.jpg)
ទិដ្ឋភាពនៅសណ្ឋាគារ Marriott ដែលប្រតិបត្តិការជាសណ្ឋាគារបែបជីវិតកម្សាន្ត។ រូបថត AFP
ក្រុងបាងកកៈ សណ្ឋាគារបែបជីវិតកម្សាន្ត (Lifestyle hotels) កំពុងកើនឡើងនៅអាស៊ី ដែលជំរុញដោយភ្ញៀវជាយុវវ័យ រួមជាមួយលក្ខណៈពិសេសនានា ដូចជាការរចនាច្នៃប្រឌិត ការតភ្ជាប់ល្អ និងទីតាំងងាយស្រួល។ នេះបើយោងតាមក្រុមផ្នែកសណ្ឋាគារ និងបដិសណ្ឋារកិច្ចនៃក្រុមហ៊ុន JLL។
កាសែតបាងកកប៉ុស្តិ៍បានរាយការណ៍ដោយដកស្រង់សំដីរបស់លោក Andrew Langston អនុប្រធានប្រតិបត្តិក្រុមហ៊ុន JLL ប្រចាំតំបន់អាស៊ីប៉ាស៊ីហ្វិក ខណៈលោកថ្លែងថា៖ «ការកើនឡើងសណ្ឋាគារបែបជីវិតកម្សាន្តនៅអាស៊ីត្រូវបានជំរុញដោយកត្តាប្រជាសាស្រ្ត ជាពិសេសនៅប្រទេសកំពុងអភិវឌ្ឍន៍ខ្លាំងដូចជា ឥណ្ឌា និងចិន»។
លោកថ្លែងថា៖ «អ្នកធ្វើដំណើរភាគច្រើនដែលជ្រើសរើសយកសណ្ឋាគារបែបនេះគឺជាអ្នកដែលកើតនៅឆ្នាំ ១៩៨០ និង ១៩៩០។ មានសក្តានុពល ដ៏អស្ចារ្យក្នុងការរកប្រាក់ពីទីផ្សារដែលរីកចម្រើននេះតាមរយៈការបំពេញទៅតាមតម្រូវការរបស់ពួកគេ»។
យីហោ W របស់សណ្ឋាគារ Starwood ត្រូវបានគេស្គាល់យ៉ាងទូលំទូលាយថា ជាសណ្ឋាគារបែបជីវិតកម្សាន្តទីមួយនៅពេលដែលសណ្ឋាគារនេះត្រូវបានចាប់ផ្តើមដាក់ដំណើរការដំបូងនៅទីក្រុងញូវយ៉កក្នុងឆ្នាំ ១៩៩៨។ យីហោសណ្ឋាគារ និងគោលគំនិតស្រដៀងគ្នាបានរីករាលដាលនៅអាមេរិកខាងជើង និងអឺរ៉ុប ហើយឥឡូវនេះមកដល់អាស៊ី។
សណ្ឋាគារបែបជីវិតកម្សាន្តនៅទូទាំងសកលលោកដែលជោគជ័យ បានមកវិនិយោគនៅអាស៊ីក្នុងរយៈកាល ២ ឆ្នាំចុងក្រោយនេះ។
សណ្ឋាគារ Yotel ដែលមានមូលដ្ឋាននៅប្រទេសអង់គ្លេសបានបើកនៅប្រទេស សិង្ហបុរី ក្នុងឆ្នាំ ២០១៧ ហើយសណ្ឋាគារ Moxy របស់ក្រុមហ៊ុន Marriott បានចាប់ផ្តើមនៅទីក្រុង Bandung ទីក្រុង Osaka និងទីក្រុង តូក្យូ។ សណ្ឋាគារជាច្រើនទៀតនឹងធ្វើដូចគ្នាដែរ។ សណ្ឋាគារ Ace មកពីសហរដ្ឋអាមេរិក គ្រោងបើកសណ្ឋាគារ Ace Hotel Kyoto នៅប្រទេស ជប៉ុន នាឆ្នាំក្រោយ។
