៍ធំៗថាធនាគារកណ្ដាលប្រទេស ថៃ មិនបារម្ភអំពីកម្ចីបុរេហិរញ្ញប្បទាន (pre-finance loan) សម្រាប់ក្រុមហ៊ុនអភិវឌ្ឍន៍អចលនទ្រព្យ និងកម្ចីអចលនទ្រព្យខូចនោះទេ។ នេះបើយោងតាមកាសែតបាងកកប៉ុស្តិ៍។
លោក Tharith Panpiemras នាយកជាន់ខ្ពស់ទទួលបន្ទុកការគ្រប់គ្រងធនាគារ និងការវាយតម្លៃហានិភ័យត្រូវបានដកស្រង់សម្តីដោយកាសែតបាងកកប៉ុស្តិ៍ថា កម្ចីអចលនទ្រព្យបន្តកើនឡើង ខណៈដែលកម្ចីមិនដំណើរការ (NPL) របស់ឧស្សាហកម្មនេះអាចគ្រប់គ្រងបាន ដូច្នេះមិនមានការបារម្ភអំពីការផ្តល់ហិរញ្ញប្បទានគម្រោង និងគុណភាពទ្រព្យសកម្មនោះទេ ទោះបីជាអនុបាតកម្ចីខូចនៃការផ្ដល់កម្ចីទិញផ្ទះកើនឡើងក្តី។
លោកថ្លែងថា៖ «ធនាគារជាធម្មតាផ្តល់ជូនកម្ចីបុរេហិរញ្ញប្បទានដល់ក្រុមហ៊ុនអភិវឌ្ឍន៍ធំៗដែលមានហិរញ្ញវត្ថុរឹងមាំ និងបទពិសោធរយៈពេលវែងផ្នែកអាជីវកម្ម ដូច្នេះអនុបាត NPL នៃកម្ចីគម្រោងមានស្ថិរភាព»។
ក្រុមហ៊ុនអភិវឌ្ឍន៍ធំៗក្នុងស្រុកបានកែតម្រូវយុទ្ធសាស្ដ្រអាជីវកម្មរបស់ពួកគេតាមការធ្លាក់ចុះសេដ្ឋកិច្ច និងទីផ្សារអចលនទ្រព្យ ជាពិសេសនៅក្នុងគម្រោងអគារខ្ពស់ៗ។
ក្រៅពីកម្ចីធនាគារ និងឧបករណ៍បំណុល ទីផ្សារមូលបត្របំណុលគឺជាប្រភពផ្ដល់មូលនិធិដ៏សំខាន់មួយសម្រាប់ក្រុមហ៊ុនអភិវឌ្ឍន៍អចលនទ្រព្យធំៗ និងជួយកាត់បន្ថយហានិភ័យឥណទានរបស់វិស័យធនាគារ។
ប៉ុន្តែធនាគារកណ្ដាលថៃកំពុងត្រួតពិនិត្យមើលចំណាត់ថ្នាក់មិនមែនវិនិយោគ និងមូលបត្របំណុលដែលគ្មានចំណាត់ថ្នាក់រួមទាំងបំណុលមួយចំនួនដែលបោះផ្សាយដោយក្រុមហ៊ុនអភិវឌ្ឍន៍តូចៗ។
យោងតាមទិន្នន័យគណៈកម្មការមូលបត្រ មូលបត្របំណុលស្ថិតក្នុងចំណាត់ថ្នាក់មិនមែនវិនិយោគ និងមូលបត្របំណុលដែលគ្មានចំណាត់ថ្នាក់គិតត្រឹមខែកញ្ញាឆ្នាំ ២០១៩ មានតម្លៃ ២៣៨,៧១ ពាន់លានបាតកើនឡើង ១៨ ភាគរយធៀបនឹងរយៈពេលដូចគ្នាកាលពីឆ្នាំ ២០១៨។
លោក Virasak Sutanthavibul អនុប្រធានប្រតិបត្តិជាន់ខ្ពស់នៅធនាគារ Bangkok Bank បានឲ្យដឹងថា ធនាគារផ្ដល់កម្ចីដោយផ្តោតការយកចិត្តទុកដាក់លើក្រុមហ៊ុនអភិវឌ្ឍន៍ធំៗដែលមានបទពិសោធរយៈពេលវែង និងកេរ្ដិ៍ឈ្មោះល្អ។ កំណត់ត្រាតាមដានអាជីវកម្ម អនុបាតបំណុលធៀបនឹងមូលធន និងការលក់មុនរបស់គម្រោងជានីមួយៗនៅតែត្រូវការការវិភាគអំពីកម្ចី។
តម្រូវការកម្ចីបុរេហិរញ្ញប្បទានសម្រាប់គម្រោងការវិនិយោគថ្មីៗ ជាពិសេសខុនដូ បានថមថយ បន្ទាប់ពីការកម្រិតកំណត់កម្ចីធៀបនឹងតម្លៃដែលគ្រប់គ្រងកម្ចីទិញផ្ទះ ត្រូវបានអនុវត្តកាលពីខែមេសាឆ្នាំមុន។
លោក Surat Leelataviwat អនុប្រធានប្រតិបត្តិធនាគារកសិករ (KBank) ឲ្យដឹងថា ធនាគារ KBank នៅតែកំពុងផ្ដល់កម្ចីដល់វិស័យអចលនទ្រព្យ ប៉ុន្តែឈរលើមូលដ្ឋានជ្រើសរើស។ តម្រូវការកម្ចីអចលនទ្រព្យ និងកំណើនកម្ចីបុរេហិរញ្ញប្បទានរបស់ធនាគារនៅឆ្នាំនេះត្រូវបានរំពឹងថានឹងធ្លាក់ចុះស្របនឹងសេដ្ឋកិច្ចខ្សោយ និងទីផ្សារអចលនទ្រព្យទាប។
ធនាគារនេះបានព្យាករថា ការលក់គម្រោងលំនៅឋានថ្មីៗនៅឆ្នាំនេះនឹងធ្លាក់ចុះពី ១៥ ទៅ ៣០ ភាគរយ ធៀបនឹងឆ្នាំមុន ដោយការលក់ក្នុងទីផ្សារតាមខេត្តរំពឹងថា នឹងធ្លាក់ចុះពាក់កណ្ដាល៕ LA
