ភ្នំពេញៈ ទិន្នន័យពីស្ថានភាព និងតម្លៃអចលនទ្រព្យនៅកម្ពុជា ពិសេសនៅក្នុងរាជធានីភ្នំពេញអាចនឹងចេញឲ្យប្រើប្រាស់ជាផ្លូវការនៅដំណាច់ឆ្នាំ ២០២០ នេះ បន្ទាប់ពីក្រុមហ៊ុនក្នុងស្រុក Z1 Data Co.,LTD (Cambodia) បានចុះអនុស្សរណៈនៃការយោគយល់ជាមួយក្រុមហ៊ុនមកពីអាមេរិក theDevMasters។ នេះបើយោងតាមនាយកក្រុមហ៊ុន Z1 Data Co., LTD (Cambodia)។
ក្នុងពិធីចុះអនុស្សរណៈនៃការយោគយល់គ្នាកាលពីថ្ងៃពុធ លោក ហ៊ឹម សីហា នាយកក្រុមហ៊ុន Z1 Data Co., LTD (Cambodia) ដែលជាបុត្រសម្ព័ន្ធរបស់ក្រុមហ៊ុនអចលនទ្រព្យ VTrust Appraisal Co., Ltd. បានឲ្យដឹងថា ខណៈវិស័យអចលនទ្រព្យកម្ពុជាកំពុងមានដំណើរវិវឌ្ឍន៍ទៅមុខយ៉ាងល្អ និងមានភាពកាន់តែមមាញឹកនោះ ការប្រើប្រាស់បច្ចេកវិទ្យាបានក្លាយជាការចាំបាច់ដើម្បីអាចគ្រប់គ្រងការងារទាំងអស់នោះប្រកបដោយប្រសិទ្ធភាព និងមានភាពឆាប់រហ័ស។
លោកបន្តថា កត្តានេះជំរុញឲ្យមានការអភិវឌ្ឍប្រព័ន្ធផ្ទុកទិន្នន័យដ៏ធំ Artificial Intelligence (AI) នៅក្នុងវិស័យអចលនទ្រព្យនៅកម្ពុជា ដែលជាទិន្ន័យមានគុណភាព និងផ្តល់នូវទំនុកចិត្តខ្ពស់ដល់វិនិយោគិន។ ប្រព័ន្ធទិន្នន័យនេះក៏នឹងជួយធ្វើការវិភាគពីនិន្នាការអភិវឌ្ឍកន្លងមក បច្ចុប្បន្ន និងពេលអនាគតផងដែរ។
លោកថ្លែងថា៖ «បញ្ញាសិប្បនិម្មិត Artificial Intelligence (AI) នឹងជួយពន្លឿនប្រតិបត្តិការក្នុងវិស័យអចលនទ្រព្យតាមរយៈការកាត់បន្ថយពេលវេលាដែលតែងតែធ្វើដោយដៃ ហើយបញ្ញាសិប្បនិម្មិតនេះក៏បានជួយបង្កើនប្រសិទ្ធភាពសម្រាប់ដំណើរការទិញលក់ និងប្រតិបត្តិការទីផ្សារអចលនទ្រព្យនៅកម្ពុជាផងដែរ»។
លោកប្រាប់ទៀតថា ជាមួយនឹងការធ្វើកិច្ចសហប្រតិបត្តិការជាមួយក្រុមហ៊ុន theDevMasters លោកសង្ឃឹមថាទិន្ន័យបច្ចុប្បន្នភាពរបស់វិស័យអចលនទ្រព្យនៅកម្ពុជា ដែលរៀបចំឡើងដោយក្រុមហ៊ុន Z1 Data Co., LTD (Cambodia) នឹងអាចយកទៅប្រើប្រាស់ជាផ្លូវការបាននៅចុងឆ្នាំ ២០២០ នេះ។
