The Phnom Penh Post Search

Search form




Logo of Phnom Penh Post newspaper Phnom Penh Post - និន្នាការ​អភិវឌ្ឍ​អចលនទ្រព្យ​បាន​ងាក​ចេញ​ពី​តំបន់​បឹងកេងកង​ ១

និន្នាការ​អភិវឌ្ឍ​អចលនទ្រព្យ​បាន​ងាក​ចេញ​ពី​តំបន់​បឹងកេងកង​ ១

Content image - Phnom Penh Post
អគារខុនដូនិងការិយាល័យ មួយ​កំពុង​ត្រូវ​បាន​សាង​សង់​នៅ​បឹងកេងកង ១។ ហុង មិនា

និន្នាការ​អភិវឌ្ឍ​អចលនទ្រព្យ​បាន​ងាក​ចេញ​ពី​តំបន់​បឹងកេងកង​ ១

ទីផ្សារ​អចលនទ្រព្យ​នៅ​តំបន់​បឹងកេងកង​១​ទំនង​ជា​ចាប់​ផ្តើម​ឆ្អែត​ជា​បណ្តើរៗ​ហើយ​ទើប​អ្នក​វិនិយោគ​មួយ​ចំនួន​បាន​ងាក​​ចេញ​ពី​តំបន់​នេះ​ហើយ​សម្លឹង​ទៅ​កាន់​​តំបន់​រណប​ក្រៅពី​តំបន់​បឹងកេងកង​ទី​១​ដែល​កំពុង​មាន​ការ​អភិវឌ្ឍ​យ៉ាង​លឿន​ក្នុង​ប៉ុន្មាន​ឆ្នាំ​ចុងក្រោយ​នេះ​។

លោក ស៊ឹង ប៊ុណ្ណា អគ្គនាយក​ក្រុមហ៊ុន​ប៊ុណ្ណា​រៀលធីគ្រុប​បាន​ថ្លែង​ឲ្យ​ដឹង​កាល​ពី​ថ្ងៃ​ចន្ទ​ថា​តំបន់​ដែល​បាន​បន្សល់​ទុក​តាំង​ពី​ជំនាន់​អន្តរកាល​ពេល​អង្គការ​សហប្រជាជាតិ​មក​បំពេញ​បេសកកម្ម​នៅ​កម្ពុជា ឬ​បច្ចុប្បន្ន​អាច​ហៅ​ថា​តំបន់​បរទេស​និយម​នេះ​ជា​តំបន់​លំនៅឋាន​ប្រភេទ​លេខ​១​ពី​មុន​មក​ប៉ុន្តែ​ឥទ្បូវ​នេះ​វា​បាន​ប្រែ​ក្លាយ​ជា​តំបន់​ពាណិជ្ជកម្ម និង​លំនៅឋាន​ជំនួស​វិញ​។ ការ​ឆ្អែត​នៃ​ការ​អភិវឌ្ឍ​គឺ​មិន​ទាន់​ឆ្អែត​ទេ​វា​អាស្រ័យ​លើ​និន្នាការ​នៃ​ការ​អភិវឌ្ឍ​ប៉ុន្តែ​ដោយសារ​មាន​ការ​សាងសង់​អគារ​ខ្ពស់ៗ​ច្រើន​បាន​ធ្វើ​ឲ្យ​អង្គការ​ក្រៅរដ្ឋាភិបាល និង​ការិយាល័យ​អង្គការ​សហប្រជាជាតិ​នៅ​តំបន់​នេះ​បាន​ចាកចេញ​ជា​បណ្តើរៗ​ហើយ​។

លោក​បន្ត​ថា «​យើង​អាច​ហៅ​តំបន់​បឹងកេងកង​ជា​តំបន់​សប្បាយ​រីករាយ​ជា​តំបន់​ចម្រុះ​ដែល​មាន​សណ្ឋាគារ ខុនដូ អាផាតមិន ភោជនីយដ្ឋាន សាលា​រៀន ហាង​កាហ្វេ​ល្បីៗ​វា​ប្រៀប​បាន​នឹង​តំបន់​សាឃុមវីត​នៅ​ទីក្រុង​បាងកក​»​។

