ក្រុងគូឡាឡាំពួៈ ជនបរទេសនឹងត្រូវហាមមិនឱ្យទិញអចលនទ្រព្យក្នុងទីក្រុងមួយដែលគ្រោងនឹងសាងសង់ឡើងដោយចំណាយ ១០០ ពាន់លានដុល្លារ បន្ទាប់ពីគម្រោងអភិវឌ្ឍន៍ដ៏ធំនេះដែលមានគោលដៅសំដៅអតិថិជនមកពីប្រទេសចិនដីគោកបានបង្កឱ្យមានការរិះគន់យ៉ាងខ្លាំង។ នេះបើតាមការឲ្យដឹងពីមេដឹកនាំម៉ាឡេស៊ីនៅដើមសប្តាហ៍នេះ។
Forest City គឺជាទីក្រុងអេកូដែលមានអគារខ្ពស់ៗ និងមានវីឡាជាច្រើននៅតាមមាត់សមុទ្រលើកោះកែច្នៃចំនួន ៤ នៅភាគខាងត្បូងរដ្ឋ Johor ដែលចំណាយពេលដំណើរតែ ១ ម៉ោងប៉ុណ្ណោះពីប្រទេសសិង្ហបុរី។
គម្រោងអភិវឌ្ឍន៍នេះត្រូវបានរចនាឡើងសម្រាប់ពលរដ្ឋចំនួន ៧ សែននាក់ ហើយវានឹងត្រូវសាងសង់ដោយក្រុមហ៊ុនអចលនទ្រព្យដ៏ធំ Country Garden ដែលបានចុះបញ្ជីនៅទីក្រុងហុងកុង និងក្រុមហ៊ុនមួយដែលកាន់កាប់ភាគហ៊ុនមួយផ្នែកដោយស្តេចស៊ុលតង់ប្រចាំរដ្ឋ Johor ហើយគ្រោងនឹងបញ្ចប់នៅឆ្នាំ ២០៣៥។
វាត្រូវបានបង្កើតឡើងដើម្បីជាការទាក់ទាញអ្នកទិញដែលជាអ្នកមានទ្រព្យស្តុកស្តមមកពីចិនដីគោក ប៉ុន្តែនាយករដ្ឋមន្ត្រីម៉ាឡេស៊ី លោក Mahathir Mohamad ដែលបានលុបចោលរួចហើយនូវកិច្ចព្រមព្រៀងជាច្រើនដែលមានទឹកប្រាក់រាប់ពាន់លានដុល្លារជាមួយទីក្រុងប៉េកាំងដែលកិច្ចព្រមព្រៀងទាំងនោះសម្រេចដោយអតីតរដ្ឋាភិបាលម៉ាឡេស៊ីនោះបានថ្លែងថា ជនបរទេសនឹងមិនត្រូវបានអនុញ្ញាតឱ្យទិញអចលនទ្រព្យនៅក្នុងគម្រោងទីក្រុងនេះទេ។
លោក Mahathir ថ្លែងក្នុងសន្និសីទសារព័ត៌មានមួយថា៖ «អ្វីដែលច្បាស់លាស់មួយគឺថាទីក្រុងដែលនឹងត្រូវសាងសង់នេះគឺមិនអាចលក់ទៅឱ្យជនបរទេសបានទេ»។
លោកបញ្ជាក់ថា៖ «យើងនឹងមិនផ្តល់ទិដ្ឋាការឱ្យគេមករស់នៅទីនេះទេ»។
ប្រជាជនម៉ាឡេស៊ីជាច្រើនមិនសប្បាយចិត្តនឹងគម្រោងនេះទេ ដោយសារតែវាបញ្ជាក់យ៉ាងច្បាស់ថាសំដៅទៅអ្នកទិញបរទេសដែលមានទ្រព្យសម្បត្តិស្តុកស្តម ហើយពួកគេក៏សម្តែងការព្រួយបារម្ភផងដែរថាអាចបំផ្លាញដល់បរិស្ថាន។
ក្រុមហ៊ុន Country Garden Pacificview Sdn Bhd ដែលជាក្រុមហ៊ុនវិនិយោគរួមគ្នាក្នុងគម្រោងសាងសង់ទីក្រុង Forest City បានឲ្យដឹងថា ក្រុមហ៊ុនបានទាក់ទងទៅការិយាល័យរបស់លោក Mahathir រួចហើយដើម្បីស្វែងរកការបំភ្លឺអំពីការលើកឡើងរបស់គាត់នេះ។
ក្រុមហ៊ុនបានឲ្យដឹងនៅក្នុងសេចក្តីថ្លែងការណ៍ថា ប្រធានក្រុមហ៊ុន Country Garden បានជួបលោក Mahathir កាលពីដើមខែ ហើយមេដឹកនាំម៉ាឡេស៊ីរូបនេះបានបញ្ជាក់ជាថ្មីថា លោកស្វាគមន៍ចំពោះការវិនិយោគបរទេសដែលអាចបង្កើតឱកាសការងារ លើកកម្ពស់ការផ្ទេរបច្ចេកវិទ្យា និងការច្នៃប្រឌិតដែលអាចផ្តល់អត្ថប្រយោជន៍ដល់កំណើនសេដ្ឋកិច្ចម៉ាឡេស៊ី និងការបង្កើតការងារ។
ទំនាក់ទំនងរវាងទីក្រុងគូឡាឡាំពួ និងទីក្រុងប៉េកាំងមានភាពកក់ក្តៅនៅក្រោមការដឹកនាំរបស់អតីតរដ្ឋាភិបាលដែលកំពុងជួបរឿងអាស្រូវរបស់លោក Najib Razak ហើយការវិនិយោគពីក្រុមហ៊ុនចិនបានកើនឡើងយ៉ាងខ្លាំងក្នុងប្រទេសម៉ាឡេស៊ី។
ទោះបីជាយ៉ាងណាក្រុមអ្នករិះគន់បាននិយាយថា កិច្ចព្រមព្រៀងទាំងនោះមិនបានផ្តល់អំណោយផលដល់ប្រទេសម៉ាឡេស៊ីទេ។
នៅក្នុងដំណើរទស្សនកិច្ចទៅទីក្រុងប៉េកាំងកាលពីពេលថ្មីៗនេះលោកនាយករដ្ឋមន្ត្រី Mahathir បានប្រកាសថាលោកបានពន្យារគម្រោងហេដ្ឋារចនាសម្ព័ន្ធដែលគាំទ្រដោយចិនដែលមានទឹកប្រាក់សរុបចំនួន ២២ ពាន់លានដុល្លារ។
ខណៈគម្រោងទីក្រុង Forest City គឺជាគម្រោងអភិវឌ្ឍឯកជននោះមនុស្សមួយចំនួននៅក្នុងប្រទេសម៉ាឡេស៊ីមើលឃើញគម្រោងនេះថាជាសញ្ញាមិនស្វាគមន៍មួយទៀតនៃឥទ្ធិពលរបស់ចិនដែលកំពុងកើនឡើង៕ NS