.jpg)
រូបគម្រោងសណ្ឋាគារ Novotel នៅក្នុងខេត្តព្រះសីហនុដែលគ្រោងបើកដំណើរការនៅឆ្នាំ ២០១៩។ រូបថត សហការី
ការមកដល់របស់សណ្ឋាគារលំដាប់ពិភពលោកនឹងជួយបញ្ចប់កង្វះខាតកន្លែងស្នាក់នៅក្នុងក្រុងព្រះសីហនុ។ បច្ចុប្បន្ននេះមានសណ្ឋាគារលំដាប់ពិភពលោកកាន់តែច្រើនកំពុងចាប់អារម្មណ៍វិនិយោគនៅក្រុងព្រះសីហនុ ដែលជាទិសដៅទេសចរណ៍តំបន់ឆ្នេរដ៏ល្បីល្បាញជាងគេរបស់ប្រទេសកម្ពុជា។
ការរីកចម្រើនហេដ្ឋារចនាសម្ព័ន្ធ ការកើនឡើងចំនួនកាស៊ីណូ និងការពង្រីកជើងហោះហើរផ្ទាល់ទៅកាន់ក្រុងព្រះសីហនុបានធ្វើឲ្យភ្ញៀវទេសចរកាន់តែច្រើនធ្វើដំណើរមកកាន់ទីក្រុងកំពង់ផែភាគខាងត្បូងមួយនេះ។ បច្ចុប្បន្នសណ្ឋាគារអន្តរជាតិមួយចំនួនដូចជា Marriott, InterContinental និង AccorHotels កំពុងតែត្រៀមបើកសម្ពោធនៅទីក្រុងព្រះសីហនុ។
កាលពីដើមខែមីនានេះសណ្ឋាគារអន្តរជាតិអាមេរិក Marriott បានចុះកិច្ចព្រមព្រៀងជាមួយក្រុមហ៊ុនអចលនទ្រព្យកម្ពុជា Grand Lion Group ដើម្បីរៀបចំសណ្ឋាគារផ្កាយ ៥ Le Meridien ដែលនឹងសាងសង់លើផ្ទៃដី ១,៧ ហិកតាស្ថិតនៅសង្កាត់លេខ ៣ ជិតឆ្នេរហាវ៉ៃ។ សណ្ឋាគារដែលមានចំនួន ៣៨៨ បន្ទប់នេះនឹងចាប់ផ្ដើមសាងសង់នៅខែមករា ឆ្នាំ ២០១៩ ហើយគ្រោងនឹងចំណាយពេលសាងសង់ចំនួន ៣ ឆ្នាំ។
Grand Lion Group នឹងបញ្ចេញប្រាក់ ២០០ លានដុល្លារដើម្បីសាងសង់គម្រោងលំនៅឋានប្រណីតមួយ (Gold Coast) ដែលមានកម្ពស់ ៥៨ ជាន់ស្មើនឹង ៨៨៨ យូនីត ហើយ Le Meridien គឺជាផ្នែកមួយនៃគម្រោងមួយនេះ។
លោក Lundy Nath អគ្គនាយកក្រុមហ៊ុន Grand Lion Group មានប្រសាសន៍ថា ៖ «Gold Coast នឹងទាក់ទាញភ្ញៀវទេសចរឱ្យបន្តការស្នាក់នៅយូរថ្ងៃថែមទៀតក្នុងប្រទេសកម្ពុជា។ Gold Coast ជាគម្រោងដ៏ធំដែលនឹងបើកសករាជថ្មីនៅក្នុងបទពិសោធដំណើរកម្សាន្តតាមឆ្នេរសមុទ្រនៅក្រុងព្រះសីហនុ»។
InterContinental Hotels & Resorts ដែលជាក្រុមហ៊ុនគ្រប់គ្រងសណ្ឋាគារចំនួនជាង ៥០០០ កន្លែងនៅលើពិភពលោកក៏ត្រៀមនឹងបញ្ចប់ការសាងសង់សណ្ឋាគាររបស់ខ្លួនដែលមានទុនវិនិយោគចំនួន ៧៧ លានដុល្លារនៅក្នុងខេត្តព្រះសីហនុផងដែរ។ ចំណែកគម្រោងសាងសង់សណ្ឋាគារមួយកន្លែងទៀតរបស់ក្រុមហ៊ុន ថៃ ប៊ុនរ៉ុង ដែលមានចំនួន ៤៧៦ បន្ទប់លើផ្ទៃដី ៣ ហិកតាក្នុងសង្កាត់លេខ ៣ ក៏កំពុងដំណើរការទៅមុខយ៉ាងរលូនផងដែរ។
