ភ្នំពេញ: ក្រុមហ៊ុន Aeon Mall (Cambodia) Co,. Ltd ដែលជាក្រុមហ៊ុនពហុផលិតផលជប៉ុនបានប្រកាសចាប់ផ្តើមបុកគ្រឹះសាងសង់គម្រោងផ្សារទំនើបអ៊ីអន ៣ ដែលនឹងចំណាយទឹកប្រាក់វិនិយោគជាង ២០០ លានដុល្លារស្ថិតនៅក្នុងសង្កាត់ចាក់អង្រែក្រោមខណ្ឌមានជ័យ រាជធានីភ្នំពេញកាលពីថ្ងៃពុធ ដោយគ្រោងចំណាយពេលសាងសង់ ២៧ ខែ។
ដំណើរការស្ថាបនាផ្សារទំនើបអ៊ីអន ៣ ដែលមានអគារកម្ពស់ ៥ ជាន់នាពេលនេះបានលុបបំបាត់នូវការសង្ស័យពីភាពប្រាកដនិយមនៃការចាប់ផ្តើមសាងសង់ ក្រោយពីមានព័ត៌មានលើកឡើងជាហូរហែពីវត្តមានផ្សារទំនើបធំបំផុតនៅកម្ពុជានេះ បន្ទាប់ពីសម្ពោធដាក់ឱ្យប្រើប្រាស់ផ្សារទំនើបអ៊ីអន ២ កាលពីខែឧសភា ឆ្នាំ ២០១៨ ហើយ ទីតាំងផ្សារទំនើបអ៊ីនអន ៣ នេះនឹងក្លាយជាមជ្ឈមណ្ឌលហាងទំនិញ និងចំណតរថយន្តស្ថិតនៅភាគខាងត្បូងក្រុងភ្នំពេញ។
ក្រុមហ៊ុន Hyundai Engineering បានឈ្នះការដេញថ្លៃលើគម្រោងសាងសង់ផ្សារទំនើបអ៊ីអន ៣ ដែលមានតម្លៃ ២០០ ពាន់លានវ៉ុន (១៦៤ លានដុល្លារ)។
លោក ឃួង ស្រេង អភិបាលរាជធានីភ្នំពេញបានថ្លែងក្នុងពិធីបុកគ្រឹះកាលពីម្សិលមិញថា ផ្អែកតាមប្លង់គោលប្រើប្រាស់ដីរាជធានីភ្នំពេញឆ្នាំ ២០៣៥ តំបន់ភាគខាងត្បូងទីក្រុងភ្នំពេញត្រូវបានកំណត់ជាតំបន់អភិវឌ្ឍន៍ថ្មីសម្រាប់ទទួលគម្រោងសំណង់អគារខ្ពស់ៗ ស្ថាបកម្មប្រណីត និងការអភិវឌ្ឍទីក្រុងរណប ដើម្បីធានាដល់ការប្រើប្រាស់ដីធ្លី និងសក្តានុពលដែលមានស្រាប់ក្នុងទីក្រុងប្រកបដោយប្រសិទ្ធភាពខ្ពស់។
លោកថ្លែងថា៖ «ខ្ញុំសូមចូលរួមអបអរសាទរ និងវាយតម្លៃខ្ពស់ចំពោះវឌ្ឍនភាព និងការសម្រេចចិត្តដ៏ត្រឹមត្រូវរបស់ក្រុមហ៊ុនមកវិនិយោគទំហំទឹកប្រាក់ដ៏ច្រើនសន្ធឹកសន្ធាប់លើគម្រោងអភិវឌ្ឍន៍ផ្សារទំនើបចាប់តាំងពីគ្រោងទី ១ រហូតដល់គ្រោងទី ៣ នៅទីក្រុងភ្នំពេញ។ លទ្ធផលនេះជាការយកចិត្តទុកដាក់របស់រដ្ឋាភិបាលក្នុងការខិតខំប្រឹងប្រែងទាក់ទាញការវិនិយោគក្នុងប្រទេស និងក្រៅប្រទេស»។
លោកថ្លែងបន្តថា ក្នុងអំឡុងពេលនៃការរីករាលដាលជំងឺកូវីដ១៩ កំពុងប៉ះពាល់ដល់ការធ្វើដំណើរកម្សាន្តជាសកល ដូច្នេះការដើរកម្សាន្ត និងទិញទំនិញតាមផ្សារទំនើបក្នុងស្រុកគឺជាជម្រើសដ៏ល្អសម្រាប់ការវិនិយោគក្នុងកាលានុវត្តភាពថ្មីនេះ។
