​សិង្ហបុរី ជាប់​ចំណាត់​ថ្នាក់​ទី ១០ ​នៃ​ទីតាំង​ការិយា​ល័យ​តម្លៃ​ខ្ពស់​​

អគារការិយាល័យខ្ពស់ៗនៅតំបន់មជ្ឈមណ្ឌលហិរញ្ញវត្ថុរបស់ប្រទេសសិង្ហបុរី។ រូបថត AFP

ក្រុងសិង្ហបុរីៈ ក្រុមហ៊ុនពិគ្រោះយោបល់អចលនទ្រព្យ JLL របស់អាមេរិក បានឲ្យដឹងនៅក្នុងរបាយការណ៍ចុងក្រោយរបស់ខ្លួនថា ទីតាំងការិយាល័យនៅប្រទេស សិង្ហបុរី មានតម្លៃខ្ពស់បំផុតលំដាប់ទី ១០ នៅទ្វីបអាស៊ី ដោយទីក្រុងហុងកុងស្ថិតក្នុងលំដាប់កំពូល។

បន្ទាប់ពីចេញផ្សាយរបាយការណ៍ស្តីពីការតាមដានតម្លៃជួលការិយាល័យតម្លៃខ្ពស់ (Premium Office Rent Tracker) ក្រុមហ៊ុន JLL បានឲ្យដឹងថា ប្រទេស សិង្ហបុរី គឺជា «ទីតាំងការិយាល័យដែលចំណាយប្រកបដោយប្រសិទ្ធភាព» ខណៈដែលទីតាំងការិយាល័យតម្លៃខ្ពស់ស្ថិតនៅក្នុងទីក្រុងហុងកុង នៅតែមានតម្លៃខ្ពស់បំផុតលើពិភពលោក រយៈពេល ៤ ឆ្នាំជាប់គ្នា។

ក្នុងប្រទេស សិង្ហបុរី ការជួលទីតាំងការិយាល័យបែបនោះជាមធ្យមមានតម្លៃ ១០៨ ដុល្លារអាមេរិក (១៤៨ ដុល្លារសិង្ហបុរី) ក្នុងមួយហ្វ៊ីតការ៉េ ពោលគឺស្មើនឹងប្រហែល ១ ភាគ ៣ នៃតម្លៃជួលក្នុងសង្កាត់កណ្តាលនៅទីក្រុងហុងកុងដែលមានតម្លៃ ៣៣៨ ដុល្លារអាមេរិកក្នុង ១ ហ្វ៊ីតការ៉េ។

ថ្លៃជួលក្នុងសង្កាត់ពាណិជ្ជកម្មកណ្តាលរបស់ទីក្រុងហុងកុងនេះ ថ្លៃខ្ពស់ជាងប្រហែល ៦០ ភាគរយពីថ្លៃជួលនៅសង្កាត់កណ្ដាលទីក្រុងញូវយ៉ក ដែលបានជាប់ចំណាត់ថ្នាក់ទី ២ លើពិភពលោកក្នុងចំណោមទីផ្សារការិយាល័យសំខាន់ៗទាំង ៧២ នៅក្នុងទីក្រុង ៦១។

នេះគឺជាការចេញផ្សាយលើកទី ៤ ហើយសម្រាប់របាយការណ៍របស់ក្រុមហ៊ុនផ្តល់សេវាប្រឹក្សាអចលនទ្រព្យ JLL នេះ។

ក្រុមហ៊ុន JLL បានឲ្យដឹងថា តម្លៃជួលខ្ពស់នៅទីក្រុងហុងកុង បានរួមចំណែកដោយសារក្រុមហ៊ុនរបស់ប្រទេស ចិន ដែលទិញភ្លាមៗនូវទីតាំងការិយាល័យកម្រិត A នៅទីនោះ។

ប្រទេស សិង្ហបុរី ត្រូវបានជាប់ចំណាត់ថ្នាក់ទី ១០ នៅលើបញ្ជីទីផ្សារការិយាល័យតម្លៃខ្ពស់បំផុតថ្លៃបំផុតនៅអាស៊ី កើនឡើងពីចំណាត់ថ្នាក់ទី ១៤ កាលពីឆ្នាំមុន។

លោក Chris Archibold ប្រធានទទួលបន្ទុកការជួលរបស់ក្រុមហ៊ុន JLL Singapore បានថ្លែងថា៖«ប្រទេស សិង្ហបុរី មានលក្ខណៈប្រកួតគ្នាយ៉ាងខ្លាំង ដោយសារតែថា ប្រទេសនេះជាមជ្ឈមណ្ឌលពិភពលោកមួយសម្រាប់ឧស្សាហកម្មមានតម្លៃខ្ពស់ជាច្រើន និងផ្ដល់ជីវភាពរស់នៅប្រកបដោយគុណភាពខ្ពស់ ប៉ុន្តែមានតម្លៃ ទាបបើធៀបនឹងមជ្ឈមណ្ឌលពិភពលោកផ្សេងទៀត»។

លោកបន្ថែមថា៖ «លទ្ធផលសុទ្ធ (Net result) នៃការជួលនេះគឺថា យើងកំពុងមើលឃើញការកើនឡើងនៅក្នុងវិស័យជាច្រើន ដែលរួមទាំងកំណើនគួរឲ្យកត់សម្គាល់លើតម្រូវការមកពីវិស័យបច្ចេកវិទ្យាផងដែរ»។

