ទិដ្ឋភាពនៅការដ្ឋានសាងសង់លំនៅឋានតម្លៃសមរម្យ ១ កន្លែងក្នុងរាជធានីភ្នំពេញកាលពីដើមសប្តាហ៍នេះ។ រូបថត ហ៊ឹន ពិសី
ភ្នំពេញៈ ការកើនឡើងនៃចំនួនប្រជាជនរស់នៅទីប្រជុំជន និងរាជធានីភ្នំពេញ បានជំរុញឲ្យមានកំណើនអគារស្នាក់នៅក្នុងរយៈពេលប៉ុន្មានឆ្នាំចុងក្រោយនេះ ខណៈអាជ្ញាធរបានព្យាករថានៅឆ្នាំ ២០៣០ ចំនួនប្រជាជនដែលមករស់នៅទីប្រជុំជន ក្រុង និងរាជធានីនឹងកើនឡើងដល់ជិត ៨ លាននាក់។
ខុសប្លែកពីប៉ុន្មានឆ្នាំមុនកំណើនចំនួនប្រជាជននៅទីប្រជុំជនបានធ្វើឲ្យការសាងសង់លំនៅឋានដែលមានតម្លៃទាបកើនឡើងប្រជែងនឹងលំនៅឋានតម្លៃមធ្យម និងអគារស្នាក់នៅតម្លៃខ្ពស់។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បាននិយាយថាស្ទើរជិត ៨០ ភាគរយនៃសំណង់លំនៅឋានដែលកំពុង និងចាប់ផ្តើមសាងសង់នាពេលនេះគឺជាលំនៅឋានមានតម្លៃក្រោម ៤ ម៉ឺនដុល្លារ ដែលជាទីផ្សារកំពុងមានសម្ទុះកើនឡើងលឿនបំផុត។
លោកប្រាប់ទៀតថា៖ «ផ្ទះដែលមានតម្លៃក្រោម ៤ ម៉ឺនដុល្លារកំពុងមានទីផ្សារខ្លាំងដោយសារកំណើនសេដ្ឋកិច្ច និងចំនួនប្រជាជនវ័យក្មេងមានចំនួនច្រើន ហើយទីផ្សារនេះនឹងអាចបន្តរយៈពេលយូរជាបន្តទៀត»។
បើតាមលោកប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា តម្លៃលំនៅឋាននៅកម្ពុជាអាចចែកចេញជា ៣ ប្រភេទគឺក្រោម ៤ ម៉ឺនដុល្លារ តម្លៃចន្លោះពីជាង ៤-៨ ម៉ឺនដុល្លារ និងតម្លៃចាប់ពី ៨ ម៉ឺនដុល្លារឡើងទៅ។
យោងតាមលោក គីម ហ៊ាង គ្រាន់តែបុរីពិភពថ្មីក្នុងឆ្នាំ ២០១៧ បានសង់ផ្ទះដែលមានតម្លៃក្រោម ៥ ម៉ឺនដុល្លាររាប់ពាន់ខ្នង។ លោកបានអះអាងថា៖ «បច្ចុប្បន្នសម្រាប់ផ្ទះដែលមានតម្លៃចាប់ពីជាង ៨ ម៉ឺនឡើងទៅអាចនិយាយថា ពិបាកលក់»។
កាលពីឆ្នាំ ២០១៧ តម្លៃទុនវិនិយោគលើសំណង់លំនៅឋានមានចំនួនជាង ២,២ ពាន់លានដុល្លារ។ នេះបើយោងតាមរបាយការណ៍ពីក្រសួងរៀបចំដែនដី នគរូបនីយកម្ម និងសំណង់។
ការសិក្សារបស់ក្រសួងរៀបចំដែនដី នគរូបនីយកម្ម និងសំណង់ អំពីក្របខ័ណ្ឌយុទ្ធសាស្ត្រអភិវឌ្ឍន៍ទីក្រុងនៅកម្ពុជានាពេលកន្លងមកបានរកឃើញថាចំនួនប្រជាជនរស់នៅក្នុងទីប្រជុំជន ក្រុង និងរាជធានីក្នុងឆ្នាំ ២០១៤ មានប្រមាណ ៤,៥ លាននាក់ដែលស្មើនឹង ២៧,១ ភាគរយនៃចំនួនប្រជាជនទាំងអស់។ ចំនួននេះនឹងបន្តកើនឡើងដល់ ៧,៩២ លាននាក់ ឬជាង ៤៤ ភាគរយនៅឆ្នាំ ២០៣០។
លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានលើកឡើងក្នុងវេទិកា Tall Building កាលពីថ្ងៃអង្គារថារយៈពេល ១៥ ឆ្នាំ (ពីឆ្នាំ ២០១៥ ដល់ ឆ្នាំ ២០៣០) តម្រូវការលំនៅឋានថ្មីទូទាំងប្រទេសនឹងមានចំនួន ១ លានខ្នងបន្ថែមទៀត ក្នុងនោះសម្រាប់រាជធានី ក្រុង និងទីប្រជុំជនមានប្រមាណ ៨០ ម៉ឺនដែលគិតជាមធ្យមគឺមានតម្រូវការជាង ៥ ម៉ឺនខ្នងក្នុង ១ ឆ្នាំ។
លោក ឌឹត ចណ្ណា អគ្គនាយកក្រុមហ៊ុនអចលនទ្រព្យ ឡាក់គី បានប្រាប់ថា ដោយសារកំណើនសេដ្ឋកិច្ចបានធ្វើឲ្យប្រជាជនកាន់តែមានលទ្ធភាព ខណៈវិស័យធនាគារកំពុងចូលរួមចំណែកយ៉ាងច្រើនក្នុងការជួយជំរុញសកម្មភាពក្នុងវិស័យនេះ។
លោកថ្លែងថា៖ «បច្ចុប្បន្ននេះអ្នកអភិវឌ្ឍន៍ភាគច្រើនកំពុងបែរឆ្ពោះទៅរកការអភិវឌ្ឍលំនៅឋានដែលមានតម្លៃធូរថ្លៃ។ ប្រសិនបើសង់ផ្ទះដែលមានតម្លៃខ្ពស់ គឺពិបាករកអ្នកទិញណាស់នាពេលនេះ»។
លោក សុខ កៅ ជំនួយការប្រធានផ្នែកលក់បុរី VIP ដែលមានទីតាំងស្ថិតនៅក្នុងសង្កាត់ស្ពានថ្ម ខណ្ឌដង្កោ រាជធានីភ្នំពេញបាននិយាយថាបច្ចុប្បន្នក្រុមហ៊ុនរបស់លោកកំពុងធ្វើការសាងសង់លំនៅឋានដែលមានតម្លៃទាបជាច្រើនខ្នងព្រោះកំពុងមានទីផ្សារល្អ។
លោកបន្តថា៖ «ការលក់លំនៅឋានរបស់ក្រុមហ៊ុនបុរី VIP ពិតជាមានដំណើរការល្អ ដោយសារមានតម្លៃសមរម្យ និងស្ថិតនៅមិនឆ្ងាយពីរាជធានីភ្នំពេញ។ ម្យ៉ាងទៀតការបង់ប្រាក់រំលស់ ប្រចាំខែក៏មិនសូវច្រើននោះដែរ»។
លំនៅឋានមានតម្លៃសមរម្យ និងក្រោមមធ្យមភាគច្រើនមានទំហំតូច និងស្ថិតនៅជាយក្រុង។
ទោះបីយ៉ាងណាក៏ដោយលោក ជា សុខហេង បុគ្គលិកជាន់ខ្ពស់ផ្នែកទីផ្សាររបស់ក្រុមហ៊ុន Chip Mong Land ដែលកំពុងអភិវឌ្ឍគម្រោងលំនៅឋានតម្លៃមធ្យម និងខ្ពស់បាននិយាយថាការលក់របស់ក្រុមហ៊ុននៅតែល្អ ទោះបីជាតម្លៃខ្ពស់បន្តិចក៏ដោយ។ គម្រោងអភិវឌ្ឍន៍លំនៅឋានរបស់បុរី ជីបម៉ុង មានតម្លៃចាប់ពីជាង ៦ ម៉ឺនដុល្លារឡើងទៅ។
