The Phnom Penh Post Search

Search form

បាត់ដំបង៖ ទីក្រុង​លេចធ្លោ​ជាង​គេ​ នៅ​ភូមិភាគ​ពាយព្យ

Content image - Phnom Penh Post
រង្វង់មូល​លោកតា​ដំបងគ្រញូង​ដែល​ស្ថិត​នៅ​ក្នុង​ក្រុង​បាត់ដំបង​។ ហុង មិនា

បាត់ដំបង៖ ទីក្រុង​លេចធ្លោ​ជាង​គេ​ នៅ​ភូមិភាគ​ពាយព្យ

ជាមួយ​នឹង​កត្តា​ប្រជាសាស្ត្រ និង​ជីវភាព​ប្រជាពលរដ្ឋ​កាន់តែ​ប្រសើរ​ក្រុង​បាត់ដំបង​បាន​បន្ត​ភាពលេចធ្លោ​ជាងគេ​ក្នុង​សកម្មភាព​ពាណិជ្ជកម្ម និង​ការអភិវឌ្ឍ​គម្រោង​លំនៅឋាន​នានា​។

អគ្គនាយក​ធនាគារ​ស្រូវ និង​ជា​ប្រធាន​សភា​ពាណិជ្ជកម្ម​ខេត្ត​បាត់ដំបង​លោក​ឧកញ៉ា ភួ ពុយ បាន​ថ្លែង​ឲ្យ​ដឹង​តាម​ទូរស័ព្ទ​កាលពី​ថ្ងៃ​ចន្ទ​ថា​ខេត្ត​បាត់ដំបង​កំពុង​មាន​ការអភិវឌ្ឍ​ច្រើន ដោយសារ​ខេត្ត​នេះ​មាន​ធនាគារ​គ្រឹះស្ថាន​មីក្រូហិរញ្ញវត្ថុ និង​ហាង​ល្បីៗ​ជាច្រើន​បាន​មក​បើក​ការិយាល័យ​នៅក្នុង​ទីក្រុង​នេះ​។

លោក​ឧកញ៉ា​បាន​បន្ត​ថា​ជាមួយ​នឹង​ភាព​ប្រសើរ​ឡើង​នូវ​ជីវភាព​របស់​ប្រជាពលរដ្ឋ និង​តម្រូវការ​លំនៅឋាន​កើនឡើង​លោក​បាន​វិនិយោគ​គម្រោង​អភិវឌ្ឍន៍​លំនៅឋាន​ថ្មី​មួយ​លើ​ផ្ទៃដី​ប្រមាណ​ ២០ ​ហិកតា​ស្ថិត​នៅ​ក្នុង​សង្កាត់​អូរចារ ក្រុង​បាត់ដំបង ខេត្ត​បាត់ដំបង​។

លោក​បន្ត​ថា៖ «​គម្រោង​នេះ​ផ្តោត​លើ​ការសាងសង់​ផ្ទះ​សម្រាប់​អ្នក​មាន​ជីវភាព​មធ្យម​ដោយ​ផ្ទះ​លក់​ក្នុង​តម្លៃ​ចន្លោះ​ពី​ ៣៤០០០ ​ទៅ​ ៦០០០០ ​ដុល្លារ​អាមេរិក​»​។ លោក​បាន​បន្ត​ថា៖ «​យើង​សាងសង់​លំនៅឋាន​ជា​ដំណាក់កាលៗ​តាម​តម្រូវការ​ជាក់ស្តែង​របស់​ប្រជាពលរដ្ឋ​»​។

ទោះ​ជា​យ៉ាង​ណា​លោក​ឧកញ៉ា​មិន​បាន​បញ្ជាក់​ឲ្យ​ដឹង​ពី​ទំហំ​ទុនវិនិយោគ​ក្នុង​គម្រោង​នេះ​ទេ​។

