The Phnom Penh Post Search

Search form

Logo of Phnom Penh Post newspaper Phnom Penh Post - ភាព​ស្មោះត្រង់ និង​ចំណេះដឹង​នាំ​មក​នូវ​ភាពជោគជ័យ




ភាព​ស្មោះត្រង់ និង​ចំណេះដឹង​នាំ​មក​នូវ​ភាពជោគជ័យ

Content image - Phnom Penh Post
លោកស្រី អាន សុធីតា នាយិកា​ក្រុមហ៊ុន CBRE Cambodia​។ មឿន ញាណ

ភាព​ស្មោះត្រង់ និង​ចំណេះដឹង​នាំ​មក​នូវ​ភាពជោគជ័យ

ក្នុង​នាម​ជា​ស្ត្រី​ខ្មែរ​វ័យ​ក្មេង​មួយ​រូប​ដែល​ទទួល​បាន​តួនាទី​ជា​អ្នកដឹកនាំ​កំពូល​ក្នុង​ក្រុមហ៊ុន​អចលនទ្រព្យ​អន្តរជាតិ CBRE Cambodia មាន​មនុស្ស​មិន​តិច​ទេ​ដែល​កោតសរសើរ​ចំពោះ​អ្វី​ដែល​រូបនាង​សម្រេច​បាន​នាពេល​នេះ​។

អង្គុយ​ក្នុង​ការិយាល័យ​ធ្វើការ​មួយ​ដ៏ស្រស់ស្អាត នាយិកា​នៃ​ក្រុមហ៊ុន CBRE Cambodia លោកស្រី អាន សុធីតា បាន​និយាយ​ថា ការតស៊ូ​ព្យាយាម ប្រកប​ដោយ​ភាពស្មោះត្រង់ មាន​ក្រមសីលធម៌​វិជ្ជាជីវៈ និង​ការស្វែងរក​ចំណេះដឹង​ថ្មីៗ​បន្ថែម​គឺជា​គោល​គំនិត​ចម្បង​ដែល​រូបនាង​តែង​ប្រកាន់​យ៉ាង​ខ្ជាប់ខ្ជួន​ក្នុង​ជីវិត​ការសិក្សា ការងារ និង​គ្រួសារ​ចាប់​តាំងពី​រូបនាង​ដឹង​ក្តី​រហូត​មក​ដល់​ពេល​បច្ចុប្បន្ន​។

ចាប់​កំណើត​ជា​កូនពៅ​នៅ​ក្នុង​គ្រួសារ​មួយ​ដែល​មាន​បងប្រុស​ចំនួន​ ២ ​នាក់​ដោយ​មាន​ឪពុក​ឈ្មោះ ឈិន សំអាន ជា​មន្ត្រីរាជការ និង​ម្ដាយ​ឈ្មោះ គឹម ស៊ីវ៉ាង ជា​មេផ្ទះ លោកស្រី សុធីតា បាន​និយាយ​ថា​៖ «​មិនមែន​ជា​រឿង​ងាយស្រួល​ទេ​សម្រាប់​គ្រួសារ​មួយ​ដែល​មាន​មេ​គ្រួសារ​ជា​មន្ត្រីរាជការ​ក្នុង​ការ​អនុញ្ញាត​ឲ្យ​កូន​ទាំង​ ៣ ​នាក់​ចូលរៀន​មហាវិទ្យាល័យ​ក្នុង​ពេល​តែ​មួយ​»​។

ដោយសារ​គ្រួសារ​ឲ្យ​តម្លៃ​ខ្ពស់​ទៅ​លើ​ការសិក្សា កុមារី សុធីតា ត្រូវ​បាន​ឪពុកម្តាយ​បញ្ជូន​ឲ្យ​ចូល​រៀន​នៅពេល​នាង​ទើប​មាន​អាយុ​ត្រឹម​ ៥ ​ឆ្នាំ​ប៉ុណ្ណោះ​។ ឆ្នាំ​ ១៩៩៨ គឺជា​ពេល​ដែល​ក្មេងស្រី​ដ៏ស្រស់​សោភា​ម្នាក់​ស្ថិត​ក្នុង​វ័យ ១៦ ​ឆ្នាំ​បាន​បញ្ចប់​ការសិក្សា​មធ្យមសិក្សា​ទុតិយភូមិ​។

