ក្រុងហាណូយៈ ប្រទេសវៀតណាមមានសក្ដានុពលដ៏ធំក្នុងការអភិវឌ្ឍទីផ្សាររមណីយដ្ឋាននៅចុងឆ្នាំនេះ និងឆ្នាំបន្តទៅមុខទៀត ដោយសារកំណើនតម្រូវការ និងកំណើនសេដ្ឋកិច្ចខ្ពស់។
ក្រុមអ្នកជំនាញបានធ្វើអត្ថាធិប្បាយក្នុងសិក្ខាសាលាមួយស្ដីពីនិន្នាការថ្មី និងឱកាសវិនិយោគអចលនទ្រព្យនៅឆមាសទី ២ ឆ្នាំនេះដែលបានរៀបចំឡើងនៅទីក្រុងហាណូយកាលពីសប្តាហ៍មុនដោយ CafeLand ជាគេហទំព័រឯកទេសខាងព័ត៌មានទាក់ទងនឹងទីផ្សារអចលនទ្រព្យ។
អ្នកជំនាញទាំងនេះបានឲ្យដឹងថាឆ្នាំនេះអាចជាឆ្នាំដ៏សំខាន់សម្រាប់វិស័យអចលនទ្រព្យរមណីយដា្ឋន។
លោក Tran Dinh Thien អតីតនាយកវិទ្យាស្ថានសេដ្ឋកិច្ចវៀតណាមបានឲ្យដឹងថា ការវិនិយោគផ្ទាល់បរទេស (FDI) នៅវៀតណាមបានកើនឡើងដែលជំរុញតម្រូវការការវិនិយោគផ្នែកអចលនទ្រព្យឧស្សាហកម្ម និងស៊ីវិល។ កត្តានេះបង្កើតឲ្យមានតម្រូវការអចលនទ្រព្យខ្ពស់ដែលរួមទាំងអចលនទ្រព្យសម្រាប់វិស័យទេសចរណ៍ផងដែរ។
លោក Dang Hung Vo អតីតឧបនាយករដ្ឋមន្ដ្រីទទួលបន្ទុកធនធានធម្មជាតិ និងបរិសា្ថនរបស់វៀតណាមបានឲ្យដឹងថា ចំនួនសរុបនៃអចលនទ្រព្យទេសចរណ៍ក្នុងប្រទេសវៀតណាមគឺនៅតែទាបជាងអចលនទ្រព្យទេសចរណ៍ក្នុងបណ្ដាប្រទេសក្នុងតំបន់ផ្សេងទៀតដែលមានការអភិវឌ្ឍទេសចរណ៍រឹងមាំដូចជាប្រទេសថៃនៅឡើយ។ ទន្ទឹមនឹងនេះវិស័យទេសចរណ៍វៀតណាមបានកើនឡើង ៣០ ភាគរយប្រចាំឆ្នាំ។
បើទោះជាវៀតណាមមានទីផ្សាររមណីយដា្ឋនពេញនិយមជាច្រើនដូចជាទីក្រុងដាណាង និងទីក្រុងញ៉ាចាងក្តី ក៏រមណីយដ្ឋានទាំងនេះក្នុងពេលឆាប់ៗនឹងត្រូវចាស់ទុំ។
លោក Vo ឲ្យដឹងថានៅពេលអនាគត ទីកន្លែងពេញនិយមទំនងជានឹងផ្លាស់ប្តូរទៅទីតាំងផ្សេងទៀត ដូចជាទីក្រុង Quy Nhon ខេត្ត Binh Dinh និងទីក្រុង Tuy Hoa ខេត្ត Phu Yen។ ក្រៅពីនេះទីតាំងដែលមានសក្ដានុពលមួយចំនួនផ្សេងទៀតដែលមានកំណើនរហ័សរួមមានទីក្រុង Phan Rang និងទីក្រុង Phan Thiet ខេត្ត Binh Thuan។
នៅក្នុងរយៈពេលវែងការផ្គត់ផ្គង់ខុនដូបែបសណ្ឋាគារ (ខុនដូតែល) នៅវៀតណាមនឹងមិនអាចមានខ្ពស់ជាងតម្រូវការបានទេ។ នេះបើយោងតាមលោក Vo។
ប៉ុន្តែលោកបន្តថានៅដើមឆ្នាំ ២០១៩ ការទិញលក់ខុនដូបែបសណ្ឋាគារបានថយចុះនៅក្នុងតំបន់មួយចំនួនទំនងជាដោយសារតែគោលនយោបាយរឹតបន្តឹងឥណទានសម្រាប់អចលនទ្រព្យ និងភាពមិនច្បាស់លាស់ក្នុងប្រព័ន្ធច្បាប់សម្រាប់ខុនដូបែបសណ្ឋាគារ។