នៅពេលជាមួយគ្នានេះដែរ សហគ្រិនក្នុងតំបន់បានចាប់ផ្តើមគោលគំនិតកន្លែងស្នាក់នៅបែបជីវិតកម្សាន្តដោយខ្លួនឯង។ ក្រុមហ៊ុនបដិសណ្ឋាកិច្ចអូស្រ្តាលីឈ្មោះ QT បានបើកសាខារបស់ខ្លួននៅទីក្រុង Perth កាលពីខែសីហា។
កាលពីដើមឆ្នាំនេះ ក្រុមហ៊ុន Dusit International ដែលជាក្រុមហ៊ុនមួយក្នុងចំណោមក្រុមហ៊ុនអភិវឌ្ឍន៍អចលនទ្រព្យ និងសណ្ឋាគារល្អបំផុតរបស់ប្រទេស ថៃ បានប្រកាសផែនការរបស់ខ្លួនក្នុងការបង្កើតសាខា ASAI Hotels នៅអាស៊ីអាគ្នេយ៍ ក្នុងឆ្នាំ ២០១៩ ដោយសណ្ឋាគារទី ១ គ្រោងបើកនៅទីក្រុងបាងកកនៅក្នុងត្រីមាសទី ១។
ក៏មានក្រុមហ៊ុនដែលមិនស្ថិតក្នុងផ្នែកបដិសណ្ឋារកិច្ចផងដែរដែលចូលមកក្នុងទីផ្សារសណ្ឋាគារបែបជីវិតកម្សាន្តនៅក្នុងតំបន់នេះ។
ក្រុមហ៊ុនបែបជីវិតកម្សាន្តដ៏ធំរបស់ប្រទេស ជប៉ុន ឈ្មោះ Muji ដែលល្បីល្បាញដោយសារសិល្បៈសោភណភាព បានបើកដំណើរការសណ្ឋាគារ Muji ចំនួន ២ ដំបូងរបស់ខ្លួនក្នុងទីក្រុង Shenzhen និងទីក្រុង ប៉េកាំង ប្រទេស ចិន នៅក្នុងឆ្នាំនេះ និងមានក្រុមហ៊ុនមួយទៀតកំពុងរង់ចាំការចាប់ផ្តើមនៅទីក្រុងតូក្យូ នាឆ្នាំក្រោយ។ ក្រុមហ៊ុនលក់រាយដូចជា Koe និង Zouk ក៏កំពុងចូលមកក្នុងវិស័យសណ្ឋាគារផងដែរ។
សូម្បីតែក្រុមហ៊ុនផលិតរបស់ក្មេងលេង Hasbro ក៏កំពុងចូលទៅក្នុងទីផ្សារនេះផងដែរ ដោយចាប់ដៃគូជា មួយក្រុមហ៊ុនអភិវឌ្ឍន៍អចលនទ្រព្យរបស់ប្រទេស ម៉ាឡេស៊ី M101 Holdings ដើម្បីចាប់ផ្តើមសណ្ឋាគារ Monopoly នៅទីក្រុងគូឡាឡាំពួ នាឆ្នាំក្រោយ។
លោក Langston បានថ្លែងថា៖ «ខណៈសណ្ឋាគារបែបជីវិតកម្សាន្តសម្របទៅតាមតម្រូវការផ្លាស់ប្តូរនៃអ្នកធ្វើដំណើរជំនាន់ថ្មី វាងាយស្រួលជាងមុនដែលចាប់ផ្តើមគោលគំនិតជីវិតកម្សាន្តដែលមានលក្ខណៈច្នៃប្រឌិតនៅអាស៊ី ដែលជាកន្លែងសណ្ឋាគារភាគច្រើនបំផុតមាននិន្នាការសាងសង់ថ្មី និងមិនមែនជួសជុលកែប្រែ»។
លោកបន្ថែមថា៖ «ដោយសារហេតុផលទាំងនេះ វានឹងជាការភ្ញាក់ផ្អើលដែលឃើញសណ្ឋាគារបែបជីវិតកម្សាន្តរីកចម្រើនក្នុងអត្រាលឿននៅតាមបណ្តាទីក្រុងអភិវឌ្ឍន៍ខ្លាំងរបស់អាស៊ី និងទិសដៅសម្រាកលម្ហែទេសចរណ៍នានា»៕ PS