ការទទួល​បាន​ភាព​ជោគជ័យ​ពី​ការសិក្សា​នោះ​បាន​ធ្វើឲ្យ​រូបនាង និង​ក្រុមគ្រួសារ​រីករាយ​យ៉ាង​ខ្លាំង ប៉ុន្តែ​ទន្ទឹម​នឹង​ភាព​រីករាយ​នោះ កង្វល់​មួយ​ក៏បាន​លេច​ឡើង​ផងដែរ នោះ​គឺ​លទ្ធភាព​ក្នុង​ការ​អនុញ្ញាត​ឲ្យ​រូបនាង​បន្ត​ការសិក្សា​នៅ​ថ្នាក់​មហាវិទ្យាល័យ ខណៈ​ពេល​នោះ​បងប្រុស​ទាំង​ ២ ​នាក់​របស់​នាង​ក៏​កំពុង​សិក្សា​នៅ​ថ្នាក់​មហាវិទ្យាល័យ​ដែរ​។

លោកស្រី អាន សុធីតា បាន​រំឭក​ថា​បន្ទាប់ពី​ប្រឡង​ជាប់​សញ្ញាបត្រ​មធ្យមសិក្សា​ទុតិយភូមិ ដោយសារ​គ្រួសារ​មិន​មាន​លទ្ធភាព​គ្រប់គ្រាន់​រូបនាង​ក៏​បាន​ទៅ​សិក្សា​វគ្គ​ខ្លីៗ​មួយ​ចំនួន​ដូចជា រដ្ឋបាល កុំព្យូទ័រ និង​ភាសា​អង់គ្លេស ជាដើម មុន​ពេល​ដែល​រូបនាង​ទៅ​ដាក់​ពាក្យ​ធ្វើការ​នៅ​រោងចក្រ​កាត់ដេរ Suntex នា​ដើម​ឆ្នាំ​ ១៩៩៩ ក្នុង​នាម​ជា​ស្មៀន​ការិយាល័យ ដោយ​ទទួល​បាន​ប្រាក់ខែ​ ៥០ ​ដុល្លារ​។

ការប្រើ​ជីវិត​ដំបូង​ជា​បុគ្គលិក​នៅ​ក្នុង​រោងចក្រ​កាត់ដេរ​សម្លៀកបំពាក់​នេះ​បាន​ធ្វើឲ្យ​ក្មេងស្រី​ដែល​ទើប​មាន​អាយុ​ ១៧ ​ឆ្នាំ​រូប​នេះ​មាន​ភាពសប្បាយ​យ៉ាង​ខ្លាំង ព្រោះ​គិត​ថា​អាច​រកប្រាក់​បាន​មួយ​ចំនួន​សម្រាប់​ខ្លួនឯង និង​សម្រាប់​ជួយ​ដល់​ក្រុម​គ្រួសារ​។

លោកស្រី​អះអាង​ថា​៖ «​ពេល​ខ្លះ​ខ្ញុំ​គិត​ថា ចំណុច​នេះ​អាច​ជា​មូលហេតុ​សំខាន់​ដែល​ជំរុញ​ឲ្យ​កើត​មាន​អ្វីៗ​គ្រប់​យ៉ាង​នាពេល​នេះ ព្រោះ​បើ​ពេល​នោះ​ខ្ញុំ​មិន​ជួប​បញ្ហា​លំបាក​ក៏​ប្រហែល​ជា​ការខិតខំ​ជម្នះ​ឧបសគ្គ​របស់​ខ្ញុំ​ក៏​មិន​សូវ​មាន​ដែរ​»​។

