ខ្សែរថភ្លើងដែលធ្វើដំណើរពីក្រុងសិរីសោភ័ណឆ្ពោះទៅក្រុងប៉ោយប៉ែតនៃខេត្តបន្ទាយមានជ័យ។ រូបថត សហការី
ការបើកដំណើរការផ្លូវរថភ្លើងពីក្រុងប៉ោយប៉ែតទៅក្រុងសិរីសោភ័ណនៃខេត្តបន្ទាយមានជ័យកាលពីដើមខែមេសានេះគឺជាព្រឹត្តិការណ៍សំខាន់មួយក្នុងផែនការជួសជុលឡើងវិញនូវសេវាដឹកជញ្ជូនអ្នកដំណើរ និងទំនិញតាមរយៈខ្សែរថភ្លើងនាភាគពាយព្យនៃប្រទេសកម្ពុជា ដើម្បីឆ្ពោះមករាជធានីភ្នំពេញ។ ផ្លូវដែកនេះត្រូវគេរំពឹងថានឹងចូលរួមចំណែកយ៉ាងច្រើននៅក្នុងការជំរុញដល់កំណើនសេដ្ឋកិច្ចក្នុងតំបន់ពិសេសក្នុងក្រុងប៉ោយប៉ែត។
ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល មានប្រសាសន៍ក្នុងពិធីសម្ពោធផ្លូវដែករវាងក្រុងប៉ោយប៉ែត និងក្រុងសិរីសោភ័ណកាលពីថ្ងៃទី ៤ ខែមេសាឆ្នាំ ២០១៨ ថា «សេវាផ្លូវរថភ្លើងពីក្រុងប៉ោយប៉ែតទៅក្រុងសិរីសោភ័ណគឺគ្រាន់តែជាជំហានដំបូងនៃគម្រោងរបស់យើងក្នុងការស្តារផ្លូវរថភ្លើងឡើងវិញតែប៉ុណ្ណោះ។ ជំហានបន្ទាប់យើងនឹងត្រូវភ្ជាប់ទៅកាន់ខេត្តបាត់ដំបង ខេត្តពោធិ៍សាត់ និងភ្ជាប់ទៅកាន់រាជធានីភ្នំពេញ»។
បើតាមលោករដ្ឋមន្ត្រីផ្លូវរថភ្លើងពីក្រុងសិរីសោភ័ណទៅកាន់ក្រុងបាត់ដំបងនឹងត្រូវបញ្ចប់នៅចុងខែមេសានេះ ហើយការតភ្ជាប់ទៅខេត្តពោធិ៍សាត់នឹងរួចរាល់ក្នុងខែឧសភា ចំណែកទៅកាន់រាជធានីភ្នំពេញនឹងរួចរាល់នៅចុងឆ្នាំ ២០១៨ នេះ។
ក្រសួងសាធារណការ និងដឹកជញ្ជូនកាលពីថ្ងៃទី ២០ ខែមេសា ឆ្នាំ ២០១៨ បានចេញលិខិតផ្លូវការមួយដែលប្រកាសថានៅដើមខែឧសភានេះខ្សែរថភ្លើងរវាងក្រុងប៉ោយប៉ែត និងបាត់ដំបងនឹងចាប់ផ្តើមដំណើរការជាផ្លូវការ។
បន្ទាប់ពីការសាងសង់ឡើងវិញរួចរាល់ជាស្ថាពរការដឹកជញ្ជូនទំនិញរវាងប្រទេសកម្ពុជាជាមួយប្រទេសថៃនឹងមានភាពកាន់តែមានភាពប្រសើរបន្ថែមទៀត។
ទោះជាយ៉ាងណាបើតាមលោក ស៊ុន ចាន់ថុល ការពិភាក្សាអំពីការរៀបចំតភ្ជាប់ផ្លូវរថភ្លើងនៅចំណុចព្រំដែននាពេលនេះមិនទាន់បានរួចរាល់នោះទេ។
ការបើកដំណើរការផ្លូវដែកនេះមិនត្រឹមតែជួយកាត់បន្ថយការចំណាយលើការដឹកជញ្ជូនប៉ុណ្ណោះទេ តែវាក៏នឹងជួយជំរុញការដោះដូរពាណិជ្ជកម្មរវាងប្រទេសកម្ពុជា និងប្រទេសថៃឲ្យមានទំហំកាន់តែធំថែមទៀត។ ចំណែកវិស័យអចលនទ្រព្យដែលស្ថិតនៅក្បែរកន្លែងខ្សែរថភ្លើងឆ្លងកាត់ក៏នឹងមានភាពល្អប្រសើរផងដែរ។
ស្ថានីយរថភ្លើងក្រុងសិរីសោភ័ណ។ រូបថត សហការី
លោក សាន ស៊ានហូ អភិបាលក្រុងប៉ោយប៉ែតបាននិយាយថាផ្លូវដែកនឹងជួយកែលម្អកម្រិតជីវភាពរស់នៅរបស់ប្រជាជន និងបង្កើនល្បឿនកំណើនពាណិជ្ជកម្ម។
