The Phnom Penh Post Search

Search form




Logo of Phnom Penh Post newspaper Phnom Penh Post - ភាព​ខ្វះ​ចន្លោះ​មុន​នឹង​សម្រេច​ចិត្ត​ទិញ​ ខុនដូ​ របស់​អតិថិជន​នៅ​ទីក្រុង​ភ្នំពេញ

ភាព​ខ្វះ​ចន្លោះ​មុន​នឹង​សម្រេច​ចិត្ត​ទិញ​ ខុនដូ​ របស់​អតិថិជន​នៅ​ទីក្រុង​ភ្នំពេញ

លោក Simon Griffiths បាន​ទទួល​បន្ទុក​ផ្នែក​គ្រប់គ្រង​អចលនទ្រព្យ​របស់​ក្រុមហ៊ុន CBRE កម្ពុជា​អស់​រយៈពេល​ ៤ ​ឆ្នាំ​មក​ហើយ​ដែល​បាន​ចូលរួម​នៅក្នុង​គម្រោង​សំណង់​ធំៗ​ល្បីៗ​ជាច្រើន​នៅក្នុង​រាជធានី​ភ្នំពេញ​ហើយ​មាន​បទពិសោធ​ខាង​ផ្នែក​ទិញ-លក់-ជួល ផ្នែក​គ្រប់គ្រង និង​ផ្នែក​អភិវឌ្ឍ​គម្រោង​អចលនទ្រព្យ​ជាង ១០ ​ឆ្នាំ​មក​ហើយ​ទាំង​នៅក្នុង​ព្រះរាជាណាចក្រ​កម្ពុជា និង​ចក្រភព​អង់គ្លេស​៕
លោក Simon Griffiths បាន​ទទួល​បន្ទុក​ផ្នែក​គ្រប់គ្រង​អចលនទ្រព្យ​របស់​ក្រុមហ៊ុន CBRE កម្ពុជា​អស់​រយៈពេល​ ៤ ​ឆ្នាំ​មក​ហើយ​ដែល​បាន​ចូលរួម​នៅក្នុង​គម្រោង​សំណង់​ធំៗ​ល្បីៗ​ជាច្រើន​នៅក្នុង​រាជធានី​ភ្នំពេញ​ហើយ​មាន​បទពិសោធ​ខាង​ផ្នែក​ ទិញ-លក់-ជួល ផ្នែក​គ្រប់គ្រង និង​ផ្នែក​អភិវឌ្ឍ​គម្រោង​អចលនទ្រព្យ​ជាង ១០ ​ឆ្នាំ​មក​ហើយ​ទាំង​នៅក្នុង​ព្រះរាជាណាចក្រ​កម្ពុជា និង​ចក្រភព​អង់គ្លេស​៕

ភាព​ខ្វះ​ចន្លោះ​មុន​នឹង​សម្រេច​ចិត្ត​ទិញ​ ខុនដូ​ របស់​អតិថិជន​នៅ​ទីក្រុង​ភ្នំពេញ

អត្ថបទពាណិជ្ជកម្ម

ពេល​ទិញ​ខុនដូ​អ្នក​ទិញ​ភាគច្រើន​ពុំ​ដែល​ខ្វាយខ្វល់​ថា​អ្នក​ណា​ជា​អ្នក​ទទួល​ខុសត្រូវ​ការ​សាងសង់​ឲ្យ​បាន​រួចរាល់ និង​ថា​សម្ភារ​ដែល​មាន​គុណភាព​គង់វង្ស​យូរ​អង្វែង​​នោះ​មាន​តម្លៃ​ប៉ុន្មាន​នោះ​ទេ​។

ការ​មិន​ខ្វាយខ្វល់​នឹង​ការ​សាងសង់​បញ្ចប់ និង​តម្លៃ​នេះ​អាច​ធ្វើឲ្យ​មាន​ផលប៉ះពាល់​យ៉ាង​ខ្លាំង​លើ​តម្លៃ​នៅពេល​លក់​ចេញ​វិញ ឬ​ពេល​ដាក់​ជួល​ហើយ​ក៏​មាន​ផលប៉ះពាល់​ជាច្រើន​ទៀត។ នេះ​បើ​យើង​តាម​លោក Simon Griffiths នាយក​តំណាង​ក្រុមហ៊ុន CBRE កម្ពុជា​។