ការងារ​ដំបូង​នៅ​រោងចក្រ​កាត់ដេរ​នាពេល​នោះ​បាន​តម្រូវ​ឲ្យ​រូបនាង​ត្រូវ​ភ្ញាក់​តាំងពី​ម៉ោង​ ៤ ​ទៀបភ្លឺ​ដើម្បី​រៀបចំ​ខ្លួន និង​ធ្វើដំណើរ​ដោយ​ម៉ូតូ​ចេញ​ពី​ផ្ទះ​ក្នុង​ចម្ងាយ​ផ្លូវ​ជាង​ ១០ ​គីឡូម៉ែត្រ ដើម្បី​ទៅ​ធ្វើការ​នៅ​រោងចក្រ​ដែល​ស្ថិត​នៅ​តាម​បណ្តោយ​ផ្លូវ​វេងស្រេង ម៉ោង​ ៦ ​ព្រឹក និង​ចេញ​នៅ​ម៉ោង​ ២ ​រសៀល​។

លោកស្រី បាន​បញ្ជាក់​ថា៖ «​ការចូល​ធ្វើ​ការងារ​របស់​ខ្ញុំ​មិន​ដែល​យឺត​ទេ ហើយ​ខ្ញុំ​ក៏​មិន​ដែល​បាន​ចេញ​ទៅ​ផ្ទះ​មុន​គេ​ដែរ ព្រោះ​ខ្ញុំ​ត្រូវ​នៅ​ផ្ទេរ​ការងារ​បន្ត​ទៅ​ឲ្យ​អ្នក​ចូល​ធ្វើ​ការងារ​នៅ​ម៉ោង​បន្ទាប់​»​។

បន្ទាប់ពី​ធ្វើការ​នៅ​ក្នុង​រោងចក្រ​បាន​ជាង​ ១ ​ឆ្នាំ និង​អាច​សន្សំ​ប្រាក់​បាន​មួយ​ចំនួន ក្មេងស្រី​ដែល​ពោរពេញ​ទៅ​ដោយ​មហិច្ឆតា​ក្នុង​ការ​ចាប់​យក​នូវ​ចំណេះដឹង​រូប​នេះ​ក៏​បាន​ចុះឈ្មោះ​ចូល​រៀន​នៅ​វិទ្យាស្ថាន​ជាតិ​គ្រប់គ្រង (​សាកលវិទ្យាល័យ​ជាតិ​គ្រប់គ្រង​) លើ​ជំនាញ​គណនេយ្យ​ក្នុង​ឆ្នាំ​ ២០០០​ ​ដោយ​សិក្សា​វេន​ល្ងាច​។

លោកស្រី សុធីតា អះអាង​ថា៖ «​តាំងពី​តូច​មក​ខ្ញុំ​តែងតែ​ទទួល​បាន​លទ្ធផល​ល្អ​សម្រាប់​ការសិក្សា​មុខវិជ្ជា​វិទ្យាសាស្ត្រ​ពិត​ដែល​មាន​ដូចជា គណិតវិទ្យា រូបវិទ្យា និង​គីមីវិទ្យា​។ ហេតុនេះ​ការសិក្សា​មុខ​ជំនាញ​គណនេយ្យ គឺ​អាច​និយាយ​ថា​ជា​ជំនាញ​ដែល​មាន​តាំងពី​កំណើត​របស់​ខ្ញុំ​»​។

នៅក្នុង​ដំណាក់​កាល​នោះ​ក្មេងស្រី​ដ៏ស្រស់ស្អាត ដែល​ទើប​ឈាន​ចូល​វ័យ​ ១៨ ​ឆ្នាំ​ខាង​លើ​ត្រូវ​ជម្នះ​ការលំបាក​ជាច្រើន ពិសេស​ពេលវេលា​ដោយ​ត្រូវ​ចេញ​ពី​ផ្ទះ​នៅ​ម៉ោង​ ៥ ​ព្រឹក និង​ត្រឡប់​មក​ដល់​ផ្ទះ​វិញ​នៅ​ម៉ោង​ជាង​ ៩ ​យប់​ស្ទើរ​រាល់​ថ្ងៃ​។