របាយការណ៍របស់ក្រុមហ៊ុន JLL ប្រើប្រាស់ទិន្នន័យស្ដីពីការជួលដែលសម្រេចបាននៅក្នុងអគារគុណភាពខ្ពស់បំផុតក្នុងសង្កាត់ការិយាល័យដ៏សំខាន់នៅក្នុងទីក្រុងនានា។

របាយការណ៍នេះរួមបញ្ចូលធាតុសំខាន់ៗនៃការចំណាយលើការកាន់កាប់ (occupancy cost) ពោលគឺជាថ្លៃជួលប្រកបដោយប្រសិទ្ធភាពសុទ្ធ (net effective rent) ការគិតថ្លៃសេវា និងពន្ធអចលនទ្រព្យ ដែលទាំងអស់នេះ ត្រូវបានធ្វើឲ្យមានលក្ខណៈស្ដង់ដារ ដើម្បីអាចឲ្យមានការប្រៀបធៀបជាលក្ខណៈអន្តរជាតិ។

ក្នុងរយៈពេលប៉ុន្មានខែថ្មីៗនេះ ក្រុមហ៊ុនអន្តរជាតិជាច្រើនបានប្រកាសផែនការបង្កើតការិយាល័យកណ្ដាលប្រចាំតំបន់នៅក្នុងប្រទេស សិង្ហបុរី ដែលរួមទាំងក្រុមហ៊ុន Guardant Health ដែលជាក្រុមហ៊ុនបច្ចេកវិទ្យាវេជ្ជសាស្ដ្រចុះបញ្ជីនៅផ្សារហ៊ុន Nasdaq និងក្រុមហ៊ុន Engie ដែលជាក្រុមហ៊ុនថាមពលរបស់ប្រទេស បារាំង។

លោក Paul Maguire ប្រធានប្រតិបត្តិប្រចាំតំបន់អាស៊ី និងប៉ាស៊ីហ្វិកការរបស់ក្រុមហ៊ុន Engie បានឲ្យដឹងកាលពីខែតុលាថា សិង្ហបុរីគឺជាជម្រើសពីធម្មជាតិមួយសម្រាប់ក្រុមហ៊ុន Engie ដោយសារតែអតិថិជនជាច្រើនរបស់ខ្លួនមានមូលដ្ឋាននៅទីនេះ។ លោកបានលើកឡើងពីចក្ខុវិស័យប្រទេសវៃឆ្លាត (Smart Nation) និងភាពជាអ្នកដឹកនាំខាងនវានុវត្តន៍ និងចីរភាពរបស់សិង្ហបុរី។

ទោះជាយ៉ាងណា ក្រុមហ៊ុន JLL បានឲ្យដឹងថា ក្រុមហ៊ុនដែលផ្តល់សេវាក្នុងវិស័យធនាគារ និងហិរញ្ញវត្ថុ គឺនៅតែជាក្រុមហ៊ុនជួលឈានមុខគេនូវទីតាំងការិយាល័យតម្លៃខ្ពស់លើពិភពលោក។

តម្រូវការជួលការិយាល័យនៅតែរឹងមាំក្នុងប្រទេស សិង្ហបុរី។ សន្ទស្សន៍ជួលការិយាល័យសម្រាប់តំបន់ផ្នែកកណ្ដាលបានកើន ២,៥ ភាគរយក្នុងពេល ៣ ខែគិតត្រឹមថ្ងៃទី ៣០ ខែកញ្ញាធៀបនឹងត្រីមាសទី ២ ដោយពឹងផ្អែកលើទិន្នន័យបានពីអាជ្ញាធរអភិវឌ្ឍន៍នៅទីក្រុងឡើងវិញ (URA)។

យោងតាមទីភ្នាក់ងារព័ត៌មាន Blo-omberg ដែលបានរាយការណ៍នៅពេលថ្មីៗ ក្រុមហ៊ុន Cushman & Wakefield ដែលជាក្រុមហ៊ុនផ្តល់សេវាអចលនទ្រព្យរបស់អាមេរិក រំពឹងថា ការជួលការិយាល័យកម្រិត A នៅក្នុងប្រទេស សិង្ហបុរី នឹងកើនឡើងចំនួន ១១ ភាគរយនៅឆ្នាំនេះ និង ៩ ភាគរយនៅឆ្នាំក្រោយ៕ ANN/LA

សិង្ហបុរី ជាប់ចំណាត់ថ្នាក់ទី ១០ នៃទីតាំងការិយាល័យតម្លៃខ្ពស់

ព័ត៌មានថ្មីៗ

វីដេអូ

សិង្ហបុរី ជាប់​ចំណាត់​ថ្នាក់​ទី ១០ ​នៃ​ទីតាំង​ការិយា​ល័យ​តម្លៃ​ខ្ពស់​

ប៉ុស្តិ៍ អចលនទ្រព្យ

ព័ត៌មានថ្មីៗ

វីដេអូ

សិង្ហបុរី ជាប់ចំណាត់ថ្នាក់ទី ១០ នៃទីតាំងការិយាល័យតម្លៃខ្ពស់