នៅក្នុង​កិច្ចសម្ភាសន៍​ជាពិសេស​ជាមួយ​ប៉ុស្តិ៍​អចលនទ្រព្យ​លោក Griffiths បកស្រាយ​អំពី​មូលហេតុ​ដែល​វិនិយោគិន និង​អតិថិជន​អចលនទ្រព្យ​នៅក្នុង​ទីក្រុង​ភ្នំពេញ​ចាំបាច់​ត្រូវ​ពិចារណា​ឲ្យ​បាន​ល្អិតល្អន់​លើ​ការ​គ្រប់គ្រង​សំណង់ និង​តម្លៃ​សេវា​នៃ​ការ​គ្រប់គ្រង​ផង​ដែរ​។

ខណៈ​ដែល​ទីផ្សារ​អចលនទ្រព្យ​កំពុង​មាន​​សកម្មភាព​មមាញឹក​យ៉ាង​ក្តៅគគុក​ហើយ​សំណង់​អគារ​ខុនដូ​ថ្មីៗ​កំពុង​តែ​ផុស​លេច​ចេញ​ឡើង​យ៉ាង​ច្រើន​ឥត​ឈប់ឈរ​នៅក្នុង​ទីក្រុង​ភ្នំពេញ​នោះ​ប្រធានបទ​ដែល​កម្រ​នឹង​ត្រូវ​បាន​លើក​ឡើង​យក​មក​ពិភាក្សា​បំផុត​នោះ​គឺ​ថា​តើ​ខុនដូ​នេះ​នឹង​ត្រូវ​បាន​គ្រប់គ្រង​ដោយ​របៀប​ណា​ខ្លះ​នៅ​ពេល​បាន​សាងសង់​ចប់​ជា​ស្ថាពរ និង​ដាក់​ទិញ​ លក់ ឬ​ជួល​នោះ​?

បើ​ទោះ​ជា​ការ​គ្រប់គ្រង​អចលនទ្រព្យ​មាន​ឥទ្ធិពល​លើ​ការ​សម្រេចចិត្ត​របស់​អតិថិជន​មុន​នឹង​ធ្វើការ​ជាវ​ដោយ​មិន​បាច់​រាប់​បញ្ចូល​នូវ​គុណសម្បត្តិ​នៅពេល​លក់​ចេញ ឬ​ដាក់​ជួល​​ក៏ដោយ​ចំណុច​នេះ​មិន​ត្រូវ​បាន​គេ​ចាប់​អារម្មណ៍​ច្រើន​នោះ​ទេ​។ តម្លៃ ទីតាំង និង​កេរ្តិ៍ឈ្មោះ​របស់​វិនិយោគិន ឬ​ម្ចាស់​គម្រោង គ្រឿង​សម្ភារ​សំណង់ និង​សោភណភាព​គឺជា​កត្តា​ដែល​មាន​ឥទ្ធិពល​លើ​ការ​សម្រេច​​របស់​អតិថិជន​ថា​តើ​គួរ​តែ​ធ្វើការ​ទិញ​ឬ​ក៏​អត់​? ទោះ​បី​ជា​យ៉ាង​ណា​ការ​គ្រប់គ្រង​អចលនទ្រព្យ និង​តម្លៃ​គឺជា​គន្លឹះ​ដ៏សំខាន់​មុន​ពេល​ទិញ​ខុនដូ​។

ប្រយោគ​មួយ​និយាយ​ថា​៖ អតិថិជន​ត្រូវ​ប្រុងប្រយ័ត្ន​នៅ​ពេល​ខុនដូ​មាន​តម្លៃ​សេវា​គ្រប់គ្រង​ទាប​!

សាក​គិត​ថា​បើ​អ្នក​ទិញ​រថយន្ត Porsche ស៊េរី​ស្ព័រ​មួយ​គ្រឿង​តើ​អ្នក​នឹង​​ចាក់​​សាំង​ដប​តាម​ផ្លូវ ឬ​សុខចិត្ត​ថែម​តែ ២ ​​​កាក់​ក្នុង​មួយ​លីត្រ​ចាក់​សាំង​គុណភាព​ខ្ពស់​ដែល​អាច​ការពារ​ម៉ាស៊ីន​យានយន្ត​របស់​​អ្នក​បាន​? តើ​អ្នក​នឹង​ថែរក្សា​ឡាន​អ្នក​​ឲ្យ​ស្អាត​ជានិច្ច ឬ​សុខចិត្ត​ឲ្យ​ម៉ាស៊ីន​ដុះ​ស្នឹម​ជាប់​ដី​? ត្រូវ​ហើយ​អ្នក​នឹង​ស្រឡាញ់​ហើយ​ចង់​ការពារ​លើ​អ្វី​ដែល​អ្នក​បាន​ចំណាយ​ប្រាក់​ទៅ​លើ​។