បន្ទាប់ពី​ធ្វើការ​នៅ​រោងចក្រ​កាត់ដេរ​បាន​ ៦ ​ឆ្នាំ និង​បាន​បញ្ចប់​ការសិក្សា​ថ្នាក់​បរិញ្ញាបត្រ សុធីតា ក៏​បាន​ផ្លាស់​ទៅ​ធ្វើការ​នៅ​ក្រុមហ៊ុន​ដឹកជញ្ជូន MSE KPM លើ​ជំនាញ​គណនេយ្យ​។ ការផ្លាស់ប្តូរ​ការងារ​នៅពេល​នោះ​គឺ​ស្ថិត​ក្រោម​ហេតុផល​ចង់​ប្រើប្រាស់​ជំនាញ​ដែល​រូបនាង​ទើប​បាន​បញ្ចប់ និង​មាន​ពេលវេលា​ខ្លះ​សម្រាប់​ជីវិត​ខ្លួនឯង និង​ក្រុម​គ្រួសារ​។

ការងារ​ទី​ ២ នៅពេល​នោះ​ក៏​បាន​ធ្វើឲ្យ​រូបនាង​មាន​មោទនភាព​សម្រាប់​ខ្លួនឯង​ជា​ញឹកញាប់​ផង​ដែរ ដោយ​រូបនាង​តែងតែ​ទទួល​បាន​នូវ​ការកោតសរសើរ ប្រាក់រង្វាន់ និង​ឡើង​តំណែង​ជា​បន្តបន្ទាប់​។

លោកស្រី សុធីតា និយាយ​ថា​៖ «​ធ្វើការ​នៅ​ទី​នោះ ខ្ញុំ​ឡើង​តំណែង​ជា​បន្តបន្ទាប់ ដោយសារ​ខ្ញុំ​បាន​ធ្វើ​ការងារ​ប្រកប​ដោយ​ភាពត្រឹមត្រូវ​មិន​លម្អៀង និង​គោរព​តាម​ក្រមសីលធម៌​វិជ្ជាជីវៈ​»​។

ដោយ​មិន​ចង់​បាត់បង់​ពេលវេលា​ក្នុង​ការ​ពង្រឹង​សមត្ថភាព​បន្ថែម​ទៀត​នោះ នា​អំឡុង​ឆ្នាំ​ ២០០៨ លោកស្រី អាន សុធីតា ក៏​បាន​ចុះឈ្មោះ​ដើម្បី​ចូលរៀន​ជំនាញ​គណនេយ្យ​ (ACCA) ​បន្ថែម​ទៀត​។

អំឡុង​ពេល​កំពុង​សិក្សា ACCA នៅ សាលា Cam-Ed នា​ចុង​ឆ្នាំ​ ២០០៩ លោកស្រី​បាន​ឃើញ​សេចក្តី​ប្រកាស​ព័ត៌មាន​មួយ​ស្តីពី​ការជ្រើសរើស​បុគ្គលិក​ផ្នែក​គណនេយ្យ​របស់​ក្រុមហ៊ុន CBRE Cambodia​។ សេចក្តី​ប្រកាស​ព័ត៌មាន​នេះ​ធ្វើឲ្យ​រូបនាង​ចាប់​អារម្មណ៍​ជា​ខ្លាំង​។

លោកស្រី អាន សុធីតា ដែល​ក្រោយ​មក​បាន​ក្លាយ​ជា​នាយិកា​របស់​ក្រុមហ៊ុន CBRE Cambodia និយាយ​ថា​៖ «​ខ្ញុំ​ចាប់​អារម្មណ៍​ខ្លាំង​ព្រោះ CBRE Cambodia ជា​ក្រុមហ៊ុន​ស្តង់ដារ​អន្តរជាតិ​»​។

