The Phnom Penh Post Search

Search form




Logo of Phnom Penh Post newspaper Phnom Penh Post - ផ្លូវ​ល្បឿនលឿន​ នឹង​រួមចំណែក​ច្រើន​ដល់​ការលើកកម្ពស់​វិស័យ​អចលនទ្រព្យ​នៅ​ក្រុង​បាវិត




ផ្លូវ​ល្បឿនលឿន​ នឹង​រួមចំណែក​ច្រើន​ដល់​ការលើកកម្ពស់​វិស័យ​អចលនទ្រព្យ​នៅ​ក្រុង​បាវិត

Content image - Phnom Penh Post
ទិដ្ឋភាព​នៃ​សំណង់​អគារ​ធំៗ​ជាច្រើន​នៅក្នុង​ទីក្រុង​បាវិត​។ រូបថត សហការី

ផ្លូវ​ល្បឿនលឿន​ នឹង​រួមចំណែក​ច្រើន​ដល់​ការលើកកម្ពស់​វិស័យ​អចលនទ្រព្យ​នៅ​ក្រុង​បាវិត

ភ្នំពេញៈ ការសិក្សា​ពី​គម្រោង​សាងសង់​ផ្លូវ​ល្បឿន​លឿន​តភ្ជាប់​ពី​ភ្នំពេញ​ទៅកាន់​ក្រុង​បាវិត ដែល​ជា​ច្រកទ្វារ​ព្រំដែន​អន្តរជាតិ​កម្ពុជា វៀតណាម កំពុងមាន​ដំណើរ​ទៅមុខ​យ៉ាង​រលូន ខណៈ​អ្នកជំនាញ​នៅក្នុង​វិស័យ​អចលនទ្រព្យ​មាន​សុទិដ្ឋិនិយម​ថា ផ្លូវ​ថ្មី​នេះ​នឹង​រួមចំណែក​ច្រើន​ក្នុង​ការលើកកម្ពស់​សក្តានុពល​ទីផ្សារ​អចលនទ្រព្យ​នៅ​ក្រុង​បាវិត​។

កាលពី​សប្តាហ៍​មុន​នៅក្នុង​កិច្ចប្រជុំ​មួយ​រវាង​ថ្នាក់ដឹកនាំ​ក្រសួង​សាធារណការ និង​ដឹកជញ្ជូន​ជាមួយនឹង China Railway International Group Co., Ltd ដែលជា​ក្រុមហ៊ុន​កំពុងធ្វើការ​សិក្សា​ពី​លក្ខណៈ​បច្ចេកទេស​នៃ​គម្រោង​សាងសង់​ហេដ្ឋារចនាសម្ព័ន្ធ​ផ្លូវ​ល្បឿន​លឿន​ភ្ជាប់ពី​រាជធានី​ភ្នំពេញ​ទៅ​ក្រុង​បាវិត តំណាង​ក្រុមហ៊ុន​បាន​លើកឡើង​ថា ការសិក្សា​ពី​ស្ថានភាព​ភូមិសាស្ត្រ និង​ផលប៉ះពាល់​ផ្សេងៗ​កំពុង​ដំណើរការ​ទៅ​មុខជា​បន្តបន្ទាប់​។ ក្រុមហ៊ុន​រកឃើញ​មាន​ជម្រើស​ចំនួន​ ៣ សម្រាប់​ការសាងសង់​គម្រោង​ខាងលើ​។

លោក សូរ វិចទ័រ រដ្ឋលេខាធិការ​ក្រសួង​សាធារណការ និង​ដឹកជញ្ជូន​ដែល​បាន​ដឹកនាំ​ក្នុង​កិច្ចប្រជុំ​នោះ​បាន​និយាយថា ក្រសួង​ក៏ដូចជា​រដ្ឋាភិបាល​ត្រូវការ​សិក្សា​ពិនិត្យ​ឲ្យ​បាន​គ្រប់​ជ្រុងជ្រោយ​លើ​ជម្រើស​ផ្លូវ​ទាំង​ ៣ ​នេះ​មុន​នឹង​ធ្វើការ​សម្រេច​ជា​ចុងក្រោយ ហើយ​ម្យ៉ាងទៀត​ក្រសួង​ក៏ត្រូវ​រង់ចាំ​លទ្ធផល​របាយការណ៍​សិក្សា​ផ្នែក​ហិរញ្ញវត្ថុ​ពី​ក្រុមហ៊ុន​នៅ​ពាក់កណ្ដាល​ខែ​តុលា ឆ្នាំ​ ២០២០ នេះ ដើម្បី​យក​ជា​មូលដ្ឋាន​ក្នុង​ការសម្រេចចិត្ត​ផងដែរ​។