ដូច​គ្នា​ទៅ​នឹង​ការ​ចំណាយ​ប្រាក់​លើ​អចលនទ្រព្យ​ដែរ​។ តម្លៃ​គ្រប់គ្រង​ទាប​នឹង​ធ្វើឲ្យ​ការ​គ្រប់គ្រង​គ្មាន​គុណភាព​ហើយ​​វា​នឹង​ធ្វើឲ្យ​មាន​ផលប៉ះពាល់​យ៉ាង​ឆាប់​រហ័ស​លើ​អតិថិជន និង​អ្នក​ជួល​បើ​ទោះ​ជា​ទិញ-លក់-ជួល​រយៈពេល​ខ្លី​យ៉ាង​ណា​ក៏ដោយ​។ ប្រសិន​បើ​ការ​គ្រប់គ្រង​គ្មាន​គុណភាព​ការ​ចំណាយ​លើ​ការ​ទិញ​ខុនដូ​មាន​ភាព​ប្រថុយ​ប្រថាន​យ៉ាង​ខ្លាំង​ដោយ​មិន​ទាន់​ចាំបាច់​និយាយ​អំពី​ការ​ចូល​ទៅ​រស់​នៅក្នុង​ខុនដូ​នោះ​នៅ​ឡើយ​ផង​។ បើ​ដូច្នេះ​ហេតុ​អ្វី​បាន​ជា​អ្នក​ទិញ​ភាគច្រើន​រក​ខុនដូ​ដែល​មាន​គុណភាព​ខ្ពស់​តែ​បន្ទាប់​មក​ទាមទារ​តម្លៃ​សេវា​គ្រប់គ្រង​ទាប​ទៅ​វិញ​?

ចូរ​បញ្ចូល​ការ​ពិភាក្សា​នេះ​ទៅ​ក្នុង​ប្រធានបទ​ទីផ្សារ​អចលនទ្រព្យ​កម្ពុជា​។ តម្លៃ​ដែល​ភាគច្រើន​គេ​ហៅថា «​តម្លៃ​ទីផ្សារ​ស្តង់ដារ​» សម្រាប់​តម្លៃ​សេវា​គ្រប់គ្រង​ក្នុង​ទីក្រុង​ភ្នំពេញ​ត្រូវ​បាន​គេ​កំណត់​ឲ្យ​ស្ថិត​នៅ​ចន្លោះ​ពី ០,៥០ ​ដុល្លារ​ទៅ​ ១ ដុល្លារ​ក្នុង​មួយ​ម៉ែត្រការ៉េ​តែ​អតិថិជន​ទូទៅ​ច្រើន​គិត​ថា​មួយ​ម៉ែត្រ ១ ​ដុល្លារ​ថ្លៃ​ហួស​ហេតុ​ទៅវិញ​។

ឥឡូវ​សាក​គិត​ថា​បើ​មាន​ខុនដូ​ ១០០ ​អគារ​ហើយ​មួយ​អគារៗ​មាន​ទំហំ ១០០ ​ម៉ែត្រ​ការ៉េ​វិញ​ប្រសិន​បើ​អ្នក​បង់ ០,៥០ ​ដុល្លារ​ក្នុង​មួយ​ម៉ែត្រការ៉េ​នោះ​ការ​ចំណាយ​ប្រចាំខែ​សម្រាប់​សេវា​គ្រប់គ្រង​នឹង​មាន​ចំនួន ៥០០០ ​ដុល្លារ​ក្នុង​មួយ​ខែ​សម្រាប់​ខុនដូ​ទាំងអស់​។ ទឹក​ប្រាក់​នេះ​គឺ​សម្រាប់​បើក​ឲ្យ​អ្នក​គ្រប់គ្រង​អគារ គណនេយ្យ​ជាង​ជួសជុល​ប្រចាំការ ជាង​បច្ចេកទេស ថ្លៃ​ធានា​រ៉ាប់រង​អាយុ​ជីវិត ថ្លៃ​សម្អាត ថ្លៃ​ការពារ​សុវត្ថិភាព ២៤ ​ម៉ោង​សម្ភារ គ្រឿង​បន្លាស់​សំណង់ និង​ផ្នែក​ជាច្រើន​ទៀត​។ ការ​ចំណាយ​នេះ​អាច​ធ្វើឲ្យ​អគារ​ដំណើរការ​ទៅ​មុខ​បាន​ដែល​អ្នក​អាច​នឹង​ភ្លេច​អំពី​គុណភាព​ផ្សេងៗ (ដូចជា​គុណភាព​ដែល​យើង​ជា​អតិថិជន​គួរ​តែ​បាន​គិត​ដល់​) ហើយ​ប្រឈម​នឹង​ស្តង់ដារ​សុវត្ថិភាព​ទាប ការ​បាក់បែក​គ្រឿង​បរិក្ខារ និង​ជា​អគារ​ដែល​មាន​លក្ខណៈ​អន់ថយ​ដែល​មាន​បុគ្គលិក​គ្មាន​ទឹក​ចិត្ត​ធ្វើការ​ផង​ដែរ។

