ក្រុងហាណូយៈ ក្រុមហ៊ុន Jones LaSalle Vietnam Co Ltd (JLL Vietnam) បានឲ្យដឹងក្នុងសេចក្ដីប្រកាសព័ត៌មានមួយនៅដើមសប្តាហ៍នេះថា ក្រុមវិនិយោគិនកំពុងស្វែងរកទ្រព្យសកម្មឧស្សាហកម្ម និងឡូជីស្ទិកតាមរយៈការវិនិយោគរួមគ្នាជាមួយក្រុមហ៊ុនអភិវឌ្ឍន៍ឧស្សាហកម្មក្នុងស្រុក និង/ ឬការទិញដី និងប្រតិបត្តិការអចលនទ្រព្យ។
ក្រុមហ៊ុន JLL Vietnam ក៏បានឲ្យដឹងថាការច្របាច់បញ្ចូលគ្នា និងការទិញភាគហ៊ុនក្រុមហ៊ុន (M&A) នៅក្នុងវិស័យអចលនទ្រព្យគឺជាចំណុចគួរឲ្យចាប់អារម្មណ៍បំផុតក្នុងទីផ្សារនេះ ដោយសារនិន្នាការផលិតកម្មកំពុងផ្លាស់ប្តូរចេញពីប្រទេសចិនទៅកាន់តំបន់អាស៊ីអាគ្នេយ៍ ហើយនឹងបន្តផ្ដល់អត្ថប្រយោជន៍ដល់តំបន់នេះទាំងមូលដែលរួមទាំងប្រទេសវៀតណាមផងដែរ។
កង្វះស្ដង់ដាខ្ពស់ កង្វះទីតាំងឃ្លាំងស្ដុកឡូជីស្ទិកទំនើប និងកង្វះតម្រូវការរឹងមាំពីអ្នកកាន់កាប់ក្នុងតំបន់កំពុងគាំទ្រដល់កំណើនប្រកបដោយសក្ដានុពល។
លោកស្រី Nguyen Thi Van Khanh នាយកជាន់ខ្ពស់ទទួលបន្ទុកផ្នែកទីផ្សារមូលធនប្រចាំក្រុមហ៊ុន JLL Vietnam បានឲ្យដឹងថា គុណភាពទ្រព្យសកម្ម កំណើនការជួល ទំហំកិច្ចព្រមព្រៀង និងការកាន់កាប់ដីធ្លីដែលនៅសល់ជាកត្តាដ៏សំខាន់សម្រាប់ក្រុមវិនិយោគិនក្នុងការកំណត់ការសម្រេចចិត្តវិនិយោគរបស់ពួកគេ។
លោកស្រី Khanh បានមានប្រសាសន៍ថា៖ «យើងរំពឹងថា ក្រុមវិនិយោគិនបរទេសនឹងបន្តបង្ហាញចំណាប់អារម្មណ៍ខ្លាំង និងការប្ដេជ្ញាចិត្តដ៏រឹងមាំក្នុងទីផ្សារអចលនទ្រព្យរបស់ប្រទេសវៀតណាម ហើយទីផ្សារនេះនៅតែមានសក្ដានុពលសម្រាប់កំណើន»។
ទោះសកម្មភាព M&A អាចកើតឡើងក្នុងល្បឿនកាន់តែយឺត និង ហ្វ្រេកង់កាន់តែទាបក្នុងរយៈពេល ២ ត្រីមាសដែលនៅសល់ក្នុងឆ្នាំនេះដោយសារកង្វះការវិនិយោគលើគម្រោងដែលមានរួចហើយក្តី ក៏គោលនយោបាយដែលមានស្រាប់របស់រដ្ឋាភិបាលនឹងលើកកម្ពស់តម្លាភាពក្នុងទីផ្សារនេះ។ កត្តានេះនឹងធានាសមត្ថភាពប្រកួតប្រជែងរបស់ប្រទេសវៀតណាម និងទាក់ទាញក្រុមវិនិយោគិនកាន់តែច្រើនថែមទៀតមកពីតំបន់។ នេះបើយោងតាមក្រុមហ៊ុន JLL Vietnam។
ជាមួយនឹងតំបន់ដីដែលមានរួចហើយ ដើម្បីអភិវឌ្ឍគម្រោងលំនៅឋាន និងគម្រោង ពាណិជ្ជកម្មដែលកាន់តែពិបាកស្វែងរកក្នុងតំបន់ប្រជុំដោយពាណិជ្ជកម្ម (CBD) ឬក្នុងតំបន់ល្បីៗនៅទីក្រុងដែលក្រុមហ៊ុន JLL បានឲ្យដឹងថា ចំនួនក្រុមវិនិយោគិន និងក្រុមហ៊ុនអភិវឌ្ឍន៍កំពុងស្វែងរកការពង្រីកទីតាំងឈរជើងរបស់ពួកគេឆ្ពោះទៅកាន់បណ្ដាខេត្តជិតខាងផ្សេងទៀត។
ក្រុមហ៊ុនអភិវឌ្ឍន៍ធំៗរួមមានក្រុមហ៊ុនអចលនទ្រព្យ Novaland ដែលអភិវឌ្ឍគម្រោងទីក្រុង Aqua City របស់ខ្លួននៅទីក្រុង Long Hung ខេត្ត Dong Nai ក្រុមហ៊ុន Nam Long ដែលទិញយកគម្រោងអភិវឌ្ឍន៍ទីក្រុង Dong Nai Waterfront នៅដើមឆ្នាំនេះ ហើយនៅឆ្នាំមុនបានទិញគម្រោងអភិវឌ្ឍន៍ទីក្រុង Dai Phuoc Paragon ទំហំ ៤៥ ហិកតាដែលមានទីតាំងនៅទីក្រុង Nhon Trach ខេត្ត Dong Nai និងទិញអចលនទ្រព្យ Keppel Land ដែលមានដី ៣ កន្លែងក្នុងទីក្រុងហូជីមិញនៅពេលថ្មីៗ។
ទោះបីជាមានក្រុមហ៊ុនអភិវឌ្ឍន៍ និងក្រុមវិនិយោគិនថ្មីៗមួយចំនួនកំពុងស្វែងរកតំបន់ដែលរីកចម្រើនរហ័សទាំងនេះក៏ដោយ ក៏ក្រុមហ៊ុន JLL បានឲ្យដឹងថា ភាគច្រើននៅតែត្រូវបានគ្របដណ្ដប់ដោយក្រុមហ៊ុនក្នុងស្រុក ឬក្រុមហ៊ុនបរទេសដែលត្រូវបានបង្កើតឡើងជាយូរនៅក្នុងប្រទេសវៀតណាម៕ ANN/LA