នៅពេល​នោះ​មាន​បេក្ខជន​ដែល​មាន​សមត្ថភាព​ខ្លាំងៗ​ជាច្រើន​បាន​ដាក់​ពាក្យ​ចូលរួម​ប្រកួត​ប្រជែង​។ លោកស្រី​និយាយ​ថា៖ «​អាច​និយាយ​ថា​នោះ​គឺជា​សំណាង​ដ៏ធំ​មួយ​នៅក្នុង​ជីវិត​ដែល​ខ្ញុំ​មិន​អាច​បំភ្លេច​បាន ព្រោះ​មាន​បេក្ខជន​ជាច្រើន​បាន​ដាក់​ពាក្យ​ក្នុង​ពេល​ដែល​គេ​ត្រូវការ​បុគ្គលិក​តែ​ ១ ​នាក់​ប៉ុណ្ណោះ​»​។

ការងារ​ដំបូង​របស់​នាង​ក្នុង​ក្រុមហ៊ុន CBRE Cambodia គឺជា​អ្នក​ទទួល​ខុសត្រូវ​ផ្នែក​គណនេយ្យ​ដែល​ពេល​នោះ​មាន​បុគ្គលិក​តែ​ ៣ ​រូប​ប៉ុណ្ណោះ គឺ​ជនបរទេស​ ២ ​នាក់ និង​រូបនាង​។

ដោយ​សារភាព​អំណត់​សមត្ថភាព ចំណេះដឹង និង​ភាពស្មោះត្រង់ ត្រឹមតែ​រយៈពេល​ ៣ ​ខែ​ បន្ទាប់ពី​ចូល​បម្រើ​ការងារ សុធីតា ត្រូវ​បាន​ថ្នាក់ដឹកនាំ​ផ្តល់​តួនាទី​ឲ្យ​ធ្វើ​ជា​ប្រធាន​គ្រប់គ្រង​ទូទៅ​តែ​ម្តង​។ នៅក្នុង​ឆ្នាំ​ ២០១៣ រូបនាង​ត្រូវ​បាន​ដំឡើង​តំណែង​ជា​នាយិការង​។

លោកស្រី អាន សុធីតា ដែល​បច្ចុប្បន្ន​មាន​វ័យ​ ៣៦ ​ឆ្នាំ​ត្រូវ​បាន​ថ្នាក់ដឹកនាំ​ក្រុមហ៊ុន CBRE ដែល​មាន​ការិយាល័យ​កណ្តាល​នៅ​សហរដ្ឋអាមេរិក​សម្រេច​តែងតាំង​ជា​នាយិកា​ក្នុង​ឆ្នាំ ​២០១៥​។

បច្ចុប្បន្ន CBRE Cambodia មាន​បុគ្គលិក​ទាំងអស់​ចំនួន ​៤៧ ​នាក់​រួម​ទាំង​បុគ្គលិក​បរទេស​ ៧ ​នាក់ ហើយ​នឹង​កើន​ដល់​ ៦០ ​នាក់​នៅ​ចុង​ឆ្នាំ​ ២០១៨ នេះ​។

ការសិក្សា និង​ជីវិត​គ្រួសារ

លោកស្រី អាន សុធីតា បាន​រៀប​អាពាហ៍ពិពាហ៍​ជាមួយ​លោក រ័ត្ន ប៊ុនរិទ្ធ ដែល​ជា​អ្នក​ជំនាញ​ផ្នែក​មេកានិក​នៅ​ក្រុមហ៊ុន​អាកាសចរណ៍ Thai Airways ក្នុង​ឆ្នាំ​ ២០០៣​។ បច្ចុប្បន្ន​លោកស្រី មាន​កូន​ចំនួន​ ២ ​នាក់​។

ទស្សនៈ

ការខិតខំ​ធ្វើការ​ដោយ​ភាព​អត់ធ្មត់ គោរព​សីលធម៌​វិជ្ជាជីវៈ និង​មាន​មហិច្ឆតា នឹង​នាំឲ្យ​ទទួល​បាន​ជោគជ័យ​៕

អត្ថបទគួរចាប់អារម្មណ៍