លោក ប៊ុណ្ណា បាន​បន្ត​ថា «​អ្នក​វិនិយោគ​បាន​ងាក​ចូល​ទៅ​កាន់​តំបន់​បឹងកេងកង​ទី​២ ទី​៣ តំបន់​ទួលទំពូង និង​ផ្សារ​ដើមថ្កូវ​ជា​បន្តបន្ទាប់​ដោយសារ​តំបន់​ទាំង​នោះ​មាន​ហេដ្ឋារចនាសម្ព័ន្ឋ​កាន់តែ​ល្អ​ប្រសើរ»​។

លោក​បន្ត​ថា «​តំបន់​ទាំង​នោះ​កំពុង​ទទួល​បាន​ការ​អភិវឌ្ឍ​ច្រើន​ប៉ុន្តែ​តម្លៃ​អចលនទ្រព្យ​នៅ​តំបន់​នោះ​ខុស​គ្នា​រវាង ៣០ ​ទៅ​ ៤០ ​ភាគរយ​ធៀប​នឹង​តំបន់​បឹងកេងកង​១»​។

លោក កឺក ណារិន អ្នក​វិភាគ​អចលនទ្រព្យ​ឯករាជ្យ​បាន​ថ្លែង​ថា​តាម​អ្វី​ដែល​លោក​បាន​រាប់​ដោយ​ខ្លួន​ឯង​គឺ​បច្ចុប្បន្ន​នេះ​​តំបន់​បឹងកេងកង​១​មាន​ខុនដូ និង​អាផាតមិន​ជាង ២០ ​គម្រោង​បាន​និង​កំពុង​សាងសង់ និង​ខុនដូ​អាផាតមិន​មិន​ក្រោម ៥០ ​គម្រោង​ទេ​ដែល​បាន​និង​កំពុង​ដំណើរការ​ជួល​ និង​លក់​។

លោក​បន្ត​ថា​តំបន់​បឹងកេងកង​ ១ នៅ​តែ​ជា​តំបន់​មាន​សក្តានុពល​ជា​តំបន់​ទី​១​ដែល​អ្នក​វិនិយោគ និង​អ្នក​មាន​បំណង​ជួល​កន្លែង​ស្នាក់នៅ​តែង​ពិចារណា​ពី​តំបន់​នេះ​មុន​គេ​បើ​ទោះ​ជា​តម្លៃ​ខុនដូ​តំបន់​នេះ​លក់​ក្នុង​តម្លៃ​​ចន្លោះ​ពី​ ២៧០០ ​ទៅ​ ៣៥០០ ​ដុល្លារ​ក្នុង​ ១ ​ម៉ែត្រ​ការ៉េ និង​ដី​មាន​តម្លៃ​ចន្លោះ​ពី​ ៥០០០ ​ទៅ​ ៦០០០ ​ដុល្លារ​ក្នុង​មួយ​ម៉ែត្រការ៉េ​ក៏ដោយ​។

លោក​បន្ត​ថា​សម្រាប់​អ្នក​វិនិយោគ​ក្នុង​ស្រុក​ពួកគេ​មិន​ហ៊ាន​សាងសង់​ខុនដូ​លក់​នៅ​តំបន់​នេះ​នោះ​ទេ​ដោយ​ពួកគេ​បាន​ងាក​ទៅ​តំបន់​បឹងកេងកង​ទី​២ បឹងកេងកង​៣ តំបន់​ទួលទំពូង និង​តំបន់​ផ្សារ​​ដើមថ្កូវ ដោយសារ​តម្លៃ​ដី​នៅ​តំបន់​នោះ​មាន​ភាព​សមរម្យ​នៅ​ទ្បើយ​ប៉ុន្តែ​តម្លៃ​ខុនដូ​តំបន់​នោះ​គឺជា​ការ​វិនិយោគ​សម្រាប់​អ្នក​មាន​ប្រាក់​ចំណូល​មធ្យម​។ ចំណែក​តម្លៃ​ជួល​អាផាតមិន​ក៏​មាន​ភាព​ខុស​គ្នា​ចន្លោះ​ពី​ ៣០ ​ទៅ​ ៤០ ​ភាគរយ​ផង​ដែរ​ដោយ​​អាផាតមិន​នៅ​តំបន់​បឹងកេងកង​ ១ អាច​ជួល​បាន​ក្នុង​តម្លៃ​ ៨០០ ​ទៅ​ ១២០០ ​ដុល្លារ​តំបន់​បឹងកេងកង​២ ទួល​ទំពូង និង​​ផ្សារ​ដើមថ្នូវ​អាច​ជួល​បាន​ក្នុង​តម្លៃ​ ៤០០ ​ទៅ​ ៦០០ ​ដុល្លារ​ប៉ុណ្ណោះ​សម្រាប់​អាផាតមិន​មាន​បន្ទប់​គេង​ ១ ​ដូច​គ្នា​។