លោកសាស្ត្រាចារ្យ ទួស សាភឿន មន្ត្រីជាន់ខ្ពស់ក្រុមហ៊ុន ថៃ ប៊ុនរ៉ុង បាននិយាយថា សណ្ឋាគារនេះបានបញ្ចប់គ្រោងអគាររបស់ខ្លួនហើយ និងកំពុងស្ថិតក្នុងដំណាក់កាលឌីហ្សាញផ្នែកខាងក្នុងនៃអគារដែលមានកម្ពស់ ១៧ ជាន់។
ក្រុមហ៊ុនបារាំង AccorHotels Group ដែលគ្រប់គ្រងសណ្ឋាគារជាង ៤៣០០ កន្លែងនៅទូទាំងពិភពលោកក៏គ្រោងនឹងបើកដំណើរការសណ្ឋាគារផ្កាយ ៤ ដែលមានឈ្មោះថា Novotel នៅឆ្នេរឯករាជ្យនាត្រីមាសទី ៣ ក្នុងឆ្នាំ ២០១៩ នេះផងដែរ។ គម្រោងនេះគឺជាផ្នែកមួយនៃការពង្រីកអាជីវកម្មក្នុងប្រទេសកម្ពុជាដែលរួមមានសណ្ឋាគារ Novotel នៅក្រុងភ្នំពេញ និងសណ្ឋាគារ Ibis នៅសៀមរាប។
លោកស្រី Joyce Ong នាយកផ្នែកទំនាក់ទំនងប្រចាំតំបន់របស់ AccorHotel និយាយថា ៖ «ក្រុងព្រះសីហនុស្ថិតក្នុងទីតាំងល្អបំផុតមួយនៅក្នុងតំបន់ ហើយក្រុមហ៊ុនជឿជាក់ថាវិស័យសណ្ឋាគារ និងបដិសណ្ឋារកិច្ចនឹងបន្តរីកចម្រើននៅកម្ពុជាជាមួយនឹងកំណើនភ្ញៀវទេសចរ និង កំណើនជើងហោះហើរមកកាន់កម្ពុជា»។
លោកស្រីបានបន្តថា ការសម្រេចចិត្តវិនិយោគលើសណ្ឋាគារផ្កាយ ៤ គឺឆ្លុះបញ្ចាំងពីតម្រូវការទីផ្សារកន្លែងស្នាក់នៅក្នុងក្រុងព្រះសីហនុ និងពីបំណងប្រាថ្នាចង់ពង្រីកអាជីវកម្មរបស់ក្រុមហ៊ុនបន្ថែមទៀត។
លោកស្រីបញ្ជាក់ថា៖ «AccorHotels កំពុងគ្រប់គ្រងលើទីផ្សារសណ្ឋាគារ Raffles និង Sofitel នៅរាជធានីភ្នំពេញ និងខេត្តសៀមរាប។ សណ្ឋាគារថ្មីរបស់យើងនឹងជួយបំពេញតម្រូវការស្នាក់នៅបន្ថែមទៀតនៅក្រុងព្រះសីហនុ»។
លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ មានប្រសាសន៍ថា ការវិនិយោគលើសណ្ឋាគារខ្នាតអន្តរជាតិបន្ថែមនៅក្រុងព្រះសីហនុបានឆ្លុះបញ្ចាំងពីការកើនឡើងនូវទំនុកចិត្តពីសំណាក់អ្នកវិនិយោគលើស្ថិរភាពនយោបាយ និងកំណើនសេដ្ឋកិច្ចរបស់ប្រទេសកម្ពុជា។ សណ្ឋាគារទាំងនេះនឹងទាក់ទាញភ្ញៀវទេសចរអន្តរជាតិឲ្យធ្វើដំណើរមកកាន់ប្រទេសកម្ពុជាកាន់តែច្រើនបន្ថែមទៀត។ ប្រការនេះនឹងជួយបង្កើតការងារសម្រាប់ប្រជាជនក្នុងស្រុក និងជួយលើកកម្ពស់កម្រិតជីវភាពរបស់ពួកគេផងដែរ។