លោកនិយាយថា៖ «ខ្ញុំគិតថា ទិន្នន័យពីវិស័យអចលនទ្រព្យនៅកម្ពុជានឹងត្រូវបើកឲ្យប្រើប្រាស់ជាផ្លូវការនៅចុងឆ្នាំ ២០២០ នេះ។ ទិន្នន័យនេះនឹងអនុញ្ញាតឲ្យអតិថិជនប្រើប្រាស់បានគ្រប់គ្នា គឺមិនមែនសម្រាប់តែភ្នាក់ងារ ឬបុគ្គលិករបស់ក្រុមហ៊ុន Z1 Data Co., LTD (Cambodia) ទេ»។
យោងតាមលោក សីហា ការអភិវឌ្ឍប្រព័ន្ធទិន្នន័យដោយប្រើប្រាស់បញ្ញាសិប្បនិម្មិតដែលមានគុណភាពនេះនឹងផ្តល់ប្រយោជន៍ដល់ប្រតិបត្តិករក្នុងទីផ្សារអចលនទ្រព្យ ម្ចាស់អចលនទ្រព្យ ភ្នាក់ងារទិញ លក់ ឬជួល និងរដ្ឋាភិបាលផងដែរ។
ទោះយ៉ាងណាលោកមិនបានផ្តល់ព័ត៌មានពីតម្លៃនៃការប្រើប្រាស់ ឬ ការទាញយកទិន្នន័យពីប្រព័ន្ធដែលក្រុមហ៊ុនកំពុងរៀបចំនេះឡើយ។
លោក Arshad Khan អគ្គនាយកក្រុមហ៊ុន theDevMasters បានប្រាប់ថា theDevMasters គឺជាក្រុមហ៊ុនដែលមានជំនាញក្នុងការផ្តល់ ការបណ្តុះបណ្តាល និងការពិសោធពីវិទ្យាសាស្ត្រទិន្នន័យ Machine Learning និងវគ្គបណ្តុះបណ្តាលនានាដែលមានកម្មវិធីឆ្លើយតបនឹងតម្រូវការទីផ្សារជាក់ស្តែង។
លោកបន្តថា កម្ពុជាជាប្រទេសដែលកំពុងអភិវឌ្ឍន៍មានប្រជាជនវ័យក្មេងច្រើន និងមានទីផ្សារអចលនទ្រព្យល្អប្រសើរ។
លោកនិយាយថា៖ «ភាពល្អប្រសើរនៃទីផ្សារអចលនទ្រព្យនៅកម្ពុជាគឺជាមូលហេតុចម្បងដែលក្រុមហ៊ុន theDevMasters សម្រេចធ្វើកិច្ចសហការនេះ»។
theDevMasters គឺជាក្រុមហ៊ុនបុត្រសម្ព័ន្ធរបស់ GBCS LLC ដែលជាក្រុមហ៊ុនប្រឹក្សាផ្នែកទិន្នន័យដោយប្រើប្រាស់បញ្ញាសិប្បនិម្មិត Artificial Intelligence (AI)។ TheDev Masters បានបង្កើតឡើងនៅក្នុងឆ្នាំ ២០១២ ដែលកាលពីមុនត្រូវបានស្គាល់ថា Codecamp5។
លោក គុយ វ៉ាត ប្រធានក្រុមហ៊ុនអចលនទ្រព្យ Zillennium បានលើកឡើងថា បច្ចេកវិទ្យាបានចូលរួមកាន់តែសំខាន់ក្នុងការផ្តល់ព័ត៌មាន និងគ្រប់គ្រងទិន្នន័យពីសកម្មភាពទីផ្សារអចលនទ្រព្យដែលមានទំហំកាន់តែធំ និងស្មុគស្មាញឡើងជារៀងរាល់ថ្ងៃ។
លោកថ្លែងថា៖ «បច្ចុប្បន្ននេះការប្រើប្រាស់បច្ចេកវិទ្យាដើម្បីគ្រប់គ្រងទិន្នន័យអ្វីមួយ គឺពិតជាមានសារៈសំខាន់ណាស់»៕ LA