លោក ច្រឹក សុខនីម អគ្គនាយក​ក្រុមហ៊ុន​អចលនទ្រព្យ Century21 Mekong បាន​ថ្លែង​ថា​ការ​អភិវឌ្ឍ​អចលនទ្រព្យ​ខុនដូ អាផាតមិន​នៅ​តំបន់​បឹងកេងកង​១ ផ្តោត​លើ​អចលនទ្រព្យ​បែប​ប្រណីត និង​មាន​តម្លៃ​ខ្ពស់​ព្រោះ​តំបន់​នេះ​មិន​អាច​អភិវឌ្ឍ​អចលនទ្រព្យ​មាន​តម្លៃ​ទាប​នោះ​ទេ​ដោយ​សារ​តម្លៃ​ដី​នៅ​តំបន់​នេះ​ខ្ពស់​ខ្លាំង​ដូច្នេះ​អ្នក​វិនិយោគ​ខុនដូ​អាផាតមិន​ដែល​មាន​តម្លៃ​ធូរ​ថ្លៃ​បាន​ងាក​ទៅ​កាន់​តំបន់​បឹងកេងកង​២ បឹងកេងកង​៣ និង​តំបន់​ទួលគោក​ជាដើម​។

លោក​បន្ត​ថា «​តម្លៃ​ដីធ្លី​ខ្ពស់​នៅ​តំបន់​បឹងកេងកង​ ១ មិនមែន​ជា​ឧបសគ្គ​សម្រាប់​​ការ​អភិវឌ្ឍ​នៅ​ទ្បើយ​ទេ​ប៉ុន្តែ​ដី​តំបន់​នេះ​កាន់តែ​ចង្អៀត និង​ពិបាក​រក​ដី​សម្រាប់​អភិវឌ្ឍ​»​។

លោក ម៉េង លុន នាយក​ផ្នែក​ប្រតិបត្តិ​នៃ​ក្រុមហ៊ុន LCPP Resident Co., Ltd. ដែល​បាន​និង​កំពុង​សាងសង់​ខុនដូ L Resident Cambodia បាន​ថ្លែង​ថា​ក្រុមហ៊ុន​របស់​លោក​បាន​និង​កំពុង​អភិវឌ្ឍ​គម្រោង​ខុនដូ​លក់​រហូត​ដល់​គម្រោង​ទី​ ៤ ហើយ​ដែល​គម្រោង​ទី​ ១ ទី​ ២ និង​ទី​ ៣ លក់​អស់​ ១០០ ​ភាគរយ និង​គម្រោង​ទី​ ៤ ​នេះ​លក់​អស់​ ៦៥ ​ភាគរយ​ផង​ដែរ​។ គម្រោង​ខុនដូ​ទាំង​នេះ​ស្ថិត​នៅ​សង្កាត់​ទួលទំពូង ផ្សារ​ដើមថ្កូវ និង​គម្រោង​ចុង​ក្រោយ​ស្ថិត​នៅ​សង្កាត់​បឹងកេងកង​ទី​ ៣។

លោក​បន្ត​ថា «​ដោយសារ​គម្រោង​ខុនដូ​របស់​ខ្ញុំ​ផ្តោត​លើ​អ្នក​មាន​ប្រាក់​ចំណូល​មធ្យម​ទើប​យើង​មិន​អាច​អភិវឌ្ឍ​នៅ​តំបន់​បឹងកេងកង​ទី​១​បាន​ព្រោះ​តម្លៃ​ដី​នៅ​តំបន់​នោះ​ថ្លៃ​ដែល​ធ្វើឲ្យ​តម្លៃ​នៃ​ការ​វិនិយោគ​ខ្ពស់​ហើយ​យើង​មិន​អាច​លក់​ផ្ទះ​សម្រាប់​ប្រជាជន​វណ្ណៈ​កណ្តាល​ទេ​»​។

