ភ្នំពេញៈ ក្នុងត្រីមាសទី ២ ឆ្នាំ ២០១៨ នេះចំនួនបន្ទប់ខុនដូនៅក្នុងរាជធានីភ្នំពេញបានកើនឡើងប្រមាណ ២០ ភាគរយបើធៀបទៅនឹងត្រីមាសទី ១ កន្លងមកដោយខុនដូភាគច្រើនស្ថិតនៅក្នុងខណ្ឌចំការមន។ នេះបើតាមរបាយការណ៍ស្រាវជ្រាវរបស់ក្រុមហ៊ុនអចលនទ្រព្យ CBRE Cambodia។
របាយការណ៍ស្រាវជ្រាវដែលទើបចេញផ្សាយកាលពីចុងខែកក្កដាកន្លងមក បង្ហាញថាក្នុងត្រីមាសទី ២ ឆ្នាំ ២០១៨ មានខុនដូប្រមាណ ២ ០០០ យូនីតបានបញ្ចប់ការសាងសង់ និងដាក់ចូលក្នុងទីផ្សារដែលធ្វើឲ្យចំនួនបន្ទប់ស្នាក់នៅខុនដូក្នុងក្រុងភ្នំពេញកើនដល់ចំនួន ១១ ៨៣០ យូនីត គិតត្រឹមដំណាច់ឆមាសទី ១។ ចំនួននេះគឺកើនឡើង ២០ ភាគរយបើធៀបនឹងត្រីមាសទី ១ នៃឆ្នាំ ២០១៨ ដែលមានចំនួនជិត ១០ ០០០ យូនីត។
នៅក្នុងបណ្តាខុនដូប្រមាណ ២០០០ យូនីតដែលបានបញ្ចប់ការសាងសង់ក្នុងត្រីមាសទី ២ គឺមាន ៨០ ភាគរយស្ថិតក្នុងសង្កាត់បឹងកេងកង និងសង្កាត់ទន្លេបាសាក់នៃខណ្ឌចំការមន។
ក្នុងត្រីមាសទី ២ ខុនដូតម្លៃសមរម្យ (Affordable) និងលើមធ្យម (Mid-Range) មិនបានប្រែប្រួលទេគឺស្ថិតនៅក្នុងរង្វង់ ១៥០០ ដុល្លារ និង ២៥០០ ដុល្លារក្នុង ១ ម៉ែត្រការ៉េរៀងគ្នា ខណៈខុនដូប្រណីត (High-End) តម្លៃស្ថិតក្នុងរង្វង់ ៣២៥០ ដុល្លារដោយបានកើនឡើងប្រមាណ ២ ភាគរយ បើធៀបនឹងត្រីមាសទី ១ ។
លោក Jonathan Flexer ប្រធានផ្នែកទីផ្សារគម្រោងលំនៅឋាននៃក្រុមហ៊ុន CBRE Cambodia និយាយថាទីផ្សារខុនដូនៅភ្នំពេញនៅតែល្អប្រសើររវាងការផ្គត់ផ្គង់ និងតម្រូវការ។ ដោយសារប្រទេសកម្ពុជាមានចំនួនប្រជាជនវ័យក្មេងច្រើន និងមានកំណើនសេដ្ឋកិច្ចរឹងមាំនោះ វិស័យនេះនឹងនៅតែបន្តនូវភាពរឹងមាំរបស់ខ្លួនជាបន្តទៀត។
លោកថ្លែងថា៖ «ទីផ្សារខុនដូក្នុងក្រុងភ្នំពេញនៅតែល្អ ទាំងតម្រូវការ និងតម្លៃ ពិសេសខុនដូតម្លៃសមរម្យ និងលើមធ្យម។ ការដាក់បញ្ចូលក្នុងទីផ្សារនូវបន្ទប់ស្នាក់នៅថ្មីៗបានធ្វើឲ្យអតិថិជនមានជម្រើសកាន់តែច្រើន»។
