សិង្ហបុរីៈ ការកម្រិតដ៏ជាក់លាក់មួយចំនួនសម្រាប់ការពន្យារពេលការទូទាត់លើកម្ចីទិញផ្ទះ និងកម្ចីប្រើប្រាស់ផ្ទាល់ខ្លួននឹងត្រូវបានលើកលែងដើម្បីជួយអ្នកខ្ចីប្រាក់ក្នុងអំឡុងពេលការធ្លាក់ចុះសេដ្ឋកិច្ច។
អាជ្ញាធររូបិយវត្ថុរបស់ប្រទេសសិង្ហបុរី (MAS) បានបញ្ជាក់កាលនៅដើមខែមេសាថា អនុបាតសេវាកម្មបំណុលសរុប (TDSR) នឹងមិនអនុវត្តចំពោះការពន្យារពេលការសងកម្ចីទិញផ្ទះសម្រាប់អចលនទ្រព្យពាណិជ្ជកម្ម ឬឧស្សាហកម្ម ការផ្ដល់ហិរញ្ញប្បទានជាថ្មីនៃកម្ចីទិញផ្ទះដែលគ្រប់គ្រងដោយម្ចាស់ និងការជួយសម្រួលឥណទានដែលគ្មានសុវត្ថិភាពដូចជាកាតឥណទាន និងកម្ចីប្រើប្រាស់ផ្ទាល់ខ្លួនទេ។
ការសម្រេចចិត្តខ្ចីប្រាក់ធៀបនឹងតម្លៃផ្ទះពិតប្រាកដ (MWL) ក៏នឹងមិនត្រូវស្ថិតក្រោមអនុបាតសេវាកម្មបំណុលសរុប (TDSR) ទេ ប្រសិនបើអនុបាតកម្ចីធៀបនឹងតម្លៃ (LTV) មិនលើសពី ៥០ ភាគរយ។
TDSR កម្រិតចំនួនអ្នកទិញអាចខ្ចីសម្រាប់កម្ចីអចលនទ្រព្យ។
ជាធម្មតាការសងប្រចាំខែរបស់អ្នកខ្ចីសម្រាប់បំណុលទាំងសងមិនត្រូវលើសពី ៦០ ភាគរយនៃប្រាក់ចំណូលប្រចាំខែរបស់ពួកគេទេ។ នេះរួមមានកម្ចីទិញផ្ទះ កាតឥណទាន កម្ចីទិញរថយន្ត និងកម្ចីប្រើប្រាស់ផ្ទាល់ខ្លួន។
អនុបាតកម្ចីធៀបនឹងតម្លៃ (LTV) សំដៅដល់ចំនួនកម្ចីជាភាគរយនៃតម្លៃរបស់អចលនទ្រព្យនោះ។
MAS បានឲ្យដឹងថា អ្នកខ្ចីនឹងត្រូវលើកលែងពីការកម្រិត TDSR នៅពេលពួកគេដាក់ពាក្យសុំពន្យារពេលការទូទាត់ប្រាក់ដើមរបស់ពួកគេ ឬការទូទាត់ទាំងប្រាក់ដើម និងអត្រាការប្រាក់សម្រាប់កម្ចីទិញផ្ទះរបស់គេ។
ជំនួយនេះអនុវត្តចំពោះកម្ចីទិញផ្ទះ និងកម្ចីដកធៀបតម្លៃផ្ទះ (MWL) ដែលរួមមានអ្នកដែលស្ថិតក្រោមផែនការកាត់បន្ថយកម្ចី និងពន្យារពេលចំពោះទាំងការកាន់កាប់ដោយម្ចាស់ (ក្រុមប្រឹក្សាលំនៅឋាន និងឯកជន) និងអចលនទ្រព្យវិនិយោគ។
វិធានការពន្យារការសងប្រាក់កម្ចីត្រូវបានប្រកាសដោយ MAS កាលពីសប្ដាហ៍មុន ជាផ្នែកមួយនៃកញ្ចប់ឧស្សាហកម្មដ៏ធំក្នុងគោលបំណងការពារបទល្មើស និងការក្ស័យធនចំពេលការធ្លាក់ចុះសេដ្ឋកិច្ចដែលបណ្ដាលមកពីវីរុសកូរ៉ូណា។
MAS បានឲ្យដឹងថា ការបញ្ជាក់នេះជាការឆ្លើយតបនឹងសំណួរពីសាធារណជន និងប្រព័ន្ធព័ត៌មានអំពីគោលការណ៍ណែនាំរបស់ខ្លួនសម្រាប់ការពន្យារពេលការទូទាត់កម្ចីដែលមានសុវត្ថិភាព និងការទូទាត់កម្ចីទិញផ្ទះដែលនឹងជួយបុគ្គល/ក្រុមហ៊ុនស្វែងរកជម្រើសក្នុងការបំពេញតាមតម្រូវការលំហូរសាច់ប្រាក់របស់ពួកគេ។
ក្រុមអ្នកពិគ្រោះយោបល់អចលនទ្រព្យជឿជាក់ថា សេចក្ដីប្រកាសព័ត៌មានថ្មីៗរបស់ MAS បានជួយលុបចោលភាពសង្ស័យអំពីកញ្ចប់ជំនួយដែលប្រកាសកាលពីសប្ដាហ៍មុន។
លោក Desmond Sim ប្រធានផ្នែកស្រាវជ្រាវអាស៊ីអាគ្នេយ៍នៅក្រុមហ៊ុន CBRE បានថ្លែងថា៖ «MAS និងធនាគារជាច្រើនកំពុងផ្ដល់ជំនួយដល់អ្នកដែលអាចយល់ថា ពិបាកក្នុងការសងប្រាក់បំណុលរបស់ពួកគេនៅក្នុងពេលដ៏ពិបាកទាំងនេះ»។
អ្នកខ្ចីប្រាក់ត្រូវដាក់ពាក្យសុំការបន្ធូរបន្ថយលើប្រាក់កម្ចីនេះ ហើយវាមិនផ្លាស់ប្តូរក្របខ័ណ្ឌជារួមដែលធានាចំពោះការផ្ដល់ប្រាក់កម្ចីដោយប្រុងប្រយ័ត្ន និងការខ្ចីប្រាក់នៅក្នុងផ្សារអចលនទ្រព្យឡើយ។ នេះបើយោងតាមលោក Sim។
លោកថ្លែងថា៖ «រដ្ឋាភិបាល និង MAS កំពុងផ្ដល់ការគាំទ្រនៅក្នុងទ្រង់ទ្រាយកាន់តែទូលំទូលាយ»។
ក្នុងសេចក្ដីប្រកាសព័ត៌មានរបស់ខ្លួន MAS បានឲ្យដឹងថា ការពន្យារពេលទូទាត់ដល់កម្ចីបុគ្គលជាមួយពាណិជ្ជកម្ម ឬកម្ចីអចលនទ្រព្យឧស្សាហកម្មមិនស្ថិតក្រោម TDSR ទេ៕LA