The Phnom Penh Post Search

Search form

Logo of Phnom Penh Post newspaper Phnom Penh Post - លោក សុខ ប៊ុន ជាប់​ឆ្នោត​ជា​ប្រធាន​សមាគម




លោក សុខ ប៊ុន ជាប់​ឆ្នោត​ជា​ប្រធាន​សមាគម

លោក សុខ ប៊ុន (កណ្តាល​ខាង​មុខ) បាន​ជាប់​ឆ្នោត​ជា​ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា អាណត្តិ​ទី​៤ ។
លោក សុខ ប៊ុន (កណ្តាល​ខាង​មុខ) បាន​ជាប់​ឆ្នោត​ជា​ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា អាណត្តិ​ទី​៤ ។ រូបថត ហ៊ឹន ពិសី

លោក សុខ ប៊ុន ជាប់​ឆ្នោត​ជា​ប្រធាន​សមាគម

ប្រធាន​ក្រុមហ៊ុន TEHO Development លោក សុខ ប៊ុន ត្រូវ​បាន​បោះឆ្នោត​ឲ្យ​ធ្វើ​ជា​ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា (President of Cambodian Valuers and Estate Agents Association) សម្រាប់​អាណត្តិ​ទី​៤ (ឆ្នាំ​២០១៥-២០១៧)។

នៅក្នុង​មហាសន្និបាត​បូក​សរុប​ការងារ និង​ផ្សព្វផ្សាយ​ផែនការ​យុទ្ធសាស្រ្ត​របស់​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា លើក​ទី​៣ ដែល​បាន​រៀបចំ​ឡើង​នៅ​សណ្ឋាគារ​កាំបូឌីយ៉ាណា កាលពី​ល្ងាច​ថ្ងៃ​ម្សិលមិញ លោក សុខ ប៊ុន បាន​ថ្លែង​ថា លោក​មាន​សេចក្តី​រីករាយ និង​មាន​មោទនភាព​យ៉ាង​ខ្លាំង​ដែល​ត្រូវ​បាន​សមាជិក​សមាគម​បោះឆ្នោត​ជ្រើសរើស​ឲ្យ​លោក​ធ្វើ​ជា​ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា​សម្រាប់​អាណត្តិ​ទី​៤​នេះ​។

លោក​បាន​ថ្លែង​ថា៖ «​ខ្ញុំ​ពិតជា​រីករាយ​ណាស់​ដែល​ត្រូវ​បាន​សមាជិក​សមាគម​ទុកចិត្ត និង​ជ្រើសរើស​ឲ្យ​ធ្វើ​ជា​ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា​។ ក្នុង​នាម​ជា​ប្រធាន​សមាគម​ខ្ញុំ​សូម​សន្យា​ថា នឹង​ខិតខំ​ធ្វើ​យ៉ាង​ណា​ឲ្យ​ក្រុមហ៊ុន​ដែល​រកស៊ី​ផ្នែក​អចលនទ្រព្យ​កាន់តែ​ច្រើន​បន្ថែម​ទៀត​មក​ចុះ​ឈ្មោះ​ជា​សមាជិក​សមាគម។ មួយ​វិញ​ទៀត​ ខ្ញុំ​ក៏​មាន​ផែនការ​ក្នុង​ការ​បើក​វគ្គ​បណ្តុះបណ្តាល​ឲ្យ​បាន​ច្រើន​ដល់​សមាជិក​សមាគម​ផង​ដែរ​»។

លោកស្រី នួន សុខា រដ្ឋលេខាធិកា​ក្រសួង​សេដ្ឋកិច្ច ប្រគល់​ប័ណ្ណ​សរសើរ​ដល់​លោក ចេង ខេង ។
លោកស្រី នួន សុខា រដ្ឋលេខាធិកា​ក្រសួង​សេដ្ឋកិច្ច ប្រគល់​ប័ណ្ណ​សរសើរ​ដល់​លោក ចេង ខេង ។ រូបថត ហ៊ឹន ពិសី

