ភ្នំពេញ: ក្រសួងសេដ្ឋកិច្ច និងហិរញ្ញវត្ថុបានអំពាវនាវឲ្យម្ចាស់អភិវឌ្ឍអចលនទ្រព្យលំនៅឋានធ្វើការបញ្ចុះ និងសម្រួលលក្ខខណ្ឌការបង់ប្រាក់ចំពោះលំនៅឋានរបស់កម្មករ និយោជិតដែលរងផលប៉ះពាល់ពីការព្យួរការងារដោយសារការផ្ទុះជំងឺកូវីដ។ នេះបើតាមសេចក្តីប្រកាសព័ត៌មានក្រសួងចេញផ្សាយកាលពីថ្ងៃចន្ទ។
សេចក្តីប្រកាសព័ត៌មានឲ្យដឹងថា ដើម្បីលើកកម្ពស់ស្មារតីចូលរួមជាមួយរដ្ឋាភិបាលកម្ពុជាក្នុងការអនុវត្តវិធានការបន្ទាន់ក្នុងការកាត់បន្ថយផលប៉ះពាល់អវិជ្ជមានពីការរីករាលដាលនៃជំងឺកូវីដ ១៩ វិធានការនេះក៏នឹងជួយសម្រាលបន្ទុកដល់កម្មករ និងនិយោជិតមួយចំនួនដែលត្រូវបានព្យួរ និងបាត់បង់ការងារពីការងារ។
សេចក្តីប្រកាសព័ត៌មានបន្តថា៖ «ក្រុមហ៊ុនអភិវឌ្ឍអចលនវត្ថុត្រូវធ្វើការបញ្ចុះថ្លៃផ្ទះក្នុងកម្រិតសមស្រប ខណៈរដ្ឋាភិបាលបានសម្រេចផ្តល់ការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ ដែលមានតម្លៃក្រោម ៧០ ០០០ ដុល្លារក្នុងរយៈពេល ១ ឆ្នាំ»។
សេចក្តីប្រកាសព័ត៌មានរបស់សមាគមអ្នកអភិវឌ្ឍន៍លំនៅឋានកម្ពុជាចេញផ្សាយកាលពីថ្ងៃទី ១០ មីនា ក៏បានគាំទ្រវិធានការរបស់រដ្ឋាភិបាល និងសម្រេចបញ្ចុះតម្លៃលំនៅឋានរហូតដល់ ៧ ភាគរយទៅតាមគម្រោងនីមួយៗរបស់សមាជិកខ្លួន។ ចំពោះអតិថិជនដែលទិញលំនៅឋានបង់ផ្តាច់ពីសមាជិករបស់សមាគមចាប់ពីខែមីនានេះតទៅនឹងបញ្ចុះតម្លៃ ៧ ភាគរយ។ នេះបើតាមសេចក្តីប្រកាសព័ត៌មាន។
សេចក្តីប្រកាសព័ត៌មានបន្តថា៖ «សមាជិកសមាគមនឹងផ្តល់ភាពទន់ភ្លន់អំពីលក្ខខណ្ឌនៃការបង់ប្រាក់ចំពោះការទិញលំនៅឋានរបស់កម្មករ និយោជិតដែលរងផលប៉ះពាល់បាត់បង់ចំណូលនៅក្នុងពេលនៃវិបត្តិនេះ»។
លោក គឹម ហ៊ាង ម្ចាស់គម្រោងបុរី KS Residence និង ប្រធានក្រុមហ៊ុន Khmer Real Estate បានឲ្យដឹងថា លោកគាំទ្រចំពោះវិធានការរបស់ក្រសួងអំពាវនាវដល់ក្រុមហ៊ុនអភិវឌ្ឍអចលនវត្ថុធ្វើការបញ្ចុះតម្លៃផ្ទះ និងសម្រួលលក្ខខណ្ឌការបង់ប្រាក់ចំពោះកម្មករ និយោជិត។
លោកបន្តថា ទោះបីយ៉ាងណាក្រុមហ៊ុនអភិវឌ្ឍលំនៅឋានមួយចំនួនក៏នឹងរងផលប៉ះពាល់ផងដែរ ដោយសារខ្ចីប្រាក់ពីធនាគារមកអភិវឌ្ឍ។
លោកថ្លែងថា៖ «ការអំពាវនាវជារឿងល្អ តែសំខាន់ម្ចាស់លុយ [ម្ចាស់បុរី] គេធ្វើតាមអត់ ជួនកាលម្ចាស់លុយគេអត់ធ្វើតាមព្រោះគេមានហេតុផលគេដែរ គេខ្ចីលុយពីធនាគារ បើគេធ្វើតាមក្រសួង ចុះខាងធនាគារគេព្រមអនុគ្រោះអត់ បើនិយាយពីសន្ដានចិត្តយើងមិនដឹងថាធ្វើបាន ឬមិនបាននោះទេ»៕LA