The Phnom Penh Post Search

Search form




Logo of Phnom Penh Post newspaper Phnom Penh Post - សេវាកក់បន្ទប់ អនឡាញ ទាញប្រយោជន៍ពីភាពប្រហោងផ្នែកច្បាប់

សេវាកក់បន្ទប់ អនឡាញ ទាញប្រយោជន៍ពីភាពប្រហោងផ្នែកច្បាប់

Content image - Phnom Penh Post
ទិដ្ឋភាព​អគារ​ខុនដូ និង​អគារ​ការិយាល័យ​ក្នុងទីក្រុង បាងកក ប្រទេស ​ថៃ។ រូបថត AFP

សេវាកក់បន្ទប់ អនឡាញ ទាញប្រយោជន៍ពីភាពប្រហោងផ្នែកច្បាប់

ក្រុងបាងកកៈ ភាពចន្លោះប្រហោងផ្នែកច្បាប់ និងបទប្បញ្ញត្តិធូររលុងនៃអាជីវកម្មសណ្ឋាគារ បានធ្វើឲ្យមានការកើនឡើងប្រតិបត្តិករសណ្ឋាគារដែលមិនចុះបញ្ជី និងភ្ញៀវដែលមិនចុះឈ្មោះជាច្រើនក្នុងតំបន់ទិសដៅទេសចរណ៍សំខាន់ៗក្នុងប្រទេសថៃ។ នេះបើយោងតាមមន្រ្តីរដ្ឋាភិបាល និងមន្រ្តីវិស័យឯកជន។

ជាងនេះទៀត វិស័យកក់កន្លែងស្នាក់នៅតាមអនឡាញដែលមានប្រជាប្រិយភាពខ្លាំង បានជំរុញឲ្យម្ចាស់អចលនទ្រព្យ អ្នកប្រើប្រាស់ និងអ្នកដើរលេងជំនាន់ថ្មីប្រើប្រាស់កម្មវិធីអនឡាញ និងកម្មវិធីទូរស័ព្ទដើម្បីជួល ឬកក់បន្ទប់សម្រាប់ការសម្រាកដើរលេង និងទម្រង់ដទៃៗទៀតនៃការស្នាក់នៅ។

លោកស្រី Supawan Tanomkieatipume ប្រធានសមាគមសណ្ឋាគារថៃ បានឲ្យដឹងកាលពីសប្តាហ៍មុនថា វិស័យកក់តាមអនឡាញមិនអាចបញ្ឈប់បានទេ ដោយសារអ្នកប្រើប្រាស់កាន់តែច្រើនឡើងៗចូលចិត្តប្រើកម្មវិធីទាំងនេះជាងសេវារបស់សណ្ឋាគារបែបប្រពៃណី។

ទោះយ៉ាងណាក្តី លោកស្រីថ្លែងថា ប្រតិបត្តិករសណ្ឋាគារជាច្រើនក៏បានប្រើប្រាស់បច្ចេកវិទ្យាថ្មីនេះផងដែរ ដើម្បីសម្របសម្រួលទៅតាមការផ្លាស់ប្តូរឥរិយាបថរបស់អ្នកប្រើប្រាស់។ លោកស្រី Supawan បានថ្លែងថា៖ «យើងមិនមែនរើសអើងសេវាកក់តាមអនឡាញ និងកម្មវិធីដទៃៗទៀតទេ ប៉ុន្តែយើងសង្ឃឹមថា ភាគីទាំងអស់ដែលពាក់ព័ន្ធនឹងគោរពច្បាប់»។

លោកស្រីបានថ្លែងថា រដ្ឋាភិបាលត្រូវធានាថា ម្ចាស់កន្លែងស្នាក់នៅនឹងចុះឈ្មោះភ្ញៀវរបស់ពួកគេឲ្យបានត្រឹមត្រូវ និងគោរពទៅតាមបទប្បញ្ញត្តិផ្សេងៗស្តីពីសុវត្ថិភាព ព្រមទាំងបញ្ជូនអត្តសញ្ញាណភ្ញៀវទៅអាជ្ញាធរអន្តោប្រវេសន៍។ ជាងនេះទៀត ពួកគេត្រូវបង់ពន្ធនៅតាមមូលដ្ឋាន និងពន្ធដទៃៗទៀតដូចដែលប្រតិបត្តិករសណ្ឋាគារដែលមានអាជ្ញាប័ណ្ណបង់ដែរ។

