ក្រុងគូឡាឡាំពួរៈ ចាប់ពីអាផាតមិនប្រណីតនៅប្រទេស សិង្ហបុរី រហូតដល់ខុនដូមាត់សមុទ្រនៅប្រទេស ម៉ាឡេស៊ី ក្រុមវិនិយោគិនហុងកុងកំពុងផ្លាស់ប្តូរសាច់ប្រាក់ទៅជាអចលនទ្រព្យនៅតំបន់អាស៊ីអាគ្នេយ៍ ដោយការតវ៉ាប្រឆាំងដោយហិង្សាកាន់តែខ្លាំងឡើងនៅក្រុងហុងកុង និងសង្គ្រាមពាណិជ្ជកម្មរវាងប្រទេសចិន និងអាមេរិក។
មនុស្សរាប់លាននាក់បានចេញមកដងផ្លូវក្នុងអំឡុងពេល ៤ ខែនៃការធ្វើបាតុកម្មគាំទ្រប្រជាធិបតេយ្យនៅទីក្រុងចិនភាគខាងត្បូងមួយនេះដែលរារាំងទេសចរណ៍ ខណៈដែលក៏កំពុងបង្ខំក្រុមហ៊ុនជាច្រើនឲ្យផ្អាកការងារបុគ្គលិក ហើយវិស័យអចលនទ្រព្យកំពុងទទួលរងផលប៉ះពាល់។
ភាគហ៊ុនរបស់ក្រុមហ៊ុនក្នុងវិស័យអចលនទ្រព្យនៅក្នុងទីផ្សារ ១ ក្នុងចំណោមទីផ្សារលំនៅឋានតម្លៃខ្ពស់បំផុតរបស់ពិភពលោកនេះបានធ្លាក់ថ្លៃគិតចាប់តាំងពីខែមិថុនាមកដោយក្រុមហ៊ុនអភិវឌ្ឍន៍កំពុងបង្ខំចិត្តដាក់លក់បញ្ចុះតម្លៃលើគម្រោងថ្មីៗ និងការកាត់បន្ថយថ្លៃជួលការិយាល័យ។
លោក Peter Ng ពាណិជ្ជករហុងកុងបានទិញខុនដូមួយនៅកោះ Penang ប្រទេស ម៉ាឡេស៊ី បន្ទាប់ពីការតវ៉ាប្រឆាំងបានផ្ទុះឡើង។ Penang ជាទីកោះមួយដែលមានប្រជាជនដែលជាជនជាតិចិនរស់នៅភាគច្រើន និងមានភាពពេញនិយមក្នុងចំណោមប្រជាជនហុងកុង។
វិនិយោគិនផ្សារហ៊ុន និងអចលនទ្រព្យអាយុ ៤៨ ឆ្នាំរូបនេះបានប្រាប់ទីភ្នាក់ងារព័ត៌មាន AFP ថា៖ «អស្ថិរភាពគឺជាកតា្តជំរុញសម្រាប់ខ្ញុំ»។ លោកបានបន្ថែមថា លោកបារម្ភអំពីការខូចខាតរយៈពេលវែងដល់សេដ្ឋកិច្ចទីក្រុងហុងកុង ប្រសិនបើភាពចលាចលបន្តកើតឡើង។ លោកថ្លែងថា៖ «ក្រុមវិនិយោគិននឹងតែងតែសម្លឹងអ្វីៗដូចនោះ។ ស្ថិរភាពនយោបាយ»។
លោក Derek Lee ដែលជាពាណិជ្ជករទីក្រុងហុងកុងមួយរូបទៀតដែលមានអាផាតមិននៅកោះ Penang ដែរនោះបានឲ្យដឹងថា លោកដឹងថាអ្នកផ្សេងទៀតនៅក្នុងទីក្រុងពាក់កណ្ដាលស្វយ័តមួយនេះកំពុងពិចារណាការវិនិយោគលើអចលនទ្រព្យនៅតំបន់អាស៊ីអាគ្នេយ៍ ដោយសារតែភាពចលាចលនេះ។
បុរសវ័យ ៥៥ ឆ្នាំនេះប្រាប់ AFP ថា៖ «មនុស្សកំពុងគិតអំពីរបៀបក្នុងការពន្លឿនគំនិតរបស់ពួកគេ របៀបក្នុងការធ្វើឲ្យជីវិតកាន់តែមានស្ថិរភាព»។
បន្ថែមលើការទាក់ទាញរបស់ម៉ាឡេស៊ី តម្លៃសមរម្យ និងតម្លៃទាបជាងខ្លាំងធៀបនឹងអចលនទ្រព្យនៅទីក្រុងហុងកុងក៏ជាកត្តាជំរុញផងដែរ។
គេហទំព័រអចលនទ្រព្យអាស៊ីអាគ្នេយ៍ Property Guru របស់ម៉ាឡេស៊ីបានមើលឃើញកំណើន ៣៥ ភាគរយនៃលំហូរចូលមនុស្សមកពីទីក្រុងហុងកុង។ នេះបើយោងតាមលោក Hari Kri-shnan អគ្គនាយករបស់គេហទំព័រនេះ។
កំណើនដែលជំរុញដោយប្រទេសចិន
