.jpg)
ទីតាំងនៃគម្រោង Sina Plaza ដែលមិនទាន់មានការសាងសង់អ្វីជាដុំកំភួន។ ស្រេង ម៉េងស្រ៊ុន
នៅពេលនិយាយពីការបោះឆ្នោតជាតិនាពេលខាងមុខលទ្ធផលនៃការបោះឆ្នោតនេះហាក់មិនមានអ្វីប្រែប្រួលទេ ហើយស្ថិរភាពនយោបាយ និងសេដ្ឋកិច្ចកម្ពុជាក៏នឹងនៅតែបន្តដើរទៅមុខដោយឡែកបើក្រឡេកមើលទៅក្នុងវិស័យសំណង់វិញមានគម្រោងអគារធំៗជាច្រើនបាននិងកំពុងកែតម្រូវប្លង់ ឬការឌីហ្សាញ និងផ្លាស់ប្តូរកាលបរិច្ឆេទការចាប់ផ្តើមការសាងសង់ គឺវាហាក់ដូចជាការទន្ទឹងរង់ចាំមើលលទ្ធផលនៃការបោះឆ្នោតដែរ។
នាយិកាក្រុមហ៊ុន CBRE Cambodia អ្នកនាង អាន សុធីតា បាននិយាយថា គម្រោងនីមួយៗមានរឿងខុសៗគ្នាប៉ុន្តែការពន្យារពេល ឬមិនពន្យារពេលក្នុងការសាងសង់អាចមិនមែនដោយសារការបោះឆ្នោតនោះទេ ព្រោះការបោះឆ្នោតនាពេលខាងមុខហាក់គ្មានអ្វីគួរឲ្យបារម្ភឡើយ។ អ្នកនាងបន្តថាអ្វីដែលអ្នកអភិវឌ្ឍន៍បារម្ភអាចបណ្តាលមកពីពួកគេគិតពីភាពជោគជ័យក្នុងការលក់ដោយសារភាពប្រកួតប្រជែងកំពុងកើនឡើងខ្ពស់នាពេលនេះ។
«បញ្ហាទីផ្សារអាចជារឿងដែលអ្នកវិនិយោគបារម្ភជាងគេ ប៉ុន្តែការពន្យារពេលសាងសង់នូវគម្រោងមួយចំនួនក៏អាចបណ្តាលមកពីមានហេតុផលផ្ទៃក្នុងក្រុមហ៊ុនផងដែរតែគេមិនបានប្រកាសឲ្យដឹង»។ នេះបើតាមប្រសាសន៍របស់អ្នកនាង សុធីតា។ «អ្នកវិនិយោគខ្លះក៏អាចនឹងកំពុងស្វែងរក (វិធីសាស្ត្រ ឬភាពទាក់ទាញ) ថ្មីសម្រាប់វិនិយោគផងដែរ»។
បច្ចុប្បន្នគម្រោង Sina Plaza ដែលស្ថិតនៅទល់មុខការិយាល័យលក់នៃគម្រោង Olympia City ក្នុងសង្កាត់វាលវង់ ខណ្ឌ ៧ មករា និងគម្រោង Kowloon Bay ដែលបានបុកគ្រឹះមួយរយៈរួចមកហើយនោះពេលនេះគម្រោងទាំង ២ នេះនៅស្ងៀមស្ងាត់ដូចគ្នា។ ចំណែកគម្រោង The Glory ដែលមានកម្ពស់ ៧៨ ជាន់ស្ថិតនៅខាងក្រោយនៃគម្រោង The Bridge ក៏គ្រោងនឹងចាប់ផ្តើមសាងសង់នៅពេលឆាប់ៗនេះផងដែរ។
លោក ផូ ប៊ីលសម្បត្តិ តំណាងក្រុមហ៊ុនយានឆ័ងដែលមានមូលដ្ឋាននៅប្រទេសចិន ហើយគម្រោងនឹងសាងសង់អគារ The Glory មិនលើកទូរស័ព្ទទេនៅអំឡុងដើមសប្តាហ៍នេះ។