ឥឡូវ​តើ​អ្នក​ចង់​បង់​ថ្លៃ​សេវា​គ្រប់គ្រង​ទាប ឬ​សុខចិត្ត​បង់​លើស​ពី​នេះ​ដើម្បី​ទទួល​បាន​គុណភាព​គួរ​ជា​ទី​គាប់​ចិត្ត?

តែ​បើ​ទោះ​ជា​អ្នក​បង់ ១ ​ដុល្លារ​ក្នុង​ ១ ​ម៉ែត្រការ៉េ​ដើម្បី​ឲ្យ​អគារ​ខុនដូ​ដំណើរការ​ទៅ​មុខ​ក៏ដោយ ក៏​អ្នក​នៅ​តែ​មិន​អាច​ទទួល​បាន​គុណភាព​ខ្ពស់​ដែរ​។

ភាគច្រើន​អតិថិជន​ដែល​ចាប់​អារម្មណ៍​លើ​កត្តា​សេវា​គ្រប់គ្រង​នេះ​មាន​ចំនួន​ទាប​ពេក​ដែល​ធ្វើឲ្យ​វិនិយោគិន ឬ​ម្ចាស់​គម្រោង​ពិបាក​ក្នុង​ការ​ផ្តល់​នូវ​គុណភាព​ខ្ពស់​ពិតប្រាកដ​។ បូក​ចំណុច​នេះ​ជាមួយ​នឹង​​ការ​ផ្តល់​ប្រាក់​ខែ​ដែល​សមរម្យ​សម្រាប់​បុគ្គលិក​ដើម្បី​ឲ្យ​បាន​សេវា​គ្រប់គ្រង​ប្រកប​ដោយ​គុណភាព​ខ្ពស់​គឺ​រឹត​តែ​ពិបាក​ថែម​ទៀត​។

សរុប​ទៅ​តម្លៃ​ដែល​ភាគច្រើន​ត្រូវ​បាន​ហៅថា៖ «​តម្លៃ​ទីផ្សារ​ស្តង់ដារ​» សម្រាប់​សេវា​គ្រប់គ្រង​ខុនដូ​ក្នុង​ទីក្រុង​ភ្នំពេញ​នេះ​គឺ​មិន​អាច​ធ្វើ​ទៅ​រួច​នោះ​ទេ​ហើយ​វា​បង្កើត​ឲ្យ​មាន​ភាព​ចម្រូង​ចម្រាស​​ដែល​ធ្វើឲ្យ​អតិថិជន​មិន​អាច​ទទួល​បាន​នូវ​អ្វីដែល​ពួកគេ​រំពឹង​ទុក និង​អ្វី​ដែល​ពួកគេ​គួរ​ទទួល​បាន​ពី​សេវា​គ្រប់គ្រង​ប្រកប​ដោយ​គុណភាព​។ ពេល​ខ្លះ​វា​រឹត​តែ​ធ្ងន់ធ្ងរ​ថែម​ទៀត​នៅពេល​អតិថិជន​គិត​ថា «​តម្លៃ​សេវា​គ្រប់គ្រង​កាន់​តែ​ថោក កាន់​តែ​ល្អ​» ហើយ​រួម​ទាំង​វិនិយោគិន និង​ម្ចាស់​គម្រោង​ធ្វើ​យ៉ាង​ណា​ដើម្បី​ទាក់ទាញ​អតិថិជន​ទាំងនោះ​ឲ្យ​​មក​ទិញ​ផង​ដែល​ការ​ធ្វើ​បែប​នេះ​ជួយ​ដល់​ការ​លក់​តែ​មិន​ផ្តល់​នូវ​គុណភាព​នៃ​សេវាកម្ម​នោះ​ទេ​។