រហូតមកដល់ពេលនេះ រដ្ឋាភិបាលមានភាពធូររលុងក្នុងការអនុវត្តបទប្បញ្ញត្តិទាំងនេះ ខណៈចំនួនខុនដូនិងកន្លែងស្នាក់នៅដែលជាកម្មសិទ្ធិឯកជនដទៃៗទៀតដែលបម្រើភ្ញៀវទេសចរ និងភ្ញៀវដទៃៗទៀត បន្តកើនឡើងខ្លាំង។

បច្ចុប្បន្ននេះ ក្រសួងមហាផ្ទៃថៃ និងទីភ្នាក់ងាររដ្ឋាភិបាលមូលដ្ឋានមានសមត្ថកិច្ចទៅលើប្រតិបត្តិករសណ្ឋាគារ និងប្រតិបត្តិករទីតាំងជួលស្នាក់នៅដទៃៗទៀត។

លោក Weerasak Kowsurat រដ្ឋមន្រ្តីក្រសួងទេសចរណ៍ និងកីឡាថៃបានថ្លែងថា ច្បាប់សណ្ឋាគារថៃបច្ចុប្បន្នអនុញ្ញាតឲ្យម្ចាស់អចលនទ្រព្យជួលបន្ទប់យ៉ាងច្រើនបំផុត៤ដែលអាចឲ្យភ្ញៀវស្នាក់នៅយ៉ាងច្រើនបំផុត ២០ នាក់។ ពួកគេអាចប្រតិបត្តិ ការដូចសណ្ឋាគារឬអ្នកផ្តល់កន្លែងស្នាក់ដទៃៗទៀតដោយមិនចាំបាច់ចុះបញ្ជីជាប្រតិបត្តិករ។

ការណ៍នេះត្រូវបានមើលឃើញថាជាភាពចន្លោះប្រហោងនៃច្បាប់ ហើយបាននាំឲ្យមានការកើនឡើងយ៉ាងលឿននូវចំនួនខុនដូ និងអាផាតមិនដែលជួលទៅឲ្យភ្ញៀវទេសចរ ជាពិសេសក្នុងទីក្រុងបាងកក និងនៅទិសដៅទេសចរណ៍ដែលមានប្រជាប្រិយភាពដទៃៗទៀត ខណៈការកក់តាមអនឡាញ និងកម្មវិធីកក់តាមអនឡាញ ដូចជា Airbnb, Booking.com និង Agoda មានការរីកចម្រើនយ៉ាងខ្លាំង។

តំណាងរបស់ក្រុមហ៊ុន Airbnb និងក្រុមហ៊ុន Booking.com មិនអាចទាក់ទងសុំអត្ថាធិប្បាយបាន។

ក្រុមអ្នករិះគន់បាននិយាយថា ប្រតិបត្តិករកន្លែងស្នាក់នៅដែលគ្មានការ គ្រប់គ្រង បានរួមចំណែកដល់ការកើនឡើងនៃចំនួនអ្នកស្នាក់នៅហួសទិដ្ឋាការ និងឧក្រិដ្ឋជនឆ្លងដែនដែលប្រើប្រទេសនេះជាកន្លែងលាក់ខ្លួន។

បើយោងតាមលោកស្រី Supawan ប្រទេស ថៃ មានបន្ទប់សណ្ឋាគារដែលមានអាជ្ញាប័ណ្ណប្រហែលពី ៣ ទៅ ៤ សែនបន្ទប់ ប៉ុន្តែចំនួនជាក់ស្តែង នៃបន្ទប់សណ្ឋាគារ និងទីតាំងជួលដទៃទៀត ត្រូវបានគេគិតថាមានចំនួនទ្វេដងនៃតួលេខទាំងនេះ។

លោកស្រី Supawan បានថ្លែងថា ចំនួនសណ្ឋាគារ និងកន្លែងស្នាក់នៅជាច្រើន មិនបានចុះបញ្ជី និងមិនបានបង់ពន្ធត្រឹមត្រូវ។

ការណ៍នេះបានប៉ះពាល់ជាអវិជ្ជមានលើម្ចាស់សណ្ឋាគារដែលគោរពច្បាប់ ដោយសារតែការប្រកួតប្រជែងមិនស្មើភាពដែលកាន់តែរីករាលដាល។ លោកស្រីថ្លែងថា៖ «យើងបានរាយការណ៍ស្ថានភាពនេះទៅរដ្ឋាភិបាលដែលកំពុងបាត់បង់ចំណូលពន្ធជា ច្រើនពីសណ្ឋាគារនិងកន្លែងស្នាក់នៅដែលមិនចុះបញ្ជីទាំងនេះ»។