លោកបានបញ្ជាក់ថាកំណើនភ្ញៀវទេសចរបានធ្វើឲ្យខេត្តព្រះសីហនុប្រឈមមុខនឹងកង្វះខាតកន្លែងសម្រាប់ស្នាក់នៅផងដែរនាពេលនេះ។ កាលពីឆ្នាំ ២០១៧ កន្លងមកខេត្តព្រះសីហនុទទួលភ្ញៀវទេសចរបានប្រមាណជាង ២ លាននាក់ក្នុងនោះភ្ញៀវទេសចរបរទេសមានចំនួនជាង ៤៧០០០០ នាក់ដែលជាង ១ ភាគ ៤ ជាជនជាតិចិន។ សណ្ឋាគារចំនួន ៨០ និងផ្ទះសំណាក់ចំនួន ៣០០ ជាញឹកញាប់ត្រូវបានគេកក់អស់ពេលមានបុណ្យទានម្តងៗ។ បច្ចុប្បន្នមានសណ្ឋាគារចំនួន ១០ ដែលកំពុងតែសាងសង់។
ប្រធានផ្នែកលក់ និងជួលនៃក្រុមហ៊ុន Sihanoukville Property លោក នន ធីម បានប្រាប់ថា សណ្ឋាគារអន្តរជាតិនឹងជួយបំពេញតម្រូវការសណ្ឋាគារដែលកំពុងតែខ្វះខាតនៅក្រុងព្រះសីហនុ។
លោកនិយាយថា តម្រូវការបន្ទប់សណ្ឋាគារនៅក្នុងក្រុងព្រះសីហនុបានកើនឡើងលើសពីការផ្គត់ផ្គង់ ពិសេសនៅពេលមានបុណ្យទានដូចជាចូលឆ្នាំខ្មែរ និងបុណ្យអុំទូក ជាដើម។ ជាទូទៅ ជនជាតិចិនបានជួលសណ្ឋាគារដើម្បីធ្វើជាកន្លែងសម្រាប់ឲ្យបុគ្គលិកស្នាក់នៅដែលជាហេតុធ្វើឱ្យខ្វះបន្ទប់សណ្ឋាគារសម្រាប់ភ្ញៀវទេសចរ។ ដូច្នេះការមកដល់នៃសណ្ឋាគារលំដាប់ផ្កាយ ៥ នៅក្រុងព្រះសីហនុនឹងជួយបំពេញការផ្គត់ផ្គង់បន្ថែមទៀតក្នុងវិស័យបដិសណ្ឋារកិច្ច។
លោក ធីម បានបន្តថាតម្លៃអចលនទ្រព្យនៅក្រុងព្រះសីហនុបានកើនឡើងយ៉ាងខ្ពស់ដោយសារតែលំហូរការវិនិយោគមកពីប្រទេសចិន។ ការវិនិយោគលើសណ្ឋាគារអន្តរជាតិថ្មីៗនឹងកាន់តែធ្វើឱ្យតម្លៃអចលនទ្រព្យនៅក្រុងព្រះសីហនុកើនឡើងបន្ថែមទៀត គឺប្រហាក់ប្រហែលទៅនឹងតម្លៃអចលនទ្រព្យកោះភូកេត ប្រទេសថៃ។
បើពិនិត្យមើលពីការវិនិយោគដ៏សម្បើមពីសំណាក់ប្រទេសចិននៅក្នុងវិស័យអចលនទ្រព្យ ក្រុងព្រះសីហនុ ទំនងជានឹងដើរតាមគន្លងអភិវឌ្ឍន៍នៅកោះភូកេត ប្រទេសថៃជាទីដែលមានរមណីយដ្ឋាន និង សណ្ឋាគារផ្កាយ ៥ ជាច្រើននៅទីនោះ។
តែទោះជាយ៉ាងណាលោក ធីម នៅតែយល់ថា ក្រុងព្រះសីហនុគឺមិនដូចគ្នាជាមួយភូកេតនោះទេ។ កំណើនវិនិយោគិនចិន និងការរីកដុះដាលកាស៊ីណូ អាចធ្វើឱ្យក្រុងព្រះសីហនុកាន់តែដូចគ្នាទៅនឹងទីក្រុងស៊ាងហៃ និងម៉ាកាវ ដែលមានអគារពាណិជ្ជកម្ម និងសណ្ឋាគារធំៗព្រមទាំងកាស៊ីណូជាច្រើន៕
រាយការណ៍បន្ថែមដោយៈ Cam McGrath