ប៉ុន្តែកាលពីពេលកន្លងមក លោក ប៊ីលសម្បត្តិ ធ្លាប់បានថ្លែងថា គម្រោងនេះមិនបានពន្យារពេលសាងសង់នោះទេហើយក្រុមហ៊ុនក៏មិនដែលបានប្រកាសពីកាលបរិច្ឆេទសាងសង់ជាក់លាក់នោះទេ។ បច្ចុប្បន្នក្រុមហ៊ុនកំពុងឌីហ្សាញប្លង់អគារឡើងវិញដោយសារវាជាអគារខ្ពស់ហេតុនេះបច្ចេកទេសសំណង់ជារឿងត្រូវយកចិត្តទុកដាក់ដើម្បីធានាការសាងសង់ដោយរលូន និងទទួលបានជោគជ័យ។
ទីស្នាក់ការលក់នៃគម្រោង Kowloon Bay ដែលស្ថិតនៅតាមបណ្តោយផ្លូវសុធារស។ ផា លីណា
អគ្គនាយកក្រុមហ៊ុន Century21 Mekong លោក ច្រឹក សុខនីម បានថ្លែងថា ទីផ្សារខុនដូវាហាក់ក្មេងខ្ចីនៅឡើយនៅក្នុងទីផ្សារកម្ពុជាហេតុនេះអ្វីដែលអ្នកអភិវឌ្ឍន៍ត្រូវធ្វើគឺគួរសិក្សាពីទីផ្សារ និងតម្រូវការឱ្យបានច្បាស់លាស់សិនចាំធ្វើការអភិវឌ្ឍខណៈសញ្ញានៃការផ្គត់ផ្គង់នាពេលនេះហាក់កើនលើសពីតម្រូវការទន្ទឹមនឹងនេះការប្រកួតប្រជែងក្នុងទីផ្សារក៏កើនឡើងខ្លាំងទៀតផង។
ទាក់ទងទៅនឹងការបោះឆ្នោតនៅកម្ពុជាទាំងអ្នកវិនិយោគ និងអតិថិជនសុទ្ធតែយល់ដឹង និងមានបទពិសោធតាមរយៈការបោះឆ្នោតពីលើកមុនៗរួមទាំងពេលខាងមុខនេះដែរ «រឿងសាមញ្ញគឺអ្នកលក់ និងអ្នកទិញពួកគេនៅបន្តអាចលក់ និងទិញអ្វីៗតាមតម្រូវការរបស់ពួកគេជាធម្មតាទេ»។ នេះបើតាមប្រសាសន៍របស់លោក សុខនីម។ «ក្នុងស្ថានភាពបច្ចុប្បន្នទាល់តែអ្នកអភិវឌ្ឍន៍មានអតិថិជនក្នុងដៃស្រាប់ និងមានការសិក្សាពីទីផ្សារច្បាស់លាស់សិនចាំធ្វើការវិនិយោគបានវាប្រសើរបើមិនដូច្នេះវាអាចនឹងមានបញ្ហាដែរ»។
ក្រឡេកមើលតាមផែនការរបស់ក្រុមហ៊ុន WorldBridge Group ក្រុមហ៊ុននេះនឹងសាងសង់អគារមជ្ឈមណ្ឌលពាណិជ្ជកម្ម និងលំនៅឋានដែលមានឈ្មោះថា Kowloon Bay Twin Towers កម្ពស់ ៥៩ ជាន់ស្ថិតនៅតាមបណ្តោយផ្លូវសុធារសប៉ែកខាងត្បូងផ្សារទំនើប Aeon Mall នៅចុងឆ្នាំ ២០១៨ នេះ។