លោក​ឧកញ៉ា ភួ ពុយ បាន​បន្ត​ថា​គម្រោង​នេះ​ស្ថិត​នៅ​ជាប់​នឹង​ផ្សារ​ទំនើប ភួ ពុយ ដែល​នៅ​ជាប់​ផ្លូវជាតិ​លេខ​ ៥ ជា​តំបន់​ដែល​ប្រជាពលរដ្ឋ​នៅ​តំបន់​នេះ​ស្គាល់​ច្បាស់​ជាង​គេ និង​ជា​តំបន់​ដែល​មាន​សកម្មភាព​ពាណិជ្ជកម្ម និង​ការកម្សាន្ត​ជា​ប្រចាំ​។

បច្ចុប្បន្ន​ការតភ្ជាប់​ហេដ្ឋារចនាសម្ព័ន្ធ​នៅ​តំបន់​ភូមិភាគ​ពាយព្យ ពិសេស​ផ្លូវ​ពី​ក្រុង​បាត់ដំបង កាត់​ស្រុក​សំឡូត​ភ្ជាប់​ទៅ​កាន់​ខេត្ត​កោះកុង និង​បណ្តាញ​ផ្លូវដែក​ពី​ក្រុង​ប៉ោយប៉ែត​មក​ក្រុង​បាត់ដំបង​នឹង​បញ្ចប់​នៅ​ចុង​ឆ្នាំ​នេះ ខណៈ​ដែល​ខ្សែ​រថភ្លើង​ពី​ក្រុង​ប៉ោយប៉ែត​មក​ក្រុង​សិរីសោភ័ណ​បាន​ដំណើរការ​កាលពី​ថ្ងៃ​ទី​ ៦ មេសា​កន្លង​មក​នេះ​។

លោក​ឧកញ៉ា ភួ ពុយ បាន​បន្ត​ថា​ការតភ្ជាប់​ហេដ្ឋារចនាសម្ព័ន្ធ​នឹង​ជួយ​ជំរុញ​កំណើន​សេដ្ឋកិច្ច​នៅ​តំបន់​ភូមិភាគ​ពាយព្យ​កាន់តែ​ច្រើន​នាពេល​អនាគត ព្រោះ​កម្ពុជា​ដែល​ពឹង​ផ្អែក​តែ​ទីផ្សារ​ប្រទេស​ជិត​ខាង​ពេល​ខ្លះ​មាន​ការ​លំបាក ហេតុ​នេះ​ប្រសិន​បើ​ហេដ្ឋារចនាសម្ព័ន្ធ​ទាំង​នេះ​បាន​តភ្ជាប់​គ្នា អ្វីៗ​នឹង​មាន​ភាព​ប្រសើរ​ឡើង​ទាំង​សកម្មភាព​ពាណិជ្ជកម្ម និង​ការអភិវឌ្ឍ​។

ក្រុង​បាត់ដំបង​បច្ចុប្បន្ន​មាន​ផ្សារ​ក្នុង​ស្រុក​ជាច្រើន​ដូចជា ផ្សារ​ថ្មី ផ្សារ ភួពុយ ផ្សារ​ទំនើប​បុរីថ្មី ផ្សារ​ដើមដូង ជាដើម​។

លោកស្រី អាន សុធីតា នាយិកា​ប្រចាំ​ប្រទេស​នៃ​ក្រុមហ៊ុន CBRE Cambodia បាន​ថ្លែង​ថា ការអភិវឌ្ឍ​ខេត្ត​បាត់ដំបង​មាន​ភាព​លេចធ្លោ​ជាង​បណ្តា​ខេត្ត​ដទៃ​ទៀត ប៉ុន្តែ​ការអភិវឌ្ឍ​ក្នុង​ខេត្ត​លឿន ឬ​យឺត​អាស្រ័យ​លើ​ការតភ្ជាប់​ហេដ្ឋារចនាសម្ព័ន្ធ ព្រោះ​ហេដ្ឋារចនាសម្ព័ន្ធ​នឹង​ជួយ​ដល់​ការពង្រីក​សកម្មភាព​សេដ្ឋកិច្ច ហើយ​នៅ​ពេល​មាន​សកម្មភាព​សេដ្ឋកិច្ច​ច្រើន ការ​អភិវឌ្ឍ​លំនៅឋាន​តម្លៃ​មធ្យម​នឹង​កើនឡើង​មុន​ឈាន​ទៅ​អភិវឌ្ឍ​លំនៅឋាន​ប្រណីត​នាពេល​អនាគត​។

