ក្រុងហូជីមិញៈ វិស័យអចលនទ្រព្យទេសចរណ៍មានសក្តានុពលយ៉ាងខ្លាំងក្នុងការសម្រេចបានកំណើន ដោយសារភាពរីកចម្រើនយ៉ាងលឿនក្នុងឧស្សាហកម្មទេសចរណ៍។ នេះបើយោងតាមវេទិកាមួយដែលត្រូវបានរៀបចំធ្វើឡើងក្នុងទីក្រុងហូជីមិញកាលពីថ្ងៃសៅរ៍សប្តាហ៍មុន។
លោក Ha Manh Tien ប្រធានសមាគមនាយកសាជីវកម្ម (ACD) បានប្រាប់វេទិកាអចលនទ្រព្យទេសចរណ៍ (TPF) ឆ្នាំ ២០១៩ ថា ឧស្សាហកម្មទេសចរណ៍បាននិងកំពុងកើនឡើងក្នុងអត្រាពី ៣០ ទៅ ៤០ ភាគរយប្រចាំឆ្នាំក្នុងរយៈកាលប៉ុន្មានឆ្នាំថ្មីៗនេះដែលស្ថិតក្នុងចំណោមកំណើនលឿនបំផុតក្នុងពិភពលោក។
វៀតណាមទទួលបានភ្ញៀវទេសចរអន្តរជាតិចំនួន ១៥,៥ លាននាក់ កាលពីឆ្នាំមុន ហើយចំនួននេះរំពឹងថានឹងកើនដល់ ១៨ លាននាក់នៅឆ្នាំនេះ។
លោកបានថ្លែងថា ទីផ្សារអចលនទ្រព្យទេសចរណ៍បាននិងកំពុងកើនឡើងខ្លាំង និងទាក់ទាញវិនិយោគិនក្នុងស្រុក និងអន្តរជាតិយ៉ាងច្រើន។
លោកបន្តថា៖ «ក្រុមហ៊ុនអភិវឌ្ឍន៍ជាច្រើនដែលកាលពីពេលមុនវិនិយោគតែលើវិស័យអចលនទ្រព្យលំនៅឋានបានចាប់ផ្តើមវិនិយោគលើវិស័យអចលនទ្រព្យទេសចរណ៍ ដែលបង្កើតឲ្យមានទីផ្សាររស់រវើក»។
លោក Ha Van Sieu អនុប្រធានរដ្ឋបាលទេសចរណ៍ជាតិរបស់វៀតណាមបានថ្លែងថា កំណើនចំនួនភ្ញៀវទេសចរជាតិនិងអន្តរជាតិបានធ្វើឲ្យមានរលកវិនិយោគដ៏ធំមួយក្នុងផ្នែករមណីយដ្ឋាន សណ្ឋាគារ ផ្ទះវីឡា និងអាផាតមិនទេសចរណ៍ក្នុងមជ្ឈមណ្ឌលទេសចរណ៍ធំៗ។
ក្នុងឆ្នាំ ២០១១ ប្រទេសនេះមានកន្លែងស្នាក់នៅចំនួន ១៣ ៧៥៦ ទីតាំង ដែលមានបន្ទប់សរុបជាង ២៥៦ ០០០ បន្ទប់ ហើយចំនួននេះបានកើនឡើងដល់ ២៨ ០០០ ទីតាំងដែលមានបន្ទប់សរុប ៥៥០ ០០០ បន្ទប់កាលពីឆ្នាំមុន។
លោក Sieu មានប្រសាសន៍ថា៖ «ជាមួយនឹងនិន្នាការលំហូរភ្ញៀវទេសចរចូលតំបន់អាស៊ីប៉ាស៊ីហ្វិកបន្តកើតមាន និងការដែលកំពុងក្លាយជាផ្កាយមួយដែលកំពុងរះក្នុងអាស៊ាន យើងមានសុទិដ្ឋិនិយមចំពោះទស្សនវិស័យនៃភាពរីកចម្រើនក្នុងវិស័យទេសចរណ៍ក្នុងរយៈពេល ១០ ឆ្នាំខាងមុខ»។
ប្រទេស វៀតណាម ត្រូវបានព្យាករថានឹងទទួលបានភ្ញៀវទេសចរអន្តរជាតិចំនួន ២១ លាននាក់ត្រឹមឆ្នាំ ២០២០ និង ៤៧ លាននាក់ក្នុងរយៈពេលមួយទសវត្សរ៍ខាងមុខ ហើយមានកំណើនជាមធ្យមចំនួន ៩ ទៅ ១១ ភាគរយក្នុងមួយឆ្នាំ។
លោកបានថ្លែងថា៖ «វៀតណាមត្រូវការបន្ទប់ចំនួន ៦៥០ ០០០ ទៅ ៧០០ ០០០ បន្ទប់ត្រឹមឆ្នាំ ២០២០ និង ៩៥០ ០០០ ទៅ ១,០៥ លានបន្ទប់ត្រឹមឆ្នាំ ២០២៥ និង ១,៣ លានទៅ ១,៤៥ លានបន្ទប់ត្រឹមឆ្នាំ ២០៣០»។ លោកបានបន្ថែមថា៖