លោក នួន រិទ្ធី អគ្គនាយក​ក្រុមហ៊ុន​អចលនទ្រព្យ KFA បាន​ប្រាប់​ភ្នំពេញ​ប៉ុស្តិ៍​កាលពី​ថ្ងៃ​ពុធ​ថា គម្រោង​សាងសង់​ផ្លូវ​ល្បឿនលឿន​ភ្នំពេញ បាវិត មិន​ត្រឹមតែ​ជួយ​លើកស្ទួយ​វិស័យ​ដឹកជញ្ជូន​ប៉ុណ្ណោះ​ទេ តែ​វា​ក៏​នឹង​ជួយ​ធ្វើឲ្យ​ទីផ្សារ​អចលនទ្រព្យ​មាន​ភាពល្អប្រសើរ​ផងដែរ ពិសេស​ក្រុង​បាវិត​។

លោក​បន្តថា ប្រព័ន្ធ​ហេដ្ឋារចនាសម្ព័ន្ធ​មាន​ទំនាក់ទំនង​យ៉ាង​ជិតស្និទ្ធ​នឹង​ទីផ្សារ​​អចលនទ្រព្យ គឺ​នៅពេល​ណា​មាន​ផ្លូវ​នឹង​មាន​ការធ្វើ​ចរាចរណ៍​ច្រើន ហើយ​ចំនួន​ប្រជាពលរដ្ឋ​រស់នៅ និង​ប្រកប​មុខរបរ​ក៏​កើនឡើង​ទៅតាម​នោះដែរ​។

លោក​ថ្លែងថា​៖ «​ការបង្កើត​ផ្លូវ​ថ្មី​បន្ថែម ពិសេស​ផ្លូវ​ល្បឿន​លឿន​នេះ​គឺជា​សញ្ញា​ល្អ​សម្រាប់​វិស័យ​អចលនទ្រព្យ ពិសេស​តំបន់​បាវិត​ដែល​អាច​នឹង​ក្លាយជា Hub មួយ​ដ៏សំខាន់​រវាង​កម្ពុជា និង​វៀតណាម​»​។

យោងតាម​លោក រិទ្ធី បច្ចុប្បន្ន​អចលនទ្រព្យ​នៅ​ទីតាំង​ល្អ​បំផុត​ក្នុង​ក្រុង​បាវិត មាន​តម្លៃ​ក្រោម ១ ០០០ ​ដុល្លារ​ ក្នុង ១ ​ម៉ែត្រការ៉េ និង​តំបន់​កសិកម្ម​ឆ្ងាយៗ​អាចមាន​តម្លៃ​ប្រហែល ៥ ​ដុល្លារ​។

ទន្ទឹម​គ្នា​នេះ​ប្រធាន​សមាគម​អចលនទ្រព្យ​សកល លោក សំ សុខនឿន បាន​ប្រាប់ថា ផ្លូវ​ល្បឿន​លឿន​នឹង​ក្លាយជា​ចំណែក​ដ៏ធំ​ក្នុង​ការធ្វើឲ្យ​អចលនទ្រព្យ​ក្រុង​បាវិត មាន​សម្ទុះ​ខ្លាំង​ប្រហាក់ប្រហែល​នឹង​ក្រុងព្រះសីហនុ​នាពេល​បច្ចុប្បន្ន​។ លោក​បន្តថា​៖ «​ដោយសារ​ផ្លូវ​ល្បឿន​លឿន​ចេញពី​ភ្នំពេញ​ទៅ​បញ្ចប់​នៅ​បាវិត​នោះ ហេតុនេះ​ទីផ្សារ​អចលនទ្រព្យ​នៅ​បាវិត​នឹង​មាន​សម្ទុះ​ខ្លាំង​នៅពេល​ខាងមុខ​»​។