លោកស្រី​បាន​ថ្លែង​ថា៖ «​ខ្ញុំ​គិត​ថា​ភូមិភាគ​ពាយព្យ​នៅ​ត្រូវការ​ពេលវេលា​បន្ថែមទៀត ដើម្បី​ឲ្យ​ការអភិវឌ្ឍ​កាន់​តែ​មាន​សកម្មភាព​ច្រើន ហើយ​គម្រោង​លំនៅឋាន​នានា​នឹង​មាន​សកម្មភាព​កាន់តែ​ច្រើន​»​។

នាយិកា​ក្រុមហ៊ុន Century21 Cambodia លោកស្រី Grace Rachny Fong បាន​ថ្លែងថា​ក្នុង​ចំណោម​ខេត្ត​ភូមិភាគ​ពាយ័ព្យ ខេត្ត​បាត់ដំបង​មាន​ភាពលេច​ធ្លោ​ជាង​គេ​ក្នុង​ចំណោម​ខេត្ត​នៅ​ភូមិភាគ​នេះ​ដទៃ​ទៀត​ដោយ​បច្ចុប្បន្ន​មាន​ធនាគារ​មីក្រូហិរញ្ញវត្ថុ ហាង​កាហ្វេ​ល្បីៗ​បាន​ចូល​ទៅ​កាន់​ទីក្រុង​នេះ​។ អ្នកនាង​បន្ត​ថា ខេត្ត​បាត់ដំបង​មាន​សក្តានុពល​ច្រើន ដោយសារ​សកម្មភាព​អភិវឌ្ឍន៍ និង​កត្តា​ប្រជាសាស្ត្រ​ដែល​មាន​ចំនួន​មនុស្ស​ច្រើន​រស់នៅ​ក្នុង​ទីក្រុង​នេះ​។

លោកស្រី​បន្ត​ថា៖ «​ខ្ញុំ​សង្កេត​ឃើញ​សកម្មភាព​ពាណិជ្ជកម្ម​មាន​ភាព​រីកចម្រើន​ច្រើន​នៅ​ក្នុង​ខេត្ត​នេះ ហើយ​សកម្មភាព​វិនិយោគ​លំនៅឋាន​ក៏​មាន​ច្រើន​ផង​ដែរ​ដោយ​មាន​បុរី​ជាច្រើន​បាន​ធ្វើ​ឡើង​នៅ​ខេត្ត​នេះ​»​។

បើ​តាម​លោកស្រី Grace Rachny Fong ការរីកចម្រើន​ស្ទើរ​គ្រប់​វិស័យ​បាន​ធ្វើឲ្យ​អចលនទ្រព្យ​នៅ​ក្នុង​ក្រុង​បាត់ដំបង​កើនឡើង​ចន្លោះ​ពី​ ៥ ​ទៅ​ ១០ ​ភាគរយ​ក្នុង​ត្រីមាស​ទី​ ១ ឆ្នាំ​ ២០១៨ នេះ​បើ​ធៀប​នឹង​រយៈពេល​ដូច​គ្នា​នៃ​ឆ្នាំ​មុន​។ ដី​លំនៅឋាន​ក្នុង​ក្រុង​បាត់ដំបង​មាន​តម្លៃ​ចន្លោះ​ពី​ ៧០ ​ទៅ​ ១២៥ ​ដុល្លារ​ក្នុង​ ១ ​ម៉ែត្រការ៉េ តំបន់​ពាណិជ្ជកម្ម​មាន​តម្លៃ​ចន្លោះ​ពី​​ ១៥០០ ​ទៅ​ ២២០០ ​ដុល្លារ​។

លោក អឿម សុខុម អភិបាលក្រុង​បាត់ដំបង​បាន​បដិសេធ​មិន​អត្ថាធិប្បាយ​៕

អត្ថបទគួរចាប់អារម្មណ៍