លទ្ធផល​គឺជា​ករណី​ដែល​ថា​ការ​បញ្ចុះ​តម្លៃ​សេវា​គ្រប់គ្រង​មាន​ប្រសិទ្ធភាព​ជួយ​ដល់​ការ​លក់​តែ​មិន​ផ្តល់​នូវ​គុណភាព​ដូច​ការ​រំពឹង​ទុក​នោះ​ទេ​។ ការ​ផ្តល់​នូវ​សេវាកម្ម​ប្រកប​ដោយ​គុណភាព​នៅ​តម្លៃ​ថោក​នឹង​ផ្តល់​ជា​ឧបសគ្គ​ដ៏លំបាក​ដល់​ម្ចាស់​គម្រោង​​ក្នុង​ការ​ផ្តល់​ជូន​នូវ​សមិទ្ធផល​ប្រកប​ដោយ​គុណភាព​ពិតប្រាកដ​។

ក្នុង​ស្ថានភាព​ជាក់ស្តែង​គម្រោង​ដែល​ត្រូវ​បាន​កំណត់​សម្រាប់​សេវា​គ្រប់គ្រង​អចលនទ្រព្យ​គុណភាព​ទាប​ធ្វើឲ្យ​មាន​ការ​ប៉ះពាល់​ដល់​តម្លៃ​ពេល​លក់​ចេញ ពេល​ដាក់​ជួល និង​បញ្ហា​ស្តង់ដារ​នៃ​ការ​រស់នៅ​ដែល​ធ្វើឲ្យ​អតិថិជន​មាន​ការ​មិន​ពេញចិត្ត​ហើយ​អាច​ធ្វើឲ្យ​ខូច​កេរ្តិ៍​ឈ្មោះ​វិនិយោគិន ឬ​ម្ចាស់​គម្រោង​។ វា​ជា​ការ​ដែល​មិន​បាន​មើល​វែង​ឆ្ងាយ​ហើយ​ធ្វើឲ្យ​ខាតបង់​ប្រយោជន៍​ផង​ដែរ​។

ដូច្នេះ​តើ​ម្ចាស់​គម្រោង និង​អតិថិជន​គួរ​ពិចារណា​របៀប​ណា​ខ្លះ​?

ក្នុង​នាម​ជា​ម្ចាស់​គម្រោង​អ្នក​មិន​ត្រូវ​គិត​ដល់​ជម្រើស​ដែល​ធ្វើឲ្យ​បាន​តែ​ឆាប់​រហ័ស​ដើម្បី​ឲ្យ​តែ​លក់​ចេញ​ទៅ​នោះ​ទេ។ ចំណាយ​ពេលវេលា​ឲ្យ​បាន​ត្រឹមត្រូវ​រួម​ទាំង​​កម្លាំង​កាយ​ចិត្ត និង​ប្រើ​ប្រាជ្ញា​ឲ្យ​អស់​​លទ្ធភាព​ដើម្បី​ផ្តល់​នូវ​គុណភាព​នៃ​សេវា​គ្រប់គ្រង​ដល់​សំណង់​អគារ​ក៏​ដូចជា​ដល់​អតិថិជន​ដែល​តម្លៃ​គួរ​តែ​សមរម្យ​បើ​ទោះ​ជា​ពុំ​អាច​លក់​បាន​ឆាប់​រហ័ស​ក៏ដោយ​។

ចំណែក​ក្នុង​នាម​ជា​អ្នក​ទិញ​គិត​ឲ្យ​បាន​គ្រប់​ជ្រុងជ្រោយ​មុន​នឹង​ធ្វើ​ការ​ទិញ​អ្វី​មួយ​មិន​មែន​តែ​តម្លៃ​មួយ​មុខ​នោះ​ទេ។ ត្រូវ​ដឹង​ថា​អ្នក​ចង់​បាន​អ្វី​គុណភាព​នៅ​កម្រិត​ណា​ហើយ​ថា​តើ​អ្នក​ចង់​បាន​អ្វី​ខ្លះ​ពី​ការ​ចំណាយ​របស់​អ្នក​។ បើ​អ្នក​ចំណាយ​លុយ​តិច គុណភាព​ក៏​ទាប​ទៅ​តាម​នោះ​ដែរ​ដូច្នេះ​អ្នក​ត្រូវ​ត្រៀម​ឲ្យ​បាន​រួចរាល់​មុន​នឹង​ធ្វើការ​ចំណាយ​របស់​អ្នក​ដែរ​៕

អត្ថបទគួរចាប់អារម្មណ៍