«អចលនទ្រព្យទេសចរណ៍នឹងបន្តនៅជាវិស័យមួយក្នុងចំណោមវិស័យសក្តានុពលបំផុតនៃការវិនិយោគ ប្រសិនបើក្រុមហ៊ុនអភិវឌ្ឍន៍ជ្រើសរើសទីតាំងត្រឹមត្រូវនិងប្រភេទត្រឹមត្រូវដែលចាប់យកតម្រូវការរបស់ភ្ញៀវទេសចរជំនាន់ក្រោយ»។
លោក Kai Marcus Schroter អគ្គនាយកក្រុមហ៊ុន Tourism Hospitality Management ដែលផ្តល់សេវាបដិសណ្ឋារកិច្ចទេសចរណ៍ បានអបអរសាទរចំពោះសក្តានុពលរបស់វិស័យអចលនទ្រព្យទេសចរណ៍ ប៉ុន្តែក៏ថ្លែងផងដែរថា មានបញ្ហាប្រឈមមួយចំនួនដែលត្រូវជម្នះ។
អគ្គនាយករូបនេះបានបន្តថា ប្រទេស វៀតណាម មានទេសភាពស្រស់ស្អាត ប៉ុន្តែភ្ញៀវទេសចរជាច្រើនមិនដឹងអំពីវា ដោយសារប្រទេសនេះមិនបានផ្សព្វផ្សាយឲ្យបានល្អ។
រចនាសម្ព័ន្ធទេសចរណ៍នៅខ្សោយ ហើយផលិតផលអចលនទ្រព្យទេសចរណ៍ខ្វះភាពយូនីក និងទាក់ទាញ។
លោក Sieu ថ្លែងថា ភ្ញៀវទេសចរចង់បានបទពិសោធថ្មីៗ ហើយការណ៍នេះតម្រូវឲ្យវិនិយោគិនអភិវឌ្ឍផលិតផលបែបនេះ។ ឧទាហរណ៍ គម្រោងវិស័យអចលនទ្រព្យទេសចរណ៍មួយ អាចនឹងក្លាយជាទីតាំងចម្រុះមួយ និងមានការពាក់ព័ន្ធនឹងអ្វីៗផ្សេងដូចជាកាស៊ីណូ កន្លែងកីឡា កន្លែងព្រឹត្តិការណ៍ផ្សេងៗ និងអ្វីផ្សេងៗទៀត។
លោកបានបន្តថា ប្រតិបត្តិករសណ្ឋាគារនិងរមណីយដ្ឋានត្រូវការធ្វើពិពិធកម្មកន្លែងស្នាក់នៅឲ្យមានជម្រើសផ្សេងៗដើម្បីបំពេញតាមតម្រូវការដែលកើនឡើងរបស់អតិថិជន។
លោក Nguyen Tran Nam ប្រធានសមាគមអចលនទ្រព្យ (REA) របស់វៀតណាមបានថ្លែងថា៖ «នំសម្រាប់ទីផ្សារអចលនទ្រព្យវិស័យទេសចរ គឺមានរសជាតិឆ្ងាញ់ ប៉ុន្តែមិនមែនអ្នករាល់គ្នាសុទ្ធតែអាចទទួលទានវាបានទេ។ ដើម្បីអភិវឌ្ឍប្រកបដោយចីរភាព ទីផ្សារនេះត្រូវការអ្នកអភិវឌ្ឍន៍ដែលមានគុណភាព»។
លក្ខណសម្បត្តិ និងជំនាញ របស់បុគ្គលិកនៅតាមសណ្ឋាគារនិងរមណីយដ្ឋានជាច្រើនមានកម្រិតទាប ហើយសហគ្រាសចាំបាច់ត្រូវលើកកម្ពស់គុណភាពនៃការបណ្តុះបណ្តាលបុគ្គលិករបស់ពួកគេ ហើយមិនគួរពឹងផ្អែកខ្លាំងពេកលើវគ្គបណ្តុះបណ្តាលនៅតាមសាសាទេ។
ប្រតិភូនានាដែលចូលរួមក្នុងវេទិកានេះបានលើកជាយោបល់ថា ប្រទេស វៀតណាម គួរតែយកចិត្តទុកដាក់ជាងមុនទៅលើបញ្ហាបរិស្ថាន ខណៈដែលកំពុងអភិវឌ្ឍគម្រោងអចលនទ្រព្យទេសចរណ៍ ដោយសារឧស្សាហកម្មទេសចរណ៍ពឹងផ្អែកយ៉ាងខ្លាំងលើធាតុផ្សំ និងទេសភាពធម្មជាតិ ដូច្នេះការធ្លាក់ចុះបរិស្ថានអាចនឹងធ្វើឲ្យអនាគតមិនល្អសម្រាប់ទិសដៅទេសចរណ៍ល្បីៗទាំងនេះ។
អចលនទ្រព្យទេសចរណ៍ប្រចាំឆ្នាំនេះ ត្រូវបានរៀបចំដោយទស្សនាវដ្តី Theleader៕ ANN/PS