លោក សំ សុវណ្ណៈ ជាគ្រូបង្រៀននៅសាលារៀនឯកជនមួយនៅក្នុងរាជធានីភ្នំពេញទើបចាប់ផ្តើមទិញផ្ទះបង់រំលស់ ១ ល្វែងដែលស្ថិតនៅតាមផ្លូវជាតិលេខ ៣ នៃរាជធានីភ្នំពេញ។
សុវណ្ណៈ និងភរិយាបានជួលផ្ទះគេស្នាក់នៅដើម្បីធ្វើការនៅក្នុងទីក្រុងភ្នំពេញជាយូរមកហើយ ទើបតែជាងកន្លះឆ្នាំមុនលោកបានសម្រេចចិត្តទៅទិញផ្ទះ ដែលមានតម្លៃជាង ៣ ម៉ឺនដុល្លារ។
លោកបន្តថា៖ «ខ្ញុំមានបំណងចង់បានលំនៅឋានផ្ទាល់ខ្លួនជាយូរមកហើយ តែពីមុនមកក្រុមហ៊ុនតែងសង់លំនៅឋានដែលមានតម្លៃខ្ពស់ និងមិនមានលក្ខខណ្ឌបង់ប្រាក់ងាយស្រួលដូចពេលនេះទេ»។
បច្ចុប្បន្ននេះលោក សុវណ្ណៈ ត្រូវបង់ប្រាក់ប្រចាំខែជាង ៤០០ ដុល្លារទៅឲ្យក្រុមហ៊ុន។
នៅក្នុងអំឡុងវេទិកាលំនៅឋានជាតិកាលពីខែមិថុនាឆ្នាំ ២០១៧ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា រាជរដ្ឋាភិបាលតាមរយៈក្រសួង រៀបចំដែនដី កំពុងយកចិត្តទុកដាក់យ៉ាងខ្លាំងដើម្បីរកមធ្យោបាយក្នុងការផ្តល់លំនៅឋានតម្លៃសមរម្យជូនប្រជាជនដែលមានប្រាក់ចំណូលទាប។
លោកបានបន្តទៀតថាក្រសួងកំពុងធ្វើការជាមួយក្រសួងសេដ្ឋកិច្ច និងហិរញ្ញវត្ថុដើម្បីសិក្សា និងរៀបចំដាក់តម្លៃសម្រាប់លំនៅឋានតម្លៃសមរម្យ និងលើកទឹកចិត្តខាងផ្នែកពន្ធដារ និងនិយតកម្មផ្សេងៗដើម្បីជំរុញវិស័យឯកជនឲ្យបំពេញភារកិច្ចនេះ។
បច្ចុប្បន្នរដ្ឋាភិបាលបានសហការជាមួយក្រុមហ៊ុនវិនិយោគចំនួន ៣ ក្នុងការអភិវឌ្ឍគម្រោងលំនៅឋានដែលមានតម្លៃសមរម្យ គឺទី ១ គម្រោងរបស់ក្រុមហ៊ុន Worldbridge Land ដែលស្ថិតនៅភាគខាងត្បូងក្រុងតាខ្មៅ ខេត្តកណ្តាល ទី ២ គម្រោងរបស់ក្រុមហ៊ុន Bun Ches Groups ស្ថិតនៅតាមបណ្តោយផ្លូវជាតិលេខ ៥ ក្នុងខណ្ឌព្រែកព្នៅ និងទី ៣ គម្រោងអភិវឌ្ឍន៍អគារស្នាក់នៅរួមមានតម្លៃសមរម្យរបស់ក្រុមហ៊ុនជប៉ុន Arakawa ស្ថិតក្នុងខណ្ឌសែនសុខ។ គម្រោងទាំង ៣ នេះសុទ្ធតែកំពុងស្ថិតនៅក្នុងដំណាក់កាលសាងសង់ទាំងអស់។
លោក ឡៅ ទិព្វសីហា អនុរដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់កាលពីថ្ងៃអង្គារបានឲ្យដឹងថា សំណង់បុរីលំនៅឋានថ្មីក្នុងរយៈពេល ៥ ខែឆ្នាំ ២០១៨ នេះមានចំនួន ២៦ ទីតាំង ហើយគិតមកដល់ពេលនេះលំនៅឋាន បុរីមានចំនួនសរុប ២១៣ ទីតាំង៕ LA