លោកនិយាយថា៖ «ក្នុងន័យនេះ ដើម្បីជាចលករជំរុញ និងគាំទ្រដល់ការវិនិយោគផ្នែកឯកជនក្នុងនាមរដ្ឋបាលរាជធានីភ្នំពេញ និងក្នុងនាមខ្ញុំផ្ទាល់ ខ្ញុំសូមចូលរួមគាំទ្របង្កលក្ខណៈទទួលស្វាគមន៍ និងជំរុញលើកទឹកចិត្តចំពោះការបណ្តាក់ទុនវិនិយោគ ធ្វើអាជីវកម្ម សេវាកម្មគ្រប់ប្រភេទក្នុងមូលដ្ឋានក្នុងទីក្រុង»។
លោកបន្តថា៖ «យើងក៏គាំទ្រកិច្ចសហប្រតិបត្តិការពាណិជ្ជកម្មការបើកទូលាយបរិយាកាសវិនិយោគឱ្យកាន់តែមានភាពល្អប្រសើរ ប្រកបដោយភាពទាក់ទាញ និងផ្តល់ទំនុកចិត្តខ្ពស់ជូនដល់ធុរជន និងវិនិយោគិន ស្របតាមក្របខ័ណ្ឌពាណិជ្ជកម្មសកលសម្រាប់ជំរុញកំណើនសេដ្ឋកិច្ច និងពង្រីកសក្តានុពលថ្មីៗប្រកបដោយគុណវុឌ្ឍិខ្ពស់»។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ប្រាប់ភ្នំពេញប៉ុស្តិ៍កាលពីថ្ងៃពុធថា ទីក្រុងរណប ING City នេះ ដែលស្ថិតនៅភាគខាងត្បូងរាជធានីភ្នំពេញនឹងក្លាយជាមជ្ឈមណ្ឌលពាណិជ្ជកម្មដ៏ទាក់ទាញនៃគម្រោងវិនិយោគលើអគារពាណិជ្ជកម្មយ៉ាងខ្លាំងនៅពេលអនាគត ព្រោះតំបន់នេះមានដីទំហំធំៗសម្រាប់អភិវឌ្ឍវិស័យអចលនទ្រព្យ។
លោកថ្លែងថា៖ «ផ្សារទំនើបនេះនឹងក្លាយជាមជ្ឍមណ្ឌលលក់រាយមួយដែលទាក់ទាញប្រជាជនមកពីក្រុងតាខ្មៅ និងអ្នករស់នៅក្នុងខណ្ឌដង្កោមកទិញទំនិញនៅទីនេះ ហើយវានឹងជំរុញលំហូរប្រជាជនកាន់តែច្រើនមករស់នៅក្នុងតំបន់ផ្លូវ ៦០ ម៉ែត្រនេះផងដែរ»។
លោកបន្តថា៖ «តំបន់នេះជាទីតាំងពាណិជ្ជកម្មដែលដីធ្លីមានតម្លៃខ្ពស់រួចទៅហើយ ដូច្នេះតម្លៃដីនឹងបន្តកើនឡើងឥតឈប់ថែមទៀតនៅពេលខាងមុខ ស្របពេលតំបន់នេះមានគម្រោងផ្សារទំនើបអ៊ីអន ៣ នេះ និងគម្រោងអគារខុនដូថ្មីបន្ថែមទៀត ខណៈសព្វថ្ងៃដីនៅទីនេះមានតម្លៃជាង ៣ ០០០ ដុល្លារក្នុង ១ ម៉ែត្រការ៉េ»។
លោក ម៉ាសាហ៊ីរ៉ូ មិកាមិ (MASAHIRO MIKAMI) ឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំកម្ពុជាបានឱ្យដឹងថា ផ្សារទំនើបអ៊ីអនទី ១ និងទី ២ ទទួលបានអតិថិជនបានប្រមាណ ១ លាននាក់ក្នុង ១ ខែៗសម្រាប់ផ្សារទំនើបនីមួយៗ។
បើតាមលោក ឃួង ស្រេង ក្នុងរយៈពេល ៩ ខែនៃឆ្នាំ ២០២០ នេះគម្រោងសាងសង់សំណង់ថ្មីចំនួន ១ ០២០ គម្រោងដែលមានជាង ៥ លានម៉ែត្រការ៉េ និងមានទំហំទុនវិនិយោគប្រមាណ ២,៣ ពាន់លានដុល្លារ៕ LA