ចំពោះវិស័យកក់តាមអនឡាញវិញ លោករដ្ឋមន្ត្រី Weerasak បានថ្លែងថា និន្នាការកើនឡើងយ៉ាងលឿនក្នុងចំណោមភ្ញៀវទេសចរដែលប្រើប្រាស់កម្មវិធីតាមអនឡាញដូចជា Airbnb សម្រាប់ការកក់កន្លែងស្នាក់នៅ បង្កឲ្យមានផលវិបាកជាច្រើន។ លោកក៏ទទួលស្គាល់ពីភាពចន្លោះប្រហោងផ្នែកច្បាប់នេះផងដែរ៕ ANN/PS

អត្ថបទគួរចាប់អារម្មណ៍

  • អាមេរិក​ផ្តល់​ជំនួយ ​៤២ ​ម៉ឺន​ដុល្លារ​ទៀត ​ដើម្បី​ស្រាវជ្រាវ​សំណល់​គ្រាប់​បែក​ចង្កោម

    ភ្នំពេញៈ រដ្ឋាភិបាល​អាមេរិក​បាន​សម្រេច​ផ្ដល់​ជំនួយ​ជាង​ ៤២​ ម៉ឺន​ដុល្លារ​បន្ថែម​ទៀត ដល់​មជ្ឈមណ្ឌល​កំចាត់​មីន​កម្ពុជា ហៅ​កាត់​ថា CMAC ដើម្បី​ស្រាវជ្រាវ​​សំណល់​គ្រាប់​បែក​ចង្កោម​ដែល​

  • ប្រាក់ចំណេញ​សុទ្ធ Qantas ធ្លាក់ ៦,៥ ​ភាគរយ

    ក្រុងស៊ីដនីៈ ក្រុមហ៊ុន​អាកាសចរណ៍ Qantas Airways កាលពី​ថ្ងៃ​ព្រហស្បតិ៍​បាន​ចេញ​ផ្សាយ​ការធ្លាក់ចុះ​ប្រាក់​ចំណេញ​សុទ្ធ​ប្រចាំ​ឆ្នាំ ៦,៥ ភាគរយ ដោយសារ​ការធ្លាក់ចុះ​ប្រាក់​ចំណេញ​ក្នុង​គ្រា​ដែល​ប្រេង​ឆៅ​មាន​តម្លៃ​កាន់តែ​ខ្ពស់ និង​ការធ្លាក់​ថ្លៃ​ប្រាក់​ដុល្លារ​អូស្ត្រាលី​កាន់តែ​ខ្លាំង​។

  • តោខៀវ​ឲ្យ Roma ខ្ចី​ជើង​ខ្សែការពារ Zappacosta

    ក្រុងមីឡានៈ ក្លិប Roma បានប្រកាស​កាលពី​ថ្ងៃ​ពុធ​ថា ខ្សែការពារ Davide Zappacosta នៅ​ក្លិប Chelsea បាន​ចូលរួម​ក្លិប Roma ក្នុង​លក្ខខណ្ឌ​ខ្ចី​ជើង ៦ ​ខែ ប៉ុន្តែ​អាច​បន្ត​រហូតដល់​ចុងរដូវកាល​នេះ​ក៏បាន​ដែរ​។ ​

  • កូរ៉េ​ខាងជើង​មិន​ចរចា​ពី​បញ្ហា​នុយក្លេអ៊ែរ​ទេ បើសិន​ US ​នៅតែ​បន្ត​វិធានការ​យោធា​បង្ក​អារិភាព​នោះ

    ក្រុងសេអ៊ូលៈ កូរ៉េ​ខាងជើង​បាន​ថ្លែង​កាលពី​ថ្ងៃ​ព្រហស្បតិ៍​ថា​ខ្លួន​ «​មិន​ចាប់អារម្មណ៍​» ​នៅក្នុង​ការចរចា​នោះទេ លុះណា​តែ​ក្រុង​វ៉ាស៊ីនតោន​ឈប់​ «​វិធានការ​យោធា​បង្ក​អរិភាព​កាន់តែ​ខ្លាំង​ឡើង​ជាមួយ​ខ្លួន​នោះ​» ខណៈ​ប្រេសិត​ពិសេស​ជាន់ខ្ពស់​អាមេរិក​ម្នាក់​បាន​ទស្សនកិច្ច​ទៅកាន់​ក្រុង​សេអ៊ូល​ដោយ​ផ្តោត​ទៅ​លើ​ការធ្វើឲ្យ​កិច្ចចរចា​ពី​បញ្ហា​នុយក្លេអ៊ែរ​ជាមួយ​ក្រុង​ព្យុងយ៉ាង ដំណើរការ​ឡើងវិញ​។