.jpg)
ស្ត្រីវៀតណាមមើលទៅម្ខាងនៃដងស្ទឹងក្នុងទីក្រុង ដែលមានអគារខ្ពស់។ រូបថត AFP
ទីក្រុងហូជីមិញ៖ អាជ្ញាធរទីក្រុងនេះ បានរាយការណ៍ពីការវិនិយោគទុនដោយផ្ទាល់ពីបរទេស (FDI) ចំនួន ១,១៤ ពាន់លានដុល្លារ ក្នុងរយៈពេល ៤ ខែដំបូងនៃឆ្នាំ ២០២១ ដោយធ្លាក់ចុះ ១២,៩២% ធៀបនឹងរយ:ពេលដូចគ្នានៃឆ្នាំមុន។
ថវិកាប្រមាណ ៣៦០ លានដុល្លារ ត្រូវបានចំណាយទៅក្នុងគម្រោងថ្មីចំនួន ១០០ ដែលភាគច្រើនក្នុងវិស័យពាណិជ្ជកម្មមាន ២២៥,១ លានដុល្លារ និងអចលនទ្រព្យ ១២៥,៨ លានដុល្លារ។
ទន្ទឹមនឹងនេះដែរ ទឹកប្រាក់ ៤០៣ លានដុល្លារ ត្រូវបានបន្ថែមទៅ ៣០ គម្រោង ដែលមានស្រាប់ហើយ ៣៧៧,៦ លានដុល្លារទៀត ត្រូវបានប្រើសម្រាប់ការចូលរួមវិភាគទានដើមទុន និងទិញភាគហ៊ុនក្នុងប្រតិបត្តិការសរុបចំនួន ៥៤៧។
វិនិយោគិនបរទេសបានបញ្ចេញដើមទុនភាគច្រើនក្នុងការកែច្នៃ និងផលិតកម្មដោយមានទឹកប្រាក់ ៣២២ លានដុល្លារ កើនឡើង ២៨,២ ភាគរយ បន្ទាប់មកវិស័យពាណិជ្ជកម្មដែលមាន ៣២១,២ លានដុល្លារ អចលនទ្រព្យមាន ១៩៦,៣ លានដុល្លារ សកម្មភាពវិទ្យាសាស្ត្រ និងបច្ចេកវិទ្យាមាន ១៧៥,៤ លានដុល្លារ និងការអប់រំបណ្តុះបណ្តាលមាន ៣០,៣ លានដុល្លារ។
ក្នុងចំណោមប្រទេស និងតំបន់ចំនួន ៥៥ ដែលបោះទុនវិនិយោគនៅក្នុងទីក្រុងអំឡុងពេលនោះប្រទេសជប៉ុន បាននាំមុខដោយមានទឹកប្រាក់ ៤៩៤,៤ លានដុល្លារ សិង្ហបុរីឈរនៅលំដាប់ទី២ មានចំនួន ២៨១,៦ លានដុល្លារ និងសាធារណរដ្ឋកូរ៉េឈរនៅលំដាប់ទី៣ ដែលមានទឹកប្រាក់ ៩៧,៧ លានដុល្លារ។
លោក HuaQuocHưng ប្រធានគណៈគ្រប់គ្រងតំបន់កែច្នៃឧស្សាហកម្ម និងនាំចេញនៃទីក្រុងហូជីមិញបាននិយាយថា តំបន់កែច្នៃ និងមណ្ឌលឧស្សាហកម្មភាគខាងត្បូងបានទាក់ទាញប្រាក់ចំនួន ២៣៧ លានដុល្លារគិតត្រឹមចុងខែមេសា ដែលកើនឡើង ២៦ ភាគរយ បើធៀបនឹងរយៈពេលដូចគ្នាកាលពីឆ្នាំមុន។
គណៈកម្មាធិការប្រជាជនក្រុងបានរៀបចំផែនការជួបជាមួយធុរកិច្ចវិនិយោគផ្ទាល់ពីបរទេសក្នុងគោលបំណងធ្វើឱ្យប្រសើរឡើងនូវបរិយាកាសវិនិយោគ និងគាំទ្រដល់ក្រុមហ៊ុនក៏ដូចជាណែនាំគម្រោងធំៗ និងផែនការវិនិយោគរបស់ទីក្រុងក្នុងរយៈពេល ៥ ឆ្នាំខាងមុខ៕ VNS-ANN/RR