ខណៈការតវ៉ាប្រឆាំងរបស់ទីក្រុងហុងកុងកំពុងជំរុញជាចម្បងដើម្បីឲ្យមានសេរីភាពប្រជាធិបតេយ្យកាន់តែខ្លាំងឡើង និងការទទួលខុសត្រូវរបស់នគរបាលនោះ កំហឹងនៅរដូវក្ដៅនេះត្រូវបានជំរុញដោយការខឹងសម្បាដែលឆេះងំអស់រយៈពេលជាច្រើនឆ្នាំចំពោះទីក្រុងប៉េកាំង និងរដ្ឋាភិបាលមូលដ្ឋាន ជុំវិញការធ្លាក់ចុះកម្រិតជីវភាព និងការចំណាយលើការរស់នៅខ្ពស់។
ទីផ្សារអចលនទ្រព្យរបស់ទីក្រុងហុងកុងគឺជាទីផ្សារមួយដែលមានអចលនទ្រព្យតម្លៃសមរម្យតិចជាងគេក្នុងពិភពលោក។ ទីក្រុងនេះមានអចលនទ្រព្យតម្លៃខ្ពស់ខ្លាំងដែលមួយផ្នែកត្រូវបានជំរុញដោយប្រជាជនចិនដីគោកដែលមានប្រាក់ច្រើនដែលបានវិនិយោគលើទីក្រុងនេះ ដែលបានបរាជ័យអស់រយៈពេលជាច្រើនឆ្នាំក្នុងការសាងសង់ផ្ទះល្វែងឲ្យបានគ្រប់គ្រាន់ ដើម្បីឆ្លើយតបតាមតម្រូវការ។
ប៉ុន្តែនៅពេលនេះជនជាតិចិនដីគោកដែលជាធម្មតាមើលឃើញអចលនទ្រព្យនៅទីក្រុងហុងកុងថា ជាការវិនិយោគប្រកបដោយសុវត្ថិភាពនោះកំពុងជ្រើសរើសយកប្រទេសសិង្ហបុរីដែលជាមជ្ឈមណ្ឌលហិរញ្ញវត្ថុប្រកួតប្រជែង ដោយសារការតវ៉ាប្រឆាំង និងសង្គ្រាមពាណិជ្ជកម្មរវាងអាមេរិក និងចិន។ នេះបើយោងតាមក្រុមអ្នកសង្កេតការណ៍។
នៅឆ្នាំនេះមានការកើនឡើងការលក់ផ្ទះល្វែងប្រណីតនៅប្រទេសសិង្ហបុរី ដែលដូចទៅនឹងទីក្រុងហុងកុងដែលល្បីខាងអចលនទ្រព្យមានតម្លៃខ្ពស់ ដែលបានជំរុញមួយផ្នែកដោយអ្នកទិញជាជនជាតិចិនដីគោក។ នេះបើយោងតាមក្រុមហ៊ុនពិគ្រោះយោបល់ OrangeTee & Tie។
លោក Alan Cheong នាយកប្រតិបត្តិក្រុមការងារស្រាវជ្រាវ និងពិគ្រោះយោបល់នៅក្រុមហ៊ុន Savills បានថ្លែងថា៖ «ការតវ៉ាប្រឆាំងនៅទីក្រុងហុងកុង បានធ្វើឲ្យប្រជាជនចិនដីគោកមួយចំនួនដែលនៅទីនោះ (បារម្ភកាន់តែខ្លាំង) អំពីការវិនិយោគលើអចលនទ្រព្យទីក្រុងហុងកុង ដូច្នេះពួកគេយកការវិនិយោគនោះទៅប្រទេសសិង្ហបុរី»។
រួមផ្សំជាមួយនឹងការប៉ះពាល់ដល់សេដ្ឋកិច្ចចិន ភាពតានតឹងផ្នែកពាណិជ្ជកម្ម អាចបង្អាក់ទឹកចិត្តប្រជាជនចិនមួយចំនួនមិនឲ្យវិនិយោគនៅប្រទេសលោកខាងលិច និងបានជំរុញពួកគេឆ្ពោះទៅប្រទេសសិង្ហបុរីដែលមានជាជនជាតិចិនភាគច្រើនរស់នៅទីនោះ។
លោក Cheong ថ្លែងថា៖ «ខ្ញុំគិតថា ពួកគេមិនចង់ទៅប្រទេសលោកខាងលិចទេ»។
សិង្ហបុរី គឺជា «ប្រទេសដែលមានវប្បធម៌ជិតស្និទ្ធបំផុតជាមួយចិន ក្រៅពីទីក្រុងហុងកុង ហើយខ្ញុំគិតថា ពួកគេមានអារម្មណ៍កាន់តែមានផាសុកភាពជាមួយវប្បធម៌នោះ»។
មានសញ្ញាបន្ថែមទៀតដែលបង្ហាញថា ទីក្រុងគ្រប់គ្រងយ៉ាងតឹងរ៉ឹង និងប្រកបដោយស្ថិរភាពនេះកំពុងទទួលអត្ថប្រយោជន៍ពីភាពចលាចលនៅទីក្រុងហុងកុង ដែលក្រុមហ៊ុន Goldman Sachs កាលពីសប្ដាហ៍មុនបានប៉ាន់ប្រមាណថា មានលំហូរចេញប្រាក់ ៤ ពាន់លានដុល្លារពីទីក្រុងហុងកុងទៅប្រទេសសិង្ហបុរីនៅរដូវក្ដៅនេះ៕ LA