លោកស្រី Nguyen Thi Thuy Duong នាយិកាផ្នែកទំនាក់ទំនង និងការគាំទ្រសហគមន៍នៅក្រុមហ៊ុន Novaland Group បានឲ្យដឹងថា តំបន់ជាច្រើនដែលចង់អភិវឌ្ឍអចលនទ្រព្យរមណីយដា្ឋនត្រូវការការអភិវឌ្ឍវិស័យទេសចរណ៍ និងហេដ្ឋារចនាសម្ព័ន្ធដឹកជញ្ជូនក្នុងពេលជាមួយគ្នា។
ឧទាហរណ៍ទីក្រុង Phan Thiet គ្រោងនឹងដាក់ព្រលានយន្តហោះអន្តរជាតិឲ្យដំណើរការក្នុងឆ្នាំ ២០២២ ដែលតភ្ជាប់ផ្លូវជាតិនានាទៅកាន់ទីក្រុងហូជីមិញ។ រយៈពេលធ្វើដំណើរពីទីក្រុងហូជីមិញទៅទីក្រុង Phan Thiet នឹងកាត់បន្ថយមកនៅត្រឹម ១ ម៉ោង និង ៤៥ នាទី។
លោកស្រីក៏បានយល់ស្របផងដែរទៅនឹងការលើកឡើងរបស់លោក Nguyen Tri Hieu ដែលជាអ្នកជំនាញផ្នែកហិរញ្ញវត្ថុដែលថា ទីផ្សារអចលនទ្រព្យរមណីយដា្ឋនក្នុងស្រុកត្រូវតែអភិវឌ្ឍប្រកបដោយស្ថិរភាពដើម្បីបរិស្ថាន និងកាត់បន្ថយផលប៉ះពាល់ដោយសារការអភិវឌ្ឍទៅលើបរិស្ថាន។
ក្រៅពីនោះលោក Hieu ឆ្ងល់អំពីភាពស្របច្បាប់របស់អចលនទ្រព្យរមណីយដា្ឋនដូចជាខុនដូបែបសណ្ឋាគារ ជាពិសេសជាមួយនឹងវិនិយោគិនតូចតាច។ ធនាគារជាច្រើនមិនទាន់មានភាពស្និទ្ធនៅឡើយនៅពេលពួកគេទទួលខុនដូបែបសណ្ឋាគារទាំងនោះជាទ្រព្យបញ្ចាំ។
បើតាមលោក Hieu ខុនដូបែបសណ្ឋាគារទាំងនេះគឺជាផលិតផលអចលនទ្រព្យសម្រាប់ការធ្វើអាជីវកម្ម ដូច្នេះបទប្បញ្ញត្តិទាំងអស់ស្ដីពីដីធ្លី ឬពន្ធគួរតែត្រូវចាត់ទុកថាជាទំនិញសម្រាប់ការជួញដូរ។
លោកបានស្នើរដ្ឋាភិបាល និងសភាជាតិរបស់វៀតណាមគួរតែដោះស្រាយបញ្ហាផ្នែកច្បាប់ឲ្យលឿន ដើម្បីបង្កើតលក្ខខណ្ឌអនុគ្រោះសម្រាប់ធនាគារ ក្នុងការទទួលយកខុនដូបែបសណ្ឋាគារជាទ្រព្យបញ្ចាំ ខណៈដែលអ្នកទិញលំនៅឋានត្រូវបានធានាថានឹងទទួលបានសិទ្ធិគ្រប់គ្រង។
ខេត្ត Binh Dinh និងខេត្ត Phu Yen ចង់វិនិយោគទីផ្សាររមណីយដ្ឋានរបស់ខ្លួន ដោយសារតែខេត្តទាំង ២ នេះមានដីសម្រាប់ការអភិវឌ្ឍទីផ្សារនេះ និងព្រលានយន្តហោះ។ នេះបើយោងតាមលោក Khoi ។
នៅត្រីមាសទី ១ ឆ្នាំនេះវៀតណាមបានទាក់ទាញការវិនិយោគផ្ទាល់ពីបរទេសប្រហែល ១,៧ ពាន់លានដុល្លារអាមេរិកកើនឡើង ៣៦ ភាគរយធៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមទឹកប្រាក់នេះ វិស័យអចលនទ្រព្យក្នុងរយៈពេល ៣ ឆ្នាំចុងក្រោយនេះតែងតែបានជាប់ចំណាត់ថ្នាក់ទី ២ ក្នុងការទាក់ទាញការវិនិយោគ ជាពិសេសវិស័យអចលនទ្រព្យរមណីយដ្ឋាន៕ ANN/LA