លោក​បន្ថែមថា ទោះយ៉ាងណា​អ្វីៗ​ទាំងអស់​ក៏​អាស្រ័យ​ទៅ​លើ​ផែនការ និង​គោលនយោបាយ​របស់​រដ្ឋាភិបាល​អភិវឌ្ឍន៍​ក្នុង​ការទាក់ទាញ​កំណើន​វិនិយោគិន និង​តំបន់​វិនិយោគ​ផងដែរ​។

ក្នុង​គោលបំណង​ជំរុញ​ការសាងសង់​ផ្លូវល្បឿនលឿន​នេះ​ឲ្យ​កាន់តែ​លឿន លោក​នាយករដ្ឋមន្ត្រី ហ៊ុន សែន កាលពី​ថ្ងៃទី​ ១៥ ខែ កក្កដា ឆ្នាំ​ ២០២០ នេះ​បានសម្រេច​បង្កើត​គណៈកម្មការ​អន្តរក្រសួង ដើម្បី​ជំរុញ​ដំណើរការ​អនុវត្ត​គម្រោង​ហេដ្ឋារចនាសម្ព័ន្ធ​ផ្លូវ​ល្បឿន​លឿន​តភ្ជាប់​ពី​រាជធានី​ភ្នំពេញ ទីក្រុង​បាវិត​ដែល​មាន​សមាជិក​សរុប ១៧ ​នាក់​ ដោយមាន​រដ្ឋមន្ត្រី​ក្រសួង​សាធារណការ និង​ដឹកជញ្ជូន លោក ស៊ុន ចាន់ថុល ជា​ប្រធាន​។

កន្លងមក​គម្រោង​សង់​ផ្លូវ​ល្បឿន​លឿន​នេះ​ធ្លាប់​ត្រូវ​បាន​ទីភ្នាក់ងារ​ជប៉ុន JICA ធ្វើការ​សិក្សា​ម្តង​រួចមកហើយ ដោយ​ផ្លូវ​នេះ​អាច​នឹង​មាន​ចម្ងាយ ១៣៥ ​គីឡូម៉ែត្រ និង​មាន​តម្លៃ​ជាង ២ ​ពាន់​លាន​ដុល្លារ​៕LA

អត្ថបទគួរចាប់អារម្មណ៍

  • ភ្នំពេញ៖ រដ្ឋមន្ត្រី​ក្រសួង​យុត្តិធម៌​លោក​ កើត ​រិទ្ធ​ បាន​ប្រាប់​ឯកអគ្គ​រាជទូត​អូស្ត្រាលី​លោក ​Pablo​ Kang ​នៅ​ក្នុង​ជំនួប​កាល​ពី​ថ្ងៃ​អង្គារ នៅ​ក្រសួង​យុត្តិធម៌​ថា​ ការ​ចាប់​ខ្លួន​បុគ្គល​ណា​មួយ​ដោយ​សមត្ថកិច្ច គឺ​ធ្វើ​ទ្បើង​ដោយ​អនុលោម​តាម​ច្បាប់​​កម្ពុជា។​

  • ភ្នំពេញ៖ ដោយ​សង្កេត​ឃើញ​ពី​ការ​ប្រឈម​របស់​​ប្រជាកសិករ​កម្ពុជា​​មួយ​ចំនួន​ ជាពិសេស​អ្នក​នៅ​ទី​ដាច់​ស្រយាល​ ដែល​បាត់បង់​ទីផ្សារ​​​​ព្រោះ​តែ​វិបត្តិ​កូវីដ យុវជន ​១ ក្រុម ​បាន​រួមគ្នា​បង្កើត​គម្រោង​ COVID Farmer Hacker ដើម្បី​ជួយ​​អ្នក​ខិតខំ​ដាំដុះ​តែ​ត្រូវ​រងគ្រោះ​ពី​ការ​រំខាន​ដល់​​​សេដ្ឋកិច្ច​​បង្ក​ដោយ​វីរុស​កូរ៉ូណា។​