លោកឧកញ៉ា សៀ រិទ្ធី អគ្គនាយកក្រុមហ៊ុន WorldBridge Group បានថ្លែងឲ្យដឹងតាមទូរស័ព្ទកាលពីថ្ងៃចន្ទថាអ្នកសាងសង់ខុនដូនៅកម្ពុជាភាគច្រើនបានផ្តោតលើអតិថិជនជាជនបរទេស ប៉ុន្តែគម្រោងរបស់លោកគឺចាប់ផ្តើមជាមួយនិងការគិតគូរជាចម្បងលើអតិថិជនជនជាតិខ្មែរ។
លោកបន្តថាគម្រោង Kowloon Bay Twin Towers នៅពេលនេះកំពុងស្ថិតក្នុងការរៀបចំកែសម្រួលឌីហ្សាញឡើងវិញព្រោះការឌីហ្សាញលើកមុនមិនសូវស័ក្តិសមទាក់ទាញចំណាប់អារម្មណ៍ និងដើម្បីធ្វើឲ្យប្រាកដថាគម្រោងនេះក្លាយជាចំណុចកត់សម្គាល់ថ្មីមួយហើយគម្រោងនេះបានបង្រួមមកនៅត្រឹមកម្ពស់ ៥៩ ជាន់វិញបន្ទាប់ពីការដាក់ពាក្យស្នើសុំច្បាប់សាងសង់ទៅក្រសួងរៀបចំដែនដីនគរូបនីយកម្ម និងសំណង់ជាផ្លូវការមានកម្ពស់ ៦១ ជាន់នោះ។
ទីតាំងនៃការដ្ឋានរបស់គម្រោង Kowloon Bay។ផា លីណា
លោកមានប្រសាសន៍ថា៖ «បច្ចុប្បន្នគម្រោងនេះបានបញ្ចប់ការបុកគ្រឹះហើយហើយគ្រោងនឹងចាប់ផ្តើមសាងសង់នៅចុងឆ្នាំ ២០១៨ ខាងមុខនេះគឺបន្ទាប់ពី (ការកែសម្រួល) ឌីហ្សាញឡើងវិញចប់រួចរាល់»។ លោកបន្តថា៖ «ខ្ញុំនៅតែមានជំនឿចិត្តចរិតរបស់ខ្ញុំគឺបើមិនជឿជាក់គឺខ្ញុំនឹងមិនធ្វើនោះទេ»។
អ្នកស្រី Grace Rachny Fong នាយិកាគ្រប់គ្រងក្រុមហ៊ុន Century21 Cambodia បានថ្លែងថា៖ «បច្ចុប្បន្នប្រជាជនដូចជាពុំដែលគិតអំពីបញ្ហាអវិជ្ជមានកើតឡើងពីការបោះឆ្នោតខាងមុខនេះទេ»។
«សម្រាប់អ្នកទិញគិតគូរតែអំពីផលិតផលល្អ (ផ្ទះ) ខណៈអ្នកអភិវឌ្ឍន៍ចាប់ផ្តើមគិតគូរកាន់តែខ្លាំងអំពីការឌីហ្សាញទំហំគុណភាពខ្ពស់ (រាល់យូនីត) និងកាលបរិច្ឆេទ (បញ្ចប់ការសាងសង់)»។ នេះបើតាមប្រសាសន៍របស់អ្នកស្រីRachny Fong។ នាពេលខាងមុខឆាប់នេះ «នឹងមានគម្រោងធំៗមួយចំនួនទៀតនឹងចាប់ផ្តើមការដ្ឋានសាងសង់របស់ពួកគេនៅក្នុងអំឡុងត្រីមាសទី ១ ឆ្នាំ ២០១៨ នេះ»។
តាមការសិក្សារបស់ក្រុមហ៊ុន Vtrust Appraisal បានចេញផ្សាយកាលពីពេលថ្មីៗនេះបានរកឃើញថា គិតត្រឹមដំណាច់ឆ្នាំ ២០១៧ កម្ពុជាមានខុនដូសរុបចំនួន ៦១១៩៩ យូនីតក្នុងនោះ ៤១៧០ យូនីតនៅក្នុងខេត្តព្រះសីហនុ និងខេត្តកណ្តាលមានចំនួន ១៥០៣ យូនីត៕
