.jpg)
ស្រឡាងដឹកជញ្ជូនអ្នកដំណើរពីភ្នំពេញ ទៅកាន់អរិយក្សត្រ ខណៈរំលេចទិដ្ឋភាពខាងក្រោយ នូវសំណង់អគារខ្ពស់ៗ ក្នុងរាជធានីភ្នំពេញ។ រូបថត មឿន ញាណ
ក្រុមហ៊ុនមកពីមីយ៉ាន់ម៉ាបើកសណ្ឋាគារ និងកាស៊ីណូនៅកម្ពុជា
Gobo East Enternainment Hotel & Casino ដែលស្ថិតនៅក្នុងក្រុងព្រះសីហនុ ក្រោមការវិនិយោគរបស់វិនិយោគិនមកពីប្រទេសមីយ៉ាន់ម៉ាក្នុងតម្លៃជាង ១៣ លានដុល្លារត្រូវបានបើកសម្ពោធឲ្យដំណើរការហើយកាលពីថ្ងៃអង្គារកន្លងមក។
សណ្ឋាគារ និងកាស៊ីណូប្រណីតនេះមានកម្ពស់ ៥ ជាន់ស្មើនឹង ១២៣ បន្ទប់ ដែលមានបំពាក់នូវគ្រឿងសង្ហារិម និងឧបករណ៍ទំនើបៗ។
លោកស្រី ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ច ដែលបានអញ្ជើញចូលរួមក្នុងពិធីសម្ពោធនោះមានប្រសាសន៍ថាការរីកលូតលាស់នៃសំណង់អគារទាំងអស់នេះគឺឆ្លុះបញ្ចាំងពីការរីកលូតលាស់ និងទំនុកចិត្តរបស់វិនិយោគិនបរទេសចំពោះប្រទេសកម្ពុជា៕
Prince Real Estate Group នឹងបង្កើតទុនឲ្យដល់ $៥ ពាន់លាន
Prince Real Estate Group ដែល ជាក្រុមហ៊ុនចិនវិនិយោគលើអចលនទ្រព្យនៅកម្ពុជាបានប្រកាសពីផែនការបង្កើនការវិនិយោគក្នុងវិស័យអចលនទ្រព្យនៅកម្ពុជាឲ្យមានទំហំដល់ ៥ ពាន់លានដុល្លារក្នុងរយៈពេល ១០ ឆ្នាំទៀត ដើម្បីឆ្លើយតបនឹងការរីកចម្រើននៅកម្ពុជា។
នាឱកាលខួប ៣ ឆ្នាំកាលពីថ្ងៃចន្ទ អ្នកតំណាងក្រុមហ៊ុន លោក Li Min បាននិយាយថាក្រុមហ៊ុនរបស់ខ្លួនបានរីកចម្រើនយ៉ាងរហ័សនៅកម្ពុជារួមមានគម្រោងខុនដូនៅភ្នំពេញ និងក្រុងព្រះសីហនុជាមួយនឹងទុនវិនិយោគជាង ១.២ ពាន់លានដុល្លារ៕
ក្រុមហ៊ុនវៀតណាមនឹងបើកការិយាល័យរួមនៅភ្នំពេញឆ្នាំនេះ
ក្រុមហ៊ុនវៀតណាម Toong បានប្រកាសផែនការពង្រីកការិយាល័យធ្វើការរួមនៅឡាវ និងកម្ពុជានៅក្នុងឆ្នាំនេះដោយសហការជាមួយក្រុមហ៊ុនអភិវឌ្ឍន៍ និងក្រុមហ៊ុនផ្គត់ផ្គង់សេវាកម្មក្នុងស្រុក។ ការិយាល័យរួមនេះនឹងមានទីតាំងស្ថិតនៅក្បែរអគារ Vattanac Capital Tower។
ការិយាល័យរួមដែលមានផ្ទៃក្រឡា ៧០០ ម៉ែត្រការ៉េនឹងបើកនៅចុងឆ្នាំនេះ។ យ៉ាងណាក៏ដោយការិយាល័យរួមគឺជាគំនិតថ្មីមួយនៅក្នុងទីផ្សារអចលនទ្រព្យនៅកម្ពុជា៕