  • ភ្នំពេញ៖ គ្រឹះស្ថាន​មីក្រូហិរញ្ញវត្ថុ ប្រាសាក់ ​​ដែល​ចុះ​បញ្ជី​សញ្ញាប័ណ្ណ​សាជីវកម្ម​នៅ​ផ្សារ​មូលបត្រ​កម្ពុជា ​(CSX) បាន​រាយការណ៍​អំពី​ប្រតិបត្តិការ​អាជីវកម្ម​ដ៏​ល្អ​ប្រសើរ​នៅ​ត្រីមាស​ទី​២ ​ឆ្នាំ​នេះ ទោះបី​ជា​​ខ្លួន​ទទួល​រង​នូវ​សម្ពាធ​ខ្លះៗ​ពី​ការ​រីក​រាលដាល​ជំងឺ​កូវីដ ​១៩ ​ដែល​បណ្ដាល​ឱ្យ​សេដ្ឋកិច្ច​របស់​កម្ពុជា មាន​ការ​ធ្លាក់ចុះ​ក៏​ដោយ​។​

  • ភ្នំពេញ៖ ​លោកស្រី​ ​ភឿង​ សកុណា ​រដ្ឋមន្រ្តី​ក្រសួង​វប្បធម៌​ និង​វិចិត្រ​សិល្បៈ​បាន​ចេញ​សេចក្ដី​ណែនាំ​ដល់​គ្រប់​អង្គភាព​ពាក់ព័ន្ធ​ក្រោម​ឱវាទ​ក្រសួង​វប្បធម៌ ​និង​គ្រប់​រដ្ឋបាល​ថ្នាក់​ក្រោម​ជាតិ ​អនុវត្ត​នីតិវិធី​ និង​ទម្រង់​បែបបទ​នៃ​ការ​គ្រប់គ្រង​អាជីវកម្ម​កាត់សក់​ ​អ៊ុត​សក់​ និង​លម្អ​ក្រចក

  • ភ្នំពេញ៖ ​រដ្ឋមន្រ្តី​ក្រសួង​សុខាភិបាល​លោក ​ម៉ម​ ប៊ុន​ហេង បាន​ជំរុញ​ឱ្យ​គ្រប់​ភាគី​ពាក់ព័ន្ធ​ទាំង​អស់​ ដែល​ធ្វើ​ការ​ផ្នែក​គាំពារ​មាតា​ និង​ទារក​ ត្រូវ​​បង្កើន​យុទ្ធនាការ​អប់រំ​ផ្សព្វផ្សាយ​អំពី​សារៈសំខាន់​នៃ​ការ​បំបៅ​កូន​ដោយ​ទឹក​ដោះ​ម្តាយ​ និង​ហានិភ័យ​ពី​ការ​បំបៅ​កូន​ដោយ​ទឹក​ដោះ​គោ​ម្សៅ​ផ្សំ​តាម​រូបមន្ត​ទាំង​នៅ​ថ្នាក់​ជាតិ​ និង​ថ្នាក់​ក្រោម​ជាតិ។

  • មណ្ឌលគិរី៖ សាលា​ដំបូង​ខេត្ត​មណ្ឌលគិរី ពី​ម្សិលមិញ​បាន​សម្រេច​ឃុំ​ខ្លួន​ចាងហ្វាង​សារព័ត៌មាន​អនឡាញ​ម្នាក់​នៅ​ពន្ធនាគារ​​ខេត្ត​ក្រោម​បទ​ចោទ ​«ឈូស​ឆាយ​ដី​ព្រៃ​ដោយ​គ្មាន​ការ​អនុញ្ញាត​» បន្ទាប់​ពី​សមត្ថកិច្ច​ឃាត់​ខ្លួន​កាល​ពី​​ថ្ងៃទី ២២ កញ្ញា ​តាម​ដីកា​តុលាការ​ពាក់ព័ន្ធ​ការ​ឈូស​ឆាយ​ដី​ព្រៃ ​និង​ប្រើប្រាស់​សារធាតុ​ញៀន។