លោកមានប្រសាសន៍ថា៖ «ការបើកឡើងវិញនូវផ្លូវដែករវាងក្រុងប៉ោយប៉ែត និងក្រុងសិរីសោភ័ណនឹងជួយកាត់បន្ថយការចំណាយលើការធ្វើដំណើរ និងគ្រោះថ្នាក់ចរាចរណ៍ព្រមទាំងជួយពង្រីកពាណិជ្ជកម្ម និងការវិនិយោគនៅក្នុងទីក្រុងប៉ោយប៉ែតបានយ៉ាងច្រើន។ វិស័យអចលនទ្រព្យនឹងទទួលបានអត្ថប្រយោជន៍ពីការរីកចម្រើនផ្នែកពាណិជ្ជកម្ម និងការវិនិយោគរបស់ទីក្រុងនេះ»។
ខណៈបច្ចុប្បន្ននេះការស្ថាបនា និងការកែលម្អប្រព័ន្ធហេដ្ឋារចនាសម្ព័ន្ធនៅក្រុងប៉ោយប៉ែតកំពុងមានដំណើរការឆ្ពោះទៅមុខយ៉ាងរលូននោះបានធ្វើឲ្យអចលនទ្រព្យនៅតំបន់ជិតកាស៊ីណូមានតម្លៃប្រហែល ១០០០ ដុល្លារក្នុង ១ ម៉ែត្រការ៉េ។
របាយការណ៍ស្រាវជ្រាវចុងឆ្នាំ ២០១៧ របស់ក្រុមហ៊ុន CL Realty បានឲ្យដឹងថាដីនៅតំបន់ពាណិជ្ជកម្មតាមបណ្តោយផ្លូវធំក្នុងក្រុងប៉ោយប៉ែតមានតម្លៃចន្លោះ ៥០០-១០០០ ដុល្លារក្នុង ១ ម៉ែត្រការ៉េ ចំណែកដីឧស្សាហកម្ម និងដីលំនៅឋានធម្មតាមានតម្លៃពី ១០០-៥០០ ដុល្លារ។
ប្រជាពលរដ្ឋក្នុងតំបន់ ពិសេសម្ចាស់ដីមានសុទិដ្ឋិនិយមថា ការតភ្ជាប់ផ្លូវដែកនេះនឹងធ្វើឲ្យសកម្មភាពពាណិជ្ជកម្ម និងការវិនិយោគមានកាន់តែច្រើននៅក្នុងក្រុងប៉ោយប៉ែតដោយនឹងមានរោងចក្រច្រើនថែមទៀតមកបើកនៅក្នុងតំបន់សេដ្ឋកិច្ចពិសេសរបស់ទីក្រុងនេះ។
ផ្លូវរថភ្លើងពីក្រុងប៉ោយប៉ែតទៅក្រុងសិរីសោភ័ណ។ រូបថត ហ៊ឹន ពិសី
លោក សុខ វុត្ថា ដែលជាម្ចាស់ដី ១ កន្លែងនៅក្រុងប៉ោយប៉ែតបាននិយាយថា ផ្លូវរថភ្លើងនឹងធ្វើឲ្យអចលនទ្រព្យរបស់គាត់កាន់តែមានហាងឆេងល្អ។ លោកមានប្រសាសន៍ថា៖ «ខ្ញុំរីករាយណាស់ដែលរាជរដ្ឋាភិបាលបើកដំណើរការផ្លូវរថភ្លើងនៅទីនេះ។ ខ្ញុំជឿថាប្រការនេះនឹងទាក់ទាញរោងចក្រ និងប្រជាជនកាន់តែច្រើនឱ្យមកធ្វើការនៅប៉ោយប៉ែត ហើយជាលទ្ធផលតម្លៃអចលនទ្រព្យរបស់ខ្ញុំនឹងកើនឡើងបន្ថែមទៀត»។
នាយកប្រតិបត្តិក្រុមហ៊ុន ឃី រៀលអ៊ីស្ទេត លោក សន សៀប បាននិយាយថា លោកមិនរំពឹងថាផ្លូវដែករវាងក្រុងប៉ោយប៉ែត និងក្រុងសិរីសោភ័ណនឹងមានឥទ្ធិពលភ្លាមៗទៅលើតម្លៃអចលនទ្រព្យ ឬការអភិវឌ្ឍនៅក្នុងទីក្រុងប៉ោយប៉ែតនោះទេ ប៉ុន្តែវាអាចនឹងមានឥទ្ធិពលខ្លាំងនៅពេលដែលផ្លូវដែកតភ្ជាប់ទៅកាន់រាជធានីភ្នំពេញចាប់ផ្តើមដំណើរការ។ លោកបានបន្តថា ប៉ោយប៉ែតមានសក្តានុពលដ៏ធំធេងសម្រាប់ការវិនិយោគលើវិស័យអចលនទ្រព្យ ដោយសារនៅជាប់ព្រំដែនប្រទេសថៃ និងផែនការរបស់រាជរដ្ឋាភិបាលក្នុងការប្រែក្លាយក្រុងប៉ោយប៉ែតឱ្យក្លាយទៅជាមជ្ឈមណ្ឌលឧស្សាហកម្ម៕
