.jpg)
ក្រុងបាងកកៈ ក្រុមហ៊ុនជប៉ុន Nikko Hotels International (NHI) នឹងបង្ហាញជាថ្មីនូវយីហោ Nikko ក្នុងប្រទេស ថៃ ដោយមានផែនការបើកដំណើរការសណ្ឋាគារមួយ នៅទីក្រុងបាងកកនៅដើមឆ្នាំក្រោយ។ នេះបើយោងតាមកាសែតបាងកកប៉ុស្តិ៍។
កាសែតបាងកកប៉ុស្តិ៍ បានរាយការណ៍នៅខែវិច្ឆិកានេះថា សណ្ឋាគារ Hotel Nikko Bangkok ដែលមាន ៣០១ បន្ទប់ នៅស្ថានីយរថភ្លើងអាកាស Thong Lor នឹងកំណត់ទិសដៅភ្ញៀវអាស៊ីប៉ាស៊ីហ្វិកមកពីប្រទេស ចិន ទីក្រុង ហុងកុង ទីក្រុង ម៉ាកាវ កោះតៃវ៉ាន់ ប្រទេស សិង្ហបុរី អូស្ដ្រាលី ជប៉ុន និងថៃ។ អឺរ៉ុបគឺជា ការផ្ដោតការយកចិត្តទុកដាក់ទី ២។
លោក Jo Sato អ្នកគ្រប់គ្រងទូទៅរបស់ក្រុមហ៊ុនបម្រើសេវាក្នុងវិស័យបដិសណ្ឋារកិច្ចមួយនេះបានឲ្យដឹងថា សណ្ឋាគារនេះ នឹងធ្វើទីផ្សារគ្រប់ផ្នែកទាំងអស់ ដែលរួមទាំងសាជីវកម្មការកម្សាន្ត កិច្ចប្រជុំ ការលើកទឹកចិត្ត សាលសន្និបាត សាលតាំងពិព័រណ៍ (Mice) ជាដើម។
លោក Sato ថ្លែងថា៖ «យើងចង់ក្លាយជាជម្រើសពេញចិត្តជាងគេ នៅតំបន់ Thong Lor សម្រាប់ប្រជាជនថៃសម្រាប់ការរៀបអាពាហ៍ពិពាហ៍ រៀបចំ និងបម្រើអាហារ ហាងអាហារ និងភេសជ្ជៈរបស់យើង»។
ក្រុមហ៊ុន Grand Tower Inn Group ដែលត្រូវបានបង្កើតឡើងកាលពីឆ្នាំ ១៩៨៥ ក្នុងនាមជាប្រតិបត្តិករផ្តល់សេវាអាផាតមិន ជាម្ចាស់សណ្ឋាគារ Hotel Nikko Bangkok។ ក្រុមហ៊ុននេះជាធម្មតាបម្រើអតិថិជនជប៉ុនភាគច្រើន ដែលមានប្រហែល ៩០ ភាគរយនៃភ្ញៀវដែលធ្វើដំណើរសម្រាប់ពាណិជ្ជកម្ម និង ១០ ភាគរយជាភ្ញៀវធ្វើដំណើរកម្សាន្ដ។
ក្រុមហ៊ុន NHI ធ្លាប់ប្រតិបត្តិការសណ្ឋាគារមួយនៅទីក្រុងបាងកកនៅតំបន់ Ratchadaphisek ប៉ុន្តែក្រោយមកបានដកខ្លួនចេញដោយសារតែមូលហេតុពាណិជ្ជកម្ម។ ក្រុមហ៊ុននេះមានទំនុកចិត្តចំពោះការបើកដំណើរការសណ្ឋាគារថ្មីនេះ ដោយសារតែមូលដ្ឋានដ៏រឹងមាំរបស់អតិថិជនជប៉ុន។
លោក Sato បានឲ្យដឹងថា យីហោ Nikko ត្រូវបានគេទទួលស្គាល់ និងរីករាលដាលនៅក្នុងប្រទេស ជប៉ុន និងទីកន្លែងផ្សេងទៀតនៅអាស៊ី ដោយសារវិធីសាស្ដ្រ «បដិសណ្ឋារកិច្ច» របស់ខ្លួនក្នុងការទទួលភ្ញៀវ៕ LA