បច្ចុប្បន្នគម្រោងខុនដូធំៗជាច្រើនក្នុងរាជធានីភ្នំពេញត្រូវបានវិនិយោគដោយវិនិយោគិនមកពីប្រទេសចិន ខណៈអតិថិជនក៏ជាជនជាតិចិនដែរ។
ទន្ទឹមនឹងនេះលោក Jonathan ក៏បានលើកឡើងថាអ្នកអភិវឌ្ឍន៍គួរតែយកចិត្តទុកដាក់ចំពោះអតិថិជនក្នុងស្រុកផងដែរ តាមរយៈការកំណត់ថ្លៃទីតាំង និងវិធីបង់ប្រាក់ជាដើម។
លោក អ៊ូក ឆេងលី ប្រធានគ្រប់គ្រងទូទៅក្រុមហ៊ុនអចលនទ្រព្យ Century 21 Fuji Realty ដែលជាក្រុមហ៊ុនមានអតិថិជនប្រហែល ៨០ ភាគរយជាជនជាតិជប៉ុននិយាយថាសម្រាប់ទីផ្សារខុនដូដែលមានតម្លៃខ្ពស់នៅពេលនេះអាចនិយាយថាពិបាករកអតិថិជន តែសម្រាប់ខុនដូដែលមានតម្លៃសមរម្យ គឺមិនមានបញ្ហាទេ។
លោកបានថ្លែងថា ៖ «សម្រាប់ខុនដូនៅក្នុងទីតាំងល្អ ប្រសិនបើតម្លៃក្នុង ១ ម៉ែត្រការ៉េត្រឹម ២ ០០០ ដុល្លារគឺមិនមានបញ្ហានោះទេ តែបើឡើងខ្ពស់លើសពីនេះអាចពិបាកលក់»។
អ្នកនាង ប៉ុល លីតា ទីប្រឹក្សាផ្នែកអចលនទ្រព្យគម្រោង The Parkway ដែលស្ថិតនៅតំបន់ទួលគោកបានប្រាប់ថាការលក់កំពុងមានដំណើរការទៅមុខយ៉ាងលឿន ដោយការលក់ក្នុងដំណាក់កាលទី ១ សម្រេចបានប្រហែល ៩០ ភាគរយហើយ ខណៈការលក់ដំណាក់កាលទី ២ គ្រោងនឹងចាប់ផ្តើមបើកលក់នៅចុងខែសីហានេះ។ អ្នកនាងបន្តថា អតិថិជនរបស់គម្រោង The Parkway មានជនជាតិខ្មែរប្រហែល ៥០ ភាគរយ។
អ្នកនាង ប៉ុល លីតា បាននិយាយថា៖ «បច្ចុប្បន្នការលក់កំពុងមានដំណើរការទៅមុខយ៉ាងរលូន។ តម្លៃ និងទីតាំងជាកត្តាសំខាន់»។
The Parkway មានបន្ទប់ស្នាក់នៅសរុប ១ ១៣៦ យូនីតដោយបន្ទប់តូចបំផុតមានទំហំ ៥០ ម៉ែត្រការ៉េ និងមានតម្លៃជាង ៩០ ០០០ ដុល្លារ។
កាលពីត្រីមាសទី ២ កន្លងមកមានគម្រោងខុនដូថ្មីចំនួន ៥ បានចាប់ផ្តើមប្រកាសលក់ដែលមានដូចជា R&F Mansion, L''attrait, Yuetai Garden, East Sen Sok និង Poly Mansion។
បើតាមការព្យាកររបស់ក្រុមហ៊ុន CBRE Cambodia នៅដំណាច់ឆ្នាំ ២០១៨ នេះចំនួនបន្ទប់ខុនដូនៅក្នុងរាជធានីភ្នំពេញនឹងកើនឡើងដល់ប្រហែល ២០ ០០០ យូនីត៕