លោក​បាន​បន្ត​ទៀត​ថា​៖ ​«​ខ្ញុំ​មាន​ទំនាក់ទំនង​ល្អ​ជាមួយ​ក្រុមហ៊ុន​អចលនទ្រព្យ​នៅ​បរទេស​ជាច្រើន ដូច្នេះ​ខ្ញុំ​សង្ឃឹម​ថា នឹង​អាច​ទាក់ទង​ឲ្យ​ក្រុមហ៊ុន​ទាំងនោះ​ចូល​មក​វិនិយោគ​នៅ​កម្ពុជា​បាន​កាន់តែ​ច្រើន​»។

លោក ចេង ខេង អតីត​ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា ក្នុង​អាណត្តិ​ទី​៣ ដែល​បាន​បដិសេធ​ឈរឈ្មោះ​ក្នុង​ការ​បោះឆ្នោត​ជ្រើសរើស​ប្រធាន​សមាគម​សម្រាប់​អាណត្តិ​ទី​ ៤​ នេះ បាន​និយាយ​ថា លោក​មាន​កិត្តិយស​ជា​ខ្លាំង​ដែល​បាន​ធ្វើ​ជា​ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា​នា​ពេល​កន្លង​មក​។

លោក​បាន​ប្រាប់​ថា ការ​ដែល​លោក​សម្រេចចិត្ត​ដក​ខ្លួន​ចេញ​ពី​ការ​បោះឆ្នោត​សម្រាប់​តំណែង​ប្រធាន​សមាគម​នៅពេល​នេះ​គឺ​ដោយសារ​លោក​ចង់​ទុក​ឱកាស​ឲ្យ​សមាជិក​ដទៃ​ទៀត​បាន​បញ្ចេញ​សមត្ថភាព និង​បទពិសោធ​ល្អៗ ម៉្យាង​ទៀត​ដោយសារ​លោក​គិត​ថា សមាគម​មាន​ភាព​រឹងមាំ​ហើយ​។

បច្ចុប្បន្ន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា មាន​សមាជិក​សរុប​ចំនួន​៤១​ក្រុមហ៊ុន​។ សមាគម​នេះ​ត្រូវ​បាន​បង្កើត​ដំបូង​នៅ​ថ្ងៃ​ទី​០៨ ខែ ​សីហា ឆ្នាំ​២០០៨ ដោយ​មាន​ឈ្មោះ​ថា​ «​សមាគម​អ្នក​វាយតម្លៃ​អចលនវត្ថុ​កម្ពុជា» ហើយ​ត្រូវ​បាន​ប្តូរ​ឈ្មោះ​មក​ជា​«សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា» នៅ​ថ្ងៃ​ទី​០៧ ខែ​មេសា ឆ្នាំ​២០១១»។

សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា មាន​បេសកកម្ម​បង្កើន​ទំនុកចិត្ត​ដល់​អ្នក​សមាជិក​ក្នុង​សមាគម និង​សាធារណជន តាមរយៈ​ការ​ផ្តល់​នូវ​បទពិសោធ ជំនាញ និង​ក្រមសីលធម៌​វិជ្ជាជីវៈ​ច្បាស់លាស់​ទាក់ទង​នឹង​វិស័យ​អចលនវត្ថុ។

សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា ត្រូវ​បាន​ដឹកនាំ​ដោយ លោក ស៊ឹង ប៉ុណ្ណា អគ្គនាយក​ក្រុមហ៊ុន ប៉ុណ្ណា រៀលធីគ្រុប នៅ​អាណត្តិ​ទី ​១ និង​ទី​ ២ ចំណែក​អាណត្តិ​ទី ​៣ ត្រូវ​បាន​ដឹកនាំ​ដោយ​លោក ចេង ខេង អគ្គនាយក​ក្រុមហ៊ុន​កម្ពុជា ស៊ីភីអិល​៕

អត្ថបទគួរចាប់អារម្មណ៍