ចំនួនផ្ទះទំនេរ ឬគ្មានមនុស្សរស់នៅកំពុងកើនឡើងនៅគ្រប់ទិសទីក្នុងប្រទេសជប៉ុន ហើយទាំងវិស័យរដ្ឋ និងឯកជនកំពុងតែព្យាយាមដោះស្រាយបញ្ហានានាដែលកើតឡើងពីកំណើននៃចំនួននេះ។
ក្រុមហ៊ុនឯកជនមួយចំនួនបានចាប់ផ្តើមខិតខំប្រឹងប្រែងធ្វើយ៉ាងណាឲ្យការប្រើប្រាស់ផ្ទះទំនេរកាន់តែល្អប្រសើរ។ កាលពីដើមខែមេសា ក្រសួងទេសចរណ៍ ដឹកជញ្ជូន ហេដ្ឋារចនាសម្ព័ន្ធ និងដែនដីបានបញ្ចេញនូវប្រព័ន្ធមួយដែលផ្តល់នូវការបញ្ជាក់គុណភាពនៃផ្ទះទំនេរ ដើម្បីឲ្យអ្នកទិញមានទំនុកចិត្ត។
បច្ចុប្បន្នគេកំពុងតែផ្តោតលើបញ្ហានេះ ដើម្បីមើលថា តើយុទ្ធសាស្ត្រទាំងនេះនឹងអាចដោះស្រាយបញ្ហាទាក់ទងទៅនឹងផ្ទះទំនេរដែលបានកើនឡើងយ៉ាងគំហុកនេះបានឬយ៉ាងណា?
«លក់ដាច់» ក្នុងតម្លៃ ០ យេន
កាលពីរដូវក្តៅ ស្ត្រីវ័យ ៣០ ឆ្នាំម្នាក់នៅ Matsuyama បានផ្សព្វផ្សាយនូវព័ត៌មានអំពីផ្ទះទំនេរ ១ លើគេហទំព័រ Jimoty ដែលជាគេហទំព័រផ្សព្វផ្សាយអចលនទ្រព្យដែលធ្លាប់មានអ្នកស្នាក់នៅរួច។ ឪពុកក្មេករបស់អ្នកស្រីធ្លាប់ស្នាក់នៅក្នុងផ្ទះនេះ។
អ្នកស្រីបានជូនផ្ទះនេះទៅឲ្យគេដោយមិនគិតថ្លៃ។ អ្នកស្រីបានថ្លែងថា៖ «ខ្ញុំបានរកឃើញមនុស្សម្នាក់ដែលមានចំណាប់អារម្មណ៍ចង់ជួសជុលផ្ទះនេះដើម្បីស្នាក់នៅ។ នេះគឺជារឿងមួយដ៏ល្អ ពីព្រោះខ្ញុំចង់ឲ្យផ្ទះនេះទៅគេយ៉ាងខ្លាំង»។
យោងតាមគេហទំព័រ Jimoty Inc., កាលពីប៉ុន្មានឆ្នាំថ្មីៗនេះ អ្នកប្រើប្រាស់បានដាក់ផ្សព្វផ្សាយអំពីផ្ទះទំនេរ ឬផ្ទះលម្ហែដោយដាក់តម្លៃ ០ យេន ព្រោះក្រុមហ៊ុនអចលនទ្រព្យបានបដិសេធសំណើរបស់ពួកគេចំពោះការស្វែងរកអ្នកទិញ ឬមិនអាចស្វែងរកអ្នកទិញបាន។
ការផ្សព្វផ្សាយទាំងនេះទាក់ទាញអ្នកប្រើប្រាស់អ៊ីនធឺណិតយ៉ាងខ្លាំង។ នេះបើយោងតាមក្រុមហ៊ុន Jimoty Inc.,។
ក្នុងករណីភាគច្រើន Jimoty មិនយកកម្រៃជើងសារអ្វីនោះឡើយ។ ប្រសិនបើការផ្សព្វផ្សាយបែបនេះទាក់ទាញអ្នកចូលមើលច្រើន វាផ្តល់អត្ថប្រយោជន៍ដល់គេហទំព័រផ្សព្វផ្សាយរបស់ក្រុមហ៊ុននេះទៅវិញទេ។
ក្រុមហ៊ុនរថភ្លើងមួយចំនួនរួមទាំង Keikyu Corp. បានចាប់ផ្តើមអាជីវកម្មរបស់ខ្លួនកាលពីខែមេសាឆ្នាំ ២០១៧ ដើម្បីដាក់ជួលផ្ទះទំនេរដែលស្ថិតនៅតាមបណ្តោយផ្លូវរថភ្លើងរបស់ខ្លួនពីម្ចាស់ផ្ទះ ជួសជុលផ្ទះទាំងនោះ ហើយជួលបន្តទៅឲ្យអ្នកដែលចង់ស្នាក់នៅទីនោះ។ គោលបំណងរបស់ពួកគេគឺដើម្បីកុំឲ្យបាត់បង់សោភ័ណភាពតាមបណ្តោយផ្លូវរថភ្លើង និងបង្ការពីការបាត់បង់អ្នកស្នាក់នៅដែលធ្វើឲ្យផ្ទះទំនេរកាន់តែកើនឡើង។
ក្រុមហ៊ុន Daikyo group ដែលជាក្រុមហ៊ុនអចលនទ្រព្យដ៏ធំមួយបានដាក់យូនីតទំនេរជួលក្នុងខុនដូនានាក្នុងខេត្ត Okinawa Prefecture ទៅឲ្យអ្នកស្នាក់នៅក្នុងខេត្តនេះសម្រាប់រយៈពេល ១ ខែ ឬយូរជាងនេះ។
យោងតាមក្រសួងគមនាគមន៍ និងកិច្ចការផ្ទៃក្នុងគិតត្រឹមឆ្នាំ ២០១៣ មានផ្ទះទំនេរប្រមាណ ៨.២ លានផ្ទះ។ ចំនួននេះបានកើនឡើងជាបន្តបន្ទាប់ ដោយសារតែប្រជាជននិយមទិញផ្ទះថ្មីៗជាជាងផ្ទះដែលមានមនុស្សស្នាក់នៅរួចហើយ។ បញ្ហានេះក៏ដោយសារតែចំនួនប្រជាជននៅជប៉ុនធ្លាក់ចុះផងដែរ។
ចំនួនផ្ទះទំនេរបានកើនឡើងប្រមាណ ២០ ភាគរយក្នុងរយៈពេល ១ សតវត្សរ៍ចុងក្រោយនេះ។
វិទ្យាស្ថានស្រាវជ្រាវ Nomura បានទស្សន៍ទាយថា ប្រសិនបើផ្ទះទំនេរទាំងនេះមិនមានការប្រើប្រាស់ប្រកបដោយប្រសិទ្ធភាពទេនោះ ចំនួននេះនឹងកើនឡើងដល់ ២១.៦៧ លានផ្ទះក្នុងឆ្នាំ ២០៣៣ ដែលជាចំនួនច្រើនជាង ៣០% នៃចំនួនផ្ទះសរុបក្នុងប្រទេសជប៉ុន៕
The Japan News