លោក​បន្ត​ថា «​ហេតុ​ផល​មួយ​ទៀត​ដែល​ក្រុមហ៊ុន​ខ្ញុំ​សម្រេច​ចិត្ត​អភិវឌ្ឍ​នៅ​តំបន់​នេះ​ក៏​ដោយសារ​តំបន់​បឹងកេងកង​ទី​៣​បាន​ក្លាយ​ជា​តំបន់​សេដ្ឋកិច្ច និង​ពាណិជ្ជកម្ម​ផង​ដែរ​»​។

ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា​លោក គីម ហ៊ាង បាន​ថ្លែង​ឲ្យ​ដឹង​ផង​ដែរ​ថា​តំបន់​បឹងកេងកង​១ ឈាន​ដល់​ដំណាក់កាល​ត្រី​ធំ​ស៊ី​ត្រី​តូច ត្រី​តូច​ស៊ី​ត្រី​តូច​ជាង​ខណៈ​តំបន់​នេះ​មាន​តម្រូវការ​លំនៅឋាន​សម្រាប់​ស្នាក់​នៅ​មិន​កើន​ខ្ពស់​នោះ​ទេ​ប៉ុន្តែ​ការ​ផ្គត់ផ្គង់​ខុនដូ និង​អាផាតមិន​បាន​កើន​ទ្បើង​ខ្ពស់​ដូច្នេះ​នា​ពេល​អនាគត​អាផាតមិន​ចាស់ៗ​កម្ពស់​ ៥ ទៅ​ ៨ ​ជាន់​អាច​ត្រូវ​​វាយ​ចោល​ដោយសារ​វា​មាន​ការ​ប្រកួតប្រជែង​កាន់តែ​ច្រើន​។

លោក​បន្ត​ថា «​អ្នក​វិនិយោគ​លំដាប់​ B និង​ C បាន​ងាក​ចេញ​ពី​តំបន់​នេះ​ទៅ​កាន់​តំបន់​បឹងកេងកង​ទី​ ២ ទី​៣ តំបន់​ទួលទំពូង និង​តំបន់​ផ្សារ​ដើមថ្កូវ​ដោយសារ​តម្លៃ​ដីធ្លី​នៅ​តំបន់​នោះ​មាន​ភាព​សមរម្យ និង​មាន​ការ​អភិវឌ្ឍ​ហេដ្ឋារចនាសម្ព័ន្ធ​កាន់តែ​ប្រសើរ​ទ្បើង​»​។

លោក​បន្ត​ថា «​បច្ចុប្បន្ន​ពិបាក​រក​ដី​នៅ​តំបន់​បឹងកេងកង​១ និង​បើ​មាន​ក៏​ពិបាក​រក​អ្នក​ទិញ​ដែរ​ព្រោះ​​គិត​ជា​មធ្យម​តម្លៃ​ដី​នៅ​តំបន់​នេះ​មាន​តម្លៃ​ ៣ ​លាន​ដុល្លារ​ហើយ​បើ​សង់​អគារ​ត្រូវ​ចំណាយ​បី​ដង​ធៀប​នឹង​តម្លៃ​ដី»​។

លោក ហ៊ាង បាន​បន្ត​ថា​តំបន់​បឹងកេងកង​ទី​២ ទី​៣ និង​តំបន់​ទួលទំពូង ផ្សារ​ដើមថ្កូវ​បាន​និង​កំពុង​ត្រង​យក​ចរន្ត​អភិវឌ្ឍ​ដែល​ចាកចេញ​ពី​តំបន់​បឹង​កេងកង​១។ នេះ​ជា​ជម្រើស​ព្រោះ​តំបន់​បឹងកេងកង ១ អ្នក​ខ្សោយ​មិន​អាច​នៅ​បាន​ទេ​អ្នក​ខ្លាំង​ទើប​អាច​ឈរ​ជើង​នៅ​តំបន់​នេះ​បាន​៕

អត្ថបទគួរចាប់អារម្មណ៍