.jpg)
ក្រុងហូជីមិញៈ ក្រុមអ្នកជំនាញនៅសិក្ខាសាលាស្តីពី «វដ្ដវិបត្តិ និងឱកាសវិនិយោគក្នុងទីផ្សារអចលនទ្រព្យ» ដែលបានរៀបចំឡើងដោយកាសែត Thanh Nien នៅទីក្រុងហូជីមិញ ប្រទេសវៀតណាមកាលពីខែកក្កដាបានឯកភាពថា វិបត្តិអចលនទ្រព្យនឹងមិនទំនងជាកើតមាននោះទេក្នុងអំឡុង ២ ឆ្នាំខាងមុខនេះ។ នេះបើយោងតាមគេហទំព័រ Vietname Investment Review (VIR)។
គេហទំព័រនេះបានរាយការណ៍ដោយដកស្រង់សម្តីលោក Phan Truong Son ប្រធានផ្នែកអភិវឌ្ឍន៍លំនៅឋាន និងអចលនទ្រព្យ ខណៈលោកថ្លែងថា ស្ថិតក្រោមនាយកដ្ឋានសំណង់ទីក្រុងហូជីមិញ វិបត្តិអចលនទ្រព្យមិនទំនងជាមិនកើតមានឡើយក្នុងពេល ២ ឆ្នាំខាងមុខដោយសារតែការផ្គត់ផ្គង់លំនៅឋាន នៅឆមាសទី ១ ឆ្នាំនេះមានចំនួនទាបជាងចំនួននៅអំឡុងពេលដូចគ្នាកាលពីឆ្នាំមុន។
លំនៅឋានគ្រប់កម្រិតថ្នាក់ប្រហែល ៩ ៧០០ យូនីតត្រូវបានដាក់លក់ក្នុងទីផ្សារនៅឆមាសទី ១ ឆ្នាំនេះធៀបនឹង ១៦ ៤០០ យូនីតក្នុងរយៈពេលដូចគ្នាកាលពីឆ្នាំមុន។
លោក Son ថ្លែងថា៖ «ចំនួនអាផាតមិនសម្រាប់លក់មានស្ថិរភាព ខណៈដែលបញ្ហាបានកើតមាននៅលើដីស្ថិតក្នុងតំបន់ជាយក្រុងមួយចំនួនរបស់ទីក្រុងនេះ ដោយសារការអភិវឌ្ឍហេដ្ឋារចនាសម្ព័ន្ធ ដូចជាផ្លូវមេត្រូ Long Thanh ជាលើកដំបូង ផ្លូវលឿន Dau Giay ព្រលានយន្តហោះ Long Thanh ស្ពាន Cat Lai និងផ្លូវថ្នល់ជាច្រើនផ្សេងទៀតដែលត្រូវបានសាងសង់នៅជុំវិញទីក្រុងនេះ»។
លោក Le Hoang Chau ប្រធានសមាគមអចលនទ្រព្យទីក្រុងហូជីមិញបានថ្លែងថា បញ្ហាដែលកើតមាននៅលើទីតាំងដីនានាដោយសារការកើនឡើងតម្លៃខ្លាំងបានកើតមានឡើងចាប់ពីចុងឆ្នាំ ២០១៦ រហូតដល់ខែឧសភាឆ្នាំនេះ ជាពិសេសនៅក្នុងតំបន់សេដ្ឋកិច្ចពិសេសចំនួន ៣ ដែលត្រូវបានស្នើបង្កើតឡើង។ ប៉ុន្តែថ្មីៗនេះបញ្ហាជុំវិញការលក់ដីទាំងនេះត្រូវបានដោះស្រាយហើយ។
យោងតាមលោក Chau ស្ថានភាពវិបត្តិអចលនទ្រព្យកើតឡើងស្ថិតក្រោមលក្ខខណ្ឌមួយចំនួនដូចជាការអភិវឌ្ឍភ្លាមៗនៃសេដ្ឋកិច្ច ការបន្ធូរបន្ថយគោលនយោបាយពីរដ្ឋាភិបាលលើការគ្រប់គ្រងឥណទាន គម្លាតដ៏ធំមួយរវាងការផ្គត់ផ្គង់ និងតម្រូវការ និងការកើនឡើងនៃការលក់កេងចំណេញ។
លោក Chau បានថ្លែងថា៖ «កត្ដាទាំងនេះរហូតមកដល់ពេលនេះមិនបានកើតឡើងនៅវៀតណាមនៅឡើយ ដូច្នេះវាមិនទំនងនឹងជាស្ថានភាពវិបត្តិមួយនៅពេលអនាគតដ៏ខ្លីនោះឡើយ យ៉ាងហោចណាស់រហូតដល់ឆ្នាំ ២០១៩»។
VIR បានរាយការណ៍ទៀតថាក្នុងអំឡុង ៤ ទសវត្សរ៍ចុងក្រោយនេះសេដ្ឋកិច្ចរបស់ប្រទេសវៀតណាមបានជួបប្រទះវិបត្តិប្រហែលជារៀងរាល់ ១០ ឆ្នាំម្ដង៕ LA
